Famía Cristian Ta Pone Cos Spiritual Promé

“Boso tur sea dje mesun ánimo i parecer, mustrando compasion, teniendo cariño fraternal, tiernamente compasivo, humilde di mente.”—1 PEDRO 3:8.

1. Nos tur por tuma cua decision, i con nos decision por afecta nos futuro?

KI EXCELENTE e texto anterior ta aplica ne institucion di mas antigua di humanidad, esta, e famía! I ta ki importante pa mayornan duna guía den esei! Calidad positivo di mayornan i nan calidad negativo generalmente ta sali na cla den nan yiunan. Sin embargo, e oportunidad di scoge ta permanece cu cada miembro dje famía. Como hende cristian, nos por decidi di ser hende spiritual of hende carnal, nos por decidi di agrada Dios of desagradé. Nos decision por resulta sea den un bendicion, bida eterna i paz—of un maldicion, morto eterno.—Génesis 4:1, 2; Romano 8:5-8; Galatio 5:19-23.

2. (a) Con Pedro a mustra interés den famía? (b) Kico ta spiritualidad? (Mira e nota.)

² E palabra dje apóstol den 1 Pedro capítulo 3, versículo 8, a sigi un bez despues di algun conseho excelente cu el a duna esposa i esposo. Pedro tabata berdaderamente interesá den e bienestar di famía cristian. E tabata sa cu spiritualidad fuerte ta clave pa un famía uní, cariñoso i compasivo. P’sei, el a indica den versículo 7 cu si esposo ignora su conseho pa nan, e resultado lo ser un barrera spiritual entre esposo i Jehova Dios.a Oracion di esposo lo ser strobá si nan ta neglisha e necesidad di nan esposa of ta aplasta nan esposa cu crueldad.

Cristo—Un ehempel perfecto di spiritualidad

3. Con Pablo a enfatiza ehempel cu Cristo a pone pa esposo?

³ E spiritualidad di un famía ta depende di bon ehempel. Ora esposo ta un cristian practicante, e ta hiba delantera demonstrando calidad spiritual. Si e no tin un esposo creyente, generalmente e mama ta purba di cumpli cu tal responsabilidad. Sea loke sea e caso, Jesucristo a percura e modelo perfecto pa sigi. Su conducta, su palabra, i su pensamento semper tabata edificante i refrescante. Bez tras bez apóstol Pablo a dirigi lector na e modelo amoroso di Cristo. Por ehempel, el a bisa: “Esposo ta cabez di nan esposa mescos cu Cristo també ta cabez dje congregacion, e siendo salbador dje curpa. Esposo, sigi stima boso esposa, mescos cu Cristo també a stima e congregacion i a entrega su mes pe.”—Efesio 5:23, 25, 29; Mateo 11:28-30; Colosense 3:19.

4. Jesús a pone cua ehempel di spiritualidad?

⁴ Jesús tabata un ehempel sobresaliente di spiritualidad i hefatura manifestá cu amor, bondad, i compasion. El a haci sacrificio propio, sin complace su mes. E semper a glorifica su Tata i a respeta su hefatura. El a sigi e guía di su Tata, di manera cu e por a bisa: “Mi no por haci ni un solo cos di mi mes iniciativa; mi ta huzga segun cu mi ta tende; i e huicio cu mi ta haci ta husto, pasobra mi no ta busca mi mes boluntad, sino e boluntad di esun cu a mandámi.” “Mi no ta haci nada di mi mes iniciativa; sino net manera e Tata a siñami, esei ta loke mi ta papia.”—Juan 5:30; 8:28; 1 Corintio 11:3.

5. Ora Jesús a percura pa sigidor di dje, cua ehempel el a pone pa esposo?

⁵ Kico esei kier men pa esposo? Esei kier men cu e modelo pa nan sigi den tur cos ta Cristo, cu semper ta somete su mes na su Tata. Por ehempel, mescos cu Jehova Dios ta percura cuminda pa tur forma di bida riba tera, asina Jesús a percura cuminda pa sigidor di dje. E no a neglisha nan necesidad material básico. Milagro di dje alimentando 5.000 hende i també 4.000 ta duna prueba di su cuido i sintimento di responsabilidad. (Marco 6:35-44; 8:1-9) Di igual manera awe, cabez responsabel di famía ta atende na necesidad fisical di nan famía. Pero, esei ta e fin di nan responsabilidad?—1 Timoteo 5:8.

6. (a) Cua necesidad importante di famía tin mester di atencion? (b) Con esposo i tata por demonstra comprendimento?

⁶ Famía tin otro necesidad també, i mas importante, manera Jesús a bisa. Nan tin necesidad spiritual i emocional. (Deuteronomio 8:3; Mateo 4:4) Nos ta actua mutuamente cu otronan, tanto den e famía como den e congregacion. Nos tin mester di bon guía pa motivános pa ser edificante. Den esei, esposo i tata tin e papel principal pa hunga—i asta mas tanto si nan ta anciano of sirbidor ministerial. Mayornan soltero of soltera tin mester di calidad similar ora nan ta yuda nan yiu. Mayornan tin cu comprende no solamente loke miembro dje famía ta bisa sino també loke nan no ta bisa. Esei ta exigi discernimiento, tempo, i pacenshi. Esei ta un motibo pakico Pedro por a bisa cu esposo tin cu mustra consideracion i biba cu nan esposa conforme cu conocimento.—1 Timoteo 3:4, 5, 12; 1 Pedro 3:7.

Peliger pa evita

7, 8. (a) Kico ta necesario pe famía evita naufragio spiritual? (b) Kico ta necesario además di un bon comienzo den e camina cristian? (Mateo 24:13)

⁷ Pakico ta tanto importante pa presta atencion ne spiritualidad di famía? Usando un ilustracion, nos por puntra, Pakico ta importante pa timonero di barcu presta atencion cuidadoso na mapa ora e ta nabega den awa peligroso cu tin barranca? Den Augustus di 1992 e barcu di turista Queen Elizabeth 2 (QE2) tabata nabega den awa peligroso cu drempel i barranca unda, segun informe, error di nabegacion ta común. Segun un residente local: “Hopi timonero a perde nan trabao den e awa aki.” QE2 a pega riba un barranca bao di awa. Esei a resulta di ser un error costoso. Un derde dje casca tabata dañá, i e barcu tabata kitá for di sirbishi pa varios siman pa reparacion.

⁸ Di igual manera, si “timonero” dje famía no ta sigi cuidadosamente e mapa, esta, e Palabra di Dios, nan famía por fácilmente sufri di daño spiritual. Pa un anciano of sirbidor ministerial, e resultado por ta perdimento di privilegio den e congregacion i kizás daño serio na otro miembro di famía. P’sei, cada hende cristian mester percura pa indiferencia spiritual no alcanzánan, confiando solamente den bon costumber di studiamento i celo di antes. Den nos rumbo cristian, no ta basta pa simplemente haci bon comienzo; e biahe mester ta completá cu bon éxito.—1 Corintio 9:24-27; 1 Timoteo 1:19.

9. (a) Ki importante ta estudio personal? (b) Nos por hácinos cua pregunta pertinente?

⁹ Pa nos no pega nos barcu spiritual, nos tin cu keda al dia cu nos “mapa” studiando cu regularidad e Palabra di Dios. Nos no por depende solamente riba comprendimento básico cu a síñanos e berdad. Nos fortaleza spiritual ta depende di un programa di estudio i sirbishi balanzá i cu regularidad. Por ehempel, ora nos ta asisti ne Estudio di Toren di Vigilancia dje congregacion dje revista aki, nos por puntra nos mes, ‘Ami, of nos como un famía, realmente a studia e artículo aki, buscando tur texto i meditando riba nan aplicacion? Of, nos solamente a marca tur contesta? Por ta cu nos a neglisha di sikiera leza e artículo promé cu nos a asisti ne reunion?’ Contesta onrado pa tal pregunta por estimulános pa pensa seriamente tocante nos costumber di studiá i lanta un deseo pa mehora—si esei ta necesario.—Hebreo 5:12-14.

10. Pakico examinacion di nos mes ta importante?

¹⁰ Pakico tal examinacion propio ta importante? Pasobra nos ta biba den un mundo cu e spiritu di Satanás ta domina, un mundo cu, di hopi manera scondí, ta purba di saboteá nos fe den Dios i den promesa di dje. Esaki ta un mundo cu kier ténenos asina ocupá cu nos no tin tempo pa atende na necesidad spiritual. P’sei, nos por puntra nos mes, ‘Mi famía ta fuerte spiritualmente? Ami como tata ta tanto fuerte como debe ser? Nos como un famía ta cultiva e forza spiritual cu ta impulsa nos mente pa tuma decision fundá ariba husticia i lealtad?’—Efesio 4:23, 24.

11. Pakico reunion cristian ta beneficioso spiritualmente? Duna ehempel.

¹¹ Tur reunion cu nos ta atende mester fortalece nos spiritualidad. E oranan precioso cu nos ta den Salón di Reino of ne Estudio di Buki di Congregacion ta yuda refrescános despues di oranan largu cu nos tin cu pasa forzando pa sobrebiba den e mundo dje enemigo, Satanás. Por ehempel, ta cuanto refrescante pa studia e buki E homber mas importante cu hamás a biba! Esei ta yúdanos gana un mihor comprendimento di Jesús, di su bida, i di su ministerio. Nos ta leza atentamente tur texto mencioná, ta haci investigacion personal, i p’sei ta siña hopi cos for dje ehempel cu Jesús a pone.—Hebreo 12:1-3; 1 Pedro 2:21.

12. Di ki manera e ministerio di feld ta pone nos spiritualidad na prueba?

¹² Un prueba excelente di nos spiritualidad ta e ministerio cristian. Pa nos persevera den dunamento di testimonio formal i informal, hopi bez enfrentá cu hende indiferente of contrario, nos tin mester dje motivacion correcto, amor pa Dios i amor pa próhimo. Naturalmente, ningun hende ta gusta pa otronan rechazánan, i esei por sosode den nos ministerio di feld. Pero, nos tin cu tene presente cu e bon nobo ta loke nan ta rechaza, i no nos como hende individual. Jesús a bisa: “Si mundo ta odia boso, boso sa cu el a odiámi promé cu el a odia boso. Si boso ta parti di mundo, mundo lo stima loke ta di dje. Awor door cu boso no ta parti di mundo, sino mi a scoge boso for di mundo, p’sei mundo ta odia boso. . . . Pero nan lo haci tur esei contra boso pa causa di mi nomber, pasobra nan no ta conoce esun cu a mandámi.”—Juan 15:18-21.

Accion ta indica mas cu palabra

13. Con un solo persona por destrui e spiritualidad di un famía?

¹³ Kico ta pasa den un famía si tur miembro menos uno ta respeta e limpieza i ordu di nan cas? Tur dia esun sin respet ta tira cos pa su cuenta i no ta tene e cas limpi. Esun desordená ta laga evidencia na tur parti di su descuido, causando trabao extra pe otronan. Mescos ta aplica na spiritualidad. Un solo miembro egoísta i negligente por susha e nomber dje famía. Tur e famía, i no e mayornan so, mester haci esfuerzo pa refleha e disposicion mental di Cristo. Ta ki refrescante ora tur hende ta traha hunto afin di gana bida eterna! Spiritualidad (no na moda di fariseo) ta bira e meta dje famía. Rara bez tin indicacion di negligencia spiritual den famía asina.—Eclesiastés 7:16; 1 Pedro 4:1, 2.

14. Menciona un tentacion material cu Satanás ta pone den nos camina.

¹⁴ Nos tur tin necesidad básico pa satisface pa sostene nos bida tur dia. (Mateo 6:11, 30-32) Pero, hopi bez loke nos kier ta domina loke nos mester. Por ehempel, e sistema di cosnan di Satanás ta ofrecénos tur sorto di aparato i invento. Si nos semper ta exigi di keda na moda, nos nunca lo keda satisfecho, siendo cu pronto cos moderno ta bira anticuado, i un producto mas moderno ta presenta. E mundo di comercio a establece un tredmolen cu no ta para nunca. E ta téntanos pa busca cada bez mas placa pa satisface cada bez mas deseo. Esei por resulta den “hopi deseo irrazonabel i perhudicial,” of “ambicion bobo i peligroso.” Esei por resulta den un bida desbalanzá cu cada bez menos tempo pa actividad spiritual.—1 Timoteo 6:9, 10; The Jerusalem Bible.

15. Di ki manera ehempel di cabez di famía ta importante?

¹⁵ Atrobé, ehempel cu e cabez di famía cristian ta pone ta mashá importante. E actitud balanzá di dje en cuanto responsabilidad seglar i spiritual mester inspira otro miembro di famía. Siguramente ta perhudicial si e tata of esposo ta duna excelente instruccion verbal, anto no ta cumpli cu su palabra. Pronto yiu ta mira e hipocresía di e bida di mayornan cu ta bisa pero no ta haci. Di igual manera, pronto miembro di famía i dje congregacion ta perde respet pa anciano of sirbidor ministerial cu ta anima otronan pa traha di cas pa cas pero rara bez ta participa den tal actividad cu nan famía.—1 Corintio 15:58; compara cu Mateo 23:3.

16. Nos por haci nos mes cua pregunta?

¹⁶ P’sei, ta probechoso pa nos examina nos mes bida. Nos ta preocupá pa alcanza bon éxito den nos trabao seglar i ta neglisha di haci progreso spiritual? Nos ta progresa den mundo pero ta bai atrás den e congregacion? Corda e conseho di Pablo: “E declaracion aki ta fiel. Si algun homber ta percura pa alcanza puesto di superintendente, e ta deseoso di un trabao excelente.” (1 Timoteo 3:1) Un sentimento di responsabilidad den e congregacion ta indica mas tocante nos spiritualidad cu un promocion den nos trabao seglar. Nos tin cu mantene un balanza cuidadoso di manera cu nos no ta permiti nos empleador dominános como si nos ta dedicá na ne en bez di na Jehova Dios.—Mateo 6:24.

Comunicacion significativo ta promove spiritualidad

17. Kico ta contribui na berdadero amor den un famía?

¹⁷ Miyones di cas djawe ta casi un pension. Di ki manera? Miembro di famía tei solamente pa drumi i come, anto bai na carreda. Rara bez nan ta sinta na mesa pa disfruta di cuminda hunto. Nan ta falta e sintimento di un famía, íntimo cu otro. Cu ki resultado? Tin un falta di comunicacion, ningun conbersacion significante. I esei por resulta den un falta di interés den otro miembro, kizás un falta di berdadero cariño. Ora nos ta stima un e otro, nos ta aparta tempo pa conbersa i scucha. Nos ta anima, i ta yuda. Tal aspecto di spiritualidad ta enbolbe comunicacion significante entre esposo i esposa i entre mayornan i yiu.b Tempo i tacto ta necesario mientras cu nos ta comunica cu otro pa comparti nos gozo, nos experencia i problemanan.—1 Corintio 13:4-8; Santiago 1:19.

18. (a) Kico hopi bez ta un strobacion grandi pa comunicacion? (b) Relacion significativo ta ser edificá riba kico?

¹⁸ Bon comunicacion ta exigi tempo i esfuerzo. Esei kier men aparta tempo pa papia cu otro i scúchanan. Un strobanza principal di esei ta e aparato cu ta ocupa nos tempo i cu ta ocupa e lugar di onor den casi tur cas, esta, television. Esei ta presenta un desafío: Television ta controlábo, of bo ta controla e television? Control di television ta exigi determinacion firme—incluyendo e dominio propio di pagué. Pero, esei ta habri camina pa sintoniza un e otro como miembro di famía i como rumanan spiritual. Relacion significante ta exigi bon comunicacion, yegando di comprende un e otro, nos necesidad i nos gozo, contando otro cuanto nos ta aprecia tur e cosnan bondadoso cu a wordu hací pa nos. Es decir, conbersacion significante ta mustra cu nos ta agradicido na otro i ta apreciánan.—Proverbio 31:28, 29.

19, 20. Si nos ta stima tur e famía, kico nos lo haci?

¹⁹ P’sei, si nos tin cariño i compasion un pa otro den e arreglo dje famía—i esei ta inclui interés den miembro di famía cu no ta creyente—nos ta haci hopi pa edifica i mantene nos spiritualidad. Den e arreglo dje famía, nos ta obedece e sigiente conseho di Pedro: “Finalmente, boso tur sea dje mesun ánimo i parecer, mustrando compasion, teniendo cariño fraternal, tiernamente compasivo, humilde di mente, sin paga daño cu daño ni zundramento cu zundramento, sino, al contrario, duna bendicion, pasobra boso tabata yamá pe camina aki, pa boso també hereda un bendicion.”—1 Pedro 3:8, 9.

²⁰ Nos por recibi e bendicion di Jehova Dios awor si nos ta haci esfuerzo pa mantene nos spiritualidad, i esei por obra pa nos hereda su bendicion den futuro ora nos ta recibi e don di bida eterna riba un tera paradísico. Tin otro cos cu nos por haci como un famía pa yuda un e otro spiritualmente. E sigiente artículo ta considera e beneficio di haci cosnan hunto como un famía.—Lucas 23:43; Revelacion 21:1-4.

[Nota]

Bo ta corda?

◻ Kico ta spiritualidad?

◻ Con cabez di famía por sigi ehempel di Cristo?

◻ Con nos por evita peliger pa nos spiritualidad?

◻ Kico por destrui e spiritualidad di un famía?

◻ Pakico comunicacion significativo ta importante?

[Plachi na página 12]

Asistencia ne Estudio di Buki di Congregacion ta fortalece e famía spiritualmente