Yákòb i Esou A Bira Bon Bèk ku Otro

Yehova a primintí Yákòb ku lo e protehá Yákòb meskos ku el a protehá Ábraham i Ísak. Yákòb a bai biba na Háran. Na Háran, Yákòb a kasa i bira tata di hopi yu. Ademas, Yákòb a bira masha riku mes.

Despues di tempu, Yehova a bisa Yákòb: ‘Bai bèk e pais kaminda bo tabata biba.’ Pues, Yákòb i su famia a kuminsá un biahe largu pa nan bai nan pais bèk. Ora nan tabata riba kaminda, algun hende a bin bisa Yákòb: ‘Bo ruman Esou ta bin topa bo. Tin 400 hòmber huntu kuné!’ Yákòb tabatin miedu pa Esou no hasi e i su famia daño. Yákòb a hasi orashon na Yehova. El a bisa Yehova: ‘Por fabor, no laga mi ruman Esou hasi nos daño.’ E siguiente dia, Yákòb a manda masha hopi regalo pa Esou. Yákòb a manda hopi karné, kabritu, baka, kamel i buriku pa Esou.

Anochi, ora Yákòb tabata su so, Yákòb a mira un angel. E angel a kuminsá lucha kuné. Nan a lucha te mainta. Yákòb a sigui lucha, maske el a ser heridá. E angel a bis’é: “Laga mi bai.” Yákòb a bisa e angel: ‘Nò. Mi no ta laga bo bai tanten ku bo no bendishoná mi.’

Finalmente, e angel a bendishoná Yákòb. E ora ei, Yákòb tabatin sigur ku Yehova lo a proteh’é kontra Esou.

Mainta, Yákòb a mira Esou i e 400 hòmbernan ku tabata huntu ku Esou ta bini djaleu. Yákòb tabata kana te dilanti di su famia. Dado momento, miéntras Yákòb tabata yegando mas i mas serka di su ruman hòmber Esou, Yákòb tabata bùig p’e. Yákòb a bùig shete biaha dilanti di Esou. Esou a kore bai brasa Yákòb. Nan tur dos a kuminsá yora, i nan a bira bon bèk ku otro. Bo ta kere ku Yehova a gusta e manera ku Yákòb a trata ku e situashon akí?

Despues, Esou a bai kas bèk, i Yákòb a sigui ku su biahe pa kas. Yákòb tabatin 12 yu hòmber. Nan tabata: Ruben, Símeòn, Levi, Huda, Dan, Nèftali, Gad, Áser, Ísakar, Zébulòn, Yósef i Bènyamin. Ku tempu, Yehova a usa Yósef, un di e yu hòmbernan di Yákòb, pa salba Su pueblo. Bo sa kon Yehova a hasi esei? Laga nos wak.