William Whiston​—Apóstata of Escolástico Onesto?

LO BO sacrificá bo carera pa causa di bo creencianan? William Whiston sí a haci’é.

El a bira un figura di controversia religioso den cuminsamentu di siglo 18, ora e no a bai di acuerdo cu e Iglesia di Inglatera rib’e siñansanan di Bijbel. Como resultado, cu tempu el a ser marcá como apóstata. Asina su curso a caus’é mofa pero tambe a pon’é gana respet.

Ken William Whiston tabata? I kico el a logra?

Un Escolástico di Bijbel

William Whiston tabata un colega briyante di Sir Isaac Newton dje Universidad di Cambridge. Si bo consultá e edicion ingles dje skirbimentunan di historiador hudiu Flavio Josefo dje promé siglo, probablemente lo bo ta lesando e traduccion cu Whiston a haci na 1736. Aunke otro traduccionnan ta existí, su traduccion intelectual erúdito, huntu cu su notanan i composicionnan, no a ser surpasá te cu awor i ta ser imprimí ainda. Hopi ta considerá e trabou aki e cumbre di Whiston su logronan.

Sin embargo, nos no mester pasa por haltu dje Primitive New Testament, Whiston su traduccion dje Scritura Griego Cristian. El a ser publicá na 1745, despues cu Whiston tabatin 77 aña. Whiston a traducí e cuater Evangelionan i Echonan di Apostel for dje Codex di Bezae, e cartanan di Pablo for dje Codex di Clermont, i e sobrá parti, incluyendo Revelacion, for dje Manuscrito di Alehandria. Cuidadosamente el a omití e parti ilegítimo falsu di 1 Juan 5:⁠7. Whiston a scoge e tres fuentenan griego antiguo aki como e mihónan disponibel n’e tempu ei

Amor p’e Bijbel tabata e aparente motivacion pa loke Whiston a haci. Prevalente den su tempu tabata deísmo, e siñansa cu únicamente rason ta un base adecuado pa creencia den Dios. Segun e buki William Whiston​—⁠Honest Newtonian, el a sostené fuertemente “e punto di bista tradicionalista cu Bijbel ta e único fuente infalibel di historia antiguo.” E palabra “Newtonian” aki ta un referencia na Isaac Newton, mihó conocí pa su buki Principia, den cua el a exponé e ley di gravitacion universal. Newton su pensamentu tabatin un efecto profundo riba William Whiston. Con?

Personalidadnan Contrastante

William Whiston a nace na 1667, yu di un clero di Iglesia di Inglatera. Despues di su ordenacion como pastor anglicano na 1693, el a regresá Universidad di Cambridge pa studia matemática i pa bira un asistente di Newton. Un relacion estrecho a desaroyá entre nan dos. Ora Newton a renunciá di su posicion como Profesor Lucasiano di Matemática rond di tres aña despues, el a haci sigur pa Whiston a ser nombrá na su lugá. Siguiendo cu su carera, Whiston a duna les den astronomia i matemática, pero Newton su influencia tambe a stimulá Whiston pa interesá mas profundamente den cronologia i doctrina bíblico.

Newton tabata un homber religioso. Como un creyente dedicá den e Milenio bíblico, el a skirbi extensamente rib’e profecianan di Daniel i Revelacion. Sin embargo, apénas un dje skirbimentunan aki a ser publicá durante su bida. El a rechasá e doctrina di Trinidad. Pero ora a yega na publicacion di su evidencia contra e Trinidad, “Newton a hala atras den temor cu su punto di bista anti-trinitario lo a bira conocí,” The New Encyclopædia Britannica ta observá. F. E. Manuel ta bis’é asina’ki den Isaac Newton, Historian: “E grupo di Newton sea a tene nan opinion secreto of a restringuí nan entusiasmo. . . . Caminda Newton tabata reservá Whiston a grita den mercado.” Pues e dos hombernan tabatin personalidadnan contrastante.

Exclusion

Na juli di 1708, Whiston a skirbi n’e arsobispu di tantu Canterbury i York, instando nan pa reformá e doctrina di Iglesia di Inglatera den bista dje siñansa falsu di Trinidad manera e ta ser reflehá den e Credo di Atanasio. Ta di comprendé cu el a ser consehá pa ta cauteloso. Tog Whiston a persistí. El a bisa: “Mi a studia e puntonan aki a fondo i mi ta cabalmente convencí cu e iglesia cristian a ser engañá estafá pa largu tempu i groseramente rib’e puntonan aki; i, cu bendicion di Dios, si ta den mi poder, lo e no ser engañá mas.”

Newton a teme pa su posicion social i académico. N’e otro banda, Whiston no. Despues cu el a formulá su creencianan anti- trinitario, el a skirbi un pamfleta presentando su punto di bista. Pero na augustus 1708, Universidad di Cambridge a nenga di duna Whiston permit pa imprimí su material, ya cu el a ser considerá no-ortodox.

Na 1710, Whiston a ser acusá di a siña doctrina contrario cu e creencia di Iglesia di Inglatera. El a ser hañá culpabel, a ser despohá di su posicion como profesor, i a ser sacá for di Cambridge. Sin embargo, apesar di proceduranan legal contra dje cu a sigui pa casi cincu aña mas, Whiston nunca a ser culpá como apóstata.

Aunke su punto di bista anti-trinitario tabata similar cu esun di Whiston, Newton no a defendé su amigu i cu tempu a corta tur laso cuné excluy’é. Na 1754, e obra di studio bíblico di Newton desenmascarando e Trinidad finalmente a ser publicá​—⁠27 aña despues di su morto. Pero esei tabata demasiado lat pa ta di cualkier yudansa pa Whiston, kende a muri dos aña promé.

Newton ta ser considerá responsabel tambe pa e exclusion di Whiston for dje prestigioso Sociedad Real [fundá pa promové discusion científico]. Pero Whiston no a ser desanimá. Huntu cu su famia el a muda pa Lónden, unda el a funda un Sociedad pa Promové Cristianismo Primitivo. El a hinca tur su energia den skirbimentu, su obra mas importante p’e tempu ei siendo e cuater volúmennan di Primitive Christianity Revived.

Controversial te na Fin

Como científico, Whiston a traha riba diferente manera pa marineronan determiná distancia riba laman. Maske su ideanan no a ser adoptá, cu tempu su persistencia a hiba n’e desaroyo dje cronómetro marino. Aunke hopi punto di bista di Whiston riba profecia bíblico, manera esnan di su contemporáneonan, a resultá di ta incorecto, el a purba tur medio posibel den su búskeda pa berdad. Su pamfletanan tratadonan rib’e órbita di cometanan i su suposicionnan rib’e efectonan dje Diluvio di Dia di Noe ta entre e hopinan cu el a skirbi pa defendé tantu berdad científico como bíblico. Sin embargo, su skirbimentunan cu ta desenmascará e doctrina di Trinidad como no-bíblico, ta surpasá tur su otro skirbimentunan.

Comportando su mes manera tabata su custumber, Whiston a bandoná e Iglesia di Inglatera na 1747. El a haci asina tantu literalmente como figurativamente, ora el a cana sali for di iglesia segun cu un clero a cuminsá lesa e Credo di Atanasio. A Religious Encyclopædia ta bisa di Whiston: “Bo mester admirá e frankesa i sinceridad balente di su caracter, e consistencia di su bida, i su conducta recto.”

Pa William Whiston, berdad no por a ser comprometé, i conviccion personal tabata mas precioso cu e aplousonan i elogio di hende. Aunke Whiston tabata controversial, e tabata un escolástico onesto kende sin miedu a defendé Bijbel como e Palabra di Dios.​—2 Timoteo 3:⁠16, 17.

[Caption on page 26]

Derecho di propiedad di Museo Británico