Pregunta di Lector

Te na ki grado hende cristian mester preocupánan riba e posibilidad di cu componente di sanger, tal como plasma secu, ta ser usá den cuminda?

Si tin base válido pa kere cu definitivamente sanger di bestia (of un componente di dje) ta ser usá den cuminda cu nan ta bende localmente, hende cristian tin cu keda cauteloso. Sin embargo, no ta sabí pa nan preocupánan riba simplemente un sospecho ni biba den miedu sin fundeshi.

Na principio di existencia di hende, nos Creador a declara cu hende no mag come sanger. (Génesis 9:3, 4) El a bisa cu sanger ta representa bida, locual ta un don di Dios. Sanger kitá for di bestia por ta usá den sacrificio so, tal como riba altar. Di otro manera, nan tabatin cu drama sanger di bestia riba tera, den e sentido di debolbé na Dios. Su pueblo no por a usa sanger pa sostene bida. Dios a decreta: “Boso no mag come sanger di ningun sorto di carni, pasobra e alma di tur sorto di carni ta su sanger. Ken cu ta comé lo ser cortá.” (Levítico 17:11-14) E mandamento di Dios prohibiendo comimento di sanger tabata duná na hende cristian també. (Echo 15:28, 29) P’sei, cristian di promé tabatin cu evita cuminda cu a contene sanger, tal como carni di bestia sofocá of sanger yená.

No obstante, na moda práctica, con hende cristian a cumpli cu nan determinacion di ‘wárdanan di sanger’? (Echo 21:25) Nan mester simplemente aplica e palabra di apóstol Pablo: “Tur loke nan ta bende den carnicería sigi come, sin puntra nada pa motibo di boso concenshi”?

No. E palabra di 1 Corintio 10:25 ta referi na carni cu por a ser di un bestia sacrificá den tempel di dios falso. Den e tempo ayá, nan a bende carni sobrá di tempel cu carnicero cu por a incluyé cu e surtido di carni pa benta den carnicería. E punto di Pablo tabata cu carni di tempel no tabata malu of contaminá den su mes. Ta parce cu nan tabatin e costumber di drama sanger di bestia sacrificá i usé riba altar pagano. Pues, si nan a bende algun carni sobrá den carnicería, sin ningun conexion bisto cu un tempel ni cu concepto pagano erróneo, hende cristian por a cumpra carni di carnicería cu tabata carni limpi i cu su sanger dramá.

Sin embargo, tabata diferente si hende cristian tabata sa cu carni di bestia sofocá (of sanger yená) tabata na benta den carnicería local. Nan tabatin cu tene cuidao scogiendo carni pa cumpra. Kizás nan por a reconoce carni cu a contene sanger si e color tabata diferente (mescos cu awe bo generalmente por reconoce sanger yená unda nan ta bendé). Of hende cristian por puntra e carnicero di confianza. Si hende cristian no tin motibo pa kere cu cierto carni ta contene sanger, nan simplemente por cumpré i comé.

Pablo a skirbi també: “Laga tur hende sa cu boso ta razonabel.” (Filipense 4:5) Esei por aplica ne asunto di cumpra carni. Ni e Ley di Israel ni e decreto dje cuerpo gobernante cristian dje promé siglo a indica cu e pueblo di Dios tabatin cu haci mashá investigacion tocante sanger, ni come berdura so si tabatin sikiera un tiki duda en cuanto si carni a contene sanger.

Jagdor israelita cu a mata bestia tabatin cu drama su sanger. (Compara cu Deuteronomio 12:15, 16.) Si su famía no por a come tur e carni, e por a bende un parti di dje. Asta un tiki sanger ta keda den carni di bestia cu tabatin su sanger dramá, pero nada den e Bijbel ta indica cu hudío cu a cumpra carni tabatin cu bai na extremo pa averigua cuanto minut a pasa entre e morto dje bestia i dramamento di su sanger, cua ader of bena tabata cortá pa drama e sanger, i con nan a colga e bestia i pa cuanto tempo. Además, e cuerpo gobernante no a skirbi cu hende cristian tabatin cu tuma precaucion extraordinario tocante esei, como si nan tabatin cu conoce tur detaye promé cu nan a come carni.

Den hopi país djawe, ley, costumber, of práctica religiosa ta percura pa carni (menos cierto artículo, tal como sanger yená) ta di bestia cu nan sanger tin cu ser dramá den abatoir. Pues, normalmente hende cristian di país asina no tin cu preocupánan tocante e moda di mata of procesá bestia. Den un sentido amplio, nan por simplemente ‘sigi come carni comercial sin puntra nada,’ i nan por tene un concenshi limpi di cu nan ta abstene di sanger.

No obstante, de bez en cuando tin informe técnico tocante uso comercial di sanger cu a molestiá cierto hende cristian. Tin hende den e negoshi di carni cu ta calcula cu un gran cantidad di sanger di bestia matá por ta wardá pa aplicacion práctico i pa ganashi, tal como den gordura pa tera of cuminda di bestia. Investigador a studia e posibilidad di usa sanger of (componente di sanger) den carni procesá. Algun planta comercial asta a bende un cantidad limitá di plasma líquido, di ijs, of en polvo (of cel corrá cu e color kitá) cu por reemplazá un porciento chikito di carni den salchicha of paté. Otro investigacion a concentra riba uso di producto di sanger en polvo of pa yena carni of pa mezcla awa i cebo den carni mulá, den producto di panadería, of den otro cuminda i bebida pa aumenta proteína of heru.

Sin embargo, ta bale la pena pa nota cu nan tabata haci tal investigacion pa hopi aña caba. Pero, ta parce cu uso di tal producto ta mashá limitá, of no ta existi den casi tur país. Algun informe típico ta mustra pakico:

“Sanger ta un fuente di proteína cu tin balor nutritivo i funcional. Sin embargo, sanger di baca a ser usá como cuminda humano na cantidad limitá so debí na su color intenso i sabor característico.”—Journal of Food Science, Volume 55, Number 2, 1990.

“Proteína di plasma di sanger tin atributo útil tal como mezclamento lihé, ta bruha lihé cu awa i no ta resisti . . . i nan uso den procesamento di cuminda ta ofrece bentaha grandi. Sin embargo, ningun sistema efectivo pa higienizá plasma, specialmente despues di secamento, a ser establecí den Hapón.”—Journal of Food Science, Volume 56, Number 1, 1991.

De bez en cuando algun hende cristian ta examina etiqueta di cuminda den paki, siendo cu hopi gobierno ta exigi lista di ingrediente. I nan por decidi di haci esei normalmente cu cualkier producto cu nan tin motibo pa kere cu e por contene sanger. Naturalmente, ta correcto pa evita producto cu tin cos tal como sanger, plasma di sanger, plasma, proteína di globina (of globulina) of heru di hemoglobina (of globina). Un compañía europeo dedicá ne campo ei a reconoce: “Informacion tocante uso di globina como ingrediente mester ta indicá riba e paki di cuminda di tal manera cu consumidor no ta ser confundí en cuanto e composicion of e balor dje cuminda.”

Pero, nos tin cu ser razonabel ora nos ta leza etiqueta of ta puntra carnicero. No ta necesario pa tur hende cristian den tur e mundo studia etiqueta i ingrediente di tur cuminda den paki of puntra empleado di restaurant of tienda di comestible. Hende cristian por puntra nan mes promé, ‘Ta existi algun prueba confirmá di cu sanger of componente di sanger ta ser usá den cuminda normal den e lugar of país aki?’ Den casi tur caso e contesta ta cu: No. P’sei, hopi hende cristian a decidi di no dedica hopi tempo i atencion pa investiga posibilidad remoto. Si un hende ta pensa di otro moda, nan mester sigi e guía di nan mes concenshi, sin huzga otro hende cu por resolve e asunto di otro manera pero cu un bon concenshi dilanti Dios.—Romano 14:2-4, 12.

Aunque nan por produci cuminda cu ta contene sanger, por tá cu nan no ta haci esei na tur parti pa motibo económico, legal, of otro factor. Por ehempel, e publicacion Food Processing (September di 1991) a bisa: “Pa fabricante cu tin problema cu menos cu 1% di plasma hidrolizado di baca presente den e mezcla (den hamburger final), tin un mezcla cu por reemplazé usando proteína concentrá di lechi (wei), locual por ta calificá como aceptabel.”

Nos mester bisa cu debí ne ley, costumber, of gusto, den hopi país e sanger di bestia ta ser dramá normalmente for di bestia den abatoir i cu tal sanger no ta ser usá den otro cuminda. Si no tin un base fuerte pa kere cu e situacion ta diferente unda bo ta biba of cu tabatin un cambio importante recientemente, hende cristian no tin cu bira molestiá riba un simple posibilidad of rumor. Pero, si ta sigur of ta mashá probable cu sanger ta ser usá na tur parti—sea den cuminda of den tratamento médico—nos tin cu keda determiná di obedece e mandamento di Dios di abstene di sanger.