Resolviendo e Misterio dje Nomber Mas Importante

Ta interesante cu tanto e Corán musulmán como e Bijbel cristian ta menciona e nomber mas importante. E consideracion aki ta splica e nificacion i importancia dje nomber mas importante. E ta mustra també con e nomber ta afecta tur humanidad i nos futuro aki riba tera.

MIYONES di hende homber i muher a biba i a muri riba e planeta aki. Den casi tur caso, nan nomber a muri hunto cu nan, i e recordamento di nan a ser lubidá. Pero, algun nomber importante—tal como Avicenna, Edison, Pasteur, Beethoven, Gandhi, i Newton—ta wordu recordá. Nan nomber ta relacioná cu logramento, descubrimento, i invento di inventor.

Sin embargo, tin un nomber mas importante cu tur otro. Tur maraviya di pasado i dje tempo actual den henter e universo ta relacioná cuné. Sí, e speranza di humanidad pa un bida largu i feliz ta asociá cu e nomber!

Hopi hende a deseá di yega di conoce e nomber. Nan a busqué i a puntra tocante dje, pero nan no a hayé. Pa nan, e nomber a keda un misterio. Realmente, ningun hende por descubri e nomber amenos cu e Doño di dje ta revela su nomber. Felizmente, e misterio dje nomber sin igual a ser resolví. Dios mes a haci esei pa hende cu ta kere den dje por sa di dje. El a revela su nomber na Adam, anto na Abraham, na Moisés, i na otro fiel sirbidor di dje di antigua.

En busca dje nomber mas importante

E Corán ta mencioná un hende “cu tabata bon siñá den e Scritura.” (27:40) Splicando e versículo, un comentario yamá Tafsīr Jalālayn zhalaĺyn ta bisa: “Asaf, yiu di Barkhiya tabata un homber husto. El a conoce e nomber mas importante di Dios, i ki ora cu el a inboqué, el a recibi contesta.” Esei ta hácinos corda Asaf, e skirbidor bíblico, cu a bisa den Salmo 83:18: “Pa hende por sa cu abo, cu tin e nomber Jehova, bo so ta Haltísimo riba tur e tera.”

Den Corán 17:2, nos ta leza: “Nos a duna Moisés e Scritura i a hácinan un guía pa israelita.” Den e Scritura, Moisés a haci Dios e sigiente pregunta, bisando: “Supongamos cu awor mi ta yega cerca e yiunan di Israel i en berdad ta bísanan: ‘E Dios di boso antepasado a mandámi cerca boso,’ i nan en berdad ta puntrámi, ‘Con su nomber tá?’ Kico mi mester bísanan?” Dios a contesta Moisés, bisando: “Esaki ta loke bo tin cu bisa e yiunan di Israel, ‘Jehova e Dios di boso antepasado, e Dios di Abraham, e Dios di Isaac i e Dios di Jacob, a mandámi cerca boso.’ Esei ta mi nomber te na tempo indefinitivo.”—Éxodo 3:13, 15.

Den tempo di antigua, israelita a conoce e nomber mas importante di Dios. Nan a usé asta como un parti di nan mes nomber. Mescos cu hende ta tende e nomber Abdula, cu kier men “Sirbidor di Dios,” e pueblo di Israel di antigua a usa e nomber Abdías, cu kier men “Sirbidor di Jehova.” E mama di profeta Moisés tabata yamá Jokébed, cu posiblemente kier men “Jehova Ta Gloria.” E nomber Juan kier men “Jehova Tabata Bondadoso.” I e nomber di profeta Elías kier men “Mi Dios Ta Jehova.”

E profetanan a conoce e nomber importante i a usé cu respet profundo. E ta pará skirbí mas cu 7.000 bez den e Scritura Santo. Jesucristo, e yiu di María, a enfatizá e nomber ora el a bisa den oracion na Dios: “Mi a duna di conoce bo nomber na hende cu bo a dunámi . . . mi a dúnanan di conoce bo nomber i lo duné di conoce, pe amor cu locual bo a stimámi sea den nan.” (Juan 17:6, 26) Den su famoso comentario riba e Corán, Bayḍāwī a comenta riba Corán 2:87, bisando cu Jesús tabata “rebiba hende morto usando e nomber mas importante di Dios.”

Pero, kico a pasa pa haci e nomber un misterio? Kico su nomber tin cu ber cu e futuro di cada un di nos?

Di ki manera e nomber a bira un misterio?

Algun hende ta kere cu e nomber “Jehova” den hebreo kier men “Alá” (Dios). Pero “Alá” ta corresponde cu hebreo ’Elo·him, plural dje mahestad dje palabra ’elohʹah (dios). Un supersticion a presenta den hudío cu a prevenínan di bisa e nomber divino, Jehova. P’sei, ora nan tabata leza e Scritura Santo i a mira e nomber Jehova, nan a establece e costumber di bisa ’Adho·naiʹ, cu kier men “Señor.” Den algun texto, nan asta a cambia e texto hebreo original i a skirbi ’Adho·naiʹ en bez di “Jehova.”

Lider religioso di cristiandad ta sigi e mesun camina. Nan a reemplaza e nomber di Jehova cu “Dios” (“Alá” na arabir) i “Señor.” Esei a contribui ne desaroyo dje doctrina falso dje trinidad, cu no tin base den e Scritura Santo. Debí na esei, miyones di hende ta haci equibocacion i ta adora Jesús i e spiritu santo i ta consideránan como igual cu Dios.a

P’sei, tanto lider di hudío como lider di cristiandad ta culpabel pe ignorancia na tur parti tocante e nomber mas importante. Pero, Dios a profetizá: “Lo mi siguramente santifica mi gran nomber, . . . i e nacionan tin cu sa cu mi ta Jehova.” Sí, Jehova lo duna di conoce su nomber den tur nacion. Pakico? Pasobra e no ta simplemente Dios di hudío ni di ningun otro nacion of pueblo individual. Jehova ta Dios di tur humanidad.—Ezekiel 36:23; Génesis 22:18; Salmo 145:21; Malaquías 1:11.

E nomber mas importante i nos futuro

E Scritura Santo ta bisa: “Tur hende cu ta inboca e nomber di Jehova lo ser salbá.” (Romano 10:13) Nos salbacion riba e dia di huicio lo ser relacioná cu nos conocimento dje nomber di Dios. Conocimento di su nomber ta inclui conocimento di atributo, obra, i propósito di dje, i nos bibando na armonía cu principio halto di dje. Por ehempel, Abraham a conoce e nomber di Dios i el a inboca su nomber. Como resultado, el a disfruta di un bon relacion cu Dios, a demonstra fe den dje, a depende di dje, i a obedecé. Asina Abraham a bira amigo di Dios. Di igual manera, conocimento dje nomber di Dios ta hala nos cerca dje i ta yúdanos desaroyá un relacion personal cuné, manteniendo un gara firme riba su amor.—Génesis 12:8; Salmo 9:10; Proverbio 18:10; Santiago 2:23.

Nos ta leza den e Bijbel: “Jehova a sigi presta atencion i scucha. I un buki di recuerdo a cuminza ser skirbí dilanti dje pa esnan den temor di Jehova i pa esnan cu tabata pensa riba su nomber.” (Malaquías 3:16) Pakico nos tin cu ‘pensa riba’ e nomber mas importante? E nomber di Jehova ta nifica literalmente “E Ta Causa di Ser.” Esei ta revela Jehova como Esun cu ta causa su mes di ser Cumplidor di promesa. E semper ta cumpli cu su propósito. E ta Dios Todopoderoso, e único Creador, cu tin tur atributo excelente. No tin un solo palabra cu por detayá completamente e naturaleza divino di Dios. Pero Dios a scoge pa su mes e nomber mas importante—Jehova—i su nomber ta hácinos corda atributo, calidad, i propósito di dje.

Den e Scritura Santo, Dios ta revela na nos su propósito pa humanidad. Jehova Dios a crea hende pa disfruta di bida eterna feliz den Paradijs. Su boluntad pa hende ta pa tur humanidad compone un solo famía, uní den amor i paz. E Dios di amor lo cumpli cu su propósito den e futuro cercano.—Mateo 24:3-14, 32-42; 1 Juan 4:14-21.

Dios ta splica e motibo dje sufrimento di humanidad i ta mustra cu salbacion ta posibel. (Revelacion 21:4) Den Salmo 37:10, 11, nos ta leza: “Solamente un poco tempo mas, i hende malbado lo no t’ei; i bo siguramente lo presta atencion na su lugar, i e no ta t’ei. Pero e mansonan mes lo ocupa e tera, i nan en berdad lo haya nan gozo exquisito den e abundancia di paz.”—Mira també Corán 21:105.

Sí, hende lo conoce Dios pa su nomber importante. Nacionan tin cu sa cu e ta Jehova. Ta un privilegio maraviyoso pa conoce e nomber mas importante, pa duna testimonio di dje, i pega na dje! Dje manera ei, e propósito gozoso di Dios lo ser cumplí den cada un di nos: “Door cu el a pone su cariño riba mi, lo mi percura escape pe també. Lo mi protehé pasobra el a yega di conoce mi nomber. Lo e inbocámi, i lo mi contesté. . . . Lo mi satisfacé cu largura di dianan, i lo mi hacié mira salbacion pa medio di mi.”—Salmo 91:14-16.

[Footnotes]

[Picture on page 5]

Ne mata kimando, Dios a identifica su mes na Moisés como ‘Jehova, e Dios di Abraham’

[Credit Line]

Moisés i e mata kimando, di W. Thomas, Sr.