Hesus Tabata Tristu i A Hasi Orashon

Hesus a kaba di hasi orashon ku su fiel apòstelnan. Despues ku nan a “kanta kantika di alabansa, nan a sali bai Seru di Oleifi.” (Marko 14:26) Nan a kue direkshon ost, rumbo pa Hòfi di Getsémani, kaminda Hesus tabatin kustumber di bai.

Ora nan a yega e lugá bunita akí, ku tabata yen di palu di oleifi, Hesus a bisa ocho di su apòstelnan: “Sinta akinan miéntras ku mi ta bai aya banda pa hasi orashon.” Probablemente, nan a keda warda na entrada di e hòfi. Anto Hesus a bai mas paden ku tres di su apòstelnan, esta, Pedro, Santiago i Huan. Hesus tabata sumamente preokupá. El a bisa e tres apòstelnan: “Mi alma ta masha tristu mes, kasi pa muri. Keda akinan i keda lantá huntu ku mi.”—Mateo 26:36-38.

Anto e mes a bai un poko mas leu i a ‘hinka rudia i kuminsá hasi orashon.’ Tokante kiko Hesus tabata hasi orashon na e momento difísil akí? El a bisa su Tata: “Tata, tur kos ta posibel pa bo; kita e kopa akí for di mi. Sinembargo, no loke ami ke, sino loke abo ke.” (Marko 14:35, 36) Kiko Hesus tabata ke men? Akaso e no kier a kumpli mas ku su papel komo Reskatador? Nò, esei no tabata e kaso!

Ora Hesus tabata den shelu, el a mira kon e romanonan tabata pone hende sufri i despues mata nan. P’esei awor, komo hende ku tabatin sintimentu i ku por a sinti doló, e no tabata muchu ansioso pa enfrentá e kosnan ku tabata sper’é. Pero loke tabata preokup’é realmente tabata e echo ku su morto komo un kriminal despresiabel lo por a trese reproche riba nòmber di su Tata. Denter di algun ora, lo el a ser kologá na staka komo si fuera e tabata un blasfemadó.

Despues di a hasi orashon pa basta ratu, Hesus a bai serka e tres apòstelnan i a haña nan drumí. El a bisa Pedro: “Boso no por a keda ni sikiera un ratu lantá huntu ku mi? Keda vigilá i hasi orashon kontinuamente pa boso no kai den tentashon.” Tabata lat i Hesus a komprondé ku su apòstelnan tambe tabata bou di strès. P’esei, el a bisa nan: “Ta klaru ku e spiritu tin e boluntat, ma e karni ta débil.”—Mateo 26:40, 41.

Anto Hesus a bai pa di dos biaha i a bolbe pidi Dios pa kita “e kopa” for di dje. Ora el a regresá, el a bolbe haña e apòstelnan drumí, siendo ku nan mester tabata hasiendo orashon pa nan no kai den tentashon. El a papia ku nan, pero nan “no tabata sa kiko pa kontest’é.” (Marko 14:40) Hesus a bai pa un di tres biaha i a kai na rudia i hasi orashon.

Hesus tabata masha preokupá pa motibu di e reproche ku su morto komo un kriminal lo a trese riba nòmber di su Tata. Yehova a skucha orashon di su Yu i a manda un angel pa fortales’é. Pero Hesus no a stòp di supliká su Tata; el a “sigui hasi orashon ku mas fervor.” E tabata bou di hopi tenshon. E tabatin un responsabilidat pisá riba su skouder! Su speransa pa bida eterno i e speransa di tur hende obediente tabata den wega. Asta su “sodó a bira manera gota di sanger ku tabata kai na suela.”—Lukas 22:44.

Ora Hesus a bai pa di tres biaha serka su apòstelnan, el a bolbe haña nan drumí. El a bisa nan: “Na un momento asin’akí boso ta drumi i sosegá? Wak! A yega e ora pa e Yu di hende keda entregá den man di pekadó. Lanta ariba; laga nos ban. Esun ku ta traishoná mi a yega!”—Mateo 26:45, 46.