Jehova ta corda hende enfermo i di edad avanzá
TA MASHÁ dificultoso pa enfrenta un “tempo di calamidad.” (Salmo 37:18, 19) Un tempo asina por yega den e forma di edad avanzá i e debilidad cu ta bini cuné. Algun hende ta drenta den un tempo di calamidad ora nan ta sufri di enfermedad serio di largo plazo. Nan por kere cu nan maleza a coge mando di nan bida, dominando tur nan pensamento i accion.
Sin embargo, cordamento cu Jehova ta tene su bista fihá riba tur sirbidor di dje ta duna siguranza. Ta haci su curazón alegrá ora sirbidor deboto di dje ta sigi desplega lealtad i sabiduría apesar di behez, enfermedad, of otro circunstancia dificultoso. (2 Crónica 16:9a; Proverbio 27:11) Rey David a dúnanos e siguranza: “Jehova ta cerca tur hende cu ta inboqué, . . . i ta tende nan sclamacion pa yudanza.” Sí, Jehova sa di nan lucha; i ta fortalecénan cu su spiritu. “I lo e sálbanan.” E ta córdanan i ta yúdanan wanta. (Salmo 145:18, 19) Pero, kico di nos? Nos, mescos cu Jehova, ta corda hende enfermo i di edad avanzá?
Debilidad debí na enfermedad of behez ta realidad di bida den e sistema actual aki. Nan ta echo cu locual nos tin cu lucha te cu Jehova Dios ta cumpli cu su propósito pe tera i pa humanidad. Awe, cada bez mas hende ta yega na un edad basta avanzá, pues, un gran cantidad ta conoce e debilidad di tal hende. Además, mientras cu nan ta hoven ainda, hopi ta víctima di accidente of maleza cu ta amenazá nan bida of ta incapacitánan. Te cu e mundo bieu aki ta pasa, maleza i behez lo sigi ser dificultadnan grandi.
Cuanto nos ta aprecia nos stimánan enfermo i di edad avanzá cu ta sigi como ehempel den “sufrimento di maldad i ehercicio di pacenshi”! Sí, “nos ta declara feliz esnan cu a wanta.” (Santiago 5:10, 11) Hopi hende di edad cu a perde nan forza a participa pa hopi aña den e siñamento, entrenamento, i moldeamento di esnan cu awor ta hiba e delantera den e congregacion. Varios hende di edad també ta alegrá di mira cu nan yiunan ta participa den e ministerio di tempo completo.—Salmo 71:17, 18; 3 Juan 4.
Di igual manera, nos ta aprecia esnan den nos cu ta seriamente enfermo i toch, apesar di nan sufrimento, ta logra animános cu nan fieldad. Ora eseinan ta duna evidencia di nan speranza sin vacila, e resultado ta estimula i ta fortalece nos fe mashá. Nan trankilidad di mente i contentamento ta revela un fe cu berdaderamente ta merece imitacion.
Ta un golpi pa un persona bira malu di ripiente cu cáncer, haya atake, of un otro condicion cu ta cambia totalmente nan bida. També, ta un prueba duro pa mayornan mira nan yiunan bira malu of sufri como resultado di un accidente. Kico otro hende por haci pa yuda? Cualkier tempo di calamidad ta un prueba pa tur e hermandad cristian. Esei ta un oportunidad pa mustra cu ‘un berdadero compañé ta un ruman cu a nace pe tempo ora cu tin calamidad.’ (Proverbio 17:17) Naturalmente, tur hende enfermo of hende di edad avanzá no por spera yudanza personal for di un i tur miembro dje congregacion. Pero, Jehova Dios cu su spiritu lo percura pa hopi ruman ser conmoví pa yuda den varios manera. I anciano por keda alerto pa ser sigur cu ningun ta wordu pasá por halto.—Mira Éxodo 18:17, 18.
Purba di comprende
Ora bo ta purba di yuda un hende, ta importante pa mantene bon comunicacion, i esei ta exigi tempo, pacenshi, i compasion. Como un yudante, bo naturalmente kier ‘fortalece cu palabra’; pero scucha bon promé cu bo ta papia of ta actua, of bo por resulta di ser un ‘consolador molestoso.’—Job 16:2, 5.
Aveces hende enfermo i di edad avanzá por haya cu ta duro pa sconde nan frustracion. Hopi a cultiva nan speranza di sigi biba te cu nan ta sobrebiba e tribulacion grandi, i awor nan ta síntinan enbolbí den un pustamento cu tempo, un pustamento cu nan no ta kere cu nan por gana. També, nan estado hopi bez ta causa cansancio i ansha. Ta un lucha pa mantene un fe fuerte i bibo, specialmente ora bo no por cumpli cu deseo di bo curazón di tene un plena parti den e ministerio cristian. Un anciano cristian a bishita un hermana di edad; ora el a reza cuné, el a pidi Jehova Dios pordoná nos picánan. Despues dje oracion el a mira cu e ruman tabata yora. El a splica cu el a kere cu e tabatin mester dje pordón special di Jehova pasobra e no por participa mas den e predicacion di cas pa cas. Sí, e sintimento di cu nan no ta capaz ni adecuado, aunque hopi bez esei no ta correcto, por haci un hende mashá tristu di curazón.
Corda cu ansha i fatiga por afecta balanza mental. Debí ne debilidad di behez of e presion di maleza debilitador, hende por kere cu Jehova Dios a bandonánan, kizás puntrando: “Kico mi a haci? Pakico mi tin cu sufri?” Corda e palabra di Proverbio 12:25: “Preocupacion ansioso den e curazón di hende ta loke lo hacié dobla, pero e bon palabra ta loke ta hacié alegrá.” Purba di haya bon palabra cu por consola. Hende di edad avanzá cu tin dolor por asta, manera Job, expresa e deseo di muri. Esei no ta escandaloso; purba di comprende. Tal kehamento no ta necesariamente evidencia di un falta di fe of confianza. Job a pidi pa ser ‘scondí den Sheol,’ pero su palabra net despues di tal expresion a revela su fe firme di cu Jehova lo lanté despues. Fe fuerte ta haci posibel pa wanta tempo di afliccion i depresion i toch keda cerca Jehova Dios.—Job 14:13-15.
Mustra onor pa hende enfermo i di edad avanzá
Ta di sumo importancia pa trata hende enfermo i di edad avanzá cu onor i dignidad. (Romano 12:10) Si nan no ta reacciona tanto lihé como na antes of no por haci asina tanto, no perde pacenshi. No sea lihé pa entremete i tuma decision pa nan. Maske cuanto bon intencion nos tin, si nos ta comportános na moda di dominá of ta usa autoridad, inevitablemente esei ta destrui e dignidad dje otro persona. Den un tema di un docter publicá na 1988, un investigador, Jette Ingerslev, a splica cu un grupo di hende di 85 aña di edad a considera riba nan mes cuenta loke ta mas importante pa nan calidad di bida: “Nan a duna tres sector e prioridad principal: ser cu pariente; mantene bon salud; i como último pero no di menos importancia, láganan tuma nan mes decisionan.” Ripara cu e yiunan di patriarca Jacob no a traté manera un mucha chikito ora el a bira bieu; nan a respeta su deseo.—Génesis 47:29, 30; 48:17-20.
Hende cu ta enfermo també mester ta tratá cu dignidad. Un anciano a perde su capacidad di papia, leza, i skirbi debí na un equibocacion durante un operacion. Esei tabata un golpi duro, pero otro anciano a decidi di haci nan posibel pe no sintié inútil. Awor nan ta leza tur carta dje congregacion pe i ta incluyé den e planeamento di otro asunto dje congregacion. Den reunion di anciano, nan ta haci esfuerzo pa descubri loke ta su opinion. Nan ta informé cu ainda nan ta considera cu e ta dje cuerpo di anciano i cu nan ta aprecia su presencia. Den e congregacion cristian, nos tur por haci esfuerzo pa ningun hende enfermo of di edad avanzá síntinan ‘bentá afó’ of lagá afó.—Salmo 71:9.
Yudanza pa gana fortaleza spiritual
Nos tur tin mester di alimento spiritual pa mantene bibo i fuerte nos fe. P’sei nos ta ser consehá pa leza e Bijbel i publicacion bíblico diariamente i pa participa celosamente den reunion cristian i den e trabao di predica. Hopi bez, hende enfermo i di edad avanzá tin mester di yudanza pa haci esei, i ta importante pa haci loke ta realista den nan caso particular. Felizmente, hopi di nan por asisti na reunion ainda si nan ta ser duná transportacion i un poco yudanza den e Salón di Reino. Nan asistencia na tal reunion ta un gran animacion pe congregacion. Nan awante ta un estimulante i fortalecedor di fe.
Den hopi caso hende enfermo i di edad avanzá també por tene un parti significante den e ministerio cristian. Algun por ta incluí den e grupo cu ta bai den auto pa duna testimonio, i sin duda nan lo síntinan refrescá ya cu nan por a haci algun bishita. Ora cu esei no ta posible mas, nan por haya gozo dunando testimonio informal na hende cu locual nan tin contacto. Un hermana cu a haya cáncer a decidi di dedica loke a resta di su bida haciendo un esfuerzo special pa promove e bon nobo. Su predicacion cu brío tabata un animacion pa tur hende. E asta a planeá su mes entierro pa esei duna un testimonio excelente na pariente no creyente, colega di trabao, i beciña. Asina su circunstancia penoso “a resulta den adelanto dje bon nobo,” i su determinacion pa expresa su fe i confianza a duna su dianan final un nificacion special.—Filipense 1:12-14.
Ta bon pa yuda hende enfermo i di edad avanzá haya fortaleza spiritual. Famía por invitánan pa un bishita cu nan hunto cu e famía, of un parti di nan estudio di famía por ta celebrá de bez en cuando den e cas di esun cu no por sali. Un mama a hiba su dos yiu menor ne cas di un hermana di edad pa nan por leza Mi buki di relato bíblico hunto. Esei a haci e hermana di edad feliz, i e yiunan a goza e atencion cu el a dúnanan.
Sin embargo, tin bez cu un persona enfermo no kier mucho molester, anto por ta mihor pa leza de bez en cuando algun informacion na boz halto pa nan. Pero, no lubida cu si un persona ta mucho swak físicamente pa tene conbersacion, toch e por tin e necesidad i deseo di asociacion spiritual. Nos por reza hunto cu tal persona, leza pa nan, of conta experencia; pero nos mester tene cuidao pa no keda mas tempo cu nan por wanta.
Tin un sirbishi sagrado cu e mayor parti di hende enfermo i di edad avanzá por haci ainda: reza pa otro hende. Disípelnan di promé a duna gran importancia na tal sirbishi. Na un ocasion nan a delega e trabao den e congregacion di tal manera cu e apóstolnan por a concentra riba oracion. Fiel Epafras ta ser mencioná como ‘haciendo esfuerzo pa otronan den su oracion.’ (Colosense 4:12; Echo 6:4) Tal rezamento ta sumamente importante i beneficioso.—Lucas 2:36-38; Santiago 5:16.
Jehova Dios ta corda hende enfermo i di edad avanzá i ta cuídanan den nan tempo di calamidad. Jehova hustamente ta spera pa nos també considera loke nos por haci pa yuda i apoyánan. E interés cu nos ta mustra ta refleha nos determinacion di warda nos mes integridad. I nos ta feliz pa corda e palabra di rey David: “Jehova ta consiente dje dianan di hende liber di falta, i nan herencia mes lo sigi asta te na tempo indefinitivo.”—Salmo 37:18.
[Kuadro na página 28]
Duna Yudanza Práctico cu Comprendimento
AMIGO i pariente mester gana un conocimento fundamental pero exacto dje manera di cuida hende enfermo i di edad avanzá. Sobre todo, nan por ta animá pa mantene un actitud positivo tocante bida, pa síntinan necesario i apreciá, i pa nan sinti cu nan tin dignidad. Asina nan calidad di bida por permanece na un nivel cu por conserba nan gozo den Jehova, apesar di nan desconsuelo i dolor. Hende ta ripara cu hopi Testigo di Jehova ta biba te na un edad halto. Sin duda, un factor fuerte cu ta contribui na esei ta nan interés bibo den e speranza dilanti nos, nan disposicion mental briyante, i nan participacion den actividad dje Reino tanto posibel. Frederick W. Franz, e reciente presidente dje Sociedad Watch Tower, cu a muri trankilamente ora el a haci casi 100 aña di edad despues di un bida gozoso i productivo, tabata un ehempel excelente di esei.—Compara cu 1 Crónica 29:28.
Generalmente, atencion prestá na asunto básico di cuido diario por nifica hopi: limpieza, bon cuminda, suficiente líquido i salu, ehercicio razonabel, aire limpi, masashi suave, i conbersacion animador. Bon cuminda por contribui na mihor oído, bista, funcion mental, i bienestar fisical, i també na mas resistencia na maleza. Pa hende di edad avanzá e simple asunto di bon cuminda i hopi líquido por nifica e diferencia entre un bon condicion i verkalking. Kizás algun investigacion ta necesario pa haya un forma di ehercicio físico cu ta apropiado pe persona. Un hermana cu ta bini pa leza cu un hermana di edad cu ta casi ciegu ta cuminza i ta termina cada bishita simanal cu un baliamento suave rond dje camber cu e ruman. E tape recorder ta semper cla cu música escogí, i nan dos ta goza tal “ehercicio.”
Den hopi país, organizacion auxiliar por duna yudanza práctico balioso i duna informacion i conseho en cuanto condicion específico i con pa trata cu nan. (Naturalmente, hende cristian mester semper tene cuidao pa no desviá den actividad cu por stroba nos berdadero sirbishi cristian.) Tin bez cu yudanza ta ser duná den e forma di préstamo di cama di hospital, walker, rolstoel, aparato di orea pa hende surdo, etc. Siendo cu hopi hende di edad avanzá ta kere cu nan no tin mester di nada of cu no ta bale la pena pa busca tal cos nobo, hopi bez pariente tin cu duna conseho di sano huicio of asta papia cu nan pa convencénan. Un slot práctico pe porta dje baño por duna mas berdadero gozo cu un boquet di flor.
E cuido di hende di edad avanzá por produci mashá presion mental, specialmente si e persona tin verkalking. Hopi bez verkalking ta sosode onverwakt. Bo por purba di contraresté preveniendo e paciente di sosega innecesariamente. Hende cu tin verkalking por bira rabiá di ripiente cu hende cu e ta stima mashá. Pariente tin cu comprende cu hende di edad asta por lubida tur loke tin cu ber cu e berdad—un resultado tristu di nan decaimento fisical, i no un evidencia di perdimento di fe.
Si e paciente ta den e hospital of den cas di hende bieu, bon contacto cu enfermera ta necesario afin cu e personal sa kico pa haci en relacion cu cumpliaña, pascu, of otro dia di fiesta di mundo. Si un operacion ta necesario, pariente por splica i documentá e punto di bista dje paciente cu el a tene pa henter su bida tocante transfusion di sanger.