Pronto​—⁠Un Mundu Sin Guera!

DIA 24 di december 1914, un soldá británico hóben yama Jim Prince a cana crusa tereno no-ocupá entre dos ehército pa papia cu un soldá aleman di infanteria. “Ami ta un sagon. Abo ta un anglo-sagon. Pakico nos ta bringa?” e aleman a puntr’é. Hopi aña despues, Prince a confesá: “Ainda mi no sa e contesta p’e pregunta ei.”

Pa un siman extraordinario na 1914, soldánan dje ehércitonan británico i aleman a bini huntu como ruman, a hunga futbol i asta a duna otro regalo di pascu. Naturalmente, tal tregua tabata unu no-oficial. E generalnan no tabata kier pa nan trupanan descubrí cu e “enemigu” no tabata e monster feros cu propaganda di guera a pinta. E soldá británico Albert Moren despues a recordá: “Si e suspension di tiramentu a sigui pa un siman mas, lo tabata masha difícil pa pone e guera cuminsá atrobe.”

Tal suspension spontáneo di tiramentu ta sugerí cu asta hopi soldá entrená ta anhelá pa pas en bes di guera. Mayoria soldá cu a conocé e horor di bataya lo respaldá e proverbio spañó: “Laga esun cu no sa kico ta guera, bai guera.” Sin duda, un encuesta di opinion mundial hací entre e público general lo revelá cu un mayoria aplastante di hende ta preferá pas riba guera. Pero con e deseo universal aki pa pas por ser traducí den un mundu sin guera?

Promé cu guera por ser abolí, actitud mester cambia. E constitucion dje Organisacion Educacional, Científico i Cultural di Nacionnan Uní ta declará: “Ya cu guera ta cuminsá den mente di hende, ta den mente di hende cu e defensa pa pas mester ser construí.” Tog, e sociedad di dia moderno, unda desconfiansa i odio ta plamá, ta birando mas violento i no mas pacífico.

Sin embargo, Dios mes a primintí cu un dia pas lo ser grabá den mente di hende cu un disposicion hustu. Mediante su profeta Isaías, el a bisa: “E [Dios] siguramente lo dicta fayo entre e nacionnan i lo rectificá asuntunan en cuanto hopi pueblo. I nan lo tin cu bati nan spada na ploeg i nan lansanan na chapi. Nacion lo no hisa spada contra nacion, ni nan lo no siña mas di guera.”​—⁠Isaías 2:⁠4.

Promoviendo Pas den e Mente

Un cambio remarcabel asina den pensamentu por sosodé? Hende lo siña un dia pa salbaguardiá pas en bes di glorificá guera? Considerá e ehempel di Wolfgang Kusserow. Na 1942 e nazinan a kita cabes dje aleman di 20 aña aki pasobra ‘e no kier a siña di guera.’ Pakico el a scoge pa muri? Den un declaracion skirbí, el a cita principionan bíblico manera, “Bo mester stima bo próhimo mescos cu bo mes” i, “Ken cu ta saca spada lo muri pa spada.” (Mateo 22:39; 26:52) Despues el a puntra categóricamente: “Nos Creador a laga tur esakinan ser skirbí por nada?”

E palabra di Dios, registrá den Bijbel, “ta ehercé poder” i ta loke a impulsá e hóben Testigo di Jehova aki pa sigui tras di pas, sin importá e consecuencianan. (Hebreo 4:12; 1 Pedro 3:11) Pero Wolfgang Kusserow no tabata e único cu a sigui tras di pas asina. Den e buki The Nazi Persecution of the Churches 1933-45, J. S. Conway ta cita e archivonan oficial di nazi dunando testimonio cu Testigonan di Jehova como grupo a nenga di carga arma. Manera Conway ta señalá, tal posicion yen di curashi prácticamente a nificá firmamentu di nan mes sentencia di morto.

Awe, Testigonan di Jehova ta keda sigui tras di pas, sin importá nan rasa of nacionalidad. Pakico? Pasobra nan a siña for di Bijbel cu berdadero sirbidor di Dios mester bati nan spada na ploeg. Alejandro, un argentino hóben kende a imigrá pa Israel na 1987, por duna testimonio dje echo aki personalmente.

Pa tres aña Alejandro a biba den un comunidad colectivo miéntras e tabata studia na un universidad i traha den varios hotel i restaurant. Durante e tempu aki, el a cuminsá lesa Bijbel i tabata buscando un propósito den bida. Mas cu tur cos, el a anhelá pa mira un mundu unda hende lo por disfrutá di pas i husticia. Alejandro​—⁠un hudiu​—⁠a traha huntu cu hudiu i arabir pero a preferá pa no faborecé ningun banda.

Na 1990 un amigu kende tabata studiando Bijbel cu Testigonan di Jehova a invitá Alejandro na un asamblea di un dia na Haifa. Asombrá pa mira 600 hudiu i arabir mesclando gososamente n’e asamblea, el a pensa den su mes, ‘Esaki ta e manera corecto pa hende biba.’ Dentro di seis luna, e mes a bira un Testigo i awor ta dedicá mayoria di su tempu na predicá e mensahe di pas di Bijbel.

Con Dios Lo Trece Pas

Pa conmovedor cu e ehempelnan aki ta, nan ta excepcion mas bien cu regla den e mundu djawe. Aunke e sistema actual ta boga pa pas, e ta muha e simianan di guera. Abo lo kier biba den un caya caminda e habitantenan ta gasta entre 7 i 16 porciento di nan entrada na arma di candela i proteccion di cas? En efecto, ta esei nacionnan a bin ta haciendo mediante gastunan militar den añanan reciente. No ta un sorpresa cu e profecia di Isaías ta revelá cu humanidad como totalidad nunca lo bati su spada na ploeg sino te ora Dios ‘rectificá asuntunan en cuanto hopi pueblo.’ Con lo e haci esei?

E medio principal pa rectificá asuntunan ta Jehova Dios su Reino. Profeta Daniel a profetisá cu ‘e Dios di cielu lo establecé un reino cu nunca lo ser reducí na ruina.’ E ta agregá cu e Reino aki “lo machicá i pone fin na tur e reinonan aki [gobiernunan di mundu], i e mes lo para pa tempu indefiní.” (Daniel 2:44) E palabranan aki ta revelá cu e Reino di Dios lo establecé firmemente su control riba tur e tera. Dor di eliminá frontera nacional, e Reino lo haci rivalidad obsoleto. Ademas, ya cu su súbditonan lo ta “personanan siñá pa Jehova,” nan pas “lo ta abundante.” (Isaías 54:13) Nada straño cu Jesus a bisa nos resa na Dios: “Laga bo reino bini”!​—⁠Mateo 6:10.

Kitando Obstáculo Religioso

Dios lo kita tambe obstáculo religioso pa pas. Religion a causa e conflicto armá di mas largu den historia​—⁠e Crusadanan, of “Gueranan Santu,” cu papa Urbano II a lansa na 1095 E.C.a Den nos siglo clero tabata prominente den incitá i gana apoyo popular pa guera, asta e gueranan di un caracter henteramente seglar.

Refiriendo n’e papel di iglesia cristian pa nomber durante Guera Mundial I, historiador Paul Johnson a skirbi: “Clero tabata incapas, i pa mayor parti inboluntario, pa pone fe cristian riba nacionalidad. Mayoria a scoge e caminda mas fácil i a igualá cristianismo cu patriotismo. Soldá cristian di tur denominacion a ser exhortá pa mata otro den e nomber di nan Salbador.”

Religion a haci mas pa animá guera cu fomentá pas. Realmente, Bijbel ta pinta religion falsu como un “muher di mal bida” cu ta frei gobernante di mundu. (Revelacion 17:​1, 2) Dios ta declar’é como e culpabel principal responsabel pa dramamentu di sanger di tur esnan matá riba tera. (Revelacion 18:24) Consecuentemente, Jehova Dios lo eliminá e obstáculo aki pa pas di una bes pa semper.​—⁠Revelacion 18:​4, 5, 8.

Asta cu e desaparicion di tal elemento divisor manera política i religion falsu, pas nunca lo ta sigur sin kitamentu dje mayor instigador di guera di tur​—⁠Satanas e Diabel. Esei ta e tarea final cu e Reino di Dios lo efectuá den su programa pa trece pas total na tera. E buki bíblico di Revelacion ta splica cu Satanas lo ser “gará” i “mará” i “tirá . . . den abismo” di manera cu “e no por gaña e nacionnan mas.” Despues di esei lo e ser destruí completamente.​—⁠Revelacion 20:​2, 3, 10.

E promesa bíblico di un fin na guera no ta un soño bano. E areglo di Jehova Dios pa pas a ser instituí caba. Su Reino a ser establecí den cielu i ta cla pa implementá mas medida pa garantisá pas mundial. Miéntras tantu, miyones di Testigo di Jehova, kendenan ta apoyá e gobiernu celestial aki, a siña biba na pas.

Claramente anto, nos tin motibu sólido pa kere cu guera no ta inevitabel. Mihó ainda, nos por mira padilanti n’e dia cercano ora Jehova lo haci guera caba pa semper. (Salmo 46:⁠9) Lo e percurá pa pronto lo tin un mundu sin guera.

[Footnotes]

[Caption on page 7]

Bo por biba den un mundu nobo sin guera