Organisá pa Hasi Boluntat di Yehova

RÒNT mundu tin hopi organisashon religioso, polítiko, komersial i sosial. Kada un tin nan propio karakterístika-, meta-, idea- i filosofianan. Pero tin un organisashon ku ta totalmente diferente for di tur otro. Esei ta e organisashon di Testigunan di Yehova; e ta diferente pasobra tur loke e ta hasi ta basá riba prinsipio di Beibel.

² Bo tin e privilegio di forma parti di e organisashon di Yehova. I awor ku bo a komprobá pa bo mes kiko ta boluntat di Dios, bo ta biba di akuerdo ku esei. (Sal. 143:10; Rom. 12:2) Komo un sirbidó aktivo di Dios, bo ta forma parti di un hermandat mundial amoroso. (2 Kor. 6:4; 1 Ped. 2:17; 5:9) I manera e Palabra di Dios ta primintí, esaki ta trese hopi bendishon i felisidat. (Pro. 10:22; Mar. 10:30) Ademas, ora bo ta hasi boluntat di Yehova fielmente, bo ta preparando pa un futuro duradero i glorioso.—1 Tim. 6:18, 19; 1 Huan 2:17.

³ Nos Magnífiko Kreador tin un organisashon úniko ku ta ser dirigí den forma teokrátiko. Esaki ta nifiká ku Yehova, komo outoridat máksimo, ta esun ku ta dirigí e organisashon ei, i nos tin pleno konfiansa den dje. E ta nos Hues, nos Dunadó di Lei i nos Rei. (Isa. 33:22) Komo un Dios di òrdu, el a perkurá vários manera pa nos por ‘kolaborá kuné’ pa kumpli ku su propósito.—2 Kor. 6:1, 2.

⁴ Segun ku fin di e mundu akí ta yega serka, nos ta sigui padilanti bou di guia di e Rei nombrá, Kristu Hesus. (Isa. 55:4; Rev. 6:2; 11:15) Hesus a profetisá ku su siguidónan lo hasi obra mas grandi ku esnan ku el a hasi durante su sirbishi riba tera. (Huan 14:12) El a bisa asina pasobra nan lo a oumentá den kantidat i, pa un periodo mas largu, nan lo a prediká den mas teritorio kuné. Nan lo a proklamá e bon notisia di Reino te na e partinan mas leu di tera.—Mat. 24:14; 28:19, 20; Echo. 1:8.

⁵ Esaki ta algu ku ya ta tumando lugá. Sinembargo, manera Hesus a deklará bon kla, e trabou di prediká e bon notisia lo terminá na e tempu ku Yehova a stipulá. Segun e profesianan den Dios su Palabra, tur kos ta indiká ku Yehova su dia grandi i temibel ta serka.—Yoèl 2:31; Sof. 1:14-18; 2:2, 3; 1 Ped. 4:7.

⁶ Ya ku nos ta komprondé klaramente kiko ta boluntat di Yehova den e último dianan akí, nos tin ku hasi mas esfuerso pa kumpli ku loke Dios ke pa nos hasi. Anto pa logra esei, nos mester sa bon kon e organisashon di Dios ta funshoná i kooperá plenamente kuné. E manera ku e organisashon ta funshoná ta basá riba e Palabra inspirá di Dios ku ta kontené su prinsipio-, mandamentu-, òrdu-, regla- i siñansanan.—Sal. 19:7-9.

⁷ Ora Yehova su sirbidónan ta pega na guia ku ta basá riba Beibel, nan ta biba i traha huntu pa mantené pas i union. (Sal. 133:1; Isa. 60:17; Rom. 14:19) Kiko ta fortalesé e lasonan di amistat ku tin entre nos rumannan rònt mundu? Esei ta amor. Tur loke nos hasi ta motivá pa amor i nos ta trata otro ku amor. (Huan 13:34, 35; Kol. 3:14) Ta asina Yehova ke pa nos hasi i ta di e manera ei nos por kana pareu ku e parti selestial di su organisashon.

E PARTI SELESTIAL DI E ORGANISASHON DI YEHOVA

⁸ E profetanan Isaías, Ezekiel i Daniel a haña algun vishon di e parti selestial di e organisashon di Yehova. (Isa., kap. 6; Eze., kap. 1; Dan. 7:9, 10) Apòstel Huan tambe a haña un vishon di e organisashon selestial akí i a duna nos un bista di dje den e buki di Revelashon. El a mira Yehova riba un trono glorioso i huntu kuné tabatin angel ku tabata proklamá: “Santu, santu, santu ta Yehova Dios, e Todopoderoso, Esun ku tabata, ku ta i ku ta bini.” (Rev. 4:8) Huan a mira tambe “un lamchi pará banda di e trono,” esta, Hesukristu, e Lamchi di Dios.—Rev. 5:6, 13, 14; Huan 1:29.

⁹ E vishon akí di Yehova sintá riba un trono ta indiká ku e ta Kabes di e organisashon ei. Promé Krónikanan 29:11 i 12 ta bisa relashoná ku Yehova i su posishon: “Di bo, o SEÑOR, ta e grandesa, e poder, e gloria, e viktoria i e mahestat, di bèrdat, tur loke ta den shelu i riba tera; e dominio ta di bo, o SEÑOR, i abo ta halsa bo mes komo kabes riba tur kos. Tantu rikesa komo onor ta bini for di bo, i bo ta reina riba tur kos, i den bo man tin poder i forsa; i ta den bo man pa engrandesé i pa fortalesé kada un.”

¹⁰ Komo kompañero di trabou di Yehova, Hesukristu ta okupá un puesto haltu den shelu, i el a risibí hopi outoridat. Sí, Dios “a someté tur kos bou di su pia i a hasié kabes riba tur kos ku tin di haber ku e kongregashon.” (Efe. 1:22) Apòstel Pablo a bisa di Hesus: “Dios a hals’é na un puesto mas haltu i bondadosamente a dun’é e nòmber ku ta riba tur otro nòmber, di manera ku den nòmber di Hesus tur rudia mester dobla—di esnan den shelu, di esnan riba tera i di esnan bou di tera—i tur lenga mester rekonosé públikamente ku Hesukristu ta Señor pa gloria di Dios, e Tata.” (Flp. 2:9-11) Pues, nos por tin pleno konfiansa den Hesukristu komo un lider hustu.

¹¹ Den un vishon, Profeta Daniel a mira e Ansiano di Dianan sintá riba Su trono i ‘míles i míles di angel tabata sirbié, i dies mil biaha dies mil tabata pará su dilanti.’ (Dan. 7:10) Beibel ta referí n’e ehérsito selestial di angel ei komo “spiritu pa sirbishi santu, mandá pa sirbi esnan ku lo risibí salbashon.” (Heb. 1:14) Tur e kriaturanan selestial akí ta organisá den puesto di outoridat den Dios su organisashon.—Kol. 1:16.

¹² Ora nos tuma tempu pa analisá e karakterístikanan di e parti selestial di e organisashon di Yehova, nos por komprondé Isaías su reakshon riba e vishon den kua el a mira Yehova “sintá riba un trono,” i e “serafinnan pará ariba di dje.” Isaías a bisa: “Ai di mi, pasobra mi ta ruiná! Pasobra mi ta un hòmber di lep impuru, i mi ta biba meimei di un pueblo di lep impuru; pasobra mi wowo a mira e Rei, e SEÑOR di ehérsitonan.” Sí, Isaías a keda babuká i a sinti su mes insignifikante ora el a komprondé kon inmenso e organisashon di Yehova ta. Ademas, e eksperensia akí a impreshon’é asina tantu ku ora a sali un invitashon spesial for di shelu pa proklamá Yehova su huisionan, Isaías a reakshoná mesora, bisando: “At’ami akí! Manda ami!”—Isa. 6:1-5, 8.

¹³ Ora nos siña konosé i balorá e organisashon di Yehova, nos lo sinti nos motivá pa reakshoná meskos ku Profeta Isaías. Segun ku e organisashon ta bai dilanti, nos tin ku hasi esfuerso pa kana pareu kuné. Nos tin ku demostrá nos konfiansa den e organisashon di Yehova awe.

E ORGANISASHON DI YEHOVA NO TA PARA KETU

¹⁴ Den kapítulo 1 di Ezekiel, e profeta ta mira Yehova ta kore un garoshi selestial enorme. E vehíkulo impreshonante ei ta representá e parti invisibel di e organisashon di Yehova. E ta kore e garoshi akí den e sentido ku e ta dirigié ku amor i ta us’é di akuerdo ku su boluntat.—Sal. 103:20.

¹⁵ Kada wil di e garoshi akí tin un otro wil den dje—un ku tin e mesun diameter kuné i ku ta pas presis den forma krusá den dje. Ta asina so e profeta por a bisa ku e wilnan ta “move den kualke di nan kuater direkshonnan.” (Eze. 1:17) E wilnan por kambia di direkshon instantáneamente. Sinembargo, esaki no ta nifiká ku e garoshi ta sin kontrol òf supervishon. Yehova no ta laga su organisashon bai pa loko den kualke direkshon. Ezekiel 1:20 ta bisa: “Kaminda ku e spiritu kier a bai, den e mesun direkshon ei nan tabata bai.” Pues, pa medio di su spiritu, Yehova ta pone su organisashon move den e direkshon ku e ta deseá. E pregunta ku nos tin ku hasi nos mes anto ta: ‘Mi ta kana pareu ku su organisashon?’

¹⁶ Pa nos por kana pareu ku e organisashon di Yehova, nos tin ku hasi mas ku djis asistí na reunion i partisipá den sirbishi di vèlt. Na promé lugá, nos tin ku progresá i krese den sentido spiritual. Nos ta “hasi sigur kiko ta e kosnan mas importante” i ta keda al dia ku e programa di alimentashon spiritual. (Flp. 1:10; 4:8, 9; Huan 17:3) Nos mester kòrda tambe ku kaminda tin organisashon, mester tin bon koordinashon i kooperashon. P’esei nos mester mira e importansia di hasi bon uso di e tempu, energia, talento- i rekursonan ku Yehova a konfia nos kuné pa nos por kumpli ku su trabou. Si nos ke kana pareu ku Yehova su garoshi selestial, nos mester biba na armonia ku e mensahe ku nos ta proklamá.

¹⁷ E organisashon di Yehova ta yuda nos sigui kumpli ku boluntat di Dios. Kòrda ku Esun ku ta dirigí e garoshi selestial akí ta Yehova. P’esei, si nos ta kana pareu ku su garoshi, nos ta mustra ku nos ta respetá Yehova i ku nos tin konfiansa den dje komo nos “baranka.” (Sal. 18:31) Beibel ta primintí: “SEÑOR lo duna su pueblo forsa; SEÑOR lo bendishoná su pueblo ku pas.” (Sal. 29:11) Komo ku nos ta forma parti di e organisashon di Yehova awe, nos ta risibí e forsa ku e ta duna i ta disfrutá di e pas ku kua e ta bendishoná su pueblo organisá. Sí, no tin duda, nos lo risibí bendishon riku segun ku nos ta kumpli ku Yehova su boluntat awor i pa semper.