Yehova Su Prinsipio di Sumishon Teokrátiko Ta Benefisiá Nos

PA NOS por hasi Yehova su boluntat na un manera organisá, ta importante pa nos rekonosé ku e ta e Soberano, òf Gobernante, di Universo. Nos ta rekonosé su Yu komo Kabes di e kongregashon kristian i nos ta apliká e prinsipio di outoridat den otro área di bida tambe. Tur hende ku someté nan mes na e prinsipio di sumishon teokrátiko ta benefisiá.

² For di den hòfi di Eden, Yehova a introdusí e prinsipio di sumishon na outoridat. Nos ta mira esaki den e mandamentunan di Dios na Génesis 1:28 i 2:16 i 17. E bestianan mester tabata sumiso na hende, i Adam ku Eva mester a someté nan mes na e boluntat i outoridat di Dios. Obedensia na e outoridat di Dios lo a kontribuí na pas i òrdu. Mas despues, Apòstel Pablo a enfatisá e prinsipio di outoridat na 1 Korintionan 11:3. El a skirbi: “Mi ke pa boso sa ku kabes di tur hòmber ta Kristu; kabes di muhé ta hòmber; anto kabes di Kristu ta Dios.” Pues, manera nos por mira, e úniko persona ku no tin un kabes ku e tin ku someté su mes na dje ta Yehova.

³ Awe mayoria di hende no ta rekonosé ni no ta biba di akuerdo ku e prinsipio di outoridat. Dikon? Wèl, e problema a kuminsá den Eden ora nos promé mayornan, Adam ku Eva, a disidí ku nan no ke sigui obedesé Dios i a rebeldiá kontra dje. (Gén. 3:4, 5) Sinembargo, esei no a duna nan mas libertat. Al kontrario, nan a resultá bou di dominio di un spiritu malbado, Satanas e Diabel. Pues, e promé rebelion a alehá hende for di Dios. (Kol. 1:21) Komo resultado, mayoria di hende awe ta den poder di e malbado.—1 Huan 5:19.

⁴ Nos a sali for di e gara di Satanas debí ku nos a siña i a apliká e bèrdat di e Palabra di Dios den nos bida. Komo Testigunan dediká i batisá, nos ta aseptá Yehova komo Soberano den nos bida. Nos ta pensa meskos ku Rei David, kende a rekonosé Yehova “komo kabes riba tur kos.” (1 Kró. 29:11) Humildemente nos ta deklará: “Rekonosé ku [Yehova] . . . ta Dios; e ta esun ku a traha nos, i no ta nos a traha nos mes; nos ta su pueblo i e karnénan ku e ta pastoriá.” (Sal. 100:3) Nos ta rekonosé ku Yehova ta grandi i ku e meresé nos pleno sumishon, pasobra ta é a traha tur kos. (Rev. 4:11) Komo sirbidó di e Dios berdadero, nos ta sigui e ehèmpel perfekto di Hesukristu, kende tabata sumiso na Dios den tur kos.

⁵ Kiko Hesus a siña for di e sufrimentu ku el a pasa aden tempu ku e tabata riba tera? Hebreonan 5:8 ta kontestá: “Aunke e tabata Yu, el a siña obedensia for di e kosnan ku el a sufri.” Sí, asta ora Hesus tabata pasa den momento difísil, el a keda sumiso na su Tata selestial. Ademas, Hesus no a hasi nada riba su mes. E no a papia su mes ideanan; ni e no a buska gloria pa su mes. (Huan 5:19, 30; 6:38; 7:16-18) Durante su sirbishi riba tera, e tabata kontentu pa hasi boluntat di su Tata, maske esei a pone ku su enemigunan a opon’é i persiguié. (Huan 15:20) Tòg, Hesus a sigui someté su mes na Dios i a “humiá su mes” asta te na “morto riba un staka di tormento.” Su pleno sumishon na Yehova a trese hopi benefisio: salbashon eterno pa humanidat, un puesto haltu pa e mes i gloria pa su Tata.—Flp. 2:5-11; Heb. 5:9.

E PRINSIPIO DI OUTORIDAT DEN TUR ASPEKTO DI NOS BIDA

⁶ Ora nos ta someté nos mes na Dios i hasi su boluntat, nos ta evitá hopi ansiedat i frustrashon ku hende ku ta nenga di someté nan mes na e Soberano ta haña nan kuné. Konstantemente, nos atversario, Diabel, ta purba di habraká nos. Ma nos por skapa si nos para firme kontra di dje i someté nos mes boluntariamente na Yehova.—Mat. 6:10, 13; 1 Ped. 5:6-9.

⁷ Kristu ta kabes di e kongregashon kristian i el a duna outoridat na “e esklabo fiel i prudente.” Ora nos ta rekonosé e bèrdat akí, esaki lo tin efekto riba nos kondukta i nos relashon ku hende. Si nos someté nos mes na e prinsipio di outoridat di Dios den e kongregashon, nos lo sinti nos motivá pa obedesé e Palabra di Dios den tur aspekto di nos adorashon. Nos lo obedesé den e sentido ku nos ta partisipá den sirbishi, asistí i partisipá na nos reunionnan i kooperá ku e ansianonan i e instrukshonnan di e organisashon.—Mat. 24:45-47; 28:19, 20; Heb. 10:24, 25; 13:7, 17.

⁸ Nos sumishon na Dios ta kontribuí na pas, siguridat i òrdu den e kongregashon kristian. Yehova su pueblo ta reflehá su kualidatnan. (1 Kor. 14:33, 40) Despues ku David a mira e kontraste entre e sirbidónan di Yehova i e malbadonan, el a deklará ku hopi goso: “Bendishoná ta e pueblo ku su Dios ta [Yehova]!” (Sal. 144:15) Nos eksperensia den e organisashon di Yehova ta motivá nos pa ekspresá sintimentu similar na esnan di David.

⁹ Den matrimonio, òf famia, “kabes di muhé ta hòmber.” Na mes momento, hòmber mester ta sumiso na Kristu, i e kabes di Kristu ta Dios. (1 Kor. 11:3) Un esposa mester ta sumiso na su esposo i yu mester obedesé nan mayornan. (Efe. 5:22-24; 6:1) Si kada miembro di famia apliká e prinsipio di outoridat, lo tin pas den famia.

¹⁰ Un esposo mester imitá Kristu i ehersé su outoridat na un manera amoroso. (Efe. 5:25-29) Ora e no ta abusá di su posishon komo kabes ni neglishá esei, su esposa i su yunan lo ta kontentu pa keda sumiso na dje. E esposa tin e ròl di un yudadó. (Gén. 2:18) Ora e ta apoyá i ta respetá su esposo, e ta gana su kariño i ta duna gloria na Dios. (1 Ped. 3:1-4) Ora esposo i esposa ta apliká e prinsipio bíbliko di outoridat, nan ta pone bon ehèmpel pa nan yunan.

¹¹ Nos sumishon na Dios tin efekto tambe riba e manera ku nos ta mira e “outoridatnan superior” ku “Dios a pone . . . den nan posishon relativo.” (Rom. 13:1-7) Komo siudadano ku ta kumpli ku lei, tur kristian ta paga belasting i ta “duna Sésar loke ta di Sésar, ma Dios loke ta di Dios.” (Mat. 22:21) Ademas, nos areglonan pa traha den sirbishi di vèlt ta na armonia ku e leinan ku ta na vigor tokante protekshon di dato personal. Ora nos ta sumiso i ta obedesé e outoridatnan den tur kos ku no ta na konflikto ku e lei hustu di Yehova, nos por usa tur nos energia den e trabou di prediká.—Mar. 13:10; Echo. 5:29.

¹² Sumishon na Yehova tin efekto riba tur aspekto di nos bida. Ku wowo di fe, nos ta mira padilanti ora henter humanidat lo ta sumiso na Yehova Dios. (1 Kor. 15:27, 28) Hende ku ta kontentu pa rekonosé Yehova su soberania i pa keda sumiso na dje pa semper, lo ta bendishoná!