Con por tin un Mundo sin Picá?

DEN un becindario trankilu di Tokio, grito pa auxilio a lanta un disturbio madrugá den tempo di friu. Pa cinco te diez minut, diezdos hende a tende grito di desesperacion di un señora partidor di curant cu un hende a persigí i puñalá bez tras bez. Ningun hende tabatin e humanidad pa investiga loke tabata pasa. E señora a muri di perdimento di sanger. Un investigador a bisa, “Si un hende so a informa e poliz dje incidente ora nan a tende e grito, e por a salba su bida.”

Aunque e cos di mas malu cu hende cu a tendé a haci tabata di simplemente no haci caso, nan por hustamente libra nan mes di culpa? Un homber cu a tendé grita a bisa, “Mi concenshi a molestiámi henter diabierne despues cu mi a tende dje matamento.” Esei ta hácinos puntra, Kico realmente ta picá?

Kico ta Picá?

Indicando cu hende ta consiente di picá, Hideo Odagiri, crítico literario i profesor emérito di Universidad di Hosei di Tokio, Hapón, a bisa, segun e curant Asahi Shimbun: “Mi no por elimina e memoria gráfico cu mi tin di reconocimento di picá, tal como egotismo desagradabel di mucha, envidia bergonzoso, i traicion. Tal reconocimento tabata inculcá den mi mente ora mi tabata den scol primario i ta tormentámi ainda.” Bo nunca a experimenta tal sintimento? Bo tin un boz di concenshi cu ta condenábo si bo ta haci algo cu bo sa ta malu? Kizás bo no ta comete crimen, pero un remordimento ta permanece i ta pisá den bo mente. Esei ta funcion di bo concenshi, i e Bijbel ta referi na dje den e sigiente pasashi: “Semper ora hende dje nacionan cu no tin ley ta haci door di naturaleza cosnan di ley, tal hende, aunque nan no tin ley, ta un ley pa nan mes. Nan ta net e hendenan cu ta demonstra e asunto dje ley cu lo ser skirbí den nan curazón, mientras cu nan concenshi ta duna testimonio cu nan i, entre nan mes pensamento, nan ta ser acusá of asta dispensá.” (Romano 2:14, 15) Sí, acto tal como adulterio, hortamento, i gañamento ta causa un molestia natural pa mayor parti di hende. Nan concenshi ta duna testimonio di picá.

Sin embargo, ora hende ta pasa por halto dje boz di nan concenshi bes tras bez, e no ta sirbi mas como un guía confiabel. E por bira dof i contaminá. (Tito 1:15) Nan ta perde nan gevoel en cuanto loke ta malu. Realmente, e concenshi di mayor parti di hende djawe ta morto pa cu loke ta toca picá.

Concenshi ta e único indicador pa controla picá, of tin algo cu por sirbi como norma absoluto en cuanto loke ta picá i loke no tá? Mas cu 3.000 aña pasá, Dios a duna su pueblo escogí un wetboek, i usando tal Ley nan por a “mustra [loke] ta picá.” (Romano 7:13, Testament Nobo) E Ley a mustra cu asta conducta cu na antes tabata basta aceptabel, també ta picá. E Ley a saca na cla cu israelita, e pueblo escogí di Dios, tabata pecador i p’sei tabata bao di condenacion.

Nos concenshi ta advertínos di ki picá cu e Ley di Moisés ta indicá i ta incluí specialmente? Segun e uso bíblico dje palabra, picá kier men hera e marca den loke ta toca e Creador. Picá ta tur loke no ta na armonía cu e personalidad, norma, camina, i boluntad di Dios. E no por permiti existencia continuo di ningun creacion cu no ta alcanza e marca cu el a establece. P’sei un specialista den ley cu a biba den e promé siglo a adverti cristian hebreo: “Cuidao, rumanan, pa miedu cu na un tempo ta desaroya den algun di boso un curazón malu faltando fe, alehando for di e Dios bibo.” (Hebreo 3:12) Sí, un falta di fe den e Creador ta bira un picá grave. Pues, manera e Bijbel ta splica, picá tin hopi mas alcance cu loke hende normalmente ta kere. E Bijbel asta ta bisa cu: “Tur [hende] a peca i no ta alcanza e gloria di Dios.”—Romano 3:23.

E Origen di Picá

Esei kier men cu Dios a crea Adam pecador? No, Jehova Dios, e Creador di bida humano, a crea e promé homber un criatura perfecto. (Génesis 1:26, 27; Deuteronomio 32:4) Sin embargo, e promé pareha humano a hera e marca ora nan a desafiá e único prohibicion cu Dios a duna, ora nan a come dje palu prohibí, e “palu di conocimento di bon i malu.” (Génesis 2:17) Aunque Dios a créanan perfecto, awor nan a hera e marca di obedencia completo na nan Tata, a bira pecador, i tabata hustamente condená pa muri.

Kico tal historia di antigua tin cu ber cu picá djawe? E Bijbel ta splica: “Pa medio di un solo homber picá a drenta den mundo i morto mediante picá, i asina morto a plama na tur hende pasobra nan tur a peca.” (Romano 5:12) Nos tur sin excepcion ta pecador mediante herencia; p’sei, nos ta bao dje condenacion di morto.—Eclesiastés 7:20.

Esfuerzo Humano pa Elimina Picá

Adam a pasa picá na desendiente di dje, pero també el a pasa na nos e facultad di concenshi cu Dios a duna. Picá por crea sintimento di molester. Manera nos a bisa caba, hende a inventa varios idea pa aliviá tal sintimento. Pero, nan ta realmente efectivo?

Tanto den oriente como den occidente, hende a purba di trata cu efecto di picá cambiando nan norma of asta nengando existencia mes di picá. (1 Timoteo 4:1, 2) E situacion pecaminoso di picá di hende por ta compará cu estado di un paciente cu cayentura. Picá por ta compará cu e virus cu ta causa síntoma di cayentura, i bo concenshi molestiá ta comparabel cu e cayentura cu ta molestiábo. Si bo ta kibra e termometer, esei no ta cambia e echo di cu bo tin cayentura halto. Eliminacion di norma moral, manera hopi hende den cristiandad a haci, i ignora e testimonio di bo mes concenshi no ta yuda elimina picá.

Bo por usa ijs pa alivia e cayentura. Esei ta mescos cu hende dje religion sintoísta cu ta cumpli cu nan ceremonia di purificacion purbando di aliviá remordimento di nan concenshi. Ijs por baha temporalmente e cayentura dje víctima, pero e no ta elimina e causa dje cayentura. Sacerdote i profeta dje tempo di Jeremías a purba un curacion similar pa israelita dje tempo ei. Nan a cura superficialmente herida spiritual i moral dje pueblo, bisando: “Tur cos ta bon, tur cos ta bon.” (Jeremías 6:14; 8:11, Casa de la Biblia) E simple cumplimento cu ceremonia religioso i repiticion di cantamento “tur cos ta bon” no a cura e degradacion moral dje pueblo di Dios, ni ceremonia di purificacion djawe no ta cambia ley di hende.

Cierto remedi por aliviá e cayentura, pero e virus ta den bo curpa ainda. Mescos ta cierto cu e moda di Confucio di enfrenta maldad usando educacion. Superficialmente, esei por yuda hende aparta for di maldad, pero e práctica di li solamente ta restringi conducta pecaminoso i no ta libra hende di nan inclinacion pecaminoso heredá, e causa fundamental di mal conducta.—Génesis 8:21.

Kico dje siñanza budista di drenta den nirvana pa librábo di picá? Nan ta bisa cu nirvana kier men “terminacion,” i supuestamente ta inexplicable, ta termina tur pasion i deseo. Algun ta bisa cu e ta termina existencia individual. Esei no ta mescos cu bisa hende enfermo cu cayentura cu nan tin cu muri pa haya alivio? Además, nan ta kere cu ta mashá dificultoso pa alcanza nirvana, asta imposibel. Tal siñanza ta parce cu e por yuda hende cu tin remordimento di concenshi?

Liberacion for di Picá

Ta keda bisto cu filosofía humano tocante bida i e tendencia di peca por, alomas, solamente trankiliza bo concenshi. Nan no ta kita picá. (1 Timoteo 6:20) Tin un manera pa haci esei? Den e Bijbel, un buki di antigua skirbí den e Medio Oriente, nos ta haya e clave pa liberacion for di picá. “Aunque boso picánan ta resulta di ser manera scarlata, nan lo ser hací blancu manera sneu . . . Si boso ta mustra e gana i sí ta scucha, boso lo come loke ta bon dje tera.” (Isaías 1:18, 19) Jehova Dios tabata papia ei cu israelita, cu, aunque nan tabata su pueblo escogí, nan a hera e marca di integridad na dje. Sin embargo, e mesun principio ta aplica na tur humanidad. Loke ta clave pa haya bo picánan kitá, of labá den un sentido, ta di keda dispuesto pa scucha e palabra dje Creador.

Kico e Palabra di Dios ta bísanos en cuanto labamento di picá di humanidad? Segun e Bijbel, mescos cu mediante e picá di un solo hende tur humanidad a bira pecador, mediante e obedencia perfecto na Dios di un otro hende, humanidad obediente lo ser librá di nan condenacion. (Romano 5:18, 19) Di ki manera? “Dios ta recomenda su mes amor pa nos, pasobra mientras cu nos tabata pecador ainda, Cristo a muri pa nos.” (Romano 5:8) Jesucristo, nací como un hende perfecto i sin picá, igualito cu Adam original promé cu el a peca, por a kita e picá di humanidad. (Isaías 53:12; Juan 1:14; 1 Pedro 2:24) Ya cu e tabata matá riba un staca di tormento como si fuera un criminal, Jesús a libra humanidad for di sclabitud na picá i morto. Pablo a splica na hende cristian den Roma: “Pasobra, en berdad, Cristo, mientras cu nos tabata swak ainda, a muri pa hende pecador ne tempo siñalá. . . . Mescos cu picá a reina como rey hunto cu morto, asina mes també bondad inmerecida por reina como rey mediante husticia cu bida eterna na bista mediante Jesucristo nos Señor.”—Romano 5:6, 21.

E morto di Cristo pa salba tur humanidad i deshaci loke Adam a haci, ta ser yamá e “rescate.” (Mateo 20:28) Esei por ta compará cu un remedi cu ta ataca e virus causando e cayentura. E aplicacion dje balor dje rescate di Jesús na humanidad, por cura e enfermedad di humanidad cu picá a causa, incluyendo morto mes. Tal curacion ta ser simbolizá den e último buki dje Bijbel: “Ne banda aki dje rio i ne banda ayá tabatin palu di bida produciendo diesdos cosecha di fruta, cu a duna fruta tur luna. I foyo dje palu tabata pa curacion dje nacionan.” (Revelacion 22:2) Imaginábo! Un rio simbólico dje awa di bida corriendo entre palu di bida cu nan foyo, tur pe curacion di humanidad. Tal símbolo skirbí bao di inspiracion divino ta representa e percuracion di Dios pe restoracion di humanidad na perfeccion riba e base dje sacrificio di rescate di Jesús.

E vision profético dje buki di Revelacion lo ser un realidad pronto. (Revelacion 22:6, 7) Anto, cu e aplicacion completo dje balor di e sacrificio di rescate di Jesús na humanidad, tur hende di curazón recto lo bira perfecto i “lo ser libertá for di esclabitud na corrupcion i tene e glorioso libertad dje yiunan di Dios.” (Romano 8:21) Cumplimento di profecía bíblica ta indica cu tal liberacion glorioso ta cerca. (Revelacion 6:1-8) Pronto Dios lo kita maldad for dje planeta aki, i hende por disfruta di bida eterna den Paradijs riba tera. (Juan 3:16) Esei en berdad lo ser un mundo sin picá!

[Plachi na página 7]

E sacrificio di rescate di Jesús ta haci posibel pa famía manera esei disfruta di felicidad eterno