Informe Di Proclamador Di Reino

Dios no ta haci distincion di persona

MAS cu 1.900 aña pasá, apóstol Pedro a duna testimonio na Cornelio, un oficial militar, bisando: “Por cierto mi ta comprende cu Dios no ta haci distincion di persona, sino cu den tur nacion e hende cu ta temele i ta obra husticia ta aceptable pe.” (Echo 10:​34, 35) Cornelio a manifesta temor di Dios i amor pa husticia. El a acepta e testimonio cu Pedro a duna, i a bira cristian.

E mesun principio ta cierto awe​—⁠Dios no ta haci distincion di persona. Nos ta tuma nota di esei den un experencia di Alemania. E informe ta bisa:

“Den e territorio di nos congregacion, tin un kazerne ruso grandi. Na 1989, un poco despues di caimento dje muraya di Berlín, anciano a puntra si algun publicador a conoce e idioma ruso. Algun di nos sí, i nos a bai traha den e territorio, cu a resulta di ser un berdadero gozo. Lo sigiente ta uno di hopi experencia.

“Mi tabata cu un publicador no bautizá (cu awor sí ta bautizá) ora nos a papia cu un comandante militar. E comandante a scucha loke nos a bisa anto a invitános pa papia cu soldad di dje. El a bisa cu nan mester tende tocante Dios i e Bijbel també, pues nos a pone afsprak pa bolbe.

“Nos a pidi un hermana cu ta papia ruso flot pa bai cu nos como intérprete. Den e sala di reunimento den e kazerne, nos a pone desplegue di literatura riba mesa i por a papia cu 68 soldad i contesta nan pregunta. Despues, cu gusto nan a acepta 35 buki i casi 100 revista. Ora nos a sali for dje sala, nos a mira grupo chikito papiando tocante e literatura.

“Nos a haci afsprak pa bolbe dia 4 di Juli di 1992. Ora nos a yega 10:50 a.m., ne warda ne porta dje kazerne a bísanos cu e soldadnan tabata spéranos. Un mayor a híbanos na sala di reunimento, i nos a haya cu un señora, cu anteriormente a recibí literatura foi nos pe biblioteca, a anuncia nos binimento cu poster poní den e kazerne. Tres ruman a duna discurso breve tocante nos trabao mundial i a mustra pakico nos por pone confianza den e Bijbel. Anto nos a contestá pregunta dje auditorio, dunando contesta bíblico. Algun pregunta cu nan a haci tabata, Ki posicion Testigo di Jehova ta tuma tocante sirbishi militar, i tin Testigo di Jehova cu ta soldad? Esei a duna e publicador no bautizá cu a compañámi promé e oportunidad di splica su sirbishi di 25 aña den e militar di Oostalemania, i terminando como un capitán den e forza aérea. El a relatá con el a siña tocante Dios i e Bijbel i awor kier bira Testigo di Jehova. E soldadnan a keda impresioná cu loke nan a siña. Dentro di siete minut tur e literatura cu nos a trece tabata den man dje soldadnan, i hopi di nan kier a haya Bijbel. Nos por a obtene siete Bijbel ruso den un boekhandel, locual nan a aprecia di recibi. Tabata un berdadero gozo pa duna tal hende hambrá spiritualmente informacion bíblico, i nos ta spera cu nan lo biba di acuerdo cuné.”

Berdaderamente, Dios no ta haci distincion di persona. Mediante su Palabra e ta atraé hende di curazón onrado, ken cu sea i na unda cu sea. E ta invitánan pa siña di dje i di su Yiu, Jesucristo, i hopi hende di tur categoría ta haci esei.​—⁠Juan 17:⁠3.