‘Laga Bo Progreso Ser Manifestá’

“Awor cu mi a bira homber, mi a elimina inclinacion di baby.” —1 CORINTIO 13:11.

NACIENDO for di un webu asina chikito cu bo por miré solamente cu microscop, bayena por crece pa bira un bestia mas cu 30 meter largu i cu un peso di mas cu 80 ton. Di igual manera, creciendo for di simía di mas chikito, e palu gigante yamá secoya por yega mas cu 90 meter halto. Berdaderamente, crecimento ta un maraviya di bida. Manera apóstol Pablo a bisa, nos por planta i muha, pero Dios ta esun cu ta “hacié crece.”—1 Corintio 3:7.

² Sin embargo, tin un otro clase di crecimento cu ta igualmente asombroso. Esei ta e crecimento cu profeta Isaías a profetiza: “Esun menor mes lo bira mil, i esun chikito un nacion poderoso. Ami mes, Jehova, lo aceleré na su debido tempo.” (Isaías 60:22) E profecía tin cu ber cu e aumento dje pueblo di Dios, i ta realiza un cumplimento mayor den nos tempo.

³ E informe dje aña di sirbishi di 1991 dje actividad mundial di Testigo di Jehova ta mustra cu e cantidad di publicador di Reino a alcanza un máximo nobo di 4.278.820, i un total di 300.945 persona tabata bautizá durante e aña. Cu e drentamento di tanto hende nobo, 3.191 congregacion nobo tabata formá, hunto cu un cantidad correspondiente di circuito i districto nobo. Esei ta mas cu 8 congregacion nobo pa dia, casi un circuito nobo cada dos dia. Ki un aumento maraviyoso! Claramente, Jehova ta acelera cosnan, i su bendicion ta riba esfuerzo di su pueblo.—Salmo 127:1.

Tempo pa un Examinacion Propio

⁴ Aunque ta animador pa mira esei, e bendicion també ta trece cuné cierto responsabilidad. Lo tin suficiente ruman cu e madurez i e gana pa atende ne necesidad spiritual di tur esnan nobo? Mientras cu nos ta mira padilanti ne futuro, ta tolondrador pa corda e cantidad di pionero, sirbidor ministerial, anciano, i superintendente biahero necesario pa atende ne aumento i expansion, i també ne cantidad di trahador boluntario necesario den oficina di sucursal i Cas di Betel rond di mundo pa apoya e trabao. Di unda e gran cantidad di hende lo bini? No cabe duda cu e cosecha ta grandi. Pero, ken den e dia djawe ta den un posicion pa atende na tur trahador necesario pa cosechá e cosécha?—Mateo 9:37, 38.

⁵ Por ehempel, segun informe, den algun parti di mundo, tin congregacion cu tanto como cien publicador di Reino cu un anciano so hunto cu un of dos sirbidor ministerial pa sírbinan. Aveces un anciano tin cu sirbi den dos congregacion. Den otro lugar e necesidad pa sirbidor cristian capacitá conducí estudio bíblico di cas ta asina grandi cu nan tin cu traha lista di hende nobo sperando un estudio. Den otro territorio ainda, congregacion nobo ta ser formá na un grado asina lihé cu tres, cuater, of asta cinco congregacion tin cu usa un solo Salón di Reino. Kizás bo a mira aumento manera esei den bo mes territorio.

⁶ Kico lo anterior ta bísanos? Cu den bista dje tempo, nos tur tin cu examina nos circunstancia pa mira si nos ta saca e mayor probecho for di nos tempo i recurso afin di reacciona favorablemente ne necesidad. (Efesio 5:15-17) Apóstol Pablo a skirbi na cristian hebreo dje promé siglo: “Pasobra, en realidad, aunque boso mester ta siñador den bista dje tempo, boso tin mester pa hende siña boso di nobo desde e principio e cosnan fundamental di declaracion sagrado di Dios; i boso a bira manera hende cu tin mester di lechi, no cuminda sólido.” (Hebreo 5:12) Manera e palabra ei ta indica, hende cristian individualmente també tin cu crece. I tin un berdadero peliger cu hende por tarda den infancia spiritual en bez di progresa te na madurez cristian. Na armonía cu esei, Pablo a úrginos: “Sigi pone boso na prueba pa mira si boso ta den e fe, sigi duna prueba di loke boso mes tá.” (2 Corintio 13:5) Bo a examina bo mes pa mira si bo a crece spiritualmente desde e tempo di bo bautismo? Of bo a keda pará? Pero, con bo por determina esei?

“Inclinacion di Baby”

⁷ “Ora mi tabata baby, mi tabata papia manera baby, pensa manera baby, razona manera baby; pero awor cu mi a bira homber, mi a elimina inclinacion di baby,” segun apóstol Pablo. (1 Corintio 13:11) Den desaroyo spiritual, na un tempo nos tur tabata manera mucha den nos pensamento i accion. Sin embargo, pa nos progreso ser manifestá, nos tin cu elimina “inclinacion di baby,” manera Pablo a bisa. Cua ta algun inclinacion asina?

⁸ Primeramente, ripara e palabra di Pablo den Hebreo 5:13, 14: “Tur hende cu ta bebe lechi no ta conoce e palabra di husticia, pasobra nan ta baby. Pero cuminda sólido ta pertenece na hende hecho, na esnan cu via uso tin nan facultad di comprendimento entrená pa distingi tanto loke ta bon como loke ta malu.” Bo ta ‘conoce e palabra di husticia’? Bo ta conoce e Palabra di Dios, e Bijbel, suficientemente pa ser capaz pa usé pa “distingi tanto loke ta bon como loke ta malu”? Pablo a bisa cu hende cu tin madurez por haci esei pasobra nan ta tuma “cuminda sólido” regularmente. Pues, bo deseo of apetit pa alimento spiritual sólido ta un bon indicador di si bo a crece spiritualmente of ta keda un baby spiritual ainda.

⁹ Anto, con ta bai cu bo apetit spiritual? Con bo ta considera e abastecimento abundante di alimento spiritual cu Jehova Dios ta percura regularmente mediante publicacion bíblico i reunion cristian i asamblea? (Isaías 65:13) Sin duda bo ta alegrá mashá si publicacion nobo ta ser presentá na asamblea anual di districto. Pero, kico bo ta haci cu nan despues di yega cas? Kico bo ta haci ora un número nobo dje revista Toren di Vigilancia of Despertad! ta yega? Bo ta aparta tempo pa leza tal publicacion, of bo simplemente ta pasa rápidamente door di nan pa tira un bista riba punto sobresaliente anto ta wárdanan den cashi hunto cu e otronan? Pregunta similar por ta hací tocante reunion cristian. Bo ta asisti regularmente na tur reunion? Bo ta prepara pa nan i també ta participa den nan? Aparentemente algun a cai den mal costumber den nan alimentacion spiritual, den un sentido nan ta leza i ta come na carreda. Tabata ki diferente cu e salmista, cu a bisa: “Cuanto mi ta stima bo ley! Tur e dia largu esei ta mi interés.” Además, rey David a bisa: “Lo mi alabábo den e congregacion grandi; lo mi alabábo den un cantidad di hende.” (Salmo 35:18; 119:97) Claramente, e grado na locual nos ta aprecia percuracion spiritual ta un indicador di nos progreso spiritual.

¹⁰ Pablo a siñala na un otro inclinacion di un baby spiritual ora el a adverti cu nos no mag ser “mucha chikito mas, bentá como si ta pa ola i hibá p’aki i p’ayá pa tur bientu di siñanza pa medio di triki di hende, i pa medio di astucia den invento di error.” (Efesio 4:14) Manera mayornan wel sa, yiu ta curioso tocante tur cos. Di un manera esei ta un inclinacion positivo pasobra e ta haci posibel pa nan explora i siña i gradualmente desaroya na hende hecho. Sin embargo, tin un peliger pasobra nan ta ser destraí fácilmente pa un cos tras di otro. Loke ta pior, debí na falta di experencia, hopi bez tal curiosidad ta híbanan na dificultad serio, asta peligrando nan mes i otro hende. Esei també ta cierto di baby spiritual.

¹¹ Sin embargo, kico Pablo tabatin pensá ora el a bisa cu baby spiritual ta ser tirá p’aki i p’ayá pa “tur bientu di siñanza”? Ei, “bientu” ta ser traducí for dje palabra griego aʹne·mos, en cuanto locual e International Critical Commentary ta bisa cu evidentemente tabata “escogí como apropiado pe idea di cambiabilidad.” Esei ta wel ilustrá den e sigiente palabra di Pablo, “pa medio di triki di hende.” E palabra “triki” den e idioma original ta nifica básicamente “dao” of “wega di dao,” es decir, wega di placa. E punto tá cu idea nobo i interésnan ta enfrentános constantemente, locual por parce inofensivo, atractivo, i asta probechoso. E palabra di Pablo ta aplica primeramente na asunto relacioná cu nos fe—movimento ecuménico, meta social i político, etc. (Compara cu 1 Juan 4:1.) Pero e principio ta aplica també na moda di bistí di ­mundo cu ta cambia cada bez—na estilo, diverticion, cuminda, rutina di salud of ehercicio, etc. Debí na falta di experencia i sano huicio, baby spiritual por ta destraí demasiadamente pa tal cosnan i asina ser strobá di haci progreso spiritual i cumpli cu nan obligacion cristian mas importante.—Mateo 6:22-25.

¹² Un otro inclinacion di mucha chikito ta nan necesidad constante di yudanza i atencion. Nan no ta reconoce ni no ta interesá den responsabilidad; infancia ta e tempo di bida ora casi tur cos ta simplemente wega i diverticion. Manera Pablo a bisa, nan ta ‘papia manera baby, ta pensa manera baby, i ta razona manera baby.’ Nan ta kere cu di mes otro hende lo atende na nan. Nos por bisa mescos tocante baby spiritual. Ora un persona nobo ta duna su promé discurso bíblico of ta cuminza sali den e sirbishi di feld pe promé bez, su mayornan spiritual ta keda contentu pa haci tur cos pa yuda. Kico ta pasa si e persona nobo ta sigi depende di tal yudanza i ta resulta di ser incapaz pa acepta e responsabilidad di atende na nan mes? Claramente esei ta un indicacion di falta di esfuerzo personal.

¹³ En cuanto esei, corda e conseho di apóstol Pablo cu aunque nos mester “sigi wanta carga un di otro,” toch “cada un lo wanta su mes carga.” (Galatio 6:2, 5) Naturalmente, tempo i esfuerzo ta necesario pa siña acepta bo responsabilidad cristian, i esei por nifica hacimento di sacrificio den cierto sector. Sin embargo, ta un equibocacion serio pa permitíbo keda asina enbolbí den wega i diverticion di bida, sea cu esei ta recreo, biahamento, aparato di cas, of asta sigimento innecesariamente tras di trabao seglar, cu bo simplemente ta para un banda, den un sentido, sin ningun deseo pa aumenta bo parti den e trabao di haci disípel of forza pa haci progreso spiritual i alcanza responsabilidad. Disípel Santiago a urgi: “Bira hacidor dje palabra, i no scuchador so, gañando boso mes cu razonamento falso.”—Santiago 1:22; 1 Corintio 16:13.

¹⁴ Sí, tin hopi inclinacion fácilmente mirá cu ta distingi mucha for di hende adulto. Sin embargo, e cos importante, segun Pablo, ta pa nos gradualmente elimina inclinacion di baby i crece. (1 Corintio 13:11; 14:20) Di otro manera, nos por keda retardá den un sentido spiritual. Pero, con bo por haci progreso? Mantenecion di crecimento spiritual te na madurez ta enbolbe kico?

Con Progreso ta Ser Manifestá

¹⁵ Wel, con crecimento ta sosode den e mundo di naturaleza? Segun e splicacion di The World Book Encyclopedia, “Cada individuo ta cuminza bida como un solo cel. E cel ta recibi material i ta conberti esei na bloki di construccion cu e mester pe crece. Asina, e solo cel ta crece den su interior. E cel por multiplica i parti pa forma otro cel. E proceso di construccion, multiplicando, i partiendo ta crecimento.” E punto notable aki ta cu e crecimento ta sosode den su interior. Ora e ta come cuminda apropiado, ta saca probecho di dje, i ta usé, crecimento ta e resultado. Esei ta ser mirá claramente den e caso di un baby recién nací. Manera nos sa, un baby recién nací ta recibi un surtido continuo di lechi, locual ta cuminda specialmente formulá, ricu den manteca i proteína, e material cu e mester pa ­crecimento. Cu cua resultado? E cantidad di crecimento en relacion cu e peso i haltura cu un baby ta alcanza den un aña nunca ta ser igualá durante ningun otro aña di crecimento normal pe resto di su bida.

¹⁶ Tin hopi cos pa nos siña for dje proceso natural di tal crecimento cu nos por aplica na nos progreso spiritual for di loke ta básico te na madurez. Promé cu tur, un programa di alimentacion continuo ta necesario. Corda e tempo ora bo a cuminza na principio pa studia e Bijbel. Si bo ta mescos cu casi tur otro hende, probablemente bo no tabata sa casi nada tocante e Palabra di Dios. Pero, siman tras siman bo a prepara bo les i tabatin bo estudio bíblico, i den relativamente poco tempo, bo a yega di comprende tur siñanza básico dje Scritura. Bo tin cu admiti cu esei tabata crecimento fantástico, i tur esei como un resultado di alimentacion regularmente riba e ­Palabra di Dios!

¹⁷ Sin embargo, kico djawor? Bo ta sigi ainda un programa di alimentacion regularmente? Bo nunca mag pensa cu ya cu bo a bautiza, bo no tin mas necesidad di un estudio sistemático regularmente pa recibi alimento spiritual nutritivo. Aunque Timoteo tabata un superintendente cristian maduro, Pablo a urgié: “Medita riba e cosnan aki; keda intensamente ocupá cu nan, pa bo progreso ser manifestá na tur hende.” (1 Timoteo 4:15) Cuanto mas cada un di nos tin mester di haci esei! Si bo ta interesá pa haci bo progreso spiritual manifestá, tal esfuerzo ta necesario.

¹⁸ Ora bo ta haci bo progreso manifestá, esei no kier men cu bo ta haci un esfuerzo special pa haci exhibicion di loke bo sa of ta purba di impresioná otro hende. Jesús a bisa: “Boso ta luz di mundo. Un stad no por ta scondí ora e ta situá riba un montaña” i, “for di abundancia di curazón e boca ta papia.” (Mateo 5:14; 12:34) Ora nos mente i curazón ta yená cu e bon cosnan dje Palabra di Dios, nos no por evita e manifestacion di esei den loke nos ta haci i ta papia.

¹⁹ P’sei, e pregunta ta presenta: Bo ta studia e Bijbel regularmente i ta asisti na reunion cristian pa recibi material nutritivo cu por stimula bo crecimento spiritual interno? No keda satisfecho di ser un observador ketu den e asunto di desaroyo spiritual. Dal paso positivo pa haci sigur cu bo ta saca mayor probecho dje alimento spiritual abundante cu Jehova Dios ta percura. Si bo ta un hende cu tin ‘gozo den e ley di Jehova, i bo ta leza den su ley cu boz abao dia i anochi,’ anto e por bisa di bo també: “E siguramente lo bira manera un palu plantá cant’i rio di awa, cu ta duna su mes fruta den su temporada i foyo di dje no ta seca, i tur loke e ta haci lo tene bon éxito.” (Salmo 1:2, 3) Pero, kico bo por haci pa bo keda sigur cu lo bo sigi haci progreso spiritual? Nos lo considerá esei den e sigiente artículo.

Bo Por Contestá?

◻ Pakico ta oportuno pa controla nos progreso spiritual?

◻ Con crecimento spiritual ta relacioná cu apetit spiritual?

◻ Kico kier men “tur bientu di siñanza”?

◻ Pakico cada un tin cu wanta su mes carga?

◻ Con bo ta logra progreso spiritual?

[Preguntanan di Estudio]

1. Di ki manera crecimento ta duna testimonio dje maraviya di creacion?

2. E Bijbel ta profetiza di cua clase di creci­mento?

3. Con e informe dje aña di sirbishi di 1991 ta mustra cu Jehova Dios ta acelera e trabao di su pueblo?

4. Cua pregunta mester ta considerá ora nos ta mira den futuro?

5. Cua situacion ta existi den algun territorio debí na aumento rápido?

6. Pakico examinacion propio ta oportuno di nos parti?

7. Pa nos progreso spiritual ser manifestá, kico nos mester haci?

8. Segun e palabra di Pablo den Hebreo 5:13, 14, cua ta un inclinacion di baby spiritual?

9. Con bo apetit spiritual ta un indicacion di bo progreso spiritual?

10. Cua inclinacion di baby spiritual ta ser indicá den Efesio 4:14?

11. (a) Kico Pablo tabatin pensá ora el a usa e expresion “tur bientu di siñanza”? (b) Cua ‘bientu’ ta confrontános awe?

12. En cuanto responsabilidad, ki diferencia tin entre mucha chikito i hende hecho?

13. Pakico cada un mester siña wanta su mes carga?

14. Pakico nos no mag keda satisfecho manifestando inclinacion di baby spiritual?

15. Menciona e pasonan básico den e proceso di crecimento.

16. Cua clase di crecimento ta ser mirá den casi tur studiante nobo di Bijbel, i con esei ta ser hací posibel?

17. Pakico un programa di alimentacion spiritual regularmente ta necesario?

18. Con e progreso spiritual di un persona ta ser manifestá?

19. Nos mester keda determiná di haci kico en cuanto nos progreso spiritual, i cu cua resultado na bista?

[Plachi na página 10]

Bo ta aparta tempo pa leza publicacion bíblico?