“E Man Di Jehova” Den Mi Bida

SEGUN CU LAWRENCE THOMPSON A CONTÉ

UN ANOCHI na 1946, mi tata i mi tabata sintá den e auto contemplando aurora borealis (luz di nort pool) balia den cielo. Nos a papia tocante e grandeza di Jehova i nos insignificancia. Nos a repasa episodio di antaño ora e trabao di Testigo di Jehova tabata prohibí den Canadá. Papa a impresioná den mi mente con Jehova Dios a sostene i a guia su pueblo durante e añanan ei.

AUNQUE mi tabatin 13 aña di edad so, mi por a comprende e berdad di loke papa a bisa. També, el a impresioná den mi mente e sintimento di urgencia i e magnitud dje trabao di predica cu tabatin cu ser hací ainda. Papa a cita Número 11:23 i a enfatizá cu, realmente, e man di Jehova nunca ta ser strobá. Solamente nos falta di fe i confianza den dje ta limitá loke e por haci pa nos. Esei tabata un conbersacion precioso entre tata i yiu, i lo mi no lubidé nunca.

Estudio di publicacion dje Sociedad Watch Tower, specialmente dje buki Salvation, publicá na 1939, també a influenciá mi bida den hubentud mashá. Lo mi nunca lubida e comparacion dramático den e introduccion dje buki: “E trein pasahero rápido, yen di hende, tabata corre 160 km pa ora. E tabatin cu cruza un rio riba brug cu tabatin un lorada cu un grado di casi 50 porciento, di manera cu hende riba e plataforma patrás dje trein por a mira e locomotor . . . Dos homber pará riba e plataforma patrás dje trein . . . a mira cu un seccion dje brug na su otro punta tabata na candela i tabata cai den e rio. Nan a mira cu nan tabata enfrenta un peliger grandi. Esei tabata un berdadero emergencia. E trein por para na ora pa salba e bida dje cantidad di pasahero na bordo?”

Aplicando e ilustracion, e buki a conclui: “ta mescos awor, tur nacion i pueblo di mundo ta cara cara cu e emergencia di mas urgente. Nan ta recibi e advertencia cu Dios ta manda, di cu e desaster di Armagedón ta net dilanti nos. . . . Ya cu nos a ser spiertá, cada un cu a tende e spiertamento mester scoge e camina pe sigi.”

E trein rápido, e brug na candela, i e urgencia dje trabao di predica tabata grabá permanentemente den mi mente.

Actividad di predica na antes

Mi a cuminza participa den e trabao di predica na 1938, ora mi tabatin cinco aña di edad. Henry i Alice Tweed, dos pionero (predicador di tempo completo), a hibámi hunto cu nan, i nos a dedica 10 te 12 ora pa dia papiando cu hende. Mi a goza mashá tal dia completo den e sirbishi di Jehova. Pues, mi a keda mashá emocioná e sigiente aña ora papa i mama a permitími bira un publicador i realmente raporta mi actividad.

Den e tempo ei leu atrás, nos a participa den marcha di informacion, camnando den fila na caya principal hibando poster cu lema riba nan cu a desenmascara religion falso i a anuncia e Reino di Dios. També, nos a usa tocadisco portátil i a toca grabacion di mensahe bíblico na porta di doño di cas. Nos a toca discurso di J. F. Rutherford, e presidente dje Sociedad Watch Tower, algun di locual mi a siña di memoria. Mi por tende den mi memoria ainda loke el a bisa: “Hopi bez hende ta bisa, Religion ta un laz i un engaño!”

Nos trabao prohibí den Canadá

Durante e segundo gera mundial, e trabao di Testigo di Jehova tabata prohibí den Canadá, mescos cu e tabata den Alemania nazista i otro tera. P’sei, nos a usa e Bijbel so pero a continuá nos trabao autorizá pa Dios den obedencia na instruccion bíblico. (Mateo 28:​19, 20; Echo 5:29) Nos a siña enfrenta invasion di poliz den nos reunion i cas. També, nos a haya experencia dunando testimonio dilanti huez i contestando pregunta dilanti raad.

Jim, mi ruman mayor, i mi a bira experto tirando foyeto for di auto na drempel di porta i balcón di cas. Además, nos a sirbi como mensahero i, aveces, como vigilante pa esnan cu a cruza e frontera pa asisti na asamblea na América.

Nos cas tabata na rand di Port Arthur (awor Thunder Bay), Ontario, riba rond di un bunder di tera cu palu i mata tur rond. Nos tabatin un baca, un bishé, porco, i galiña​—⁠tur locual a sirbi como un bon camuflage pa nos trabao di yuda otro cristian hoven cu autoridad a busca pa encarcelá pa nan predicacion dje Reino di Dios.

Den anochi, auto, truck, i caravana a yega yen di hovenan cristian, a drenta i a sali for di nos terreno scondí. Nos a hospedá, a sconde, a disfrazá, i a alimenta e hovenan, anto a láganan sigi nan camina. Mi tata i mama, hunto cu otro trahador dje tempo ei leu atrás, tabata sirbidor di Dios di tur nan curazón cu a moldeá mi curazón hoven pa sirbi i stima Jehova Dios.

Den Augustus di 1941, mi a dedica mi bida na Jehova Dios i a bautiza den un lagún chikito leu den campo. Un grupo di nos a reuni pe suceso laat anochi den un cabina cu luz di lampi di kerosín. Aparentemente yen di sospecho, e poliz a patruya, luzando e lagún cu luz fuerte, pero nan no a localizános.

Hopi aspecto dje sirbishi di tempo completo

Na 1951, mi a graduá for di scol segundario i a haci biahe di casi 1.600 km pa acepta un asignacion como pionero den Cobourg, Ontario. E congregacion tabata chikito, i mi no tabatin colega pionero. Pero, cordando cu e man di Jehova no ta strobá, mi a huur un cuarto, a cushiná pa mi mes, i tabata feliz sirbiendo Jehova. E sigiente aña mi tabata invitá pa sirbi den e oficina di sucursal dje Sociedad Watch Tower den Toronto. Mi a siña hopi les balioso ei, locual a refinámi pa sirbishi di Reino di futuro.

Despues cu mi a sirbi den Toronto pa mas cu un aña, Lucy Trudeau i mi a casa, i den tempo di friu di 1954, nos a recibi asignacion di pionero den Levis, Quebec. A haci friu mes, multitud desordená i persecucion di poliz por a intimidá hende, i tabata un desafío pa siña francés. Durante tur esei e man di Jehova nunca tabata strobá, pues, aunque tabatin tempo dificultoso, nos a recibi hopi bendicion també.

Por ehempel, nos tabata pidí pa inspecciona dos bapor (Arosa Star i Arosa Kulm) cu e Sociedad a planeá pa usa pa hiba delegado na asamblea internacional grandi den Europa na 1955. Ansioso pa recibi contrato dje Sociedad, de bez en cuando cabez di compañía di bapor a mústranos hospitalidad, locual tabata un alivio agradabel despues dje sirbishi dificultoso den Quebec ne tempo ei.

Den otoño di 1955, mi tabata invitá pa sirbi como superintendente biahero, i nos a pasa e tempo di friu bishitando congregacion remoto den e nort friu di Ontario. E sigiente aña nos a asisti ne Scol Bíblico di Galad di Watchtower na América, i despues nos tabata asigná como misionero den Brasil, Suramérica.

Nos a cuminza traha cu tur nos curazón i alma den nos asignacion nobo i pronto por a predica i siña na idioma portugués. Pronto na 1957, mi tabata asigná di nobo como superintendente biahero. Awor, en bez di e temperatura friu di nort, nos tabatin cu lucha cu e calor tropical. Hopi bez nos tabatin cu para i saca e santo cayente for di nos zapato of corta caña i kauwé pa dúnanos forza. Pero, tabatin bendicion.

Den e pueblo di Regente Feijo, mi a papia cu e hefe di poliz, i el a manda pa tur tienda cera i a bisa tur hende bai ne plaza central dje pueblo. Den sombra di un palu yen di flor i foyo grandi, mi a duna un discurso bíblico pa tur hende dje pueblo. Awe tin un congregacion di Testigo di Jehova ei.

Criando nos yiunan den Brasil

Ora Lucy a sali na estado na 1958, nos a establecénos den Juiz de Fora i a sirbi como pionero special. Durante e sigiente dos aña, nos dos yiu muher a nace, Susan i Kim. Nan a resulta di ser un berdadero bendicion den e ministerio, birando un atraccion den e pueblo. Ora nos a pasa na caya di piedra cu nan garoshi, hende a sali pa wak nan. Siendo cu e necesidad tabata grandi pa publicador di Reino den Recife, net pazuid dje ecuador, nos a muda te ne lugar cayente ei.

Na 1961, mi no solamente por a haci arreglo pa transportacion cu avión pa Testigo di Jehova bai ne asamblea den São Paulo sino ami també a yega di asisti ne asamblea importante. Pero, rond di 20 minut despues di a subi, di ripiente e avión a cai pa tera, tirando pasahero rond den e cabina. E interior dje avión tabata un desaster; asiento tabata rancá for di floer, i pasahero tabata golpeá i sangriente. Felizmente, e piloto por a stroba e avión di cai, i nos a baha bon. Ningun di nos a recibi herida asina malu cu nos no por a sigi te na São Paulo den un otro avión. Nos a disfruta di un asamblea maraviyoso, pero mi a bisa cu lo mi no subi den avión nunca mas!

Sin embargo, ora mi a yega cas for dje asamblea, un otro asignacion a sperámi. Mi tabatin cu supervisá un asamblea leu den e mondi tropical den Teresina, estado di Piauí. Mi tabatin cu bai cu avión. Tanto spantá cu mi tabata, mi a acepta e asignacion, dependiendo dje man di Jehova.

Na 1962 nos yiu homber, Greg, a nace den Recife. Aunque mi no por a sigi como pionero, pasobra awor mi famía tabata aumenta, mi por a eherce un influencia positivo riba un congregacion chikito. Semper nos yiunan tabata ansioso pa participa cu nos den e ministerio, siendo cu nos a hacié interesante pa nan. Cada un di nan, for dje edad di tres aña, por a haci un presentacion na cas di hende. Nos a establece e costumber di nunca perde reunion ni participacion den e sirbishi di feld. Asta ora un miembro dje famía tabata malu i un otro tabatin cu keda cas cuné, tur e otronan a asisti na reunion of a participa den e sirbishi di feld.

Através dje añanan, nos a considera regularmente como un famía curso di scol dje yiunan i nan meta den bida, preparando nan pa un vocacion den e organizacion di Jehova Dios. Nos a tene cuidao pa no bandonánan na influencia debilitador, tal como television. Nos no tabatin television den nos cas te cu nos yiunan tabata tiener. I aunque nos tabatin placa, nos no a malcriánan cu cosnan material. Por ehempel, nos a cumpra un bicicleta so, pa tur tres usa.

Nos a haci cos hunto tanto como tabata posibel, hungando basketbol, landando, i haciendo biahe como famía. Biahe cu nos a haci tabata en relacion cu asamblea cristian of ora nos a bishita cas di Betel den varios país. Biahe asina a permitínos tempo pa papia libremente cu otro di manera cu Lucy i mi por sa loke tabata den e curazón di nos yiunan. Nos a keda mashá agradicido na Jehova Dios pa tal añanan gozoso!

Cu tempo, nos diez aña den tera tropical cerca ecuador tabatin un efecto perhudicial riba e salud di Lucy. P’sei nos a recibi cu gozo un cambio di asignacion pa un clima mas frescu pazuid, den Curitiba, estado di Paraná.

Bolbiendo pa Canadá

Na 1977, despues di rond di 20 aña den Brasil, Lucy i mi a bolbe pa Canadá cu nos yiunan pa yuda cuida mi tata enfermo. Ki un diferencia den cultura esei tabata pa nos famía! Pero e no tabata un cambio spiritualmente, siendo cu nos a sigi e mesun rutina cu nos hermandad cristian amoroso.

Den Canadá e ministerio di tempo completo a bira un asunto cu a enbolbe henter e famía pasobra nos yiu muhernan, un tras di otro, a drenta den e ministerio di tempo completo como pionero. Nos tur a contribui na esfuerzo dje famía. Tur entrada di empleo di tempo parcial tabata contribui ne fondo pa paga gasto pa mantene nos cas i e tres auto necesario pa cubri nos territorio grandi. Tur siman, despues di un estudio bíblico di famía, nos a trata cu nos plan di famía. Tal conferencia a yuda indica pa nos tur unda nos tabata bai i loke nos tabata haci cu nos bida.

Greg, nos yiu homber, mescos cu su ruman muhernan di mas edad, també a pone como su meta e ministerio di tempo completo. Desde cu el a haci cinco aña di edad, el a expresa su deseo di traha den un oficina di sucursal dje Sociedad, yamá Betel. E nunca a perde bista di su meta, i despues di a gradua di scol segundario, el a puntra su mama i mi: “Boso ta kere cu mi mester solicita e sirbishi di Betel?”

Aunque a duelnos pa laga nos yiu bai foi nos, nos a contestá sin vacila: “Bo nunca lo sinti e man di Jehova asina tanto como den Betel​—⁠e curazón mes dje organizacion di Jehova.” Dentro di dos luna el a bai na Betel di Canadá. Esei tabata na 1980, i el a sirbi ei te awor.

Entre 1980 i 1990, un desafío nobo a presenta pa Lucy i mi. Nos tabata unda nos a cuminza​—⁠nos dos so. Susan a casa caba i tabata pionero cu su casá, i Kim i Greg tabata sirbi den Betel. Kico nos lo haci? E contesta pe pregunta a presenta pronto na 1981 ora nos tabata invitá pa sirbi den un circuito portugués, cu a cubri mas cu 2.000 km di Canadá. Ainda nos ta disfruta dje trabao di superintendente biahero.

Desde e tempo ei, Kim a casa i a bai ne Scol di Galad, i awor ta sirbi hunto cu su casá den e trabao di circuito den Brasil. Susan i su casá ta den Canadá ainda, criando nan dos yiu, i e casá di Susan ta pionero. Aunque nos famía na tempo reciente ta separá físicamente for di otro debí na nos asignacion den e sirbishi di tempo completo, nos ta keda íntimo spiritual i emocionalmente.

Lucy cu mi ta anticipa un futuro briyante hunto cu nos famía riba un tera limpi. (2 Pedro 3:13) Mescos cu Moisés di antigua, nos a experimenta personalmente e berdad dje contesta pe pregunta retórica den Número 11:23: “E man di Jehova ta cortá, berdad? Awor lo bo mira si loke mi ta bisa lo pasábo of no.” Realmente, nada por stroba Jehova Dios di bendiciona su sirbidornan pa nan sirbishi cu tur nan curazón.

[Caption on page 25]

Cu mi esposa, Lucy

[Caption on page 28]

◆