Pregunta di Lector
Testigo di Jehova ta evita celebracion di cumpliaña pa motibo cu e costumber tabatin un nificacion religioso den tempo di antigua?
E celebracion di cumpliaña tin su raíz den supersticion i religion falso, pero esei no ta e único motibo ni esun principal di pakico Testigo di Jehova ta evita e costumber.
Algun costumber cu tabatin naturaleza religioso na antes no ta asina mas den hopi lugar. Por ehempel, rinchi di matrimonio tabatin un nificacion religioso na antes, pero no ta asina den e mayoría di lugarnan awendia. P’sei, hopi cristian berdadero ta acepta e costumber local di usa rinchi di matrimonio pa indica cu nan ta casá. Den asunto asina, loke generalmente ta e factor determinante ta si un costumber ta relacioná cu religion falso awendia.—Mira “Pregunta di lector” den La Atalaya di 1 di October di 1972 i 15 di October di 1991.
Sin embargo, innengablemente tin hopi buki di consulto cu ta menciona e origen supersticioso i religioso di celebracion di cumpliaña. The Encyclopedia Americana (redaccion di 1991) ta bisa: “E mundo antigua di Egipto, Grecia, Roma, i Persia a celebra cumpliaña di dios, rey, i aristocrat.” E ta bisa cu romano a celebra e nacimento di Artemis i e dia di Apolo. Na contraste, “aunque israelita di antigua a tene registro di edad di ciudadano barón, no tin evidencia di cu nan tabatin fiesta riba aniversario di dia di nan nacimento.”
Otro buki di consulto ta duna hopi detaye riba e origen di celebracion di cumpliaña: ‘Fiesta di cumpliaña a cuminza hopi aña pasá den Europa. Hende a kere den bon spiritu i mal spiritu, i nan a kere cu nan por a haci bon of malu pa hende. Tur hende tabatin miedu cu tal spiritu por haci daño na hende cu a celebra su cumpliaña, i p’sei amigo i famía a rondoné pa nan bon deseo i presencia protegé di peliger desconocí cu por a presenta durante e cumpliaña. Dunamento di regalo a duna asta mas proteccion. Comimento hunto tabata otro proteccion i a yuda trece bendicion di bon spiritu. Asina, e propósito original di fiesta di cumpliaña tabata pa proteha hende di malu i garantiza un bon aña entrante.’—Fiesta di cumpliaña rond di mundo (inglés), 1967.
E buki ta splica també e origen di hopi costumber di cumpliaña. Por ehempel: “E motibo [di uso di bela] a origina den pueblo griego i romano di antigua cu a kere cu bela tabatin poder mágico. Nan a haci oracion i a expresa nan deseo locual flam di bela a hiba pa nan dios. Anto nan dios a manda nan bendicion i kizás a contesta nan oracion.” Tin un coleccion di mas informacion asina di pasado riba bladji 97 dje buki Razonamiento a partir de las Escrituras, un publicacion di Watchtower Bible and Tract Society of New York, Inc.
Manera nos a bisa caba, e cuestion ta enbolbe mas cu simplemente determina si celebracion di cumpliaña tabatin algun nificacion religioso, of si nan tin esei ainda. E Bijbel ta menciona e asunto di cumpliaña, i cristian maduro ta responde sabiamente ne guía cu e ta duna.
Sirbidor di Dios di antigua a tuma nota di fecha di nacimento di hende, pa nan por calcula nan edad. Nos ta leza: “Noé a yega di tin cinco cien aña di edad. Despues di esei Noé a bira tata di Sem, Cam i Jafet.” “Den aña seis cien dje bida di Noé, . . . tur fontein dje enorme profundidad di awa tabata kibrá.”—Génesis 5:32; 7:11; 11:10-26.
Asta Jesús a bisa cu e nacimento di un criatura ta un ocasion bendito i feliz den e pueblo di Dios. (Lucas 1:57, 58; 2:9-14; Juan 16:21) Sin embargo, e pueblo di Jehova Dios no a conmemora e fecha di nacimento; nan a celebra otro aniversario, pero no cumpliaña. (Juan 10:22, 23) Encyclopaedia Judaica ta bisa: “Celebracion di cumpliaña no tabata parti di ceremonia tradicional hudío.” E buki na inglés, Costumber i tradicion di Israel ta bisa: “E celebracion di cumpliaña tabata fiá for di costumber di otro nacion, pasobra no tin ningun mencion dje costumber di hudío ni den e Bijbel, ni den e Talmud ni den e skirbimento dje sabínan di tempo despues. Realmente, esei tabata un costumber egipcio di antigua.”
Ta keda bisto cu e tabata un costumber egipcio pasobra tin un relato bíblico di un celebracion di cumpliaña den locual no tabatin presente ningun adorador berdadero. Esei tabata un fiesta di cumpliaña dje faraó cu a goberna ora Josef tabata den un prisón egipcio. Algun hende pagano asina por a disfruta dje fiesta, pero nan a cap e cabez dje hefe di panadero di faraó durante e cumpliaña.—Génesis 40:1-22.
E Scritura també ta menciona desfavorablemente un otro celebracion di cumpliaña—esun di Herodes Antipas, yiu di Herodes e Grandi. Tal fiesta di cumpliaña di ningun manera ta ser presentá den e Bijbel como un simple fiesta inocente. Mas bien, durante dje nan a cap e cabez di Juan bautista. Anto, “su disípelnan a bini i a hiba e cadáver i a deré i a bini i a informa Jesús,” cu ‘a retirá djei na un lugar solitario pe ser so.’ (Mateo 14:6-13) Bo ta kere cu e disípelnan of Jesús a sinti un atraccion ne costumber di celebracion di cumpliaña?
Den bista dje origen conocí di celebracion di cumpliaña, i mas importante, siendo cu e Bijbel ta mencionánan desfavorablemente, Testigo di Jehova tin motibo amplio pa abstene dje costumber. Nan no tin cu sigi tal costumber mundano, pasobra nan por goza di comimento feliz na cualkier tempo di aña i ta hacié. Nan dunamento di regalo no ta obligatorio ni bao di presion di un fiesta; mas bien nan ta hacié espontáneamente na cualkier tempo i debí na nan generosidad i berdadero cariño.—Proverbio 17:8; Eclesiastés 2:24; Lucas 6:38; Echo 9:36, 39; 1 Corintio 16:2, 3.