Congresonan Conmovedor Ta Promove Siñansa Divino

AWE, e mundu ta experenciando un explosion di informacion. Na television i radio, den forma di buki of mediante computer, tin un suministro casi sin límite di conocimentu riba prácticamente cualkier tópico imaginabel. Tog, hende ta bira malu i ta muri. Crímen, hamber i pobresa ta existí tur rond e tera, i trastorno emocional ta afectá mas hende cu nunca. Tur e conocimentu disponibel a fracasá pa corigí asuntunan. Pakico? Pasobra humanidad a bira lomba p’e sabiduria di Dios.

Ta ki apropiado anto, cu “Siñansa Divino” tabata e tema scogí p’e reciente congresonan di Testigonan di Jehova! E programa a recordá esnan presente cu ta solamente e siñansa hañá den Bijbel, e Palabra di Dios, tin berdadero balor salbador-di-bida.

E Promé Dia

Cada dia tabatin un tema cu a enfatisá un aspecto di siñansa divino. Por ehempel, e programa p’e promé dia tabata basá rib’e tema “Conociendo e Siñansa Cu Ta For di Dios.” (Juan 7:17) E pensamentu aki a ser bon desaroyá segun cu e dia a progresá.

Despues di un cantica i oracion, e presidente dje congreso a habri e programa cu e discurso titulá “Siñansa Divino Ta Trece Nos Huntu.” El a mustra cu e pueblo di Jehova ta uní dor di siña Su caminda i cana den Su berea. (Miqueas 4:​1-5) Siñansa divino ta fortalecé nan unidad. Esnan cu a asistí n’e congreso a ser animá pa alegrá den nan compañerismo uní.​—⁠Salmo 133:​1-3.

Mas atardi, un simposio titulá “Reunionnan Cu Ta Instruí Nos Tocante Jehova su Caminda” a considerá reunionnan regular di congregacion. E promé orador a recordá esnan den asistencia cu ora nos ta reuní huntu, nos ta onra Jehova i pues ta ricibí Su bendicion. E siguiente orador a enfatisá e necesidad pa participá den reunionnan. Haciendo esei, nos ta alabá Jehova públicamente, ta demostrá nos fe i ta fortalecé e fe di otronan. E di tres orador den e simposio a mustra e necesidad pa pone na práctica loke nos ta siña na reunionnan. Nos mester ta “hacidor dje palabra, i no solamente tendedor.”​—⁠Santiago 1:22.

Despues a bini un consideracion excelente di cantamentu di alabansa na Jehova. Cantamentu di curason ta un parti significativo di nos adoracion. Despues dje discurso aki a sigui e discurso clave, “Siñansa Divino Ta Triunfá.” Ki un tema excelente! “Jehova ta e Fuente dje mihó siñansa cu cualkier hende por ricibí,” e orador a bisa. Anto, despues di un consideracion breve dje milager dje celebro humano, el a bisa: “Nos mester usa nos facultad di pensa principalmente pa ricibí siñansa divino. Esei so ta resultá den berdadero sabiduria.” Ki cierto!

Di Dos Mainta

“Sigui Dorna e Siñansa di Nos Salbador, Dios” tabata e tema dje segundo dia dje congreso. (Tito 2:10) E principio aki a bini padilanti den e discurso “Siñansa Divino Contra Siñansa di Demoño.” Sí, e demoñonan tin nan siñansa. (1 Timoteo 4:⁠1) Manera e orador a splica, siñansa divino ta triunfá riba “sabiduria” di Satanas dor di desenmascará siñansa falsu i e caminda astuto dje Diabel. Debí na esaki, rond di 4.500.000 hende cristian di curason hustu no ta catibu mas den scuridad di Satanas.​—⁠Juan 8:32.

Tog, nos tin cu sigui resistí Satanas. Esaki a ser enfatisá p’e discurso “Bo Ta Resistiendo e Spiritu di Mundu?” E spiritu dje mundu aki ta mortífero. E ta animá moralidad degradá, un punto di bista rebelde di autoridad, i un deseo cudicioso pa cosnan material. Un cristian mester examiná su mes constantemente. Ainda e tin normanan haltu ora ta trata di loke e ta mira, scucha of lesa? Cu animacion e orador a bisa: “Nos ta encomendá boso, rumannan homber, muher i hóbennan, p’e esfuerso diligente cu boso ta haciendo caba relacioná cu esaki.”​—⁠1 Juan 2:​15-17.

Tin un otro factor cu ta haci’é difícil pa resistí e spiritu dje mundu. Kico esei ta? Nos tur ta imperfecto. Ta cierto cu Jesus a muri pa nos picánan, pero ainda nos tin cu lucha contra e inclinacion di peca. Esaki a ser considerá den e discurso “Combatiendo Picá su Gara riba Carni Pecaminoso.” Entre otro cosnan, e orador a bisa cu nos por gana nos lucha contra picá si nos bisti e personalidad nobo i evitá cualkier cos cu ta satisfacé nos tendencianan pecaminoso.

“Haci Siñansa Saludabel Bo Moda di Biba” tabata título dje siguiente discurso. Algun ta preocupá demasiado pa nan salú físico. Sin embargo, en realidad salú spiritual ta hopi mas importante. E orador a enfatisá e necesidad pa tuma nos responsabilidad den e asuntu aki na serio, i e tabatin specialmente un palabra di animacion pa hende muher cristian. El a bisa: “Nos ta apreciá mashá tantu e rumannan muher di mas edad i esnan mas hóben cu ta bon balansá den nan celo p’e ministerio i den nan percuracion di responsabilidadnan personal.” Sí, i nos tur ta gradicí Jehova p’e siñansa saludabel cu ta separá nos for dje mundu.

Na conclusion dje programa di mainta tabatin e discurso “Siñansa Divino Ta Revelá e Propósito di Bida.” E orador a bisa: “Tardi of trempan sequence changed on purpose, casi tur hende ta puntra nan mes, ‘Kico ta e propósito di bida?’ ” Cu argumentonan poderoso, el a proba cu ta solamente e Bijbel ta duna un contesta berdadero n’e pregunta ei. Despues, e orador a mustra cu e promesanan maraviyoso di Dios efectivamente ta duna nos un propósito den bida. Probablemente, hopi persona den auditorio tabata pensando, ‘Esaki ta exactamente loke hende den mi teritorio mester tende.’ E Cuerpo Gobernante tabata di mesun opinion. Un foyeto nobo, titulá Kico Ta e Propósito di Bida? a ser presentá na fin dje discurso aki. Ki encantá tur hende a keda! E pausa di merdia a duna oportunidad pa blader dor dje publicacion nobo.

E di Dos Atardi

E promé discurso parti atardi tabatin e tema consolador “Tira Tur Bo Ansiedadnan Riba Jehova.” Hopi cos ta causa ansiedad; sin embargo, e Palabra di Dios ta bisa cu nos mester tira tur nos ansiedadnan riba dje. (1 Pedro 5:​6, 7) Ta cierto cu algun problema ta persistí, i relacioná cu esaki e orador a insta: ‘Tene pacenshi. Spera riba Jehova. Kere firmemente cu siguiendo e Bijbel ta semper mihó. Si nos tene nos curason fihá riba Jehova, nos lo yega na disfrutá “dje pas di Dios” cu ta surpasá tur pensamentu.’​—⁠Filipense 4:6, 7.

E siguiente cuater discursonan a mustra cu siñansa divino ta aplicá na bida di famia. E promé, “Haciendo Matrimonio un Union Duradero,” a recordá esnan den asistencia cu den bista di Jehova matrimonio no ta desechabel, manera hopi hende den mundu ta consider’é. Sin embargo, pa haci matrimonio un éxito, nos mester sigui e guia di Jehova. E a traha nos. P’esei, su Palabra inspirá ta contené e mihó conseho di matrimonio disponibel.

E discurso “Traha Duru p’e Salbacion di Bo Famia” a considerá e desafionan di percurá pa un famia den e tempu crítico aki. (2 Timoteo 3:⁠1) Mayornan ta siña nan yunan higiena físico, bon manera, con pa traha i con pa ta generoso i interesá den otro hende. Mas importante, nan mester siña nan yunan pa ta sirbidornan dedicá di Jehova.​—⁠Proverbio 22:⁠6.

Den e siguiente consideracion, “Mayornan, Boso Yunan Mester di Atencion Specialisá,” e orador a recordá esnan den asistencia dje necesidad pa encomendá e yunan, aunke nan no ta cera wowo pa nan debilidadnan. Mayornan mester ta specialmente alerto pa tendencianan en cuanto desonrades, materialismo of egoismo.

Particularmente esnan mas hóben den asistencia a scucha atentamente n’e discurso “Hóbennan​—⁠Na Siñansanan di Ken Boso Ta Haci Caso?” Cosnan ta difícil pa hóbennan cristian awe. Pa sigui e mundu ta fácil, pero esaki ta hiba na morto. Aunke scogiendo pa pega na siñansa divino ta exigí curashi pa un persona hóben, e ta trece gran bendicion awor i bida eterno den futuro.​—⁠1 Timoteo 4:⁠8.

Di dos dia a concluí cu e drama cu a toca curason Hóbennan Cu Ta Corda nan Creador Awor. Den e introduccion, e director a yama e hóbennan den e organisacion di Dios “un ehército teocrático lealmente enbolbí den sirbishi dedicá na Jehova Dios i na su Rey celestial nombrá, Cristo Jesus.” El a agregá: “Nos hóbennan en berdad ta logrando algu bon!” E drama a mustra gráficamente cu si un mayor ta entrená un yu bon, esei lo ta bentahoso p’e yu ora e bira grandi i ta sirbi Jehova riba su mes.

Mainta dje di Tres Dia

E tema pa di tres dia tabata “Sigui Siña Hende di Tur Nacion.” (Mateo 28:​19, 20) Esnan den asistencia sin duda a spera conseho oportuno rib’e trabou di predicá, i nan no a keda desapuntá. Un simposio titulá “Cumpliendo Gososamente Cu Nos Comision di Predicá i Siña” a fortalecé nan determinacion pa sigui participá den e trabou di duna testimonio. E discurso di apertura a considerá bishitanan inicial; e segundo discurso, rebishitanan, i e di tres discurso, studionan di Bijbel. Misioneronan rond mundu a ser invitá pa regresá cas i asistí na un congreso cu nan famia i amigunan. Na algun sitio, e misioneronan a participá den e parti aki dje programa. Tabata un deleite pa haña un bista den e éxito cu nan ta hañando den nan asignacionnan. Despues, “Alcansando Tur Persona Cu e Bon Nobo” a considerá e impacto di testimonio informal.

E mainta a concluí cu e discurso di bautismo, semper un punto sobresaliente na reunionnan grandi di Testigonan di Jehova. Di un congreso pa otro, gruponan grandi di esnan recien dedicá a para dilanti e multitud grandi di hende reuní i cu determinacion a contestá sí n’e dos preguntanan dirigí na nan. Despues nan a ser sometí na bautismo público. Ki un evidencia poderoso dje gran efecto di siñansa divino!

Atardi dje di Tres Dia

E programa di atardi a cuminsá cu un consideracion bíblico profundo. Testigonan di Jehova ta familiarisá cu e palabranan di Mateo capítulo 24 i Lucas capítulo 21. Algun a pensa cu no por a bisa nada nobo dje capítulonan di Bijbel aki? Ki ekibocá nan tabata! E discursonan “Kico Lo Ta e Señal di Bo Presencia?” i “Bisa Nos, Na Ki Tempu e Cosnan Aki Lo Sosodé?” a guia esnan den asistencia atrabes di un consideracion fasinante dje seccionnan dje dos capítulonan ei i a ofrecé splicacion actualisá di algun versículo. Tabatin discusionnan animá despues dje seccion segun cu esnan den asistencia a compará notanan pa mira si nan a comprendé e puntonan. Sin duda, hopi pregunta lo ser contestá ora e informacion aki ser publicá den E Toren di Vigilancia.

E tema di studio di Bijbel a continuá den e discurso “Contestanan Informativo na Bo Preguntanan di Bijbel.” Despues e programa a tuma un otro direccion. Aña 1993 a marca e di 50 aniversario dje Scol Bíblico di Galad di Watchtower. E discurso “Cincuenta Aña di Entrenamentu i Actividad di Misionero di Galad” a mustra esnan den asistencia loke a ser lográ durante e periodo ei. Si tabatin cualkier misionero presente durante e discurso “Logronan di Evangelisacion den e Campo Mundial,” nan a ser invitá pa compartí algun di nan experencianan cu e auditorio. Tendiendo relato dje misioneronan tabata conmovedor!

E siguiente discurso, “Pakico Testigonan di Jehova Ta Sigui Vigilá,” tabata un otro les di historia. El a mustra cu hende cristian ta vigilando for dje promé siglo E.C. te cu awor. Esei a hiba na un otro sorpresa. Trempan den e siguiente discurso, titulá “Proclamadornan di Reino Activo den Tur e Tera,” e orador a hisá un volúmen grandi i a bisa: “Ta un placer pa anunciá aki awe e publicacion dje buki nobo aki, titulá Los testigos de Jehová, proclamadores del Reino de Dios.” E buki ta contené un relato detayá dje historia di dia moderno di Testigonan di Jehova. E ta conta un historia conmovedor di awante, determinacion i éxito, dunando evidencia poderoso di Jehova su spiritu siendo activo riba su sirbidornan.

E di Cuater Mainta

Ya caba tabata e último dia dje congreso. E tema dje dia, “Beneficiando Nos Mes dor di Siñansa Divino,” a primintí un culminacion excelente dje programa. (Isaías 48:17) Parti mainta atencion di esnan den asistencia tabata fihá riba un simposio di tres discurso poderoso. Cu e título “Jeremías su Mensahe Inspirá di Spiertamentu​—⁠P’e Pasado i Presente,” e simposio a contené un consideracion di versículo pa versículo di Jeremías capítulo 23, 24 i 25. Ki un mensahe fuerte e capítulonan aki ta contené! Israel infiel di tempu di Jeremías lo mester a tembla pa su spiertamentunan francu i divinamente inspirá. Henter e mundu a tembla asta mas ora e spiertamentunan ei a ser cumplí. Cosnan ta diferente awe? Di ningun manera. Testigonan di Jehova cu curashi ta predicá Dios su mensahe di huicio. Cu tempu, henter e sistema di cosnan aki lo mester enfrentá Jehova su actonan di huicio. Esei lo nificá destruccion total p’e mundu di Satanas.

Djadumingu mainta a concluí cu e di dos drama, No Sea Gañá of Tene Mofa di Dios. Den un manera gráfico, el a mustra con siñansa divino por protegá nos di ser influenciá dor di video i música degradá i for di un tendencia pa sembra desacuerdo entre compañénan cristian. Na conclusion dje drama, e presidente a cita e palabranan penetrante aki di un dje actornan: “Nos no ta inmuno p’e influencia dje mundu. Si nos no resistí, e mundu por corumpí nos pensamentu sutilmente. I sea cu nos ta keda fiel of no, lo bai dependé riba loke nos a bin ta sembra.” Ki cierto!

E Atardi Final

E congreso tabata acercando su fin rápidamente ora e orador a subi plataforma pa duna e discurso público titulá, “Siñansa Util pa Nos Tempu Crítico.” Den un manera claro i lógico, el a identificá problemanan clave cu ta afectá nos awe i a señalá na algun manera cu siñansa divino por yuda nos disfrutá di un mihó bida. El a bisa cu si nos ta siguiendo siñansa bíblico awor, nos lo por sigui’é pa semper den Jehova su mundu nobo.

Despues di un resúmen dje les semanal dje Toren di Vigilancia, tabata ora p’e discurso final. E orador a pasa rápidamente dor dje puntonan sobresaliente dje programa di cuater dia i a recordá esnan den asistencia dje publicacionnan nobo. Tambe el a anunciá cu e di dos videocaset den e seri The Bible​—⁠A Book of Fact and Prophecy lo ser publicá pronto. En realidad, e videocaset ei titulá The Bible​—⁠Mankind’s Oldest Modern Book ta disponibel awor na ingles. Informenan conmovedor a ser lesá for di lugánan unda tin crísisnan serio, manera Bosnia i Herzegovina. Na conclusion e orador a lesa e palabranan di Eclesiastés 12:13: “E conclusion dje asuntu, despues di a tende tur cos, ta: Teme e Dios berdadero i warda su mandamentunan. Pasobra esaki ta tur e deber di hende.”

Ki un bunita recordatorio! Laga nos biba p’e dia ora tur humanidad lo alabá nos Gran Instructor, Jehova, i presta atencion na su siñansa divino.

[Caption on page 25]

E congresonan “Siñansa Divino” na Moscú i Kiev a resultá den gran goso

[Caption on page 26]

1. Mediante bautismo, hopi a simbolisá nan dedicacion na Dios

2. Un ruman di 100 aña di edad den asistencia tabata emocioná pa ricibí un publicacion nobo

3, 4. Dramanan cu mensahe penetrante a ser apreciá mashá

5. Misioneronan cu a ser entrevistá na congresonan a resaltá e beneficionan di siñansa divino

[Caption on page 26]

1

[Caption on page 26]

2

[Caption on page 26]

3

[Caption on page 26]

4

[Caption on page 27]

5