Pregunta di Lector

◼ Na ki tempo tocamento dje siete trompet angelical di Revelacion a cuminza?

Den Revelacion capítulo 8, 9, i 11, nos ta leza di siete angel cu a toca siete trompet, anunciando plaga di mashá intensidad riba algun parti di humanidad. Esei ta representa proclamacion di huicio di Jehova cu e pueblo di Jehova Dios a publica durante tur e tempo di fin cuminzando notablemente cu e asamblea di Cédar Point di 1922.—Mira e buki Revelacion—su gran culminacion ta cerca!, capítulo 21 te 23 i capítulo 26.

E promé cuater tocamento di trompet a denuncia estado spiritualmente morto dje parti di cristiandad dje “tera” i di “lamá,” i també dje estado decadente dje clero i dje scuridad spiritual di cristiandad.—Revelacion 8:7-12.

E pasado ta mustra cu tal denuncio público di tal echo realmente a cuminza promé cu 1922. Por ehempel, e discurso “Miyones cu ta biba awor kizás lo no muri nunca,” pronunciá pe promé bez na 1918 i publicá den forma di un foyeto na 1920, a informa dje fracaso di cristiandad i dje binidero fin di mundo. The Golden Age di 29 di September di 1920, a denuncia cristiandad claramente como un fornicador, un fraude mentiroso, i un gañador dje pueblo.

Pakico, anto, e buki Revelacion—su culminacion ta bisa cu e cuater trompet solamente a cuminza nan tocamento ne asamblea di Cédar Point na 1922? Pasobra tabata e ora ei cu e yamada a sali pa “anuncia, anuncia, anuncia e Rey i e Reino,” dunando un estímulo grandi na actividad di predica. E número di The Watch Tower di 1 di November di 1922 a bisa: “E rumanan . . . a acepta como e anuncio clave dje asamblea cu e berdadero privilegio i deber di esnan dedicá riba tera ta pa anuncia e presencia di Señor, e gran Rey di reynan, i cu su reino ta aki, i cu esei ta e cos di mas importante pa nan haci.”

Nos tin cu ripara també cu aunque Testigo di Jehova a publica tur cuater mensahe di huicio desde 1922, cada un den su turno a recibi un estímulo fuerte for dje adopcion dje cuater declaracion na asamblea celebrá entre 1922 i 1925. Diez di miyones di copia di tal declaracion tabata partí despues den forma gedruk, efectivamente denunciando estado spiritualmente morto di cristiandad.—Mira e buki Revelacion—su culminacion, bladji 133, paragraf 15.

E tres tocamento final di trompet a encerra “calamidad.” (Revelacion 8:13) Nan tabata distinto dje promé cuater tocamento di trompet pasobra nan ta relacioná cu suceso específico. Tocamento di cinco dje trompet ta ser relacioná cu e salimento na 1919 dje pueblo di Dios for dje “abismo.” Esun di seis tabatin cu ber cu e “caballería” i e campaña di predicacion internacional masiso cu a cuminza na 1922. Esun di siete ta enlazá cu e nacimento dje Reino di Dios na 1914.—Revelacion 9:1-19; 11:15-19.

Cada suceso asina a resulta den calamidad pa Satanás i pa su mundo. E liberacion dje ungínan na 1919 for dje abismo di inactividad a pica e clero di cristiandad i a demonstra e rechazamento total di dje di Jehova Dios. Desde 1922 te na dia djawe, e caballería enorme a mata cristiandad, den un sentido spiritual, denunciando su estado mortal i dunando advertencia di su binidero destruccion. I despues di nacimento dje Reino na 1914, Satanás a wordu sacá for di cielo, instigando dificultad ruinoso den humanidad. Pronto e Reino lo elimina e arreglo social humano cu ta parce firme cu Satanás a edificá (e tera), i extermina humanidad rebelde (lamá) na Armagedón.—Revelacion 11:17–12:12; 21:1.

Ne asamblea di Cédar Point na 1922, tur tres “calamidad” a sali na cla pe mundo en general. E campaña di predica cu tabata iniciá ei a haci claro cu “sprinkhan” a sali for di abismo caba i cu e atake dje “caballería” tabata na vigor. I e yamada conmovedor di anuncia e Rey i e Reino tabata na plena armonía cu tocamento di trompet di siete. E número di The Watch Tower di 1 di Mart di 1925 a splica cu suceso na 1914, 1919 i na 1922 tabata profetiza den Revelacion capítulo 12. Esei tabata un comprendimento mas profundo dje nacimento dje Reino, i Testigo di Jehova a publica esei fielmente. Además, e anuncio dje informacion manera plaga a recibi un estímulo mayor for di adopcion i publicacion despues di declaracion hací durante asamblea celebrá for di 1926 te 1928.—Mira Revelacion—su gran culminacion ta cerca!, bladji 147, 149, 172.

Pues, tocamento dje siete trompet a cuminza den 1922 i a bai basta leu entre 1920 i 1930. Desde e tempo ei, e pueblo di Jehova Dios a coopera sin miedu cu angel informando tur humanidad cu cristiandad ta spiritualmente morto, su clero ta lider tumbá, i pronto e i e resto dje mundo satánico aki lo ser destruí.