Nan Ta Pastoreá e Lamchinan cu Compasion

DI TUR animal cu ta biba como bestia di cas, ningun ta manera carné doméstico. Mayoria animal tin e forsa i instinto necesario pa busca cuminda i evitá criaturanan cu ta yag riba nan, pero un carné ta diferente. E ta vulnerabel pa roofdier, cu masha poco abilidad pa defendé su mes. Sin un wardador, un carné ta miedoso i impotente. Separá for dje tou, e ta perde fácilmente. P’esei, carné mansu tin motibu dominante pa sinti apego na nan wardador. Sin dje nan lo tin poco chens di sobrebibencia. Pa motibu dje característicanan aki, Bijbel ta usa carné den un manera figurativo pa representá hende inocente, maltratá of sin defensa.

Siguramente, e recompensanan di un wardador ta bon merecí. Su bida no ta unu fácil. E ta exponé na tantu calor como frialdad, i e ta experenciá nochinan sin drumi. E tin cu protehá e tou for di roofdier, hopi biaha coriendo peliger e mes. Ya cu un wardador mester tene e tou huntu, e ta pasa hopi di su tempu buscando carné cu a desviá of perde. E mester trata esnan enfermo i esnan heridá. Mester carga lamchinan swak of cansá. Tin preocupacion constante pa haña un suministro adecuá di cuminda i awa. No ta incomun pa un wardador drumi anochi afó den e campo pa garantisá siguridad dje tou. P’esei, pastoreamentu di carné ta un bida rigoroso cu ta rekerí e servicionan di un homber cu curashi, diligente i ingenioso. Mas cu tur cos, e mester tin e capacidad pa mustra berdadero interes p’e tou confiá na su cuido.

Pastoreando e Tou di Dios

Bijbel ta pinta Dios su pueblo como carné mansu i esnan cu ta cuida nan como wardador. Jehova mes ta ‘e wardador i superintendente di nos alma.’ (1 Pedro 2:25) Jesucristo, “e wardador excelente,” a expresá su deseo p’e carnénan ricibí cuido cu compasion ora el a bisa apostel Pedro: ‘Alimentá mi carnénan chikitu, pastoreá mi lamchinan, alimentá mi lamchinan.’ (Juan 10:11; 21:15-17) Superintendente cristian a ser encargá solemnemente cu ‘e pastoreamentu dje congregacion di Dios.’ (Echo 20:28) I nan trabou como wardador spiritual ta exigí e cualidadnan di un bon wardador literal—curashi, diligencia, ingeniosidad i, principalmente, interes sincero p’e bienestar dje tou.

Den e dianan di Ezekiel, profeta di Dios, e mayoria dje wardadornan nombrá pa percurá p’e necesidadnan di Jehova su pueblo den Israel a keda sin cumpli cu nan debernan. E tou di Dios a sufri teriblemente, cu mayoria bandonando adoracion berdadero. (Ezekiel 34:1-10) Awe, cleronan di cristiandad ta presentá nan mes como wardador di e asina yamá congregacion cristian, pero su estado spiritualmente enfermo ta proba cu e cleronan ta manera charlatan malbado cu a neglishá i abusá dje pueblo ora Jesus tabata riba tera. Lidernan religioso di cristiandad ta manera “e homber contratá” cu “no ta interesá den e carnénan.” (Juan 10:12, 13) Den ningun manera nan ta dispuesto, capas of cualificá pa pastoreá e tou di Dios.

Wardadornan Cu Berdaderamente Ta Interesá

Jesus a pone e ehempel perfecto pa tur cu lo a pastoreá e tou di Jehova. Den tur manera e tabata amoroso, bondadoso, compasioná i útil pa su disipelnan. El a tuma e iniciativa pa busca esnan den necesidad. Aunke Jesus tabata ocupá i hopi biaha tabata cansá, e semper a saca tempu pa scucha na nan problemanan i pa duna nan animacion. Su disponibilidad pa entregá su alma na nan fabor tabata e máximo expresion di amor.—Juan 15:13.

Awe, tur anciano nombrá di congregacion, i tambe sirbidornan ministerial, ta compartí e responsabilidad aki pa cu e tou. P’esei, asta e potencial bentahanan material cu nan posiblemente lo por haña den un otro pais no ta inducí e gran mayoria dje hombernan responsabel aki pa muda i pues bandoná e congregacionnan sin yudansa i supervision adecuado. Bibando den “tempu crítico duru pa trata cuné,” e tou ta den necesidad di animacion i guia. (2 Timoteo 3:1-5) Tin un peliger semper presente cu algun lo bira víctima di Satanas, cu ta “manera un leon brabu, buscando un hende pa guli.” (1 Pedro 5:8) Awor mas cu nunca promé, ta vital pa wardadornan cristian “advertí esnan desordená, consolá e almanan deprimí, apoyá esnan débil.” (1 Tesalonicense 5:14) Vigilancia constante ta esencial si nan kier prevení esnan instabil di cai for dje tou.—1 Timoteo 4:1.

Con e wardador por determiná ki ora un carné mester di yudansa? Algun dje señalnan di mas bisto ta faltamentu na reunion cristian, participacion iregular den e ministerio di veld i un tendencia pa evitá asociacion estrecho cu otronan. Tambe, por detectá debilidad dor di tuma nota cuidadoso dje actitud dje carnénan i e caracter di nan combersacionnan. Kisas nan ta incliná pa criticá otronan, talbes indicando sintimentu di resentimentu. Nan combersacionnan kisas ta drei demasiado rond di empeñonan materialista en bes di metanan spiritual. Un falta general di entusiasmo, optimismo i goso por nificá cu nan fe a bira débil. Un expresion di cara decaí por ta un señal cu nan ta bou di presion di famia cu ta oponé of amigu mundano. Notando e señalnan aki, e wardador por traha pa determiná ki clase di yudansa ta necesario.

Ora wardadornan cristian ta haci bishita pa yuda un compañé creyente, nan mester tene na mente nan obhetivo primario. Esei no ta djis un bishita social cu combersacion tocante cosnan insignificante. Meta di apostel Pablo ora e tabata bishitá su rumannan tabata pa ‘impartí algun don spiritual na nan afin cu nan por ser hací firme i pa por tin un intercambio di estímulo.’ (Romano 1:11, 12) Pa logra esaki, preparacion delantá ta necesario.

Promé, analisá e persona, i purba determiná con su condicion spiritual ta. Cu esei establecí, pensa un tiki riba ki clase di direccion, animacion of conseho lo ta mas beneficioso. E Palabra di Dios, e Bijbel, mester ta e fuente primario di informacion pasobra e ta “ehercé poder.” (Hebreo 4:12) Por listra e revistanan Toren di Vigilancia i ¡Despertad! pa artículonan cu ta trata cu e necesidadnan specífico di carnénan cu ta haña nan confrontá cu problemanan special. Experencianan animante i refrescante por ser hañá den e Anuario de los Testigos de Jehová. E meta ta pa impartí algu spiritual cu lo ta ‘bon p’e edificacion dje persona.’—Romano 15:2.

Pastoreamentu Cu Ta Edificante

Un wardador di un tou di carné literal sa cu nan ta dependé riba dje pa proteccion i cuido. E peligernan di mas comun ta bini di dwalmentu, malesa, cansancio, herida i roofdier. Di igual manera e wardador spiritual mester reconocé i trata cu peligernan similar cu ta menasá e bienestar dje tou. Aki ta sigui algun problema típico i un par di sugerencia riba kico por bisa pa impartí informacion spiritualmente edificante.

(1) Mescos cu carné imprudente, algun cristian ta desviá for dje tou di Dios debí cu nan ta ser tentá pa atraccionnan aparentemente inocente i placentero. Kisas nan ta ser distraí i asta por drif bai pa motibu di siguimentu tras di metanan asociá cu materialismo, recreo of entretenimentu. (Hebreo 2:1) Por recordá personanan asina dje urgencia di tempu, dje necesidad pa keda cerca dje organisacion di Jehova i e importancia di pone interesnan di Reino promé den bida. (Mateo 6:25-33; Lucas 21:34-36; 1 Timoteo 6:8-10) Conseho probechoso ta ser hañá den e artículo “Mantené Bo Balansa—Con?” den The Watchtower di 15 di mei, 1984, página 8-11.

(2) Un wardador mester proveé tratamentu na carné cu ta sucumbí na enfermedad. Di igual manera, wardadornan spiritual mester yuda cristiannan cu ta bira spiritualmente malu debí na factornan negativo den nan bida. (Santiago 5:14, 15) Kisas nan ta desempleá, talbes nan tin problema serio di salú of talbes nan ta experenciando dificultad den nan bida di famia. Personanan asina kisas tin poco apetit pa alimento spiritual of asociacion cu Dios su pueblo. Esaki en buelta ta resultá den isolacion i desanimacion. Nan mester ser sigurá cu Jehova ta interesá den nan i lo sostené nan atrabes di tempu difícil. (Salmo 55:22; Mateo 18:12-14; 2 Corintio 4:16-18; 1 Pedro 1:6, 7; 5:6, 7) Tambe por ta probechoso pa repasá e artículo “Mirando Stret Padilanti como Hende Cristian,” den The Watchtower di 1 di juni, 1980, página 12-15.

(3) E wardador mester vigilá p’e carnénan cu ta bira cansá. Algun a perseverá fielmente den Jehova su sirbishi durante un periodo di añanan. Nan a lucha atrabes di hopi test i prueba. Awor nan ta mustra señal di cansancio den hacimentu di loke ta bon i kisas asta ta expresá duda tocante e necesidad pa actividad di predicacion intensivo. Ta necesario pa rebibá nan spiritu, renobando nan aprecio p’e goso i bendicionnan cu ta bini di sirbishi di curason na Dios den imitacion di Jesucristo. (Galatio 6:9, 10; Hebreo 12:1-3) Talbes por yuda nan mira cu Jehova ta apreciá nan sirbishi leal i por fortalecé nan pa futuro actividadnan pa su alabansa. (Isaías 40:29, 30; Hebreo 6:10-12) Kisas ta beneficioso pa compartí pensamentu for dje artículo “No Entregá den Hacimentu di Loke Ta Excelente,” cu ta aparecé den The Watchtower di 15 di juli, 1988, página 9-14.

(4) Mescos cu carné cu ta haña herida, algun cristian a ser ofendí pa loke nan ta percibí como conducta ofensivo. Ma, si nos ta pordoná otronan, nos Tata celestial lo duna nos pordon necesario. (Colosense 3:12-14; 1 Pedro 4:8) Algun ruman homber of muher kisas a ricibí conseho of disiplina cu nan a sinti tabata inhustu. Sin embargo, nos tur por beneficiá for di conseho i disiplina spiritual, i ta un consuelo pa sa cu Jehova ta disipliná esnan pa ken e tin amor. (Hebreo 12:4-11) Debí cu nan no a haña privilegio di sirbishi pa cua nan ta sinti nan mes cualificá, otronan a permití resentimentu crea un separacion entre nan i e congregacion. Pero si nos distanciá nos mes for di Jehova su organisacion, lo no tin ningun otro lugá pa bai pa salbacion i berdadero goso. (Compará cu Juan 6:66-69.) Informacion probechoso relacioná cu e puntonan aki por ser hañá den e artículo “Manteniendo Nos Unidad Cristian” di The Watchtower di 15 di augustus, 1988, página 28-30.

(5) Mester protehá e carnénan for di roofdier. Den un manera comparabel, algun kisas ta ser oponé i intimidá dor di famia no-creyente of colega di trabou. Nan integridad por ser atacá ora presion ta ser ehercé pa haci nan reducí nan sirbishi na Dios of stop di participá den e ministerio cristian. Sin embargo, nan ta ser fortalecí ora nan ser yudá pa realisá cu nos mester spera oposicion i cu esei realmente ta un dje pruebanan cu nos ta berdadero disipelnan di Jesucristo. (Mateo 5:11, 12; 10:32-39; 24:9; 2 Timoteo 3:12) Kisas ta beneficioso pa mustra cu si nan ta fiel, Jehova nunca lo bandoná nan i lo recompensá nan awante. (2 Corintio 4:7-9; Santiago 1:2-4, 12; 1 Pedro 5:8-10) E artículo titulá “Wantando Gososamente Apesar di Persecucion” den The Watchtower di 15 di april, 1982, página 21-7, ta proveé animacion adicional.

Wardadornan—Cumpli cu Boso Responsabilidadnan

E necesidadnan dje tou di Dios ta hopi, i vigilancia apropiado ta un trabou exigente. P’esei, wardadornan cristian mester tin compasion, mester ta berdaderamente preocupá i interesá pa ser útil. Pacenshi i dicernimentu ta importante. Aunke algun persona mester di conseho i spiertamentu, otronan ta beneficiá mas for di animacion. Un par di bishita personal kisas ta suficiente den algun caso, miéntras cu den otro caso un studio di Bijbel regular por ta necesario. Den cada caso e meta primario ta pa impartí guia spiritualmente edificante of conseho amoroso cu lo motivá e persona pa cuminsá cu bon custumbernan di studio, bira of sigui ser regular den asistí na reunion di congregacion i disfrutá di participacion activo den e ministerio cristian. Esakinan ta maneranan principal pa asistí compañénan creyente i yuda nan habri e caminda pa un fluho liber di Jehova su spiritu santu.

Wardadornan cu ta percurá tal clase di sosten ta efectuá un sirbishi masha balioso na fabor dje tou di Dios. (Mira The Watchtower di 15 di november, 1985, página 23-7.) Loke wardadornan spiritual ta haci ta ser apreciá masha tantu dor dje tou. Despues di ricibí yudansa asina, un cabes di famia a declará: ‘Despues cu nos tabata den e berdad pa 22 aña, nos a ser atraí den mundu mediante materialismo. Hopi biaha nos kier a asistí na reunion, pero a parce simplemente cu nos no por a logra. Realmente nos no a sinti nos cómodo den Satanas su sistema, pues nos tabata completamente desconectá, isolá. Esaki a laga nos keda frustrá i deprimí. Nos tabatin mester di palabranan di animacion. Ora un anciano a bishitá nos, gustosamente nos a aceptá e provision di un studio di Bijbel den nos cas. Awor nos tur ta bek den Jehova su organisacion sigur. Mi no por expresá e felicidad cu mi ta sinti!’

Tin motibu pa masha goso ora nos rumannan homber i muher cu a desviá of desanimá ta ser rebibá i reactivá spiritualmente. (Lucas 15:4-7) Jehova su propósito pa cu su pueblo ta ser realisá ora nan ta ser uní “manera un tou den e curá.” (Miqueas 2:12) Den e haf sigur aki, nan ‘ta haña refrescamentu pa nan alma’ cu yudansa dje Wardador Excelente, Jesucristo. (Mateo 11:28-30) E tou mundial uní ta ricibí guia, consuelo i proteccion huntu cu un abundancia di alimento spiritual.

Awe, mediante e actividad di pastoreamentu aki, Jehova ta percurando pa un trabou amoroso cu ta armonisá cu su promesa di antigua: “Lo mi busca mi carnénan i lo mi cuida nan. . . . Lo mi libra nan for di tur e lugarnan na cua nan a ser plamá . . . Den un bon sabana lo mi alimentá nan . . . Esun perdí lo mi busca, . . . i esun kibrá lo mi mara cu verband i esun enfermo lo mi fortalecé.” (Ezekiel 34:11-16) Ta ki un consuelo pa sa cu Jehova ta nos Wardador!—Salmo 23:1-4.

Pa motibu di provisionnan divino pa pastoreá e tou di Dios, como Jehova su sirbidornan nos por compartí e sintimentunan di David, kende a bisa: “Den pas lo mi cai drumi i pega soño, pasobra abo so, O Jehova, ta hací mi biba den siguridad.” (Salmo 4:8) Sí, Jehova su pueblo ta sinti nan sigur den su cuido amoroso i ta gradicidu cu ancianonan cristian ta pastoreá e lamchinan cu compasion.

[Picture Credit Line on page 20, 21]

Potter’s Complete Bible Encyclopedia