Determiná pa Sirbi Jehova!

“BO NO ta sali bai predicá!” “No laga bo hendenan yama aki!” Hopi hende muher cristian ta tende expresionnan similar di nan esposonan cu ta oponé. Pero ora e hombernan aki ta sirbi den ehército militar, nan esposanan ta enfrentá desafionan special di nan fe. (Isaías 2:4; Juan 17:16) Con anto, e esposanan cristian aki ta haci pa keda spiritualmente fuerte i activo den sirbishi di Reino?

Lealtad na Jehova Dios huntu cu determinacion personal ta yuda nan perseverá. “Mi ta kere cu tabata mi propio puru determinacion,” Yvonne, esposa di un soldá a splica. “Mi tabata sa cu mester tabatin manera pa evitá mi casá su oposicion.” En berdad, tabatin.

Un otro muher cristian, casá cu un oficial militar, ta relatá con su posicion determiná asta ta haci bida mas fácil pa su esposo. “E conocé mi programa mescos cu esun di dje, i personanan militar ta apreciá esei,” e ta splica. Sin embargo, su sirbishi continuo na Jehova no ta un curso fácil.

Venciendo Soledad

Esposanan di hombernan militar frecuentemente ta enfrentá e desafio di muda sabiendo esei solamente un par di dia delantá, si nan mester compañá nan esposonan na un asignacion leu for di cas. Anto, hañando nan mes den un ambiente desconocí, ta fácil pa nan sinti nan mes isolá. Pero esaki no mester ta asina. Esnan cu ta sirbi Jehova tin un bentaha. Kico esei ta? Segun apostel Pedro, esei ta “henter e asociacion di rumannan.” Awor, siendo miyones na cantidad, Testigonan di Jehova den 231 pais ta actua manera un famia cristian grandi, un “hermandad.” Bo ta haña nan prácticamente tur caminda.​—⁠1 Pedro 2:​17, nota abou.

Susan, rancá di ripiente for di su área di cas, a hañ’é ta biba na e base dje forsa aéreo caminda su esposo a wordu asigná. Nobo den fe i bou di presion di su esposo incrédulo pa stop di participá den e ministerio cristian, e ta relatá: “Mi a bai mesora na e reunionnan local, i ei mi por a sinta i combersá cu otro rumannan muher. Mi por bisa cu tur siguransa cu tabata e asociacion aki cu a tené mi activo.”

Tin bes cu soledad ta causa depresion. Asta e ora ei e bon nobo ta proveé un edificacion masha bonbiní. Glenys, un ruman muher ingles cu a compañá su esposo ora esaki a ser asigná den exterior, ta relatá: “Ora mi tabata realmente deprimí, inesperadamente, un persona cu mi a conocé hopi aña pasá, tempu cu mi mes tabata den ehército a skirbi i bisa cu recientemente el a bautisá como Testigo di Jehova. Esei a duná mi un empuhe cu a bin net na ora.”

Jane, kende a biaha cu su esposo pa Kenia, a descubrí cu reunionnan cristian a resultá di ta un cabuya di salbabida, aunke nan a ser conducí den idiomanan cu e no a comprondé. “Mi tabata sa cu aki ta caminda Jehova tabata kier pa mi ta,” e ta splica. “Mi tabata cu mi rumannan, i nan tabata manera un tónico. Nan a duná mi un bonbiní, i mi a sinti cu nos tabata un famia.”

Jane ta solamente un di e hopi personanan den e circunstancianan aki cu a descubrí famianan spiritual cu e ni sikiera tabata sa cu e tin!​—⁠Marco 10:​29, 30.

Firme Apesar di Oposicion

“No pensa cu mi a bini pa pone pas riba tera,” Jesus a spierta. “Mi no a bini pa pone pas, sino spada.” (Mateo 10:34) Kico e tabata kier men? Asta den un famia caminda bo por spera pas, por tin “un tiramentu di spada di ripiente,” A. T. Robertson ta comentá, den Word Pictures in the New Testament. “En berdad,” Jesus a bisa, “enemigu di hende lo ta personanan di su mes cas.” (Mateo 10:36) Ki cierto e palabranan aki ta resultá di ta ora un partner matrimonial ta hostil pa cu e berdad!

Ora Diane a cuminsá studia Bijbel cu Testigonan di Jehova, su esposo, un oficial di forsa aéreo, tabata masha malcontentu. Ki efecto esaki tabatin riba nan matrimonio? “Tabata manera un bloki di ijs cu a bini meimei di nos,” Diane ta splica. “Nos tabata felismente casá. Di ripiente nos tabata djis existí den e mésun cas.” Con, anto, el a manehá e situacion? “Conviccion personal i determinacion ta loke a conta, huntu cu Jehova su yudansa i su spiritu.” Diane a tuma na pechu e ehempel di Bijbel di profeta Daniel.

Ora el a ser deportá pa Babilonia i a ser ofrecé cuminda inacceptabel pa un sirbidor di Dios, Daniel “a determiná den su curason cu lo e no contaminá su mes cu e delicianan dje rey.” Sí, Daniel a tuma un decision conciente. El a resolvé den su curason pa no contaminá su mes nunca comiendo e cuminda ei. Ki un fortalesa el a demostrá e ora ei segun cu “el a sigui pidi e oficial principal di corte p’e no contaminá su mes”! E resultado? Jehova a bendicioná su posicion determiná.​—⁠Daniel 1:​8, 9, 17.

Mescos tambe awe un esposo cu ta oponé por exigí pa su esposa stop di asistí na reunionnan di congregacion. Con e esposa mester reaccioná? Jane a haña su mes den e situacion aki. E ta splica: “Nunca mi a hala atras bou di presion. Mi tabata sa cu mi no por a haci compromiso. Mi mester a demostrá cuantu e reunionnan a nificá pa mi.” Jehova a bendicioná su determinacion miéntras cu el a sigui asistí.

“Mi esposo a purba strobá mi di bai e reunionnan, pero esei no a dura mashá,” Glenys ta relatá. “Mi a bai tog. Ora mi a regresá cas, tin bes e tabata batí mi, i na otro ora e tabata cumindá mi cu silencio.” Sin embargo, el a manehá e situacion, haciendo oracion constantemente. Tambe, dos anciano dje congregacion a haci oracion cuné regularmente, locual a anim’é mashá pa sigui asistí.​—⁠Santiago 5:​13-15; 1 Pedro 2:⁠23.

Tin bes cu e superiornan hefenan di un esposo por pone presion riba dje p’e desanimá su casá di predicá e bon nobo. Diane a haña cu e mester a haci cla na su esposo kico su prioridadnan tabata. “Mi tabata prepará,” el a bisa, “pa carga e consecuencianan di mi predicacion continuo.” Cuantu esaki ta parce e posicion dje apostelnan! (Echo 4:​29, 31) Sin embargo, e tabata cauteloso den su predicacion. E ta relatá: “Mi sa invitá hende bin bebe cofi i ofrecé tur hende presente e buki Berdad.”​—⁠Mateo 10:16; 24:⁠14.

Sumision Sin Compromiso

Aunke esposanan cristian ta ser afligí p’e tension matrimonial, nan ta mira n’e futuro i ta confia den Jehova. Esaki ta yuda nan mantené un punto di bista balansá. Nan ta duna nan esposo cualkier apoyo cu nan por sin comprometé nan fe. Haciendo asina, nan ta sigui Pedro su conseho inspirá: “Boso esposanan, sea sumiso na boso propio esposonan.” (1 Pedro 3:⁠1) Den The Amplified New Testament, e instruccion apostólico aki ta bisa: “Subordiná boso mes como si fuera secundario na nan i dependiente di nan, i adaptá boso mes na nan.” Nota con Jane a sigui e conseho aki. “Mi esposo a bisá mi cu loke mi kier haci no mester interferí cu su carera,” e ta splica. “Pues mi a purba haña maneranan pa yud’é.”

Pues algun esposa cristian a bai di acuerdo pa asistí na funcionnan social caminda nan esposonan a wordu invitá. Pero nan ta keda determiná tog pa nunca comprometé nan fe. Jane a tuma tempu pa papia cu su esposo tocante esaki. Bondadosamente el a splica cu e tabata dispuesto pa asistí pero cu e no tabata kier pa su presencia pone su cara na bergwensa. “Mi tabata sa cu na cierto ocasion tur presente mester a lanta para i participá den un bríndis (toast). Mi a siña cu nos debe lealtad solamente na Jehova, i un bríndis tabata muchu mas cu simplemente mustra respet. Mi esposo a realisá con incómodo e situacion por tabata, p’esei e simplemente a bisa: ‘No bini!’ Mi a obedecé.”

Glenys, di otro banda, a compañá su esposo na un reunion asina, pero tabata wak e oficialnan na cabes dje mesa. Ora el a mira nan prepará pa bríndis, discretamente el a lanta bai toilet! Sí, e muhernan aki a adaptá nan mes pero nunca a comprometé.

“Ganá Sin Un Solo Palabra”

“Si mi mehorá mi mes abilidad como esposa, mi esposo lo mira cu e berdad ta cambiando mi,” Yvonne a razoná. P’esei el a lesa i bolbe lesa e capítulo den e buki di Bida di famía titulá “Esposa cu ta ser stimá tiernamente.”a “Mi a presta atencion particular na e material bou di e subtema ‘Esnan yoron i prufiá’! Pero mi a haña cu mas mi a trata di papia cu mi esposo, mas malu e situacion a bira.” Sin embargo, finalmente el a logra yuda su esposo pa sirbi Jehova. Con? Dor di aplicá e principio describí na 1 Pedro 3:​1, cu esposonan por ser “ganá sin un solo palabra.”

E manera cu muhernan cristian ta percurá pa nan famia ta un bon recomendacion di cristianismo na otronan. “Mi a trata di haci e berdad mas atractivo posibel,” Diane ta relatá. “Ora mi tabata bai reunion, mi esposo tabata sinti’é masha isolá, p’esei mi a haña ta importante pa instruí e muchanan pa nan comportá nan mes specialmente bon ora nos yega cas. Tambe mi a trata na presta extra atencion na dje ora nos a regresá cas.” Gradualmente, actitud di su esposo a cambia segun e tabata respondé na e atencion bondadoso di su famia.

Otro sirbidornan di Jehova tambe por yuda. Jane ta conta cu su esposo a disfrutá dje compania di misioneronan Testigo cu el a topa na Kenia. “Nan a cera amistad cuné i a papia tocante fútbol, i nan tabata masha hospitalario. Na hopi ocasion nos a ser invitá na diferente cas di misionero pa comementu.” Su esposo a splica despues: “Mi a cuminsá mira e fe di Jane for di un punto di bista totalmente diferente. Su amigunan tabata personanan hopi inteligente cu por a papia riba un variedad di tema.” Di igual manera, e esposo di Diane a cambia su punto di bista dje berdad. Ora e auto cu e tabata core a daña, un Testigo hóben a bin yud’é. “Esei realmente a impresioná mi,” el a bisa.

Naturalmente, no ta tur partner matrimonial ta ser ganá den e berdad. Kico pa haci e ora ei? Jehova ta suministrá yudansa pa capacitá esnan fiel pa perseverá. (1 Corintio 10:13) Considerá e animacion di Glenys pa esnan den e mésun circunstancia cuné: “Nunca, nunca duda cu Jehova ta Esun cu a originá matrimonio i cu e kier pa parehanan keda huntu. Pues sin importá kico e esposo por haci of ki oposicion bo por haña for di esnan rond di bo, Jehova nunca lo lagá bo tambaliá.” Aunke su esposo no ta adorá Jehova ainda, su actitud pa cu Glenys i pa cu e berdad a suavisá.

‘Sembra Cu Lágrima; Cosechá Cu Goso’

Berdaderamente, e muhernan cristian aki ta determiná pa sirbi Jehova. Si bo ta den circunstancianan similar, haci esaki bo determinacion tambe. Corda e exhortacion: “Jehova bo Dios bo mester teme. E bo mester sirbi, i na Dje bo mester pega.”​—⁠Deuteronomio 10:⁠20.

“Esun cu sin falta ta sali, asta yorando, hibando cuné un sacu yen di simia, sin falta lo e drenta cu un clamor gososo, treciendo cuné su tapushinan,” e salmista ta declará. (Salmo 126:⁠6) “Bo ta drama asina tantu lágrima segun bo ta trata di mustra bo partner e berdad, sea silenciosamente of verbalmente,” un Testigo ta admití. “Pero na final bo ta sclama gososamente pasobra asta si e no aceptá e berdad, Jehova ta bendicioná bo p’e esfuerso cu bo ta haci.”

Tur esnan cu fielmente ta sirbi Jehova apesar di oposicion na cas ta merecé un berdadero encomendacion. Nan ta merecé apoyo i amor. Laga nan mantené nan posicion sin comprometé, determiná pa sirbi Jehova!

[Nota]

[Caption on page 28]

Studio huntu cu oracion ta fortalecé determinacion cristian