Informe di Proclamador di Reino

Berdad bíblico ta liberta soeur den Bolivia

HOPI hende di curazón onrado ta hui di religion falso, i ta siña e berdad bíblico i ta acudi ne adoracion di Jehova, e berdadero Dios. Mas cu 7.600 a haci asina den Bolivia, incluyendo un soeur.

Ora M—— tabatin nuebe aña di edad so, e tabatin su promé contacto cu Testigo di Jehova. El a habri e porta ora un testigo a bishita su cas, i pe promé bez el a tende hende menciona Jehova, e nomber di Dios. Esei a keda pegá profundamente den su memoria pa hopi aña.

Siendo cu e tabata e único yiu muher den e famía, nan a decidi cu e mester bira soeur. Segun M——, “Mi a sintími mashá feliz cu lo mi bai den e sirbishi di Dios—por lo menos esei ta loke mi a kere.” Pero su gozo a bira desilusion ora el a mira e inhusticia i discriminacion practicá den e conbento. El a bisa: “Kizás mi nunca lo lubida atake di depresion i golpeamento fisical i spiritual cu a causa tanto agonía, i cu a hacími considera Dios, no como un Dios di amor, sino un Dios cu ta castiga hende sin compasion.”

El a sigi: “Ne tempo cu mi a bira soeur, mi no a logra haya e nomber di Jehova den e Bijbel. Mi solamente a haya ‘Yahweh,’ i esei a confundími. Un dia mi asta a sali pa busca e hendenan cu a papia tocante Jehova, pero mi nunca a háyanan.

“Tempo a pasa, i un dia ora mi tabata riba camina pe cas di mi famía, mi a mira un borchi, ‘Salón di Reino di Testigo di Jehova.’ Mi tabata kier bísanan cu nan ta profeta falso, pero no tabatin hende den e salón. Mi a bolbe diadomingo. Nan tabata celebra un reunion, i varios a parce di haya sorpresa pa mirámi den bistí di soeur. Despues dje reunion, mi a purba di sali lihé. Pero, un testigo a cumindámi, p’sei mi a puntré, ‘Pakico boso ta blasfema Esun Santo usando e nomber ei?’ Mi pregunta a resulta den un conbersacion bíblico, i mi a haci arreglo pe bishitámi den e cas di mi famía. Mi mayornan a saqué afó. Sin embargo, nos tabatin encuentro dos luna despues, i el a invitámi na su cas pa un estudio bíblico. Mi a keda mashá impresioná cu e informacion cu el a mustrámi, dunando prueba cu hende cristian mester usa e nomber di Dios. Tal evidencia a dunámi e fortaleza necesario pa bandona tur cos inútil cu nan a siñámi como soeur.

“Mi ta corda hopi cos tocante mi bida den e conbento. Por ehempel, un biaha mi tabatin mester di mas cuminda pa come. P’sei, mi a skirbi i a pidi mi mayornan manda cuminda pa mi, sin sa cu nan a leza tur carta den e conbento. Ne sigiente comí, nan a pone un gran cantidad di pan cu jam dilanti mi, i a forzámi di comé tur. Awo mi tabatin mucho cuminda. Mi a menciona esei cu mi amiganan, i uno a sugeri pa mi garna e pan cu mi no por a come i plamé na suela. Ora mi a haci esei, un soeur a cogémi un bez i a tirámi na suela, i a mandámi cu firmeza lembe henter e suela cu mi lenga. E comedor tabata grandi. Ora mi a obedece e ordu, mi a tende hopi harimento—nan no a mustra ningun misericordia cualkiera.

“Awor mi por mira cu ta ki maraviyoso pa ser liber di tur esei. Ta di spera cu e liberacion a exigi sacrificio. Entre otro cosnan, mi tata a sacámi for di cas. No obstante, promé cu mi a sali for dje conbento, mi tabatin e privilegio di siña otro soeur hoven e berdad. Ta dunámi alegría pa bisa cu algun di nos a dedica nos bida na Jehova Dios!

“Despues cu mi a bandona e conbento, tabata dificultoso pa mi tata comprende pakico mi a rechaza empleo cu bon pago pero cu a exigi hopi tempo. Pero, mi tabata deseá mas tempo pe sirbishi di Dios. Awor mi ta sirbi como un pionero regular, cu un bida senciyo pero mashá probechoso. I pa mi gran gozo, mi mama i ruman hombernan a uni cu mi den e sirbishi di Jehova.”

Realmente, e berdad bíblico ta libra hende for dje sistema di religion falso dje mundo aki, i ta duna gozo i felicidad duradero.—Juan 8:32.