Dios A Traha Shelu i Tera

Yehova Dios ta nos Kreador. El a traha tur kos. El a traha e kosnan ku nos ta mira i e kosnan ku nos no por mira. Promé ku Yehova a traha e kosnan ku nos por mira, el a krea masha hopi angel. Bo sa kiko ta un angel? Un angel ta un persona meskos ku Yehova. Ta Yehova a krea e angelnan. Nos no por mira e angelnan, meskos ku nos no por mira Yehova. E promé angel ku Yehova a krea a yuda Yehova traha e streanan, e planetanan i tur otro kos. E planeta kaminda nos ta biba yama Tera. Tera ta masha bunita mes.

Despues, Yehova a prepará nos planeta Tera pa hende i bestia por biba riba tera. Yehova a laga lus di solo bria riba tera, i Yehova a traha seru, laman i riu.

Bo sa kiko Yehova a hasi despues? Yehova a bisa: ‘Mi ta bai traha yerba, mata i palu.’ Sí, Yehova a laga diferente sorto di fruta, bèrdura i flor kuminsá krese. Despues, Yehova a traha tur e bestianan: bestia ku ta bula, bestia ku ta landa i bestia ku ta lastra riba tera. Yehova a traha bestia chikitu, manera konènchi, i bestia grandi, manera olefante. Kua bestia abo gusta?

Despues, Yehova a bisa e promé angel ku el a traha: “Laga nos traha hende.” Nan a traha hende diferente for di bestia. Hende por traha hopi kos nobo. Hende por papia, hari i hasi orashon na Dios. Hende tabatin ku kuida tera i e bestianan. Abo sa ken tabata e promé hende ku Dios a traha? Laga nos  wak.