Mi a Traga mi Orguyo i a Haya Felicidad

NA 1970, mi tabatin 23 aña di edad i tabata ambicioso. Den mi lugar di empleo den un club di auto den Ivrea, Italia, nan a hacími oficinista principal. Mi a keda determina di ser algo. I toch mi a keda mashá desconsola i tristu. Pakico?

Mi casá a pasa e mayor parti di su tempo den cantina hungando carta cu amigo, i a lagámi carga casi tur e responsabilidad dje famía. Nos relacion a cuminza bai atrás. Nos a pleita riba cosnan di mas chikito. Como resultado, mi mente a yena cu pensamento negativo.

Mi a bisa, ‘Ningun hende realmente ta interesá den mi. Nan solamente kier probecha di mi puesto.’ Mi a bisa mi mes: ‘No por existi Dios pasobra si e ta existi, lo e no permiti tanto sufrimento i maldad. Bida ta solamente un carreda den direccion di morto.’ Mi no por a comprende pakico tabata asina.

E Principio di un Cambio

Un dia na 1977, dos Testigo di Jehova a bati mi porta. Giancarlo, mi casá, a invitánan padén, i nan a bai den sala pa papia. Su intencion tabata pa nan bira evolucionista mescos cuné, pero nan tabata esnan cu a cambia su pensamento!

Pronto Giancarlo també a cuminza haci cambio den su bida. El a tene mas pacenshi, a dedica mas tempo i atencion na mi i na nos yiu. El a purba di papia cu mi tocante loke e tabata siña, pero invariablemente mi a termina e conbersacion riba un nota amarga.

Anto un dia ora e testigonan a yega, mi a sinta i berdaderamente a scucha. Nan a papia tocante e fin dje sistema di cosnan aki i tocante e Reino di Dios, Paradijs riba tera, i e resureccion di hende morto. Mi a keda tolondrá! Mi no a drumi pe sigiente tres anochi! Mi a deseá di sa mas, pero orguyo a strobámi di haci mi casá pregunta. Anto un dia el a bisámi seriamente: “Awe bo ta bai scucha. Mi tin contesta pa tur bo preguntanan.” Anto e simplemente a basha berdad bíblico pa mi.

Giancarlo a bisámi cu Jehova ta e nomber dje Creador, cu su atributo principal ta amor, cu el a manda su Yiu como rescate pa nos por haya bida eterna, i cu despues di destruccion di hende malbado na Armagedón, Jesucristo lo resusitá hende morto durante su Reino di mil aña. El a bisa cu hende resusitá lo crece te na perfeccion mental i fisical i cu nan lo haya oportunidad pa biba pa semper den Paradijs riba tera.

Su mañan, mi a compaña mi casá na Salón di Reino pe promé bez. Despues mi a bisé: “E hendenan ei ta stima otro. Mi kier sigi bini aki pasobra nan ta realmente feliz.” Mi a cuminza asisti na reunion regularmente, i nan a cuminza tene un estudio bíblico cu mi. Mi a pensa hopi riba loke mi tabata siña i pronto a keda convencí cu mi a haya e berdadero pueblo di Dios. Na 1979 mi casá i mi a simboliza nos dedicacion na Jehova Dios cu nos bautismo.

E Sirbishi di Tempo Completo

Na un asamblea di circuito mas despues e aña ei, nan a duna un discurso animando e actividad di predicacion di tempo completo. Mi a sintími conmoví pa drenta den tal sirbishi, i mi a acudi na Jehova Dios den oracion tocante e asunto. Pero, e ora ei mi a sali na estado, i mi plan a wordu interrumpí. Durante e sigiente cuater aña nos tabatin tres yiu. Dos di nan, na diferente ocasion, a desaroya defecto fisical cu a peligrá nan bida. Den cada caso, gracias na Dios, nan a recobra completamente.

Awor mi a kere cu mi no por tarda mas pa cumpli cu mi plan pe sirbishi di tempo completo. Mi a kita for di mi trabao seglar pa mi por concentra mihor riba mi responsabilidad como esposa i mama. Mi casá i mi a traha plan pa biba riba un solo entrada, locual a nifica bandona tur cos innecesario. Pero, Jehova Dios a bendicionános ricamente, i nunca a bandonános na pobreza ni na necesidad.

Na 1984 mi yiu muher, cu a caba di haci 15 aña di edad i cu recientemente a bautiza, a cuminza e sirbishi di tempo completo como pionero. Ne mesun tempo, mi esposo tabata nombrá como anciano. I ami? Pensando cu mi no por bira pionero ainda, mi a pone e meta di 30 ora pa luna den e trabao di predica. Mi a alcanza esei i a bisa mi mes: ‘Bon hací! Bo ta haci basta.’

Sin embargo, un biaha mas orguyo a bira mi problema. (Proverbio 16:18) Mi a sigi pensa ki bon mi tabata haci i cu mi no tabatin cu haci mas progreso spiritual. Mi spiritualidad a cuminza mengua, i mi asta a cuminza perde bon calidad cu mi a alcanza. Anto mi a recibi e disiplina cu mi a falta.

Na 1985 dos superintendente biahero i nan esposa a bishita nos cas ora nan a haci nan bishita regular na nos congregacion. Mirando tal hende cristian humilde cu a haci sacrificio propio realmente a hacími medita riba asuntonan. Mi a haci investigacion dje asunto di humildad, usando publicacion dje Sociedad Watch Tower. Mi a pensa riba e gran humildad cu Jehova Dios ta demonstra den su tratamento cu nos como hende pecador. (Salmo 18:35) Mi tabata sa cu mi tabatin cu cambia mi pensamento.

Mi a roga Jehova pa yudámi cultiva humildad pa mi por sirbié manera e kier i guiámi den e uso di don cu mi tin pa su gloria. Mi a yena e formulario pa sirbishi di pionero, i mi a cuminza sirbié den e sirbishi di tempo completo den Mart di 1989.

Awor mi por bisa cu mi ta berdaderamente feliz i cu e tragamento di mi orguyo ta loke a contribui na mi felicidad. Mi a haya un berdadero motibo pa biba, es decir, pa yuda hende den necesidad yega di sa cu Jehova, e Dios berdadero, no ta leu for di hende cu ta busqué.—Segun cu Vera Brandolini a conté.