Bida—Un Don di Dios

BINTICUATER ora pa dia, nos curazón ta manda e sanger precioso door di nos curpa. Nos ta bai drumi, i nos pulmón ta sigi expande i contrae. Nos ta come cuminda, i nos stoma ta traha riba dje automáticamente. Tur esei ta sosode tur dia, cu poco of ningun esfuerzo consiente di nos parti. Tal proceso misterioso i maraviyoso, cu nos fácilmente no ta tuma na cuenta, ta un parti dje don cu nos ta yama bida. Den un sentido, esei ta un don cu por ta yamá milagroso.

Considera e proceso di concepcion i nacimento humano. Aunque e curpa normalmente ta rechaza cos straño den dje, e matriz no ta rechaza webu fertilizá. En bez di rechaza embrión creciendo como cos straño, e ta crié i ta protehé te cu e ta cla pa sali como baby. Sin e capacidad dje matriz pa haci tal excepcion importante, rechazando cos straño, nacimento humano lo ta imposibel.

Asta asina, bida pa baby recién nací por ta cortico si no ta pe desaroyo cu ta sosode den e matriz ora e baby ta haci solamente rond di cuater luna di edad. Ne tempo ei e ta cuminza chupa su dede, eherciendo músculo cu despues ta haci posibel pe chupa pecho di su mama. I esei ta uno so di hopi asunto di bida i morto cu ta wordu resolví hopi tempo promé cu nacimento di baby.

Mientras cu e baby ta den e matriz, tin un burraco den e muraya di su curazón. Sin embargo, e burraco ta cera automáticamente ora e nace. Además, un bena grandi cu ta pasa rond di pulmón mientras cu e baby ta den e matriz ta bira mas chikito automáticamente ora e nace; i awor e sanger ta pasa den e pulmón, unda e ta yena cu oxígeno ora e baby ta hala su promé rosea.

Tur esei ta e principio so. Durante tur su bida, un serie di sistema elegantemente diseñá (tal como e sistema di respiracion, circulacion, nervio, i endocrina) ta cumpli cu nan funcion i ta coordinánan cu un eficacia cu ta tolondra comprendimento humano—tur locual ta pe perpetuacion di bida. No ta straño cu un skirbidor di antigua a bisa tocante Dios: “Lo mi alabábo pasobra mi ta ser trahá na moda inspirador di temor. Bo obranan ta maraviyoso, manera mi alma sa mashá bon.”—Salmo 139:14.

Claramente, e skirbidor di tal palabra bonita no a kere cu bida simplemente a sosode pa accidente ni pa causalidad evolucionario. Si esei ta e caso, nos lo no tin berdadero obligacion ni responsabilidad en cuanto con nos mester usa nos bida. Pero, e mecanismo di bida ta refleha diseño claramente i diseño tin mester di diseñador. E Bijbel ta declara e sigiente principio: “Naturalmente, tur cas hende ta traha, pero esun cu a traha tur cos ta Dios.” (Hebreo 3:4) P’sei ta vital pa “sa cu Jehova ta Dios. E ta esun cu a tráhanos, i no nos nos mes.” (Salmo 100:3) Sí, bida ta mas cu un accidente benigno; bida ta un don di Dios mes.—Salmo 36:9.

Siendo cu esei ta e caso, cua obligacion nos tin pa cu e Dunador di bida? Nos tin cu usa nos bida di ki manera, segun E? Eseinan i pregunta relacioná lo ser considerá den e sigiente artículo.