Testigonan di Jehova Rond Mundu—Tailandia
“E TERA di hende liber.” Esei ta e nificacion dje nomber Tailandia. Su mas cu 57.000.000 habitantenan mansu i industrioso tin varios concepto religioso. Aunke budismo ta predominá, e religionnan di cristiandad tambe ta ser practicá den e pais di zuidoost Asia aki. Tur e hendenan aki mester tende e bon nobo dje Reino di Dios.—Mateo 24:14.a
Refugiadonan Ta Tende e Bon Nobo
Den campamentunan plamá rond e cerunan di Tailandia banda dje frontera di Myanmar, berdad bíblico ta ganando tereno entre e mas cu 10.000 refugiadonan Karen (di Birmania). Miembronan di un famia Karen cu ta biba den e área ei ta Testigo di Jehova. Nan ta plamando e bon nobo entre e refugiadonan. Con nan trabou a cuminsá?
Basta aña pasá un yoncuman a corta su lasonan cu e Iglesia Anglicano i a bira Testigo di Jehova. Instigá dor di nan pastor, su famianan a oponé. Sin embargo, el a wanta cu pacenshi i e oposicion di su famia a mengua gradualmente. E cleronan dje Iglesia Anglicano a sigui cu nan mofa te cu rond di dos aña pasá ora nan a ser destituí di nan funcion debí na conducta inmoral. Siendo cu e iglesia a keda e ora ei sin un wardador, e famia directo i otro famianan dje ruman Testigo tabata confundí i desesperá. Diesun di nan a renunciá for dje iglesia i a pidi e Testigonan pa studia Bijbel cu nan.
E studio aki a progresá bon, cu participacion di mas refugiado. E berdad a plama lihé, resultando den e bautismo di 17 Testigo nobo den e riu cu ta pasa meimei dje campamentu di refugiado. Ki un bista felis ora un abuela di 88 aña di edad a bautisá cu nan!
Video Ta Chispa Interes
E potencial pa crecementu ta grandi entre e refugiadonan. Na 1993 n’e celebracion di Memorial, 57 persona tabata den asistencia. Durante e bishita dje superintendente di circuito na mei dje aña ei, 67 persona a bini huntu pa un di su discursonan. I rond di 250 a reuní pa mira e video dje Sociedad Watchtower Los testigos de Jehová—la organización tras el nombre.
E esposa di un pastor bautista den e campamentu di refugiado a asistí na un discurso público di Bijbel organisá dor dje Testigonan i a nota e textonan di Bijbel cu a ser considerá. El a bisa su esposo con disgustá e tabata cu e sermonnan repititivo cu el a tende na nan iglesia. E homber a oponé, bisando cu si e mester bai n’e reunionnan di Testigonan di Jehova, tur e otro parokianonan lo haci mescos. Ora e esposa a asistí n’e reunionnan atrobe, su casá a core su tras cu un cuchú i a kima su notanan di reunion i literatura bíblico. Apesar di esei, ora e video a ser presentá, e esposa a bin atrobe. Mas despues e muher aki a bisa su casá loke el a mira. Cu un actitud diferente, e kier a mira e video i a haña duele cu el a kima e notanan i literatura bíblico di su casá.
Dje manera ei hende ta tendiendo e bon nobo na Tailandia. Asina nan ta ganando libertad spiritual den “e tera di hende liber.”—Juan 8:32.
[Nota]
a Pa informacion adicional, mira e Calendario de los Testigos de Jehová para 1994.
[Kuadro na página 24]
DETAYENAN DJE PAIS Aña di Sirbishi di 1993
MAXIMO CANTIDAD DI PUBLICADOR: 1.434
PROMEDIO: 1 Testigo pa 40.299
ASISTENCIA NA MEMORIAL: 3.342
PROMEDIO DI PUBLICADOR PIONERO: 232
PROMEDIO DI STUDIO DI BIJBEL: 1.489
CANTIDAD BAUTISA: 92
CANTIDAD DI CONGREGACION: 39
OFICINA DI SUCURSAL: BANGKOK
[Caption on page 25]
Proclamadornan di Reino predicando e bon nobo celosamente
[Caption on page 25]
Promé oficina di sucursal, 1947
[Caption on page 25]
Famia di Betel dilanti dje oficina di sucursal nobo na Bangkok, dedicá dia 8 di februari, 1992