Informe di Proclamador di Reino

Respet pe Santidad di Bida

E BIJBEL ta mustra cu sanger ta precioso den e bista di Dios i cu e ta condena mal uso di dje. (Levítico 17:14; Echo 15:19, 20, 28, 29) Pa motibo di tal mandamento bíblico, Testigo di Jehova no ta acepta transfusion di sanger.

Pa yuda dócter i personal di hospital comprende e posicion religioso di Testigo di Jehova riba e asunto i sa cu Testigo di Jehova ta acepta tratamento alternativo, e Sociedad Watch Tower a organiza Comité di Enlace di Hospital (CEH) den diferente país. Miembro di tal comité ta bishita hospital pa papia cu personal médico. Recientemente, den 12 stad di Polonia, nan a tene mas cu 200 reunion, enbolbiendo mas cu 500 dócter médico, principalmente cabez di clínica of afdeling di hospital. Lo sigiente a sosode durante un bishita asina:

“Un reunion den e Clínica Cardio-quirúrgico den Zabrze tabata un logramento sumamente exitoso. Desde 1986 equipo médico den e clínica a opera nos rumanan sin sanger. Te awor, nan a haci 40 operacion asina. E clínica ta cla pa acepta paciente di tur Polonia i di stranhería també. Despues di un conferencia di 50 minut, e gerente asistente di afdeling dje hospital a introduci miembro dje CEH na un grupo di paciente i a bisa: ‘E hendenan aki ta Testigo di Jehova. Nan ta coopera cu nos clínica, i nan ta yúdanos. No solamente otro hende creyente sino també tur otro paciente ta beneficiá di nan yudanza. Gracias na Testigo di Jehova, nos ta keda convencí cu operacion grandi di curazón por ta hací sin sanger.

“‘Por ehempel, nos a opera e señora aki [indicando un paciente] sin sanger, i dialuna e ta bai cas. Mi kier bisa cu nos ta usa sanger cu hopi menos frecuencia cu na antes pasobra sanger ta peligroso. E ta asociá cu AIDS, hepatitis, i tardamento pa recobra.

“‘Mi ta católico, pero den nos cas nos semper tabata tolerante di creencia di otro hende. Un dia mi a camna rond den Stadión Slaski cu mi yiunan. Na antes, nan a neglisha e stadión, pero nos a ripara cu el a cambia di manera cu nos no a conocé. Mi a puntra un trahador con e cambio a sosode. El a bisa cu e directiva casi a perde speranza di drecha e stadión, pero nan a huuré cu Testigo di Jehova, i nan a renobé.

“‘Pues, Testigo di Jehova ta hende for di locual nos tur por siña hopi. Mi ta kere cu den e afdeling aki nos mester ta tolerante di creencia di otro hende.’ Anto, indicando un Testigo cu nan lo opera den algun dia, el a bisa: ‘E señora aki ta un Testigo di Jehova, nos lo operé sin sanger.’”

Aunque Testigo di Jehova no ta métenan den kerimento di otro hende, nan ta sigi ehempel dje apóstolnan i ta “obedece Dios como gobernante mas bien cu hende.” (Echo 5:29) Esei ta inclui tene respet pa sanger. Nan ta aprecia ora otro hende ta respeta nan conviccion religioso en cuanto e cuestion aki.