Ken Por Scapa For Dje “Tempo di Angustia”?

“Tur hende cu ta inboca e nomber di Jehova lo scapa salbo.”—JOËL 2:32.

1. Segun Daniel i Malaquías, kico ta caracterizá hende cu lo recibi salbacion durante e binidero “tempo di angustia”?

MIENTRAS cu profeta Daniel a spera nos tempo cu anhelo, el a skirbi: “Siguramente lo sosode un tempo di angustia tal como no a wordu hací sosode desde cu tabatin un nacion te ne tempo ei. I durante e tempo ei bo pueblo lo scapa, tur hende cu ta ser hayá skirbí den e buki.” (Daniel 12:1) Palabra di consuelo en berdad! Jehova Dios lo corda su pueblo aprobá, net manera Malaquías 3:16 també ta declara: “Ne tempo ei esnan den temor di Jehova a papia un cu otro, cada un cu su compañé, i Jehova a sigi presta atencion i scucha. I un buki di recuerdo a cuminza ser skirbí dilanti dje pa esnan den temor di Jehova i pa esnan pensando riba su nomber.”

2. Ki resultado tin di pensamento riba e nomber di Jehova?

² Pensamento riba e nomber di Jehova ta resulta den conocimento exacto tocante dje, su Cristo, i tur gran propósito di dje pe Reino. Asina su pueblo ta siña tene reverencia di dje, pa drenta den un relacion íntimo cuné mediante dedicacion, i pa stimé ‘cu tur nan curazón i cu tur nan comprendimento i cu tur nan forza.’ (Marco 12:33; Revelacion 4:11) Jehova a haci e percuracion bondadoso, mediante e sacrificio di Jesucristo, pa hende manso dje tera haya bida eterna. P’sei, nan por expresa cu confianza e palabra dje ehército di cielo cu a alaba Dios ne tempo dje nacimento di Jesús, bisando: “Gloria den haltura na Dios, i riba tera paz entre hende di bon boluntad.”—Lucas 2:14.

3. Promé cu paz por bini riba e planeta aki, cua acto di Jehova Dios tin cu tuma lugar?

³ Tal paz ta mas cerca cu e mayor parti di humanidad ta kere. Pero, promé, ehecucion dje huicio di Jehova tin cu bini riba un mundo corrupto. Su profeta Sofonías a declara: “E gran dia di Jehova ta cerca. E ta cerca, i tin un puramento di dje mashá hopi.” Esei ta ki sorto di dia? E profecía ta sigi bisa: “E sonido dje dia di Jehova ta amarga. Un homber poderoso ta dal un grito ei. E dia ta un dia di furia, un dia di angustia i di agonía, un dia di tempestad i di desolacion, un dia di scuridad i di tiniebla, un dia di nubia i di tiniebla denso, un dia di trompet i di siñal di alarma, contra stad fortificá i contra toren halto di skina. I lo mi causa angustia pa humanidad, i nan siguramente lo camna manera hende ciegu; pasobra nan a peca contra Jehova.”—Sofonías 1:14-17; mira també Habacuc 2:3; 3:1-6, 16-19.

4. Ken djawe ta acepta e invitacion pa conoce i sirbi Dios?

⁴ Felizmente, miyones di hende djawe ta acepta e invitacion di conoce i sirbi Dios. Tabata profetizá tocante cristian ungí cu ta ser introducí den e pacto nobo: “‘Nan tur lo conocémi, desde esun menor di nan te asta esun mayor di nan,’ ta e declaracion di Jehova.” (Jeremías 31:34) Nan a hiba e delantera den e trabao di duna testimonio djawe. I awor segun cu mas i mas dje resto ungí ta caba nan carreda terrenal, e “multitud grandi” di “otro carné” ta presenta pa ‘rindi sirbishi sagrado na Dios dia i anochi’ den su arreglo spiritual semehante di un tempel. (Revelacion 7:9, 15; Juan 10:16) Bo ta uno cu ta disfruta di tal privilegio preciosísimo?

Con e “Cosnan Deseabel” ta Drenta

5, 6. Promé cu tur nacion ta ser sagudí te na destruccion, cua trabao di salbacion ta tuma lugar?

⁵ Láganos considera awor Ageo 2:7, unda Jehova a profetiza tocante su cas spiritual di adoracion. El a bisa: “Lo mi sagudi tur nacion, i e cosnan deseabel di tur nacion mester drenta; i lo mi yena e cas aki cu gloria.” Profecía bíblico ta mustra cu ‘sagudimento dje nacionan’ ta referi ne ehecucion dje huicio di Jehova riba e nacionan. (Nahum 1:5, 6; Revelacion 6:12-17) P’sei e accion di Jehova profetizá den Ageo 2:7 lo yega su culminacion cu e sagudimento dje nacionan, cabando cu nan existencia, pa nan exterminacion. Pero, kico dje “cosnan deseabel di tur nacion”? Nan tin cu spera pe sagudimento destructivo final haci nan drenta? Di ningun manera.

⁶ Joël 2:32 ta bisa cu “tur hende cu ta inboca e nomber di Jehova lo scapa salbo; pasobra den e Ceru di Sion i den Jerusalem lo resulta di ser esnan cu a scapa, net manera Jehova a bisa, i hunto cu esnan sobrebibiente, cu Jehova ta yama.” Jehova ta saca hende asina for dje nacionan, i nan ta inboca su nomber cu fe den e sacrificio di Jesús promé cu e sagudimento culminante dje tribulacion grandi. (Compara cu Juan 6:44; Echo 2:38, 39.) Felizmente, e multitud grandi precioso, awor na cantidad di mas cu cuater miyón, ta ‘drenta’ den e cas di adoracion di Jehova den anticipacion di su ‘sagudimento di tur nacion’ na Armagedón.—Revelacion 7:9, 10, 14.

7. Kico ta encerrá den e ‘inbocacion dje nomber di Jehova’?

⁷ Con sobrebibiente asina ta inboca e nomber di Jehova? Santiago 4:8 ta dúnanos un indicacion, bisando: “Hala cerca Dios, i lo e hala cerca boso. Pecador, haci boso man limpi i hende indeciso, purifica boso curazón.” Mescos cu e resto ungí cu ta hiba e delantera, hende cu ta spera di ser dje multitud grandi di sobrebibiente di Armagedón mester dal paso decisivo. Si bo ta spera di sobrebiba, bo mester bebe profundamente dje Palabra purificador di Jehova i aplica su ley husto den bo bida. Bo mester ta decisivo dedicando bo bida na Jehova Dios, simbolizando esei cu bautismo bao di awa. Bo inbocacion di Jehova cu fe ta inclui també dunamento di testimonio di dje. P’sei, Pablo a skirbi den Romano capítulo 10, versículo 9 i 10: “Si bo ta declara públicamente e ‘palabra den bo mes boca,’ cu Jesus ta Señor, i ta eherce fe den bo curazón cu Dios a lanté for di morto, lo bo ser salbá. Pasobra cu curazón hende ta eherce fe pa husticia pero cu boca hende ta haci declaracion público pa salbacion.” Anto, den versículo 13, e apóstol a cita e profecía di Joël i a enfatiza cu “tur hende cu ta inboca e nomber di Jehova lo ser ­salbá.”

‘Busca, Busca, Busca’

8. (a) Segun profeta Sofonías, cua requisito Jehova Dios tini pa hende gana salbacion? (b) E palabra “probablemente” den Sofonías 2:3 ta dúnanos cua spiertamento?

⁸ Pasando ne buki bíblico di Sofonías, capítulo 2, versículo 2 i 3, nos ta leza loke Jehova ta exigi pa salbacion: “Promé cu ta bini riba boso e rabia ardiente di Jehova, promé cu ta bini riba boso e dia dje rabia di Jehova, busca Jehova, tur hende manso dje tera, cu a practica Su propio decision hudicial. Busca husticia, busca humildad. Probablemente boso por ta scondí den e dia dje rabia di Jehova.” Ripara e palabra “probablemente.” Esei no ta un caso di una bez salbá, semper salbá. Nos scondimento den e dia ei ta depende di nos continuacion den e hacimento di tres cos. Nos tin cu busca Jehova, busca husticia, i busca humildad.

9. Ki recompensa tin pa hende cu ta busca humildad?

⁹ Maraviyoso, en berdad, ta e recompensa pe buscamento di humildad! Den Salmo 37, versículo 9 te 11, nos ta leza: “Esnan sperando den Jehova ta esnan cu lo tene e tera den nan poder. I solamente un poco tempo mas, i hende malbado lo no tei . . . Pero e mansonan mes lo tene e tera den nan poder, i nan en berdad lo haya nan gozo exquisito den e abundancia di paz.” I, kico di buscamento di husticia? Versículo 29 ta bisa: “E hustonan mes lo tene e tera den nan poder, i nan lo biba riba dje pa semper.” En cuanto buscamento di Jehova, versículo 39 i 40 ta bísanos: “E salbacion di hende husto ta di Jehova; e ta nan fortaleza den e tempo di angustia. I Jehova lo yúdanan i percura escape pa nan. Lo e percura escape pa nan for di hende malbado i sálbanan, pasobra nan a tuma refugio den dje.”

10. Ken ta keda destacá nengando di busca Jehova i busca humildad?

¹⁰ Secta di cristiandad no a busca Jehova. Nan clero ta nenga su nomber precioso, i cu tribilidad a kité for di nan traduccion di Bijbel. Nan ta prefera di adora un Señor of Dios sin nomber i reverenciá un trinidad pagano. Además, cristiandad no ta busca husticia. Hopi miembro di dje ta adopta of ta boga pa moda di biba complaciente. En bez di busca humildad manera Jesús, nan ta haci exhibicion, por ehempel na television, di un bida di luho i hopi bez inmoral. Pastor ta bira gordu riba custía dje tao. Segun e palabra di Santiago 5:5, nan a “biba den luho riba tera i a sigi tras di placer carnal.” Mientras cu e dia di Jehova ta yega cerca, nan siguramente lo ripara cu e palabra inspirá ta aplica na nan: “Cosnan balioso lo no ser di ningun probecho riba e dia di furia.”—Proverbio 11:4.

11. Ken ta e homber di maldad, i con el a acumula un culpa tremendo pa dramamento di sanger?

¹¹ Den e promé siglo EC, manera apóstol Pablo a relata den su segunda carta pa tesalonicense, algun hende cristian a excitá, pensando cu e dia di Jehova a yega caba. Pero Pablo a adverti cu e apostasía grandi tabatin cu bini promé, i e “homber di maldad” tabatin cu ser revelá. (2 Tesalonicence 2:1-3) Awor, den siglo 20 aki, nos por comprende e alcance grandi dje apostasía i ki perverso e clero di cristiandad tá den e bista di Dios. Durante e último dianan desde 1914, e clero a acumula un culpa tremendo di dramamento di sanger apoyando ‘batimento di ploeg na spada.’ (Joël 3:10) Además, nan ta sigi siña doctrina falso, tal como inmortalidad natural di alma humano, purgatorio, tormento den e candela di fiernu, bautismo di baby, e trinidad, i semehante cosnan. Kico lo sosode e clero ora Jehova ta ehecuta su decision hudicial? Proverbio 19:5 ta bisa: “Hende cu ta lanza mentira lo no scapa.”

12. (a) Cua ta e “cielo” i “tera” humano cu lo ser liquidá pronto? (b) Kico nos ta siña for dje binidero destruccion dje mundo malbado aki?

¹² Den 2 Pedro 3:10, nos ta leza: “E dia di Jehova lo bini manera ladrón, den locual cielo lo pasa cu sonido di bientu, pero elemento siendo intensamente cayente lo ser liquidá, i tera i obra den dje lo ser destapá.” Gobernacion corrupto cu ta gespan manera cielo riba humanidad, hunto cu tur elemento cu ta compone e arreglo social decadente di humanidad djawe, lo ser barí for dje tera di Dios. Fabricante i bendedor di arma cu ta pone na peliger existencia di humanidad, estafador, hende religioso hipócrita i nan clero, promovedor di baheza, violencia, i crimen—nan tur lo desparce. E rabia di Jehova lo liquidánan. Pero den versículo 11 i 12, Pedro a agrega e sigiente advertencia pa hende cristian: “Siendo cu tur e cosnan ei lo ser liquidá asina, ki sorto di hende boso mester tá den acto santo di conducta i echo di debocion piadosa, sperando i teniendo mashá presente e presencia dje dia di ­Jehova.”

Miguel ta Drenta den Accion!

13, 14. Ken ta e gran Vindicador dje gobernacion di Jehova, i di ki manera el a keda activo desde 1914?

¹³ Con hende por scapa durante e “tempo di angustia” di Jehova? E Agente di Dios percurando escape ta arcangel Miguel, kende su nomber kier men “Ken ta manera Dios?” Apropiadamente, anto, e ta Esun cu ta vindica e gobernacion di Jehova Dios, apoyando Jehova como e único Dios berdadero cu ta hustamente Señor Soberano di tur e universo.

¹⁴ Ki suceso notable Revelacion capítulo 12, versículo 7 te 17, ta detayá tocante e “dia di Señor” desde 1914! (Revelacion 1:10) Arcangel Miguel ta saca e rebelde Satanás for di cielo te ne tera. Despues, segun detaye di Revelacion capítulo 19, versículo 11 te 16, esun yamá “Fiel i Berdadero” ta ‘pisa e baki di pers biña dje rabia dje furia di Dios Todopoderoso.’ E poderoso guerrero celestial ta ser yamá “Rey di reynan i Señor di señornan.” Finalmente, Revelacion capítulo 20, versículo 1 i 2, ta menciona un angel grandi cu ta tira Satanás den e abismo i ta ceré ei pa mil aña. Claramente, tur texto ei ta siñala na nos Señor Jesucristo, e solo Vindicador dje soberanía di Jehova Dios, cu Jehova Dios a pone riba su glorioso trono celestial na 1914.

15. Di ki manera special Miguel “lo lanta riba su pia” pronto?

¹⁵ Segun cu Daniel 12:1 ta bisa, Miguel ta “lantá riba su pia” pa defende e pueblo di Jehova desde cu e tabata instalá como Rey na 1914. Pero, pronto Miguel tin cu “lanta riba su pia” den un sentido mashá special—como Agente di Jehova pa kita tur maldad for dje tera i como Libertador di un sociedad mundial dje pueblo di Dios. E palabra di Jesús den Mateo 24:21, 22 ta indica ki grandi lo ta e “tempo di afliccion” ei: “Ne tempo ei lo tin tribulacion grandi tal como no a sosode desde principio di mundo te awor, no, ni lo no sosode atrobé. Realmente, amenos cu e dianan ei ta cortá, ningun carni lo ser salbá; pero pa causa dje escogínan e dianan ei lo ser cortá.”

16. Cua carni lo ser salbá durante e tribulacion grandi?

¹⁶ Ki feliz nos por keda di cu algun carni lo ser salbá ne tempo ei! Esei lo no ta manera hudío rebelde den trampa den Jerusalem na aña 70 EC, algun di locual tabata hibá como esclabo na Roma. Mas bien, esnan cu ta scapa den e “tempo di fin” lo ta manera e congregacion cristian cu a hui caba for di Jerusalem ora e atake final a cuminza. Nan lo ser e pueblo di Dios mes, e miyones di hende dje multitud grandi hunto cu cualkier di esnan ungí cu por keda riba tera ainda. (Daniel 12:4) E multitud grandi “lo sali for dje tribulacion grandi.” Pakico? Pasobra “nan a laba nan mantel i a hácinan blancu den e sanger dje Lamchi.” Nan ta eherce fe den e poder rescatador dje sanger dramá di Jesús i ta demonstra nan fe sirbiendo Dios lealmente. Asta awor, Jehova Dios, “Esun sintá riba e trono” ta span su tent protector riba nan, mientras cu e Lamchi, Cristo Jesús, ta pastoreánan i ta guíanan ne fontein di awa di bida.—Revelacion 7:14, 15.

17. Con e multitud grandi ta ser animá specialmente pa actua pa nan ser scondí durante e binidero dia di angustia?

¹⁷ Den nan buscamento pa Jehova, pa husticia, i pa humildad, e miyones di hende dje multitud grandi nunca mester laga nan ­promé amor pe berdad fria! Si bo ta un hende asina, semehante di carné, kico bo mester haci? Manera Colosense capítulo 3, versículo 5 te 14 ta bisa, bo tin cu kita completamente “e personalidad bieu cu su costumbernan.” Buscando yudanza divino, haci esfuerzo pa ‘bistíbo cu e personalidad nobo, fundá riba conocimento exacto.’ Den humildad, aumenta i mantene bo celo dunando alabanza na Jehova i dunando di conoce su gran propósito na otro hende. Asina bo por ta scondí den e “tempo di angustia,” e dia dje “rabia ardiente di Jehova.”

18, 19. Di ki manera perseverancia ta bira vital pa gana salbacion?

¹⁸ E dia ei ta cerca! E ta bini lihé den nos direccion. E recogimento di hende dje multitud grandi a sigi awor pa mas cu 57 aña. Algun di eseinan a muri i ta spera nan resureccion. E profecía di Revelacion ta dúnanos e siguranza di cu como un grupo e multitud grandi lo sali for dje tribulacion grandi como e núcleo dje sociedad di “un tera nobo.” (Revelacion 21:1) Lo bo tei? Esei ta posibel, pasobra Jesús a bisa den Mateo 24:13: “Ken cu ta persevera te ne fin ta esun cu lo ser salbá.”

¹⁹ E presion cu e pueblo di Jehova Dios ta experimenta den e sistema bieu aki por sigi aumenta. I ora e tribulacion grandi angustioso ta yega, bo por sufri di dificultad. Pero keda pegá cu Jehova Dios i su organizacion. Keda lantá! “‘Mantene boso den expectacion di mi,’ ta e declaracion di Jehova, ‘te ne dia cu mi ta lanta pe plundermento, pasobra mi decision hudicial ta di reuni e nacionan, pa mi hunta reino hunto, pa mi basha riba nan mi denunciacion, tur mi rabia ardiente; pasobra pa medio di e candela di mi celo tur e tera lo ser devorá.’”—Sofonías 3:8.

20. Mientras cu e “tempo di angustia” culminante ta yega cada bez mas cerca, kico nos mester haci?

²⁰ Pa nos proteccion i animacion, Jehova Dios bondadosamente a percura pa su pueblo un “idioma puro,” cu ta inclui e gran mensahe di su Reino binidero, “pa nan tur inboca e nomber di Jehova, pa nan sirbié scouder cu scouder.” (Sofonías 3:9) Segun cu e “tempo di angustia” culminante ta yega cada bez mas cerca, láganos sirbi cu celo, yudando hende manso ‘inboca e nomber di Jehova’ pa nan alcanza salbacion.

Bo ta Corda?

◻ Cua acto di Jehova lo sosode promé cu e introduccion di paz riba e tera?

◻ Segun Joël, kico hende mester haci pa ser salbá?

◻ Segun Sofonías, con hende manso por haya proteccion for dje rabia ardiente di Jehova?

◻ Ken ta e “homber di maldad,” i con el a acumula culpa pa dramamento di sanger?

◻ Ki importante ta perseverancia den e asunto di salbacion?