Pakico tin tanto desesperacion?

SPERANZA pa un mihor bida—realizá por fin! Hopi hende bibando den loke tabata Oostalemania a kere esei ora e Muraya di Berlín a cai den November di 1989. Sin embargo, un poco mas cu un aña despues, nan a keha di “a haya e mundo severo di democrácia capitalista mas dificultoso pa enfrenta cu e bida cu e Muraya di Berlín a proteha.” Cu ki resultado? Desilusion i e aumento di desesperacion.

Violencia doméstico i dje comunidad por forza hende di bandona nan cas pa busca siguridad, pero poco hende ta hayé. Algun asta por háyanan cu hende sin cas cu tin campamento riba caya di stad. Den algun país hopi hende asina ta háyanan víctima di trámite di gobierno. Nan no por paga pa cas pasobra nan no tin trabao, nan no por haya empleo pasobra nan no tin adres. E ministerie van sociale zaken ta purba di yuda, pero tempo ta necesario pa resolve problema. Pues, frustracion i desesperacion ta cuminza.

Desesperacion ta obliga hopi hende muher di purba berdadero medida desesperá. Den e informe na inglés Hende muher i crimen desde 1990, e discursante riba ley, Dr. Susan Edwards, a splica: “Enbolbimento di muher hoven [den prostitucion] ta sosode como un resultado directo di necesidad económico, no como un falta di disiplina propio ni nan crianza.” Di igual manera, homber hoven cu ta bandona nan cas pa busca empleo hopi bez no ta hayé. Algun, den desesperacion, ta háyanan ‘V-jongen,’ mucha homber cu ta huur nan curpa na homosexual pa nan haya cuminda i cas, birando pión den man di cuadriyo criminal corrupto.

E realidad político severo, violencia, dificultad económico, tur esei por provoca varios grado di desesperacion. Asta hende profesional no ta liber di esei ora nan ta purba di mantene nan moda di biba di luho mientras cu nan ta enfrenta un aumento di problema financiero. Cu ki resultado? “Gewoon opresion por haci hende sabí bira loco,” manera rey Salomón di antigua a bisa!a (Eclesiastés 7:7) Berdad, desesperacion ta hiba un cantidad aumentante di hende pa scoge e camina di escape di mas extremo—suicidio.

E Camina di Escape di mas Extremo

E gran cantidad di suicidio di hende hoven ta mustra cu e plaga di desesperacion ta afecta asta nan. Un columnista noticiero británico a puntra: “Kico tin den nos tempo cu ta causa tanto desesperacion den hovenan?” Den un investigacion di mucha entre edad di 8 i 16 cu a drenta hospital despues di a bebe veneno, Dr. Eric Taylor dje Instituto di Sikiatría di Londres ta informa: “Un cos notable tabata cuanto dje muchanan tabata desesperá i sin speranza tocante cosnan.” Britania tin cuenta di un calculacion di 100.000 caso no fatal pero deliberá di bebimento di veneno tur aña den loke ta igual cu sclamacion desesperá pa yudanza.

Un organizacion caritativa británico a lanza un campaña pa scucha cu compasion hende desesperá. Dje manera ei consehero di dje a bisa cu nan a ofrece un “alternativa pa morto.” Pero, nan a admiti cu nan no por resolve problema cu ta haci hende desesperá.

E cantidad di suicidio ta refleha “e nivel di aislamento i falta di unidad social den humanidad,” segun e curant The Sunday Correspondent. Pakico tin un gran cantidad di suicidio awendia? E curant a menciona “e falta di cas, aumento di bebimento, e peliger di AIDS i ceramento di hospital mental” como factor cu ta forza hende te na asina un profundidad di desesperacion cu nan ta considera terminacion di nan mes bida como e único solucion pa nan problema.

Tin un speranza pa vence desesperacion? Sí! “Stret boso curpa i hiza boso cabez” tabata e declaracion animador di Jesús! (Lucas 21:28) Kico e kier men? Cua speranza tin?

[Nota]