E Problema di Siña Spera

SIÑA spera rib’e cosnan cu nos ta deseá ta probablemente un dje lesnan di mas difícil cu ta ser exigí di nos pa aceptá. Mucha chikitu di naturalesa ta impaciente. Kico cu ta atraé nan atencion, nan kier, i nan kier’e awor! Pero manera lo bo sa for di experencia, ta un berdad di bida cu no ta tur cos ta disponibel riba exigencia. Asta den e caso di deseonan legítimo, nos mester siña spera pa un tempu apropiado pa satisfacé nan. Hopi hende ta siña e les aki; otronan nunca ta siñ’é.

Hende cu kier gana aprobacion divino tin motibunan particular pa siña spera. Jeremías, un sirbidor pre-cristian di Jehova, a enfatisá esaki: “Bon ta cu un persona mester spera, asta silenciosamente, rib’e salbacion di Jehova.” Mas despues, e disipel cristian Santiago a bisa: “P’esei, ehercé pacenshi, rumannan, te n’e presencia di Señor.”—Lamentacion 3:26; Santiago 5:7.

Jehova tin su propio orario pa realisacion di su propósito divino. Si nos no por spera te na su debido tempu pa haci cierto cosnan, nos lo perde nos contentamentu i bira disgustá, cua lo sofocá nos goso. Sin goso un sirbidor di Dios lo bira spiritualmente swak, manera Nehemías a bisa su paisanonan: “Goso den SEÑOR ta boso fortalesa.”—Nehemías 8:10, The New English Bible.

E Sabiduria di Siña Spera

Ta un deseo natural pa personanan soltero deseá pa casa of pa pareha sin yu deseá pa cria un famia. Ademas, no tin nada malu pa anhelá di satisfacé necesidad of deseo material adecuado. No obstante, debí cu hopi hende cristian ta kere cu e dianan dje sistema di cosnan aki ta contá i cu den e binidero sistema nobo Dios lo ‘habri su man i satisfacé e deseo di tur cos bibiente,’ nan a dicidí di spera pa cumpli cu algun dje deseonan aki na un tempu mas apropiado.—Salmo 145:16.

Sin embargo, hende sin e speransa cristian bon-fundá aki lo mira poco motibu pa posponementu. Faltando fe den Jehova, for di ken “tur bon don i tur regalu perfecto” ta bini, nan ta cuestioná e sabiduria di posponé cosnan pa den un futuro cu nan ta duda lo yega un dia. Nan ta biba segun e credo: “Laga nos come i bebe, pasobra mañan nos tin cu muri.”—Santiago 1:17; 1 Corintio 15:32; Isaías 22:13.

Den nacionnan desaroyá e mundu di agencia di publicidad ta probechá dje tendencia claro pa satisfaccion instantáneo. Hende ta ser animá pa malcriá nan mes. Comercio kier haci nos kere cu cumbinencia i comodidad moderno ta necesidadnan absoluto. Hende ta argumentá, pakico keda sin dje, specialmente ora tarheta di crédito, pago na cuota i areglonan di “cumpra awor—paga despues” ta haci posibel pa haña tur cos i haña nan awor? Ademas, ‘Bo merecé lo mihó; sea bondadoso cu bo mes! Corda, sea disfrutá di dje awor of posiblemente nunca!’ Asina lemanan popular ta pretendé.

Miéntras tantu, dies di miyones di hende den paisnan den desaroyo tin solamente suficiente pa existencia—of asta ménos. Tin algu cu gráficamente lo por enfatisá mas e imperfeccion i inhusticia di sistemanan humano político i económico?

E sabiduria di siña spera ta ser mirá den e echo cu miyones di hende no-dispuesto pa haci esei—of por lo ménos no ta mira motibu pa haci esei—a cai pisá den debe pa satisfacé deseonan inmediato. Circunstancianan imprevisto, manera malesa of desempleo, por nificá desaster. E corant aleman Frankfurter Allgemeine Zeitung a splica pakico un cantidad di un miyon persona na Alemania ta sin cas: “Típicamente, hende ta perde nan cas debí na desempleo of debe excesivo.”

Incapas pa paga nan debe, hopi individuo desafortuná asina ta sufri e pérdida tristu di tantu cas como posesionnan. Demasiado biaha, aumento di stres ta trece tension di famia. Matrimonionan tambaleante ta cuminsá kibra. Periodonan di depresion i otro problemanan cu salú ta bira comun. Den e caso di cristiannan, spiritualidad por sufri, hibando, en buelta, na pensamentu robes i conducta inapropiado. Hende cu a ranca sali deseando tur cos imprudentemente ta caba prácticamente sin nada.

Pa Hopi, Un Desafio Nobo

Jesus a haci cla cu nos mester paga tinu pa no laga “e anshedadnan dje sistema di cosnan aki i e poder engañoso di rikesa i e deseonan p’e resto dje cosnan invadí i hoga e palabra.” (Marco 4:19) Nos mester tene na mente cu ningun sistema político a eliminá anshedad exitosamente, incluyendo esnan económico di cua Jesus a papia.

E comunismo cu paisnan europeo oriental awor a rechasá a purba nivelá cosnan pa medio di un economia controlá pa estado. Na contraste cu e sistema di comercio liber, e sistema antiguo a brinda individuonan den e paisnan ei un cierto siguridad económico cu capitalismo hopi bes ta faya na duna. Tog, e anshedadnan cu Jesus a papia di dje a existí den forma di scarcedad di producto di consumo i restriccion di libertad personal.

Actualmente, hopi dje paisnan aki ta introduciendo mercado liber, pues presentando nan ciudadanonan cu un desafio nobo. Un informe reciente ta bisa: “Ingenuosidad ta ser combiná cu e deseo di alcansá lihé e norma occidental di consumo.” Pa logra esaki “un cantidad creciente di hende den e Länder nobo na Alemania oriental ta ser lastrá den e remolino di debe.” E informe ta agregá: “Despues dje euforia inicial rib’e libertad económico nobo, temor i desesperacion ta plamando awor.” E anshedadnan ta permanecé, numa awor nan ta ser bistí den un paña capitalista.

Mayor libertad político i económico a presentá posibilidad nobo pa progreso económico. P’esei, hopi persona por ser tentá pa considerá seriamente e idea di cuminsá nan mes negoshi of di muda pa un otro pais cu mihó oportunidad di empleo.

Decisionnan manera esakinan ta asuntunan personal. No tin nada malu pa un cristian deseá di mehorá su circunstancianan económico. E por ser motivá pa un deseo pa percurá pa su famia, siendo conciente cu “si cualkier hende no ta percurá pa esnan cu ta di dje, i specialmente pa esnan cu ta miembro di su famia, el a nenga e fe i ta pió cu un persona sin fe.”—1 Timoteo 5:8.

P’esei, ta inapropiado pa criticá e decision cu otronan ta tuma. Na mesun tempu, hende cristian mester corda cu no ta sabí pa busca alivio for di problema económico dor di hinca nan mes den demasiado debe cu lo por atrapá nan. Di igual manera lo ta malu pa busca alivio pa problema económico den un manera cu ta enbolbé neglishamentu di obligacion i interesnan spiritual.

Siñando Fo’i Otronan

Den e añanan cu a sigui despues di Guera Mundial II, miles di aleman a emigrá for dje continente europeo aplastá pa guera pa bai na otro paisnan, particularmente Australia i Cánada. Di e manera ei, hopi por a mehorá nan situacion económico, pero ningun por a scapa totalmente di anshedad económico tocante cua Jesus a papia. Solucionando problemanan económico algun biaha a crea problemanan nobo—heimwee, un idioma straño, adaptá na cuminda nobo, custumber diferente, ahustá na amigu nobo of enfrentá actitud diferente.

Algun dje emigrantenan aki tabata Testigonan di Jehova. Ta encomendabel cu mayoria di nan a rechasá di permití problemanan relacioná cu emigracion sofocá nan spiritualidad. Pero tabatin excepcionnan. Algun a bira víctima di poder engañoso di rikesa. Nan progreso teocrático a keda tras di nan bienestar económico.

Siguramente, esaki ta ilustrá e sabiduria di analisá nos situacion cuidadosamente promé cu nos tuma decisionnan posiblemente imprudente. Tendencia materialista lo pone cu nos ta haci ménos den e trabou cristian di haci disipel, un asignacion cu nunca mas lo ser ripití. Esaki ta cierto sin importá unda nos ta biba, siendo cu no tin ningun pais caminda ciudadanonan ta liber di anshedad económico.

Luchando e Lucha Excelente

Pablo a spierta Timoteo: “Sigui tras di husticia, debocion piadoso, fe, amor, awante, genio suave. Lucha e lucha excelente di fe, haña un gara firme riba e bida eterno pa cua bo a ser yamá.” N’e cristiannan corintio el a bisa: “Bira firme, inmovibel, semper teniendo basta pa haci den e trabou di Señor.”—1 Timoteo 6:11, 12; 1 Corintio 15:58.

Siguiendo e conseho excelente aki ta e mihó manera pa combatí materialismo exitosamente, i siguramente tin basta cos pa un cristian haci! Den algun pais unda e cantidad di predicador di Reino no ta hopi, multitud di hende tabatin te awor solamente acceso limitá n’e berdad. Jesus a profetisá cu exactitud: “E cosecha ta grandi, pero e trahadornan ta poco.”—Mateo 9:37.

En bes di permití anshedadnan económico den e paisnan aki desviá nan for dje trabou spiritual cu tin pa haci, Testigonan di Jehova ta probechá dje situacion dor di usa oportunidadnan actual plenamente. Ora nan ta desempleá temporalmente, hopi di nan ta expandé nan actividad di predicá. Nan sirbishi, ademas di aumentá e gritu di alabansa na Jehova, ta duna nan e goso necesario pa enfrentá nan mes problemanan económico.

E Testigonan aki ta duna prioridad n’e trabou di predicá i ta laga dificultad económico na segundo lugá, cua ta demostrá n’e hermandad mundial cu nan ta confia henteramente den Jehova pa percurá pa nan. Su promesa ta: “Sigui, pues, buscando promé e reino i su husticia, i tur e otro cosnan aki lo ser agregá na boso.”—Mateo 6:33.

Desde e restoracion di adoracion berdadero na 1919, Jehova no a permití su pueblo tambaleá. El a protehá nan atrabes di persecucion severo i den algun lugá atrabes di décadanan di actividad scondí. Testigonan di Jehova ta determiná pa no laga loke e Diabel a keda sin logra mediante persecucion, logra mediante e trampa mas sutil di materialismo!

Siña Spera den Tur Aspecto

Salonnan di Reino spacioso, ekipo di zonido costoso, Salonnan di Asamblea i casnan di Betel atractivo ta duna gloria na Dios i ta duna un testimonio silencioso cu e ta bendicionando su pueblo. Testigonan di Jehova den paisnan unda e trabou tabata prohibí pa hopi tempu por sinti cu den e aspecto aki nan tin basta di haci pa alcansá e mesun norma cu otro paisnan. Pero loke ta e cos di mas importante ta pa nan sigui haci progreso spiritualmente. E indicacionnan externo di Dios su bendicion den un manera material lo sigui na su debido tempu.

Sirbidornan dedicá di Jehova mester vigilá pa, den siguimentu tras di interesnan personal, nan no cuminsá sinti cu ya nan a keda basta tempu caba sin cierto cosnan material. Anhelando pa alivio for di inigualdad económico i social ta comprendibel, pero e pueblo di Jehova no ta pasa por haltu dje echo cu tur sirbidor di Dios ta anhelando pa alivio. E ciegunan ta anhelá pa mira atrobe, esnan crónicamente malu ta anhelá pa un salú restorá, esnan deprimí ta anhelá pa un prospecto briyante i esnan na luto ta anhelá pa mira atrobe nan sernan kerí cu a muri.

Debí na circunstancia, tur persona cristian ta forsá den cierto sentido pa spera riba Jehova su mundu nobo pa resolvé su problemanan. Esaki mester pone nos puntra nos mes, ‘Si mi tin di come i di bisti, mi no mester ta contentu cu e cosnan aki i ser dispuesto pa spera pa alivio for di problemanan económico?’—1 Timoteo 6:8.

Hende cristian cu ta confia completamente den Jehova por ta garantisá cu si nan ta solamente dispuesto pa spera, tur nan deseonan corecto i necesidadnan pronto lo ser satisfacé. Ningun persona lo a warda en bano. Nos ta ripití e palabranan di Pablo: “Bira firme, inmovibel, semper teniendo basta pa haci den e trabou di Señor, sabiendo cu boso labor no ta en bano relacioná cu Señor.”—1 Corintio 15:58.

Pues siñando pa spera realmente mester ta un problema asina grandi?

[Picture on page 10]

Siña spera por salba bo bida