Kico realmente ta e Evangelio?

DURANTE e temporada di pascu, hende di hopi país ta tende mencion dje Evangelio, i asta ta papia personalmente tocante dje. E palabra ta mashá conocí, pero e tin un nificacion cu e mayoría no conoce? E Evangelio por nifica algo mashá bon mes pa bo i pa bo stimánan?

“Evangelio” kier men “bon nobo,” i siguramente bon nobo ta bon biní na cualkier tempo i no ne tempo di pascu so. Sin embargo, e Evangelio no ta cualkier bon nobo. Su bon nobo ta específico, biniendo di un fuente definitivo, i tocante un cierto asunto. Realmente, e Evangelio ta un mensahe cu Dios a nombra pa ser anunciá pa tur humanidad.

Eugênio Salles, arzobispo di Rio de Janeiro, Brasil, a menciona tal bon nobo ora el a urgi: “Nos mester anda na armonía cu Evangelio i no den luz di ideología.” E arzobispo tabatin razón. Sin embargo, pa nos anda na armonía cu Evangelio, nos tin cu sa loke ta Evangelio. Con nos por siña esei? I con andamento na armonía cu Evangelio por yúdanos?

Kico ta e Evangelio?

Hopi bez hende no ta comprende e carácter dje Evangelio. Na 1918 e Concilio Federal di Iglesia di Cristo na América a aclama e Liga di Nacion, cu awor ta difunto, como expresion político dje Reino di Dios riba tera i a declara cu su “raíz ta den Evangelio.” E organizacion a fracasa miserablemente sin yega su meta di conserba paz. Claramente e concilio a equiboquele. E Liga di Nacion no tabatin nada cu ber cu Evangelio.

Na aña reciente respaldador dje teología di liberacion a menciona e Evangelio libremente ora nan tabata papia tocante nan idea pa reformacion político of social. Ora nan a haci esei, nan no a tuma na cuenta e berdadero Evangelio. E revista brasilero Veja a comenta: “E Iglesia Católico a cuminza favorece e reino social, ignorando e necesidad spiritual di su hendenan fiel. Esnan cu a busca e palabra ‘Dios’ den un predicashi hopi bez a haya solamente argumento retórico contra inhusticia social.”

E mehoramento dje situacion di bida of un cambio dje sistema político por ta bon nobo pa algun hende. Pero, esei no ta e bon nobo, e Evangelio. Admitiendo cu su religion no ta predica e berdadero Evangelio, un obispo a bisa: “Nos a neglisha e siñanza spiritual dje pueblo fiel desde 1960 pasobra nos a mete materialismo den nos doctrina.”

Un informe dje noticiero americano Time ta sugeri cu religion protestante també a perde bista dje Evangelio. E revista a bisa: “Religion tradicional no solamente no ta comunica nan mensahe; nan ta cada bez mas insigur di loke ta tal mensahe.” Kico nan mensahe mester tá? Kico ta e Evangelio?

Identificacion dje Evangelio

Segun e diccionario Webster’s Ninth New Collegiate Dictionary, lo sigiente ta e nificacion di “Evangelio”: “E mensahe tocante Cristo, e reino di Dios, i salbacion.” Otro nificacion dje palabra “evangelio” ta “un interpretacion dje mensahe cristian (evangelio social)”; “e mensahe of siñanza di un maestro religioso.” Tur nificacion asina ta aplica? No, si nos ta papia dje Evangelio. E berdadero Evangelio ta fundá ariba e Bijbel; pues, solamente e promé nificacion ei ta correcto. E último dos simplemente ta refleha e manera cu hende ta usa e palabra “evangelio” awe.

Di acuerdo cu tal idea, e diccionario bíblico Vine’s Expository Dictionary of New Testament Words ta bisa cu den e Scritura Griego Cristian (“Testament Nobo”), Evangelio “kier men e noticia alegre dje Reino di Dios i di salbacion mediante Cristo, pa hende recibi cu fe, riba e base di Su morto sacrificial.” Ta importante pa comprende esei pasobra e comprendimento correcto dje berdadero bon nobo tin hopi cu ber cu nos bienestar actual i nos felicidad di futuro.

Un mensahe distinto

Manera e diccionario anterior ta mustra, e Evangelio ta ser enlazá estrechamente cu Jesucristo—asina tanto cu e cuater relato bíblico di su bida riba tera ta ser yamá e cuater Evangelio. Desde e principio mes dje bida humano di Jesús, noticia di dje tabata bon noticia. Ora un angel a anuncia su nacimento, el a bisa: “Mira! mi ta declara boso bon nobo [of, evangelio] di un gran gozo cu tur pueblo lo haya, pasobra a nace na boso awe un Salbador, cu ta Cristo e Señor.”—Lucas 2:10, 11.

Jesús recién nací a crece pa bira Cristo, e Mesías primintí. El a revela e propósito di Dios pa salbacion, a entrega su bida humano perfecto pe beneficio di humanidad, tabata resusitá, anto a bira e Rey escogí dje Reino di Dios. Esei sí ta bon nobo! P’sei mes e mensahe tocante dje ta ser yamá Evangelio.

Durante su ministerio terrenal breve, Jesús tabata mashá celoso den e predicacion dje bon nobo. Nos ta leza den Evangelio di Mateo: “Jesús a cuminza un paseo den tur stad i pueblo, siñando den nan sinagoga i predicando e bon nobo di reino.” (Mateo 9:35) Su predicacion no tabata pa simplemente haci hende síntinan mihor. Marco a skirbi cu Jesús a bisa: “E tempo siñalá a ser cumplí, i e reino di Dios a yega cerca. Boso arrepentí boso i tene fe den e bon nobo.” (Marco 1:15) Sí, hende cu a acepta e bon nobo i a obedecé a haya cu el a cambia nan bida.

Despues dje morto di Jesús, sigidor di dje a sigi predica e Evangelio. Nan no solamente a papia tocante e Reino sino a agrega e noticia feliz di cu Jesús tabata resusitá pa sinta na man drechi di Dios den cielo i cu el a ofrece e balor di su bida humano perfecto pe beneficio di humanidad. Como esun cu Dios a scoge pa goberna riba tur e tera como Rey dje Reino di Dios, e ta Agente di Dios pa destrui enemigo di Dios i restora e tera na un paradijs.—Echo 2:32-36; 2 Tesalonicense l:6-10; Hebreo 9:24-28; Revelacion 22:1-5.

Den e dia djawe, e bon nobo ta inclui un otro elemento. Segun tur evidencia di cumplimento di profecía, awor Jesús ta entronizá, i nos ta biba den e último dianan dje sistema di cosnan aki. (2 Timoteo 3:1-5; Revelacion 12:7-12) E tempo pe Reino dal paso contra enemigo di Dios ta yega cerca rápidamente. Cua mihor noticia por tin?

Nos por mira den e sigiente artículo ki fuerte e Evangelio tá. El a yuda un señora haya libertad for di trampa di magia negra. El a yuda un homber encarcelá pa ladronicia haya felicidad. E por beneficiábo mashá també—con tal cu bo ta scucha i ta obedece e bon nobo.