“Busca Jehova, Boso Tur, e Mansunan”

“BUSCA Jehova, boso tur, e mansunan dje tera, cu a practicá Su mes decision hudicial. Busca husticia, busca mansedumbre. Probablemente boso por ser scondí den e dia di rabia di Jehova.”—Sofonías 2:3.

Profeta Sofonías a dirigí e palabranan ei n’e “mansunan dje tera,” i a insta nan pa “busca mansedumbre” afin di ser protegá den “e dia di rabia di Jehova.” E ta laga poco duda cu mansedumbre ta un rekisito pa sobrebibencia. Pero pakico?

Pakico Busca Mansedumbre?

Mansedumbre ta e cualidad di ser di genio suave, liber di arogancia of orguyo. E ta estrechamente ligá cu otro birtud, manera humildad i suavedad. Siendo asina, personanan mansu ta fácil pa siña i ta dispuesto pa aceptá disiplina na man di Dios, maske e por parce momentáneamente penoso.—Salmo 25:9; Hebreo 12:4-11.

Riba su mes mansedumbre talbes tin poco di haci cu un hende su educacion of posicion den bida. Sin embargo, esnan cu ta altamente educá of exitoso den un manera mundano tin tendencia di sinti cu nan ta cualificá pa tuma decision riba tur cos pa nan mes, asta asuntunan di adoracion. Esaki por stroba nan di permití un otro persona siña nan algu of di aceptá conseho i haci cambionan necesario den nan bida. Otronan cu ta ricu materialmente por cai den e pensamentu eróneo cu nan siguridad ta sinta den nan posesionnan material. Pues, nan no ta sinti necesidad p’e rikesanan spiritual di Bijbel, e Palabra di Dios.—Mateo 4:4; 5:3; 1 Timoteo 6:17.

Considerá e escribanan, e fariseonan i e sacerdotenan principal di tempu di Jesus. Na un ocasion ora e oficialnan cu nan a manda pa arestá Jesus a regresá sin dje, e fariseonan a bisa: “Boso no a wordu engañá tambe, no ta berdad? Ningun gobernante ni fariseo a pone fe den dje, no ta berdad? Pero e multitud aki cu no conocé e Ley ta hende maldicioná.” (Juan 7:45-49) Cu otro palabra, pa nan, solamente hende ignorante i sin educacion lo ta suficiente naif pa kere den Jesus.

Asina mes, algun fariseo a ser atraí n’e berdad, i nan asta a defendé Jesus i e cristiannan. Entre esakinan tabatin Nicodemo i Gamaliel. (Juan 7:50-52; Echo 5:34-40) Despues di Jesus su morto, “un gran cantidad di sacerdote a cuminsá bira obediente n’e fe.” (Echo 6:7) Sin duda e ehempel di mas sobresaliente tabata apostel Pablo. El a ser educá na pia di Gamaliel i a bira un abogado sumamente capas i respetá di hudaismo. Sin embargo, cu tempu el a respondé humildemente n’e yamada di Cristo Jesus i a bira su siguidor celoso.—Echo 22:3; 26:4, 5; Galatio 1:14-24; 1 Timoteo 1:12-16.

Tur esaki ta ilustrá cu sin importá kico un persona su pasado por ta of con e por ta sinti awor tocante e mensahe di Bijbel, e palabranan di Sofonías ta aplicá ainda. Si un hende kier ser aprobá pa Dios i guiá pa su Palabra, mansedumbre ta indispensabel.

Esnan Cu Ta “Busca Mansedumbre” Awe

Miyones di hende rond mundu ta respondiendo n’e bon nobo di Reino. Testigonan di Jehova ta conduciendo mas cu cuater miyon studio di Bijbel semanalmente den casnan di tal hende. Esakinan ta bini di hopi i varios antecedencia i diferente circunstancia económico i social. Tog, un cos cu nan tin en comun ta cu nan tin suficiente humildad pa aceptá e mensahe di Bijbel cu un hende a presentá na nan na nan mes cas of otro caminda. Hopi di nan ta haciendo progreso excelente pasobra nan ta dispuesto pa haci esfuerso pa vence obstáculo den nan caminda. Sí, nan ta entre e “mansunan dje tera” awe.

Tuma Maria di México, por ehempel. El a studia ley na universidad i tabatin siguridad financiero debí na un herencia. Pa motibu di esaki, el a desaroyá algun concepto masha liberal cu a cambi’é, manera e mes a bisa, den un persona “rebelde, rudo, dominante i ateo.” “Mi a yega di pensa cu tur cos por ser resolvé cu placa i cu Dios no tabata importante. En realidad, mi a sinti cu e no a ni existí,” Maria ta corda. El a agregá, “pa mi, religion tabata algu ridículo i djis un rekisito social.”

Mas tardi, Maria a nota e cambionan den su primo despues cu el a bira un Testigo di Jehova. “E tabata antes asina teribel, i awor e ta un persona masha pacífico i recto,” Maria a splica. “Famianan a bisa cu e ta un predicador i ta lesa Bijbel, i cu pa tal motibu e no ta bebe ni core tras di muher mas. Pues mi tabata kier p’e bini i lesa Bijbel pa mi pasobra mi a pensa cu den e manera aki lo mi a haña e pas i trankilidad cu mi a deseá asina tantu.” E resultado tabata cu Maria a aceptá un studio di Bijbel cu un pareha Testigo.

E tabatin hopi cos pa vence i tabata masha difícil tambe p’e aceptá e principio di Bijbel di hefatura pa ta sumiso na su esposo. Pero el a haci cambionan radical den su bida i actitud. El a confesá: “Mi ta pensa cu for di dia cu e rumannan a yega mi cas i a trece cu nan e yudansa di Jehova, tabatin felicidad, trankilidad i bendicion di Dios riba mi cas.” Awe, Maria ta un Testigo dedicá i bautisá di Jehova.

Den e búskeda di adoracion berdadero, tin un otro área den cua mansedumbre, of e falta di dje, ta hunga un papel importante. Hopi bes, e esposa den un famia ta aceptá e berdad i kier sirbi Dios, ma e esposo ta hala atras. Talbes ta difícil pa algun esposo aceptá e idea cu tin un otro persona—Jehova Dios—na ken su esposa mester ta sumiso awor. (1 Corintio 11:3) Un muher na Chihuahua, México, a pidi pa un studio di Bijbel, i cu tempu e cu su siete yunan a drenta den e berdad. Na promé instante su esposo a oponé. Pakico? Pasobra e no tabata kier pa su famia bai predicá di cas pa cas, ofreciendo literatura bíblico. Aparentemente el a sinti cu esaki tabata bou di su dignidad. Sin embargo, su famia a para firme den nan decision di sirbi Dios. Cu tempu e esposo a cuminsá mira e balor di aceptá e areglo di Dios. Pero 15 aña a pasa promé cu el a dedicá su mes na Jehova.

Na tur parti di México, ainda tin hopi comunidad isolá caminda e habitantenan local tin nan idioma i custumbernan nativo di indjan. E mensahe di Bijbel ta alcansando e hendenan aki i ta yudando nan mehorá nan nivel cultural, segun cu algun ta siña lesa i skirbi miéntras nan ta siña e berdad. Sin embargo, e echo cu hende tin poco educacion of tiki recurso material no ta nificá necesariamente cu nan lo ta mas receptivo. Orguyo racial i pegamentu firme na tradicion di antepasado tin biaha ta haci’é difícil pa algun aceptá e berdad. Esaki ta splica tambe pakico den algun pueblo di indjan, esnan cu ta aceptá e berdad hopi bes ta ser ferfelá dor di otro hende di pueblo. Pues mansedumbre ta necesario den hopi forma.

Respondé Cu Mansedumbre

Kico di abo personalmente? Bo ta respondiendo n’e berdad dje Palabra di Dios? Of ta difícil pa bo aceptá algun berdad di Bijbel? Talbes lo bo kier examiná bo mes pa mira kico ta strobá bo. Bo ta molestiá debí cu e mayoria di hende cu ta ser atraí n’e berdad ta di orígen humilde? Orguyo personal por ta enbolbí den bo pensamentu? Ta bon pa meditá rib’e palabranan di apostel Pablo: “Dios a scoge cos bobo di mundu, p’e brongosá e sabínan; i Dios a scoge cos swak di mundu, p’e brongosá cos fuerte; i Dios a scoge cos comun di mundu i cos menospreciá, e cosnan cu no ta, p’e reducí na nada cos cu ta, pa ningun carni por broma den bista di Dios.”—1 Corintio 1:27-29.

Lo bo rechasá un tesoro djis pasobra bo a hañ’é den un pochi di klei humilde? Naturalmente cu no! Sin embargo, esei ta e manera cu Dios ta scoge pa presentá su Palabra di berdad salbador di bida na nos, manera apostel Pablo ta splica: “Nos tin e tesoro aki den weanan di klei, p’e poder mas ayá cu loke ta normal sea di Dios i no loke ta bini di nos mes.” (2 Corintio 4:7) Mansedumbre i humildad lo permití nos mira e berdadero balor dje tesoro i no djis e “weanan di klei,” of agencianan humano, cu ta transmiti’é na nos. Haciendo asina, nos lo aumentá tambe e probabilidad pa nos ser “scondí den e dia di rabia di Jehova” i ser entre e mansunan cu “lo heredá e tera.”—Sofonías 2:3; Mateo 5:5.