Un Karta di Kuerpo Gobernante
Kerido ruman,
Manera bo sa, Beibel ta un buki ku ta papia prinsipalmente di hende ku di bèrdat a eksistí. Hopi di nan tabata hòmber- i muhénan fiel ku a pasa den kasi e mesun difikultatnan ku nos ta pasa aden, i nan tabatin “e mesun sintimentunan ku nos.” (Santiago 5:17) Algun di nan tabata yen di problema i preokupashon. Tin di nan a sinti nan hopi di hùrt pa loke miembro di famia òf otro sirbidó di Yehova a hasi. I vários di nan a sinti nan mes masha kulpabel pa fayonan ku nan a kometé.
E situashonnan ei a pone algun di nan desviá for di e bèrdat. Pero akaso nan a bandoná Yehova kompletamente? Nò. Hopi di nan tabata meskos ku e salmista ku a bisa Yehova den orashon: “Mi a kana dual manera un karné pèrdí; buska bo sirbidó, pasobra mi no ta lubidá bo mandamentunan.” (Salmo 119:176) Abo ta sinti bo asina?
Hamas Yehova ta lubidá su sirbidónan ku a dual for di e tou. Al kontrario. E ta tuma e inisiativa pa yuda nan; hopi biaha via nan rumannan den fe. Por ehèmpel, wak kon Yehova a yuda su sirbidó Yòb. Yòb a pasa den vários kalamidat, entre nan, problema ekonómiko, morto di su sernan kerí i un malesa grave. Tambe Yòb mester a tende palabranan ofensivo di hende ku eigenlijk lo mester a dun’é sosten. Aunke pa un tempu Yòb a yega na konklushonnan ku no tabata korekto, nunka el a bira lomba pa Yehova. (Yòb 1:22; 2:10) Kon Yehova a yuda Yòb haña su balansa bèk?
Un manera ku Yehova a yud’é tabata via un otro sirbidó di dje ku yama Eliú. Ora Yòb a ekspresá su angustia, Eliú a skuch’é promé, kaba el a sinti su mes konmoví pa respond’é. Kiko el a bisa Yòb? Akaso Eliú a kritik’é òf a purba di korigié dor di brongos’é òf lag’é sinti su mes kulpabel? El a trata Yòb ku un aire di superioridat? Di ningun manera! Motivá pa e spiritu di Dios, Eliú a bis’é: “Mira, abo i ami ta igual den bista di Dios; di klei El a modelá mi tambe. P’esei bo no mester spanta pa mi, pues mi no ta bai imponé mi outoridat.” (Yòb 33:6, 7, BPK) Pues, en bes di pone Yòb sinti su mes mas malu ainda, Eliú bondadosamente a dun’é e konseho i animashon ku e tabatin mester.
Nos ke pa bo sa ku ta ku e mesun sintimentunan ei nos a prepará e foyeto akí. E promé kos ku nos a hasi ta skucha ku atenshon vários ruman ku a drif bai for di e bèrdat i analisá e sirkunstansianan ku a pone nan yega asina leu. (Proverbionan 18:13) Despues, nos a bai den Beibel. Ku hopi orashon nos a analisá vários relato ku ta mustra kon Yehova a yuda su sirbidónan di pasado ku tabata den sirkunstansianan similar. Por último, nos a kombiná e relatonan di Beibel ei ku eksperensianan di rumannan di nos tempu pa produsí e foyeto akí. Nos ta invitá bo pa lesa e informashon akí ku atenshon. Bo por tin sigur ku nos stima bo profundamente.
Kuerpo Gobernante di Testigunan di Yehova