Pregunta di Lector

Siendo cu e sacerdote antiguo yamá Melkísedec tabata un ser humano real, pakico Bijbel ta bisa cu e tabata “sin genealogia”?

E declaracion aki a ser hací na Hebreo 7:3. Nota e versículo den su contexto:

“Pasobra e Melkísedec aki, rey di Salem, sacerdote di Dios Haltísimo, cu a contra cu Abraham bolbiendo for di matamentu dje reynan i a bendicion’é i cu ken Abraham a compartí un décimo di tur cos, ta primeramente, segun traduccion, ‘Rey di Husticia,’ anto tambe ta rey di Salem, esta, ‘Rey di Pas.’ Siendo sin tata, sin mama, sin genealogia, teniendo ni principio di dianan ni fin di bida, ma siendo hací semehante dje Yu di Dios, e ta permanecé sacerdote pa semper.”—Hebreo 7:1-3.

Manera a ser mencioná, Melkísedec tabata un ser humano real, mes real cu Abraham, cu ken e tabatin trato directo. (Génesis 14:17-20; Hebreo 7:4-10) Siendo asina, Melkísedec mester tabatin mayornan, un tata i mama, i kisas e por tabatin yu. P’esei, como ser humano e tabatin genealogia, of stamboom. Tambe e tabatin un fin na su bida físico. Na un dado momentu Melkísedec a muri, na armonia cu e declaracion di apostel Pablo na Romano 5:12, 14. Pero siendo cu nos no sa na ki tempu Melkísedec a muri i asina a stop di sirbi como sacerdote, den e sentido ei el a sirbi sin un fin conocí.

Den e buki di Hebreo, Pablo a comentá tocante Melkísedec ora e tabata considerá e papel di Jesucristo como un Sumo Sacerdote superior. Refiriendo na Melkísedec como un modelo, of patronchi, di Jesus den e papel sacerdotal aki, Pablo a bisa: “Jesus . . . a bira un sumo sacerdote segun e manera di Melkísedec.” (Hebreo 6:20) Den ki sentido?

Pablo mester a realisá cu e registro bíblico no ta duna detaye tocante e liña di famia di Melkísedec—su antepasadonan of cualkier posibel desendiente. E informacion ei simplemente no ta pará den Bijbel. P’esei, for dje punto di bista di loke Pablo tabata sa of loke nos sa, por a bisa corectamente di Melkísedec cu e ta “sin genealogia” (Traducción del Nuevo Mundo de las Santas Escrituras; American Standard Version), “sin tabla di desendencia” (W. J. Conybeare), of “sin stamboom.”—J. B. Phillips.

Den ki manera Jesus tabata mescos? Ta cierto cu nos sa cu Jesus su Tata tabata Jehova Dios i cu su mama humano tabata Maria dje tribu di Huda. Tog, tabatin un similaridad entre Melkísedec i Jesus. Con asina? Jesus no a nace den e tribu di Levi, e tribu pa sacerdote den e nacion di Israel. No, Jesus no a bira sacerdote mediante genealogia humano. Melkísedec tampoco, kende no a bira sacerdote “segun e ley di un mandamentu dependiendo di carni,” esta, dor di nace den un tribu i famia sacerdotal. (Hebreo 7:15, 16) En bes di bira sacerdote mediante un tata humano kende tabata un sacerdote e mes, Jesus a “ser specíficamente yamá pa Dios un sumo sacerdote segun e manera di Melkísedec.”—Hebreo 5:10.

Ademas, Jesus no tabatin ningun desendiente of sucesor pa su sacerdocio. Den e sentido aki tambe, e tabata sin genealogia. Lo e cumpli eternamente cu su sirbishi sacerdotal como un instructor útil. Pablo a comentá riba e sirbishi eterno aki, bisando:

“Dor cu [Jesus] ta sigui bibu pa semper, su sacerdocio ta sin ningun sucesor. P’esei, e tambe por salba completamente esnan cu ta acudí na Dios mediante dje, pasobra e semper ta bibu pa boga pa nan.”—Hebreo 7:24, 25.

Nos consideracion di Pablo su palabranan na Hebreo 7:3 mester ta mas cu un simpel pida conocimentu pa warda den nos mente. E mester reforsá nos aprecio p’e provision amoroso cu Jehova Dios a haci pa nos obtené pordon di picá pa tur eternidad i p’e manera cu el a percurá pa nos ricibí yudansa i guia pa semper.