Apreciando e Don Precioso di Bida

BIDA—ki un posesion precioso! Sin bida, nos no por haci nada. Despues di perde bo bida, ningun hende por restoré. Si nos bida ta den peliger, nos ta haci tur loke ta razonabel pa conserbé. Sí, algun hende asta ta pidi yudanza superhumano ora nan ta den dificultad!

Esei ta hácinos corda e relato bíblico di un barcu cu un tempestad fuerte riba lamá a alcanza. Ora e barcu tabata cla pa naufraga, “marinero a cuminza spanta i pidi yudanza, cada un na su dios.” Despues, un i tur a inboca e Dios berdadero: “Ai, awor, O Jehova, haci fabor di no láganos perece.” E relato bíblico ta bisa també: “Nan a sigi tira artículo den lamá cu tabata den e barcu, pa aliviá e barcu di nan peso.”—Jonás 1:4-6, 14; compara cu Echo 27:18, 19.

Tal marinero a keda asta dispuesto pa sacrifica propiedad material precioso den un esfuerzo pa salba nan bida. Nos por reemplaza propiedad material—pero no bida mes. I pa motibo cu di instinto nos ta aprecia nos bida, nos ta evita peliger. Nos ta alimenta, ta bisti, i ta cuida nos curpa. Nos ta busca tratamento médico ora nos ta malu.

No obstante, e Dunador di bida ta spera pa nos haci mas cu simplemente sigi nos propio instinto protectivo. En todo caso, bida ta un don preciocísimo, i e ta bini dje Persona di mas importante den tur e universo. Den nos aprecio sincero tanto pe Dundador como pe don, nos no mester cuida nos bida? I esei no ta inclui mustra aprecio pe bida di otro ­hende?

No mester ta un sorpresa pa nos, anto, cu e Ley cu Jehova Dios a duna e nacion di Israel a inclui mandamento cu e propósito di proteha e bida i salud di otro hende. (Éxodo 21:29; Deuteronomio 22:8) Di igual manera, hende cristian djawe mester ta consiente di siguridad. Por ehempel, si bo tin yiu chikito na cas, den descuido, bo ta laga den nan alcance cosnan tal como collar, feneta, of obheto skerpi cu por causa daño severo na yiu cu ta hunga cu nan inocentemente of cu por gulínan? Químico i remedi peligroso ta wardá fuera di alcance di muchanan? Si bo ta basha awa riba floer, bo ta sequé lihé afin di preveni accidente? Bo ta percura pa drecha mashín di corriente di cas cu tin defecto? Bo auto ta recibi mantenecion regularmente? Bo ta un shofer cuidadoso? Si bo realmente ta aprecia e preciosidad di bida, lo bo keda conmoví pa tuma precaucion razonabel den tur sector ei i den otronan similar.

Sin embargo, lástimamente algun hende asta no ta tuma nan mes bida na cuenta. Por ehempel, ken djawe no sa cu humamente di cigaría no ta saludable? Pero, miles di hende ta esclabo dje bicio, mientras cu nan salud ta bai atrás cada bez cu nan ta traga e huma venenoso. Otro hende ta haci abuso di droga, i otronan ainda ta alcohólico, tur locual ta pa nan perhuicio. AIDS ta un maleza fatal pa locual no tin remedi conocí. Pero, hopi hende por evita di contagiá e maleza si nan evita inmoralidad sexual, cierto clase di abuso di droga, i transfusion di sanger. Ki un falta trágico di aprecio pa bida!—Romano 1:26, 27; 2 Corintio 7:1.

Ta Posibel pa Cambia!

Hende cu ta aprecia nan Gran Creador, Jehova Dios, tin un motibo fuerte pa considera bida como precioso. Bida ta su don sagrado. P’sei, nan ta keda dispuesto pa haci cualkier cambio necesario pa traté como un don divino. Considera experencia di Kwaku, un maestro den Ghana. E tabata malgasta su bida como un alcohólico descuidadoso.

Kwaku ta corda: “Mi kier a obliga mi casá di respetámi, locual hopi bez a resulta den argumento i pelea ardiente, specialmente ora mi tabata burrachi. Debí na mucho bebimento di alcohol, hopi bez mi no tabatin placa, i hopi bez mi no tabatin placa pa mantene e famía. Ta di comprende cu esei a irrita mi esposa mashá hopi. Ora placa a caba, (i esei a sosode frecuentemente), mi a haci loke mi por pa mantene mi bicio. Un biaha mi a bai asina leu cu mi a haci uso personal di placa cu mi a cobra for di alumno pe propósito di registránan pa examen público. Mi a corre paranda i a cumpra bebida pa bebedor compañé. Pronto, e dia di regla cuenta a alcanzámi. Si e hoofd no a scapámi oportunamente, mi por a perde mi trabao.

“Mi bida tabata un desaster. Mi a keda bergonzá, pero pronto mi a recobrámi. Anto mi a cuminza desaroyá idea di suicidio pasobra mi a kere cu mi bida tabata un fracaso. Sin embargo, mi no por a librámi dje bicio di alcohol. Pero, a sosode cu un dia den un cantina mi a inbolucrámi den un pelea cu hende burrachi i tabata puñalá, a drenta den mi mente penosamente cu mi amor pa alcohol lo costámi mi bida un dia.

“Tur es tempo, Testigo di Jehova tabata bishita nos cas cada bez, haciendo esfuerzo pa interesános den e Bijbel. Mi esposa i mi semper a evitánan pasobra nos a kere cu nan tabata fastioso. Pero, na un ocasion, mi a decidi di scúchanan pa ser amable. Pronto, un estudio bíblico a habri mi wowo ne prospecto maraviyoso di biba pa semper den e sistema nobo di Dios. Mientras mas mi a studia e Bijbel cu e yudanza di Testigo di Jehova, mas profundo mi aprecio a bira pa Jehova Dios como e Dunador di bida i pa su don di bida, i mas impresioná mi a keda cu lo práctico di conseho bíblico. Esei a animámi mas pa drecha mi bida. Esei no tabata fácil, pasobra mi tabatin cu resisti alcohol continuamente i també compañé bieu. Jehova Dios, e Scuchador di oracion, a mira e determinacion di mi curazón i a tendémi.a

“Aunque mi esposa no ta un Testigo di Jehova, awor e ta tene mashá aprecio pa mi i pa mi religion debí ne gran transformacion cu e ta mira den mi bida i den nos relacion matrimonial. Nos beciña no tin cu entremeténan mas den pelea entre ami i mi esposa. Mi ta aprecia e trankilidad cu mi ta disfruta awor. Siguramente, un aprecio di Jehova Dios como e Dunador di nos bida, un adopcion di su punto di bista dje preciosidad di bida, i obedencia na su instruccion en cuanto con pa biba ta e único moda di biba cu ta bale la pena.”

E Oferta di Dios di Bida Eterna

Testigo di Jehova a yuda miles di hende manera Kwaku, “bisti e personalidad nobo cu a wordu creá conforme cu e boluntad di Dios den berdadero husticia i lealtad.” (Efesio 4:24) Nan no solamente a yega di aprecia nan bida actual sino també e speranza di bida eterna den un paradijs terrenal. E Bijbel ta priminti cu den e Paradijs cu Dios lo percura, ningun habitante dje tera hamás lo experimenta remordimento di hamber, pasobra “Jehova di ehército siguramente lo prepara pa tur pueblo . . . un banquete di plato yen di azeta.”—Isaías 25:6.

Actualmente, aunque bida ta un don maraviyoso, e ta temporario so. Morto ta enfrenta tur hende, i morto ta asina un golpi traumático! Pa mira un hende cu bo ta stima desparce for di esnan bibiente pa drumi den e silencio dje graf ta mashá dolor, por lo menos. Pero, bao dje Reino di Dios, cu Cristo como Gobernante, e promesa di Jehova Dios lo ser cumplí: “Lo no existi morto mas, ni yoramento ni sclamamento ni dolor lo no existi mas. E cosnan anterior a pasa caba.”—Revelacion 21:4.

Ne tempo ei e don di bida lo ser extendí di manera maraviyoso. Sobrebibiente dje tribulacion final riba tera lo haya e oportunidad di drenta den e plenitud di bida. Anto, pa medio dje resureccion, un restoracion di bida, Jehova Dios lo restora su don preciocísimo na hende cu ta drumi den morto. (Juan 5:24, 28, 29) Esei lo nifica e bolbimento di stimánan morto i hende di antigua temeroso di Dios!

Tur esei ta mucho bon pa ser e berdad? No, pasobra “cu Dios ningun declaracion lo ser un imposibilidad.”—Lucas 1:37; compara cu Job 42:2.

Además, Jehova Dios mes a percura un garantía pa humanidad di cu tur esei lo sosode. Di ki manera? Cu e sacrificio di esun mas precioso pa su curazón, su Yiu stimá, Jesucristo, pa rescatános for di picá i morto. Romano 8:32 ta dúnanos e siguranza: “[Jehova Dios] ni sikiera a libra su mes Yiu sino a entregué pa nos tur, pakico lo e no dúnanos bondadosamente també cuné tur otro cos?” E Bijbel ta bísanos cu esei lo inclui hacimento di humanidad limpi di decadencia moral i eliminacion di tur forma di inhusticia, crimen, i violencia. (Isaías 11:9) Nunca mas bida lo ser considerá como di poco balor.

Asta awor, den circunstancia imperfecto, bida por ta mashá gozoso. Ken no ta gusta e holor sabroso di cuminda, e bientu suave riba un dia di calor, e bista di montaña halto, e color bonita di drentamento di solo, e lamá calmo labando e costa, e color encantante di flor, e sonido di música dushi, of e cantamento di páhara? Para un rato. Corda, con e disfrute di tal cosnan lo ta pa tur eternidad?

Ta razonabel, anto, pa tira afó e privilegio precioso di biba pa semper debí na cualkier placer temporario cu un moda di biba complaciente i irrazonabel por ofrece? (Compara cu Hebreo 11:25.) Sabiamente, e Bijbel ta consehános pa ‘pasa e resto di nos bida, no mas pa deseo di hende, sino pe boluntad di Dios.’ (1 Pedro 4:2) Nos sinceramente ta animábo, sí, ta urgíbo, pa haci esei, studiando e Palabra di Dios, e Bijbel, i poniendo na práctica loke bo ta siña. (Juan 13:17) Asina bo por drenta den un bon relacion cu Jehova Dios, e Dios pasando over cu bondad i misericordia, cu por recompensábo cu bida eterna!

[Nota]

[Plachi na página 5]

Bo moda di biba ta demonstra un aprecio pa bida?

[Plachi na página 7]

E mundo nobo di Dios lo permitínos disfruta di placer di bida pa semper!