E Israelitanan A Kibra Nan Promesa

Yehova a bisa Moises: ‘Bini serka mi riba e seru. Mi ta bai skirbi mi leinan riba tabla di piedra i duna bo nan.’ Pues, Moises a subi e seru, i el a keda riba e seru 40 dia i 40 anochi. Ora e tabata ei riba, Yehova a skirbi e Dies Mandamentunan riba dos tabla di piedra, i el a duna Moises e tablanan.

Despues di un tempu, e israelitanan a kuminsá pensa ku Moises a bai laga nan. Nan a bisa Áròn: ‘Nos ke un hende pa guia nos. Traha un dios pa nos!’ Áròn a bisa nan: ‘Duna mi boso kosnan di oro.’ Anto Áròn a dirti e oro, i el a traha un estatua di oro ku tabatin forma di un bisé. E hendenan a bisa: ‘E bisé akí ta nos dios ku a saka nos for di Egipto.’ Nan a tene un fiesta, i nan a kuminsá adorá e bisé di oro. Esei tabata algu malu? Sí! Pasobra e hendenan a primintí ku nan lo adorá Yehova so. Pero nan tabata kibrando e promesa ei.

Yehova a mira loke tabata pasando, i el a bisa Moises: ‘Baha bai serka e hendenan. Nan a desobedesé mi, i nan ta adorando un dios falsu.’ Pues, Moises a baha for di e seru, ku e dos tablanan di piedra den su man.

Ora Moises a yega mas serka di kaminda e hendenan tabata, el a tende nan ta kanta. Despues, el a wak nan ta baila i bùig pa e bisé. Moises a bira masha rabiá. El a benta e dos tablanan abou, i nan a kibra na pida pida. Mesora, Moises a destruí e estatua. El a puntra Áròn: ‘Kon bo por a laga e hendenan akí influensiá bo pa hasi algu asina teribel?’ Áròn a kontest’é: ‘No rabia. Bo mes sa kon e hendenan akí ta. Nan tabata ke un dios. Pues, mi a benta nan oro den kandela, i e bisé akí a sali for di e kandela.’ Áròn no mester a traha e bisé ei. Moises a subi e seru atrobe, i el a roga Yehova pa Yehova pordoná e hendenan.

Yehova a pordoná tur e hendenan ku sí tabata ke obedes’é. Bo ta mira dikon tabata asina importante pa e hendenan sigui guia di Moises?