Sumision Gozoso Na Autoridad

“Boso a bira obediente di curazón.”​—⁠ROMANO 6:⁠17.

“E SPIRITU cu ta obra awor den e yiunan di desobedencia” ta escandalosamente bisto awe. Esei ta un spiritu di independencia desenfrená, biniendo di Satanás, “e gobernante dje autoridad di laira.” Tal spiritu, e “aire,” of actitud dominante di egoísmo i desobedencia, ta eherce “autoridad,” of poder, riba e mayoría di humanidad. Esei ta un motibo pakico e mundo ta experimentando loke a ser yamá un crisis di autoridad.​—⁠Efesio 2:⁠2.

² Felizmente, sirbidor dedicá di Jehova Dios djawe no ta yena nan pulmón spiritual cu tal “aire,” of spiritu di rebelion, contaminá. Nan sa cu e “rabia di Dios ta bini riba e yiunan di desobedencia.” Apóstol Pablo a agrega: “P’sei, no bira participante cu nan.” (Efesio 5:​6, 7) Mas bien, cristian berdadero ta haci esfuerzo pa ser “yená cu e spiritu” di Jehova, i nan ta bebe dje “sabiduría djariba,” cu ta “decente, anto pacífico, razonabel, cla pa obedece.”​—⁠Efesio 5:​17, 18; Santiago 3:⁠17.

Sumision boluntario ne soberanía di Jehova

³ Loke ta clave pa sumision boluntario ta reconocimento di autoridad legítimo. E pasado di humanidad ta mustra cu rechazamento dje soberanía di Jehova no ta resulta den felicidad. Tal rechazamento no a resulta den felicidad pa Adam i Eva, ni ne instigador di nan rebelion, Satanás e Diabel. (Génesis 3:​16-19) Den su estado di degradacion actual, Satanás ta “mashá rabiá” pasobra e sa cu su tempo ta cortico. (Revelacion 12:12) E paz i felicidad di humanidad, sí, di tur e universo, ta depende di reconocimento universal dje soberanía husto di Jehova Dios.​—⁠Salmo 103:​19-22.

⁴ Sin embargo, pa motibo di calidad maraviyosamente balanzá di Jehova Dios, e no ta keda satisfecho cu obedencia indiferente. Sí, Jehova Dios ta poderoso! Pero e no ta tirano. E ta un Dios di amor, i kier pa su creacion inteligente obedecé boluntariamente, cu amor. E kier pa nan somete na su soberanía pa motibo cu nan ta decidi di tur nan curazón pa pónenan bao di su autoridad husto i legítimo, convencí di cu no tin nada mihor pa nan cu obedencia na dje pa semper. E clase di persona cu Jehova Dios kier den su universo tin e sintimento dje salmista cu a skirbi: “E ley di Jehova ta perfecto, restorando e alma. E recordatorio di Jehova ta digno di confianza, haciendo hende sin experencia sabí. Ordu di Jehova ta recto, haciendo e curazón alegrá; mandamento di Jehova ta limpi, haciendo wowo briya. E temor di Jehova ta puro, permaneciendo pa semper. Decision hudicial di Jehova ta berdadero; nan a resulta di ser henteramente husto.” (Salmo 19:​7-9) Confianza completo den e legalidad i husticia dje soberanía di Jehova​—⁠esei mester ta nos actitud si nos kier biba den e mundo nobo di Jehova Dios.

Sumision gozoso na nos Rey

⁵ Cristo Jesús mes ta un ehempel excelente di sumision na su Tata celestial. Nos ta leza cu “el a humiya su mes i a bira obediente te na morto, sí, morto riba staca di tormento.” Pablo a agrega: “P’sei mes també Dios a halzé te na un puesto superior i bondadosamente a duné e nomber cu ta mas halto cu tur otro nomber, di manera cu den e nomber di Jesús tur rudía mester dobla di esnan den cielo i di esnan cu ta riba tera i di esnan cu ta bao di tera, i tur lenga mester reconoce abiertamente cu Jesucristo ta Señor pe gloria di Dios e Tata.” (Filipense 2:​8-11) Sí, cu gozo nos ta dobla rudía dilanti nos Lider i Rey reinante, Cristo Jesús.​—⁠Mateo 23:⁠10.

⁶ Jehova a profetiza tocante Cristo como nos Lider: “Mira! Mi a duné como un testigo pa grupo nacional, como lider i comandante pa grupo nacional.” (Isaías 55:⁠4) Cu su ministerio terrenal i cu su guiamento dje trabao di predica desde cielo despues di su morto i resureccion, Jesús a mustra cu e tabata un “testigo fiel i berdadero” di su Tata pe pueblo di tur nacion. (Revelacion 3:14; Mateo 28:​18-20) Tal grupo nacional ta ser representá awor na cantidad aumentante pa medio dje “multitud grandi,” cu lo sobrebiba e “tribulacion grandi” bao dje guiamento di Cristo. (Revelacion 7:​9, 14) Pero e guiamento di Jesús no ta termina ei. Su “gobernacion di prinz” lo sigi pa mil aña. Pa hende obediente, lo e cumpli cu e nificacion di su nomber di “Consehero Maraviyoso, Dios Poderoso, Tata Eterno, Prinz di Paz.”​—⁠Isaías 9:​6, 7; Revelacion 20:⁠6.

⁷ Si nos kier beneficiá dje “fontein di awa di bida” na locual e Lamchi, Cristo Jesús, ta guia hende di curazón recto, sin tarda nos mester duna prueba cu nos moda di anda cu nos ta someténos gozosamente na su autoridad como Rey. (Revelacion 7:17; 22:​1, 2; compara cu Salmo 2:12.) Jesús a bisa: “Si boso ta stimámi, boso lo warda mi mandamento. Ken cu tin mi mandamento i ta obedecénan, ta esun cu ta stimámi. En buelta, ken cu ta stimámi, mi Tata lo stima, i lo mi stimé.” (Juan 14:​15, 21) Bo kier pa Jesús i su Tata stimábo? Anto keda sumiso na nan autoridad.

Superintendente ta obedece gozosamente

⁸ “E congregacion ta sumiso na Cristo.” Como su Superintendente, Cristo ta percura “don den forma di hende” pe “edificacion” dje congregacion. (Efesio 4:​8, 11, 12; 5:24) Tal homber di mayor edad spiritualmente ta ser mandá pa ‘pastoreá e tao di Dios bao di nan cuido,’ sin “domina esnan cu ta e herencia di Dios, sino bira ehempel pe tao.” (1 Pedro 5:​1-3) E tao ta di Jehova Dios, i Cristo ta su “wardador excelente.” (Juan 10:14) Siendo cu superintendente ta spera apropiadamente e cooperacion boluntario dje carnénan cu Jehova i Cristo a confia na nan cuido, superintendente mes tin cu ser ehempel excelente di sumision.​—⁠Echo 20:⁠28.

⁹ Den e promé siglo, superintendente ungí tabata representá simbólicamente como situá “den” e man drechi di Cristo, indicando sumision na dje como Cabez dje congregacion. (Revelacion 1:​16, 20; 2:⁠1) No ta menos asina awe. Superintendente den e congregacion di Testigo di Jehova mester someténan ne guiamento di Cristo i ‘humiyánan bao dje man poderoso di Dios.’ (1 Pedro 5:⁠6) Ora nan ta ser pidí pa atende na asunto hudicial, mescos cu Salomón ora e tabata fiel ainda, nan mester pidi Jehova: “Bo mester duna bo sirbidor un curazón obediente pa huzga bo pueblo, pa distingi entre bon i malu.” (1 Rey 3:⁠9) Un curazón obediente por move anciano pa purba di mira tur cos manera Jehova i Cristo Jesús ta míranan di manera cu decision tumá riba tera lo ta tanto semehante posibel como decision tumá den cielo.​—⁠Mateo 18:​18-20.

¹⁰ Superintendente biahero i anciano di congregacion di igual manera lo haci esfuerzo pa imita Cristo den su manera di trata e carnénan. Distinto di fariseo, Jesús no a impone un cantidad di regla cu ta trabahoso pa sigi. (Mateo 23:​2-11) El a bisa hende semehante di carné: “Bini cerca mi, boso tur cu ta afaná i cargá, i lo mi refresca boso. Tuma mi yugo riba boso i siña di mi, pasobra mi ta di genio suave i humilde di curazón, i boso lo haya refrescamento pa boso alma. Pasobra mi yugo ta suave i mi carga ta lihé.” (Mateo 11:​28-30) Aunque ta cierto cu cada hende cristian tin cu “wanta su mes carga,” superintendente tin cu corda ehempel di Jesús i yuda nan rumanan sinti cu nan carga di responsabilidad cristian ta “suave,” i “lihé,” i un gozo pa wanta.​—⁠Galatio 6:⁠5.

Sumision teocrático

¹¹ Teocrácia ta gobernacion di Dios. E ta encerra e principio di hefatura expresá den 1 Corintio 11:⁠3. Pero e ta nifica mas cu esei. Hende por parce di mustra respet pa hefatura i toch no ser teocrático den e pleno sentido dje palabra. Con esei por tá? Pa ilustra, democrácia ta gobernacion mediante e pueblo, i hende democrático ta ser pintá como “hende cu ta kere den ideal di democrácia.” Hende por declara cu nan ta democrático, ta participa den eleccion, i asta ta un político activo. Pero, den nan comportamento general, si nan ta mustra desprecio pe spiritu di democrácia i tur principio cu e ta encerrá, nan por bisa cu nan ta berdaderamente democrático? Di igual manera, pa un persona ser berdaderamente teocrático, e mester haci mas cu keda sumiso na hefatura cu aparencia so. E mester imita e manera i calidadnan di Jehova Dios. E realmente mester laga Jehova goberné di tur manera. I siendo cu Jehova Dios a duna su Yiu plena autoridad, pa ser teocráctico hende també tin cu imita Jesús.

¹² No lubida, Jehova Dios kier sumision boluntario motivá pa amor. Esei ta su manera di goberna e universo. Dios ta e personificacion mes di amor. (1 Juan 4:⁠8) Cristo Jesús ta “e refleccion mes di su gloria i e representacion exacto di su ser mes.” (Hebreo 1:⁠3) Jesús ta manda su berdadero disípelnan pa stima un e otro. (Juan 15:17) Pues, pa ser teocrático, esei ta encerrá no solamente keda sumiso sino també ser amoroso. Nos por resumí e asunto como lo sigiente: Teocrácia ta e gobernacion di Dios; Dios ta amor; p’sei, teocrácia ta e gobernacion di amor.

¹³ Anciano por kere cu pe rumanan ser teocrático, nan mester obedece tur sorto di regla. Algun anciano ta traha regla usando sugerencia cu e “esclabo fiel i prudente” ta duna de bez en cuando. (Mateo 24:45) Por ehempel, nan a sugeri un biaha cu afin di ser mas fácil pa conoce tur ruman den e congregacion, por ta bon pa no sinta den e mesun stoel cada bez den Salón di Reino. Nan intencion tabata pa duna un sugerencia práctico, i no un regla estricto. Pero algun anciano por keda incliná di conberti e sugerencia na un regla i kere cu esnan cu no ta sigi e regla, no ta teocrático. Pero, por tin hopi bon motibo pa un ruman homber of muher prefera di sinta den un cierto sector. Si anciano no ta tuma tal cos na cuenta amorosamente, nan mes ta berdaderamente teocrático? Pa ser teocrático, “laga tur boso asuntonan tuma lugar cu amor.”​—⁠1 Corintio 16:⁠14.

Sirbi cu gozo

¹⁴ Pa ser teocrático també kier men sirbi Jehova Dios cu gozo. Jehova ta e “Dios feliz.” (1 Timoteo 1:11) E kier pa adorador di dje sirbié cu gozo. Esnan cu ta estricto en cuanto regla mester corda cu den reglamento cu Israel tabatin “cu tene cuidao pa obedece” tabatin lo sigiente: “Bo mester alegra dilanti Jehova bo Dios den tur proyecto cu bo tin.” (Deuteronomio 12:​1, 18) Cualkier proyecto cu nos tin den e sirbishi di Jehova mester ta un gozo, no un carga pisá. Tin hopi cu superintendente por haci pe rumanan sinti feliz den e hacimento di loke nan por den e sirbishi di Jehova. Na contraste, si anciano no ta tene cuidao, nan por priva algun ruman di nan gozo. Por ehempel, si nan ta haci comparacion, encomendando esnan cu ta alcanza of ta surpasá e promedio di ora dje congregacion dedicá ne dunamento di testimonio i criticando indirectamente esnan cu no a alcanza e promedio, con esnan cu por tabatin un motibo válido di a raporta hopi menos tempo, por síntinan? Esei no por molestia innecesariamente nan concenshi i kita nan gozo?

¹⁵ E poco ora cu algun por dedica na dunamento di testimonio público por representa mas esfuerzo cu hopi oranan cu otronan por dedica ne predicacion, debí na edad mas hoven, mihor salud, i otro circunstancia. En respecto esei, anciano no mag húzganan. Realmente, e Tata a duna “autoridad di huzga” na Jesús. (Juan 5:27) Jesús a critica e biuda pober pa motibo cu su ofrenda tabata menos cu e promedio? No, el a aprecia loke e dos cen realmente a costa e biuda. Nan tabata “tur loke e tabatin pa biba.” Ki un amor profundo pa Jehova nan a representa! (Marco 12:​41-44) Anciano mester ta menos apreciativo di esfuerzo amoroso di rumanan si nan total di ora ta menos cu e “promedio”? Den e sentido di amor pa Jehova, nan esfuerzo por ta wel mas halto cu e promedio!

¹⁶ E comentario ei mester ta conbertí awor na un “regla” nobo di cu cifra​—⁠asta promedio​—⁠nunca mester ta mencioná? Di ningun manera! E punto tá cu superintendente tin cu keda balanzá entre dunamento di animacion ne rumanan pa extende nan ministerio i yudando nan haci loke nan por cu gozo. (Galatio 6:⁠4) Den e comparacion di Jesús tocante talento, e doño a confia su pertenencia na su esclabonan “cada un segun su mes capacidad.” (Mateo 25:​14, 15) Di igual manera, anciano tin cu tuma na cuenta e posibilidad di cada publicador di Reino. Esei ta exigi discernimento. Por wel tá cu algun ruman realmente tin mester di animacion pa haci mas. Nan por aprecia yudanza pa nan haci mihor organizacion di nan actividad. En todo caso, si bo por yúdanan haci loke nan por cu gozo, tal gozo probablemente lo fortalecénan pa extende nan actividad cristian ora ta posibel.​—⁠Nehemías 8:10; Salmo 59:16; Jeremías 20:⁠9.

E paz cu ta resulta di sumision gozoso

¹⁷ Sumision gozoso ne soberanía legítimo di Jehova Dios ta dúnanos un gran paz. E salmista a bisa den un oracion na Jehova: “Paz abundante ta pertenece na esnan cu ta stima bo ley, i pa nan no tin tropiezo.” (Salmo 119:165) Cu obedencia na ley di Dios, nos ta beneficiá nos mes. Jehova a bisa Israel: “Esaki ta loke Jehova a bisa, bo Recumprador, e Santo di Israel: ‘Ami, Jehova, ta bo Dios, Esun cu ta siñábo saca probecho, Esun cu ta hacíbo camna den e camina den locual bo mester camna. O si bo solamente en realidad ta presta atencion na mi mandamento! Anto bo paz lo bira mescos cu rio, i bo husticia manera ola di lamá.’ ”​—⁠Isaías 48:​17, 18.

¹⁸ E sacrificio di rescate di Cristo ta trece paz cu Dios pa nos. (2 Corintio 5:​18, 19) Si nos tin fe den e sanger rescatador di Cristo i ta haci esfuerzo conciencialmente pa combati nos debilidadnan i haci e boluntad di Dios, nos por haya alivio for di remordimento di concenshi. (1 Juan 3:​19-23) Tal fe, apoyá cu obra, ta dúnanos un posicion husto dilanti Jehova i e speranza maraviyoso di sobrebiba e “tribulacion grandi” i biba pa semper den e mundo nobo di Jehova. (Revelacion 7:​14-17; Juan 3:36; Santiago 2:​22, 23) Nos por haya tur esei ‘si nos solamente en realidad ta presta atencion na mandamento di Dios.’

¹⁹ Sí, nos felicidad awor i nos speranza di bida eterna riba un tera paradísico ta depende di nos sumision gozoso ne autoridad di Jehova Dios como Señor Soberano dje universo. Laga nos semper tene e sintimento di David, cu a bisa: “Di bo, O Jehova, ta e grandeza i e fortaleza i e boniteza i e excelencia i e dignidad; pasobra tur cos den cielo i riba tera ta di bo. E reino ta di bo, O Jehova, Esun cu també ta hiza bo mes como cabez riba tur. I awor, O nos Dios, nos ta gradicíbo i ta alaba bo nomber bonita.”​—⁠1 Crónica 29:​11, 13.

[Study Questions]

1, 2. (a) Cua spiritu ta keda bisto den e mundo djawe, i e tin cua fuente i cua efecto? (b) Con sirbidor dedicá di Jehova ta mustra cu nan ta diferente?

3. Cua clave tin pa sumision boluntario, i e pasado ta síñanos cua les grandi?

4. (a) Jehova kier pa sirbidor di dje manifesta cua clase di sumision i obedencia? (b) Nos tin cu keda convencí di kico, i con e salmista a expresa esei?

5. Cua recompensa Jesús a recibi pa su obedencia, i kico nos ta reconoce boluntariamente?

6. Di ki manera Jesús ta resulta di ser un testigo i lider pa grupo nacional, i di ki manera su “gobernacion di prinz” lo sigi despues dje tribulacion grandi?

7. Si nos kier pa Cristo Jesús guíanos ne “fontein di awa di bida,” kico nos mester haci sin tarda, i kico por haci Jesús i Jehova stímanos?

8, 9. (a) Kico Cristo a percura pe edificacion dje congregacion, i di ki manera homber asina mester ta ehempel pe tao? (b) Di ki manera sumision di superintendente cristian ta ser simbolizá den e buki di Revelacion, i con nan mester busca un “curazón obediente” ora nan ta trata cu asunto hudicial?

10. Di ki manera tur superintendente mester haci esfuerzo pa imita Jesús den e manera cu el a trata e carnénan?

11. (a) Con un hende por respeta hefatura i toch no ser realmente teocrático? Ilustra. (b) Kico kier men pa ser berdaderamente teocrático?

12, 13. (a) Pa ser teocrático, kico esei specialmente ta enbolbe? (b) Sumision teocrático ta enbolbe obedencia na un cantidad di regla? Ilustra.

14, 15. (a) Con anciano por priva cierto ruman homber of muher di nan gozo den e sirbishi di Jehova, i pakico esei no por ta teocrático? (b) Con Jesús a mustra cu e ta aprecia e amor cu nos sirbishi ta expresa, en bez di e cantidad di oranan? (c) Anciano mester tuma kico na cuenta?

16. (a) Si superintendente ta usa cifra den nan discurso, pakico nan tin mester di discernimento i bon balanza? (b) Cua ta e mihor manera pa yuda e rumanan aumenta nan sirbishi?

17, 18. (a) Con sumision gozoso por trece paz i husticia pa nos? (b) Kico nos por haya si nos realmente ta presta atencion na mandamento di Dios?

19. Nos felicidad awor i nos speranza di bida eterna ta depende di kico, i con David a expresa nos conviccion di curazón?

[Caption on page 24]

Anciano ta anima e tao pa haci gozosamente loke nan por

[Caption on page 26]

Jehova ta hiba gusto di esnan cu ta obedecé di curazón

[Caption on page 28]

Punto pa corda

◻ Jehova kier pa sirbidor di dje manifesta cua clase di sumision i obedencia?

◻ Cua recompensa Jesús a recibi pa su obedencia, i nos moda di anda mester duna prueba di kico?

◻ Con tur superintendente mester imita Jesús den e manera cu el a trata e carnénan?

◻ Ser teocrático ta enbolbe kico?

◻ Sumision gozoso ta trece cua bendicion pa nos?