Hañando Exito den e Lucha cu Acoholismo

“Durante trabou, rond di 10’or di mainta, mi tabata cuminsá pensa tocante un bitter. Pa 12’or mi a sali pa dal un par di bitter. Pa 3’or lo mi tabata temblando físicamente. Mi a anhelá pa ora di trabou pasa pa mi por a dal un otro bitter. Hopi biaha mi a pasa dal un par di bitter riba caminda pa cas. Rond di 7’or mi a haña e impulso irestitibel atrobe. Mi tabata bebe, cai for di stul inconciente, uriná mi carson i drumi den mi urina te mainta. Tuma esaki i multiplik’é cu 7 dia pa siman; multiplicá esei cu 52 siman pa aña; multiplicá esei cu 29 aña.”

E HOMBER aki ta un alcoholista. E no ta so. Miyones mundialmente ta lucha cu e condicion mortífero aki cu, segun Dr. Vernon E. Johnson, “ta enbolbé e hende completo: físicamente, mentalmente, sicológicamente i spiritualmente.”a

Hopi experto ta bisa cu alcoholismo no por ser curá pero sí e por ser detené mediante un programa di abstinencia pa bida largu. Esaki no ta un rekisito irazonabel, pasobra alcohol no ta esencial pa bida. Realmente, maluso di alcohol ta trece e desaprobacion di Dios. (1 Corintio 6:9, 10) Ta mihó pa drenta e mundu nobo di Dios sin alcohol cu cede na un anhelo p’e i perde oportunidad di gana bida eterno.—Mateo 5:29, 30.

Librando bo mes—i kedando liber—di abuso di alcohol hopi biaha ta un desafio frustrante. (Compará cu Romano 7:21-24.) Kico por yuda? Laga nos duna algun conseho directo. Asta si bo no ta bebe alcohol mes, e conseho aki lo ta informativo i por permití bo yuda un amigu of famia cu ta luchando cu alcoholismo.

Wak Bo Mes Onestamente

Un dje obstáculonan di mas grandi pa vence ta nengamentu dje echo cu bo ta un alcoholista. Nengamentu ta un forma di desonestidad. E ta un manera di racionalisá cu un propósito: pa protehá bo libertad di bebe. ‘Mi no ta asina malu,’ bo por razoná. ‘Ainda mi tin mi famia. Ainda mi tin mi trabou.’ Mas importante, ainda bo tin bo alcohol.

Nengamentu por strobá bo di scucha na amigunan cu kier yudá bo. Robert a observá cu e tata di criansa di su esposa a adoptá un patronchi di bebe insaludabel i un comportacion brutu. Robert ta bisa: “Despues di un par di dia, mi a confront’é puntrand’e si el a sinti cu su bebementu a contribuí na su comportacion.” E resultado? “Mi a topa cu un nengamentu completo, cu comentario manera, ‘Bo no tin prueba’ i ‘Bo no sa con mi ta sinti.’”

Si bo ser acercá pa un miembro di famia of un amigu cu ta preocupá tocante bo bebementu, wak bo mes críticamente i onestamente. (Proverbio 8:33) Bo por biba sin alcohol pa un siman completo, pa un luna completo of pa varios luna? Si no, pakico no? No sea manera e homber cu ta gaña su mes cu razonamentu falsu. Santiago ta bisa: “Esaki ta manera un homber cu ta mira su cara natural den un spiel. Pues e ta mira su mes, i e ta sali pafó i ta lubidá inmediatamente ki sorto di hende e ta.”—Santiago 1:22-25.

Asta despues cu bo cuminsá recuperá, ainda lo bo tin cu vigilá contra nengamentu. E buki Willpower’s Not Enough ta splica: “E persona cu a cuminsá abstené por kere ekibocadamente cu debí cu e tabata capas di stop di bebe pa un periodo—kisas p’e promé biaha—el a cura awor.” Esaki ta un pensamentu sumamente adictivo i e ta e promé paso pa sufri di un recaida. Si bo kier resistí un nengamentu asina, bo no mester lucha bo só.

Busca Yudansa

Realisando cu lo e no por combatí alcoholismo su so, un homber cu nos por yama Leo a busca yudansa profesional. Despues di un periodo di tratamentu intensivo, e tabata riba e caminda di recuperacion. Leo ta kere cu mester duna consideracion special n’e balor di yudansa di experto.b Si yudansa asina ta disponibel localmente, bo por dicidí pa haci uso di dje.

Sin embargo, bo mester realisá cu recuperacion ta encerá mas cu solamente abstinencia. Tras di alcoholismo probablemente tin asuntunan mas profundo cu bo mester enfrentá. Ignorando esakinan por ta peligroso. Dra. Charlotte Davis Kasl ta skirbi: “Mi a entrevistá hende cu a pasa dor di tratamentu pa abuso di substancia te cu diescuater biaha debí cu nan no a trata esencia dje problemanan di abuso, adiccion i negligencia.”

Dennis a haña cu esaki ta cierto. E ta skirbi: “Mi tabata un alcoholista sobrio cu ainda tabatin hopi problema. No tabata suficiente pa stop di bebe. Mi mester a tira un bista den mi pasado, examiná e lesnan di mi hubentud, comprendé con nan tabata afectando mi i haci algun cambio den mi comportacion.”

Di igual manera, Leo tabatin cu wak profundo den su mes pa por a progresá den recuperacion. E ta bisa: “Mi tabata un persona extremamente yalurs i violento. Mi a fluctua entre periodonan di poco respet-propio i delirio di grandesa.” Leo a aplicá e conseho bíblico na Efesio 4:22: “Kita e personalidad bieu cu ta conformá cu bo moda di anda di antes.” Sí, “bo moda di anda di antes” a ehercé un influencia poderoso riba bo personalidad. Mescos cu yesu ta conformá cu un malchi, asina bo personalidad a ser formá en parte dor di bo moda di anda di antes. Ora bo kita mal conducta, kico ta sobra? Un personalidad cu kisas a ser formá durante un periodo di hopi aña. P’esei, recuperacion mester incluí cambiamentu dje personalidad bieu cu ta conformá cu bo moda di anda di antes.

Establecé un Relacion Cu Dios

E recuperacion di Leo a encerá tambe desaroyá un relacion personal cu Dios. “Siñando pa dependé riba Jehova a cambia mi actitud, comportacion i concepto di bida absolutamente,” e ta bisa.

Sin embargo, cautela ta apropiado. Cualkier relacion—cu hende of cu Dios—ta rekerí un actitud habrí, onestidad i confiansa. Esakinan ta net e cualidadnan cu alcoholismo ta core cuné. Nan por ser cultivá, pero esei ta tuma tempu.

Como alcoholista, kisas bo no sa kico un relacion íntimo ta nificá. Talbes, bo nunca a experenciá unu. Pues tene pacenshi. No balotá e paso aki, sperando pa un relacion cu Dios materialisá como un co-resultado automático di abstinencia. Traha duru pa comprendé Dios i su cualidadnan. Meditá regularmente, talbes lesando cuidadosamente e salmonan bíblico cu ta expresá sintimentu profundo di aprecio tocante Jehova i su camindanan.c

“Poder Mas Ayá Cu Loke Ta Normal”

Un relacion di confiansa i positivo cu Dios por tin un influencia poderoso riba bo. Jehova lo sostené bo esfuersonan pa recuperá. (Compará cu Salmo 51:10-12; 145:14.) Bo por acerk’é den oracion ferviente na cualkier momentu, cu confiansa cu lo e suministrá na bo “poder mas ayá cu loke ta normal.”—2 Corintio 4:7; Filipense 4:6, 7.

E Creador conocé bo composicion mihó cu cualkier hende. (Salmo 103:14) Conseheronan humano, kendenan ta dependiente di sabiduria humano, por yuda; pero cuantu mas e Creador di hende por yudá bo den e lucha aki! (Isaías 41:10; 48:17, 18) El a percurá pa sosten amoroso den e congregacion cristian.

Un Sistema di Sosten

Ancianonan spiritualmente maduro den e congregacion cristian por ta un gran fuente di yudansa. Poco di nan lo pretendé di ta experto den e campo médico of salú mental, pero nan conocé i ta confia Dios su Palabra i su principionan. Nan por resultá di ta “manera un lugá di sconde contra bientu i un lugá di scondementu contra tempestad di awaceru, manera coriente di awa den un pais secu, manera e sombra di un baranca skerpi i pisá den un tera agotá.” (Isaías 32:2) Probechá plenamente di nan yudansa.d

Naturalmente, ancianonan cristian asina, huntu cu otro miembro di famia i amigu, lo no protehá bo for dje consecuencianan di bo propio accionnan. E publicacion Coming Off Drink ta splica: “E elemento crucial den tratamentu cu alcoholista ta di confrontá nan cu e consecuencianan dañoso di adiccion i laga nan carga responsabilidad pa nan mes comportacion.” Pues nan lo ta bondadoso pero franco, animando bo pa enfrentá realidad i pega na cualkier tratamentu i moda di anda cu ta necesario pa gana bo bataya contra alcohol.

Recuperacion Ta Bo Responsabilidad

Miéntras cu bo ta beneficiá dje sosten di otronan, ta bon pa bo sa cu ningun hende of spiritu por forsa bo recuperacion. Bo ta liber pa scoge bo moda di anda. Bo recuperacion finalmente ta bo responsabilidad. (Compará cu Génesis 4:7; Deuteronomio 30:19, 20; Filipense 2:12.) Aceptá e responsabilidad ei i Jehova lo bendicioná bo. Promé Corintio 10:13 ta sigurá nos: “Ningun tentacion a bini riba boso cu excepcion di loke ta comun pa hende. Pero Dios ta fiel, i lo e no lagá boso ser tentá mas ayá di loke boso por soportá, sino cu huntu cu e tentacion lo e percurá tambe p’e salida pa boso por want’é.” P’esei, tuma consuelo—bo por tin éxito den e lucha cu alcoholismo.

[Nota]

[Plachi na página 24]

Talbes bo ta sufri dje degradacion i miseria cu alcoholismo ta producí. Si ta asina, no perde speransa. Yudansa ta disponibel.

[Kuadro na página 26]

SI BO SUFRI UN RECAIDA

“Ser prepará pa un recaida ta manera entrená pa paga un candela,” segun e buki Willpower’s Not Enough. “E no ta nificá cu bo ta spera un candela sino cu bo ta prepará pa tuma accion responsabel si unu mester sosodé.” Si bo sufri un recaida:

□ Resa na Jehova. Sea sigur cu e ta comprendé bo problema i kier yuda.—Salmo 103:14; Isaías 41:10.

□ Confia den un anciano cristian, dicidiendo adelantá cu ken mester tuma contacto si e necesidad presentá. Sea onesto encuanto loke a sosodé i scucha cuidadosamente na su conseho bíblico.

□ Tene cuidou cu desesperacion. Kedando disgustá cu bo mes ta hiba solamente mas cerca un recaida total, pues pone bo fayo den e perspectiva corecto. Perdiendo un bataya no ta nificá cu bo a perde e guera. Ora un coredor di maraton cai, e no ta bai bek n’e salida; e ta lanta i continuá e careda. Haci mescos cu bo recuperacion. Ainda bo ta rib’e caminda. E simannan, lunanan of añanan di abstinencia bo tras ta existí ainda.

[Plachi na página 25]

Resistí nengamente dor di wak bo mes críticamente i onestamente