Milager na Laman Kòrá

Asina ku Fárao a tende ku e israelitanan a sali for di Egipto, a duel e ku el a laga nan bai. El a bisa su sòldánan: ‘Prepará tur mi garoshinan di guera, i laga nos bai nan tras! Nos no mester a laga nan bai.’ Pues, Fárao i su sòldánan a bai tras di e israelitanan.

Den dia, Yehova tabata usa un nubia pa mustra su pueblo unda nan mester a bai. I anochi, Yehova tabata usa un kandela pa hasi esei. Yehova a hiba nan na Laman Kòrá. I el a bisa nan pa habri nan tèntnan einan i keda einan.

Pero despues, e israelitanan a mira Fárao i su sòldánan ta bini nan tras. E israelitanan tabata den un situashon difísil pasobra, nan tras, tabatin e egipsionan, i nan dilanti, tabatin laman. Nan a bisa Moises: ‘Nos ta bai muri! Bo mester a laga nos na Egipto.’ Pero Moises a bisa nan: ‘No tene miedu. Djis warda i wak kon Yehova ta bai yuda nos.’ Moises a konfia hopi den Yehova, no?

Yehova a bisa e israelitanan pa nan desharmá nan tèntnan i pa nan prepará pa bai for di kaminda nan tabata. E anochi ei, Yehova a manda e nubia patras di e israelitanan pa e nubia keda meimei di e israelitanan i e egipsionan. E nubia a laga e banda di e egipsionan bira skur, pero otro banda dje nubia, kaminda e israelitanan tabata, tabatin klaridat.

Yehova a bisa Moises pa e rèk su man riba laman. Ora Moises a hasi esei, Yehova a manda un bientu fuerte supla henter anochi. Laman a parti na dos, i meimei, un kaminda a habri pa e hendenan por a pasa via dje. Miónes di israelita a kana riba tera seku te yega otro banda dje laman. Nan a kana pasa meimei di dos muraya di awa.

Fárao i su sòldánan tambe a kuminsá kana riba e kaminda ei pa nan bai tras di e israelitanan. Pero Yehova a laga kos bai malu ku e egipsionan, i e wilnan di nan garoshinan a kuminsá lòs. E sòldánan a grita: ‘Ban fo’i djaki! Yehova ta bringando pa e israelitanan.’

Yehova a bisa Moises: ‘Rèk bo man riba laman.’ Anto, mesora, e murayanan di awa a bini abou riba e egipsionan. Fárao i tur su sòldánan a muri; niun di nan no a keda na bida.

Na e otro banda di laman, e grupo grandi di hende a alabá Dios ku un kantika. Nan a kanta: “Kanta pa Yehova, pasobra el a logra un gran viktoria. El a benta e kabainan i nan koredónan den laman.” Miéntras ku e hendenan tabata kanta, e hende muhénan tabata baila i toka tamburein. Tur hende tabata masha kontentu, pasobra, por fin, nan tabata liber di bèrdat.