Paisahe dje Tera Primintí

E camina di Siló—Muchanan Bon i Malu

ORA bo ta corda stad, pueblo, of region dje Tera Primintí, cierto homber of muher notable ta bini na bo memoria? Probablemente cu sí, pasobra e mayor parti di relato bíblico ta trata cu hende adulto. Pero, kico dje muchanan den e tempo ayá? Bo ta imaginánan den e tera ei també?

E portret anterior por yúdanos corda relato cu a enbolbe hovenan, algun cu tabata bon ehempel pa hende cristian i otronan cu tabata ehempel cu a duna spiertamento. E ceru rondó den e centro dje portret ta parce e sitio di Siló.a

Probablemente bo ta corda cu ora Israel a drenta den e Tera Primintí, e promé sitio unda nan a pone e tabernáculo di Dios tabata na Guilgal, cerca Jericó. (Hosué 4:19) Pero, ora nan a parti e tera, e tent sagrado—e centro dje adoracion di Israel—tabata poní ei na Siló. (Hosué 18:1) Esei tabata rond di 30 kilometer panort di Jerusalem den region montañoso di Efraín. Hende homber i muher di tur Israel a haci biahe pa Siló; multitud grandi di hende por a reuni den e valle pazuid di unda e tabernáculo probablemente a para. (Hosué 22:12) Bo por imaginábo cu muchanan a acudi ne lugar ei?

Sí, nan a hacié. Ehempel di mas notable cu nos mester conoce tabata e hoven Samuel. Su mayornan, Elkana i Ana, a biba den un pueblo tras di ceru mas pabao. Tur aña nan a bai na Siló, kizás compañá cu algun yiu di otro esposa di Elkana. Por fin Jehova a bendiciona Ana cu un yiu, cu nan a yama Samuel. Cu tempo su mayornan a trecé pe biba den Siló pe sirbi den e tabernáculo cu sumosacerdote Elí.—1 Samuel 1:1–2:11.

E mucha tabatin trabao pa haci den e cas di Dios, i mester a haya hopi oportunidad pa dal un keiru den ceru cerca dje. (1 Samuel 3:1, 15) Algun di nan tabatin terrazo i yen di mata di olijfi, mirá den e portret na bladji 9. Ripara e toren chikito trahá di piedra. Cunuquero of wardador isolá por a vigila for di tal toren, pero bo por imaginábo també cu e hoven Samuel a subi pa tira bista. (Compara cu 2 Crónica 20:24.) Tal sitio halto tabata un bon lugar pa vigila pa bestia sal­bahe.

Den e tempo ayá, tabatin mas mata cu awor, i asta mondi unda bestia salbahe a biba. (Hosué 17:15, 18) Nos ta mira esei den loke a sosode ora Elías a bira e profeta principal di Dios. Eliseo tabata biahá for di Jericó pa Betel, pues el a pasa den e region ei, mas cu 16 kilometer pazuid di Siló. Con hende di Betel a recibié, ya cu Betel a bira un centro di adoracion di bishé di oro? (1 Rey 12:27-33; 2 Rey 10:29) Ta parce cu hende no a trata e profeta di Jehova cu cariño, i ta parce cu nan actitud a penetra den nan yiu.

Dos Rey 2:23, 24 ta bísanos cu un grupo di muchanan a tene mofa dje profeta di Dios, gritando: “Subi, pelón! Subi, pelón!” Contestando, Eliseo “a inboca malu riba nan den e nomber di Jehova. Anto dos osa a sali for di mondi i a cuminza sker na pida pida cuarentidos mucha dje grupo.” Oso bruin di Siria por a bira feroz ora hende a sorprendénan of ora a parce cu nan yiunan tabata den peliger. (2 Samuel 17:8; Proverbio 17:12; 28:15) Dios a úsanan pa ehecuta husticia divino riba hende cu, cu brutalidad, a manifesta nan desprecio di representante di dje i asina a manifesta desprecio di Jehova Dios mes.

E posibilidad di mucha encontrando cu bestia salbahe den ceru rond di Siló por yúdanos comprende mihor e fe cu e mayornan di Samuel a demonstra ora nan a hibé pa sirbi den e tabernáculo.

Promé cu esei, un otro adorador berdadero a demonstra fe i debocion similar, esta huez Jefté. El a biba den region montañoso di Galad pariba di Jordan. Celoso den gera pa Jehova contra enemigo ammonita, Jefté a hura cu lo e sacrifica na Jehova e promé persona saliendo for di su cas pa contra cuné. Su yiu muher birgen a resulta di ser e promé. Pues, el a hiba su yiu unigénita ne santuario di Dios den Siló, unda el a biba i a sirbi fielmente pa hopi aña.—Huez 11:30-40.

E debocion fiel cu Samuel i e yiu di Jefté a manifesta den e sitio di Siló siguramente ta un contraste excelente cu e mal ehempel dje 42 mucha delincuente cu a tene mofa dje profeta di Jehova Dios den e mesun region.—Compara cu 1 Corintio 10:6, 11.

[Nota]

[Rekonosementu di plachi na página 8]

Pictorial Archive (Near Eastern History) Est.

[Rekonosementu di plachi na página 9]

Pictorial Archive (Near Eastern History) Est.

[Rekonosementu di plachi na página 9]

Safari Zoo, Ramat-Gan, Tel Aviv