Por fin, Nan A Haña un Yu!

Ábraham ku Sara tabatin hopi aña kasá. Nan a sali for di e kas bunita ku nan tabatin na Ur, i nan a bai biba den un tènt. Sara no a rabia ni keha, pasobra e tabata konfia den Yehova.

Sara tabatin masha deseo di tin un yu. El a bisa Ábraham: ‘Si mi kriá Hágar sali na estado, e yu ku e haña lo ta manera mi mes yu.’ Ku tempu, Hágar a haña un yu hòmber ku nan a yama Ismaèl.

Hopi aña despues, tres persona a bin bishitá Ábraham ku Sara. Ábraham tabatin 99 aña di edat i Sara tabatin 89 aña. Ábraham a ofresé su bishitantenan algu di kome, i el a bisa nan pa sinta sosegá un ratu bou di palu. Bo sa ken e tres personanan ku a bin bishitá Ábraham ku Sara tabata? Nan tabata angel! Nan a bisa Ábraham: ‘Otro aña, den e temporada akí, abo i bo esposa lo tin un yu hòmber.’ Sara tabata den tènt ta skucha e kòmbersashon. Sara a kuminsá hari den su mes. El a pensa: ‘Di bèrdat, mi por haña un yu awor ku mi ta bieu kaba?’

E siguiente aña, Sara a haña un yu hòmber, manera e angel di Yehova a bisa. Ábraham a yama e yu Ísak. Ísak ta nifiká “Harimentu.”

Riba un dia, tempu ku Ísak tabatin mas o ménos 5 aña di edat, Sara a mira Ismaèl ta tenta Ísak. Sara tabata ke protehá su yu Ísak. P’esei, Sara a bai serka Ábraham i pidi Ábraham pa saka Hágar i Ismaèl for di kas. Ábraham no tabata ke hasi esei, pero Yehova a bis’é: ‘Hasi loke Sara a pidi bo. Lo mi kuida Ismaèl. Ademas, ta pa medio di Ísak, mi promesanan lo kumpli.’