Testigonan di Jehova Rond Mundu

DI REPUBLICA FILIPINAS

E7.083 islanan tropical rof cu ta forma República di Filipinas ta e parti mas ariba di un cadena di ceru cu ta parcialmente bou di awa.a I e 62.000.000 habitantenan di Filipinas ta gusta papia riba casi tur tópico. E spiritu amical aki ta resultá den un tera fértil pa dunamentu di testimonio di Reino.

Dunamentu di Testimonio na Scol

Riba e isla di Masbate, un alumno hóben di scol secundario tabata capas pa duna testimonio na su maestra i muchanan di klas durante un kwis di cierto of falsu. E ta informá:

“E declaracion tabata, ‘Si Dios ta stimá mi, lo e no duná mi problema of lagá mi sufri.’ Ora mi maestra a controlá nos papelnan, el a haña cu tur mi compañénan di klas a contestá cierto cu excepcion di mi. Mi maestra a permití mi splica n’e klas pakico mi a contestá falsu. Mi a bisa cu no ta Dios a duna nos problema, aunke e ta permití sufrimentu i ta permití nos ser probá. Usando mi Bijbel, cua semper mi ta bai scol cuné, mi a razoná cu e klas riba e palabranan na 1 Juan 4:​8, ‘Dios ta amor.’ Despues di mi splicacion mi maestra a keda convencí, a bati riba su lessenaar i bisa: ‘Marilou tin razon.’ Mi tabata e único cu a haña e contesta corecto rib’e pregunta aki i a ricibí e puntuacion di mas haltu.”

E Mensahe di Reino Ta Tur Caminda

Miéntras un pionero regular (proclamador dje bon nobo di tempu completo) tabata bayendo di cas-pa-cas den un otro parti di Filipinas, el a topa e mama di tres mucha chikitu. E muher a mustra masha interes den e mensahe di Reino, i dor di esaki a bira fácil pa cuminsá un studio di Bijbel cuné. Aunke su casá no a gusta cu e tabata ricibí les di Bijbel, specialmente di Testigonan di Jehova, e studio a continuá.

E homber a muda su famia na un otro stad, pensando cu esaki lo a terminá asociacion di su esposa cu e Testigonan. Sin embargo, no a dura muchu cu nan a localisá e muher aki i a sigui su studio di Bijbel. Naturalmente su esposo tabata basta molestiá. El a bai trabou cu su rabia, unda el a expresá su sintimentunan na un cliente di ken e tabata drechando su vehículo. E homber no tabata sa cu e cliente aki tabata un Testigo di Jehova.

E Testigo a splica cu lo tabata masha beneficioso pa henter e famia si e esposa continuá su lesnan di Bijbel. Lo e por cuminsá aplicá e principionan di Bijbel direct na cas. Tambe el a sugerí cu e esposo mes lo por a saca beneficio dor di siña tocante e Reino di Dios.

Kico a resultá for dje discusion aki? E esposa dje homber a haña mas libertad pa studia Bijbel i e homber a dicidí di muda su famia bek pa nan cas original. Ei e muher a haci progreso spiritual te n’e punto di bira un publicador no-bautisá dje Reino. Su casá tambe a aceptá un studio di Bijbel, i e famia henter a cuminsá asistí na reunion cristian.

[Footnotes]

[Caption on page 8]

Dunamentu di testimonio na plasa ta duna resultado excelente

Oficina di sucursal di Sociedad Watchtower na Manila

[Caption on page 8]

DETAYENAN DJE PAIS

Aña di Sirbishi di 1993

MAXIMO CANTIDAD DI PUBLICADOR:

116.576

PROMEDIO:

1 Testigo pa 549

ASISTENCIA NA MEMORIAL:

357.388

PROMEDIO DI PUBLICADOR PIONERO:

22.705

PROMEDIO DI STUDIO DI BIJBEL:

94.370

CANTIDAD BAUTISA:

7.559

CANTIDAD DI CONGREGACION:

3.332

OFICINA DI SUCURSAL:

MANILA