Traha Duru P’e Salbacion Di Bo Famia

“Sigui cria nan den e disiplina i reglamentu mental di Jehova.”​—⁠EFESIO 6:⁠4.

UN REVISTA popular a yam’é un revolucion. Esaki tabata den un artículo cu a describí e cambionan spantoso cu a tuma lugá den e famia den añanan reciente. Esakinan lo mester tabata “e resultado di un epidemia di divorcio, casamentu di nobo, divorcio di nobo, yunan djafó i tensionnan nobo den famianan intacto.” Tension i presionnan asina no ta sorprendente, pasobra Bijbel a pronosticá cu hende lo enfrentá “tempu crítico” durante e “último dianan” aki.​—⁠2 Timoteo 3:​1-5.

² P’esei awe mayornan ta enfrentá desafionan cu e generacionnan anterior no a conocé. Aunke algun mayor entre nos a cria nan yunan den maneranan piadoso “desde infancia,” hopi famia apénas recientemente a cuminsá “cana den e berdad.” (2 Timoteo 3:15; 3 Juan 4) Nan yunan kisas tabata mas grandi ora e mayornan a cuminsá siña nan e camindanan di Dios. Ademas, un cantidad creciente di mayornan soltero i famianan cu mayor of yu di criansa ta ser hañá den nos seno. Sea cual sea bo circunstancianan, apostel Pablo su spiertamentu ta aplicá: “Sigui cria nan den e disiplina i reglamentu mental di Jehova.”​—⁠Efesio 6:⁠4.

Mayornan Cristian i Nan Papel

³ Nota cu Pablo a dirigí su palabranan na Efesio 6:4 primeramente na “tatanan.” Un escritor ta splica cu den generacionnan anterior “tatanan tabata responsabel p’e criansa entrenamentu moral i spiritual di nan yunan; tatanan tabata responsabel p’e educacion di nan yunan. . . . Pero e Revolucion Industrial a kita e intimidad aki; tatanan a bandoná nan cunucu i shop, a bandoná nan cas pa traha den fábrica i despues den oficina. Mamanan a asumí hopi dje debernan pa cua tatanan un tempu tabata responsabel. Den forma creciente, paternidad a bira un concepto existiendo den teoria mas bien cu den práctica.”

⁴ Hombernan cristian: No contentá boso mes cu solamente percurá materialmente p’e famia, lagando tur e entrenamentu i educacion di boso yunan na boso esposanan. Proverbio 24:27 ta insta tatanan di tempu antiguo: “Prepará bo trabou pafó di porta, i drech’é pa bo mes den cunucu. Despues tambe bo tin cu edificá bo famia.” Di igual manera awe, como un homber trahadó, kisas bo tin cu laborá hopi i duru pa percurá sosten. (1 Timoteo 5:⁠8) Sin embargo, despues, por fabor tuma tempu pa “edificá bo famia”​—⁠emocionalmente i spiritualmente.

⁵ Esposanan cristian: Boso tambe mester traha duru p’e salbacion di boso famia. Proverbio 14:1 ta bisa: “E muher berdaderamente sabí a edificá su famia.” Como partner di matrimonio, abo i bo casá ta compartí e responsabilidad di entrená boso yunan. (Proverbio 22:6; Malaquías 2:14) Esaki por encerá disipliná bo yunan, prepará nan pa reunionnan cristian i ministerio di veld, of asta conducí e studio di famia ora bo esposo no por haci esei. Tambe bo por yuda hopi den siña bo yunan tareanan di cas, bon manera, higiena físico i hopi otro cosnan útil. (Tito 2:⁠5) Ora esposo i esposa ta traha huntu den e manera aki, nan por satisfacé mihó e necesidadnan di nan yunan. Pero cua ta algun dje necesidadnan ei?

Percurando pa Nan Necesidadnan Emocional

⁶ “Ora un mama cu yu na pechu ta cariciá su mes yunan,” nan ta sinti nan protegá, sigur i stimá. (1 Tesalonicense 2:7; Salmo 22:⁠9) Poco mama por resistí e impulso di duna hopi atencion na nan criaturanan. Isaías a puntra: “Un esposa por lubidá su yu na pechu di manera cu e no tin piedad dje yu di su barica?” (Isaías 49:15) Pues mamanan ta hunga un papel importante den e desaroyo emocional dje muchanan. No obstante, tatanan tambe ta hunga un papel importante den e aspecto aki. Educador di famia, Paul Lewis, ta bisa: “Nunca mi tabatin un solo trahadó social cu a yega di tende un mucha [delincuente] bisa cu e tabatin un relacion saludabel cu su tata. Ni un di cientos di mucha.”

⁷ P’esei ta esencial pa tatanan cristian cultivá cuidadosamente un banchi amoroso cu nan yunan. Por ehempel, considerá Jehova Dios i Jesucristo. N’e bautismo di Jesus, Jehova a declará: “Bo ta mi Yu, esun stimá; mi a aprobá bo.” (Lucas 3:22) Cuantu cos ta ser expresá den e poco palabranan ei! Jehova (1) a reconocé su Yu, (2) a expresá abiertamente su amor pa Jesus, i (3) a duna di conocé su aprobacion di Jesus. Sin embargo, esaki no tabata e único biaha cu Jehova a expresá su amor pa su Yu. Despues Jesus a bisa na su Tata: “Bo a stimá mi promé cu fundamentu dje mundu.” (Juan 17:24) Pues, realmente, no ta tur yu homber i muhé obediente tin mester di reconocimentu, amor i aprobacion di nan tatanan?

⁸ Si bo ta un tata, probablemente bo por haci hopi pa forma un banchi amoroso cu bo yunan dor di regularmente haci expresionnan físico i verbal apropiado di amor. Ta cierto cu ta difícil pa algun hende homber mustra nan cariño, specialmente si nan nunca a ricibí cariño abierto di nan mes tatanan. Pero asta un intento incómodo pa expresá amor na bo yunan por haci un impacto poderoso. Corda cu “amor ta edificá.” (1 Corintio 8:⁠1) Si bo yunan ta sinti nan sigur debí na bo amor paternal, nan lo ta mas incliná pa ta ‘berdadero yu homber i muhé’ i pa sinti nan liber pa confia den bo.​—⁠Proverbio 4:⁠3.

Percurando pa Nan Necesidadnan Spiritual

⁹ Yunan tin tambe necesidadnan spiritual. (Mateo 5:⁠3) Moises a insta mayornan israelita: “E palabranan aki cu mi ta mandando bo awe mester resultá di ta riba bo curason; i bo mester inculcá nan den bo yu homber i papia di nan ora bo ta sinta den bo cas i ora bo ta cana riba caminda i ora bo ta drumi i ora bo ta lanta.” (Deuteronomio 6:​6, 7) Si bo ta un mayor cristian, bo por haci hopi di bo dunamentu di instruccion informalmente, manera “ora bo ta cana riba caminda.” E tempu cu bo ta pasa coriendo huntu den e auto di famia, haciendo cómpras of canando huntu cu bo yunan di cas pa cas den e ministerio cristian ta duna oportunidad faborabel pa impartí instruccion den un ambiente relahá. Ora di come ta specialmente un bon tempu pa famianan combersá. “Nos ta usa ora di come pa papia tocante cosnan cu a presentá durante e dia,” un mayor ta splica.

¹⁰ Sin embargo, instruccion formal pa medio di un studio di Bijbel regular cu bo yunan tambe ta vital. Ta berdad cu “locura ta mará na curason” di mucha. (Proverbio 22:15) Algun mayor ta bisa cu nan yunan por saboteá e studio di famia fácilmente. Con? Dor di actua intrankil i fadá, dor di crea distraicionnan iritante (manera bringamentu cu ruman) of dor di fingi ignorancia di berdad bíblico básico. Si esaki yega n’e punto di bira un bataya pa wak ken su boluntad ta mas fuerte, un mayor su boluntad mester ta esun mas fuerte. Mayornan cristian no mester entregá i laga nan yunan dominá e famia.​—⁠Compará cu Galatio 6:⁠9.

¹¹ Si bo yunan no ta disfrutá dje studio di famia, talbes bo por haci algun cambio. Por ehempel, e studio ta ser usá como un capa excuus pa repasá e debilidadnan mas recien di bo yunan? Talbes lo ta mihó pa considerá tal problemanan den privá. Bo studio ta ser tené regularmente? Si bo ta cancel’é pa un programa di television of evento deportivo faborito, probablemente bo yunan lo no tuma e studio mashá na serio. Bo ta diligente i entusiástico den bo manera di conducí e studio? (Romano 12:⁠8) Sí, e studio mester ta agradabel. Purba enbolbé tur e yunan. Sea positivo i edificante, encomendando bo yunan calurosamente pa nan participacion. No simplemente cubri material, naturalmente, sino purba alcansá curason.​—⁠Proverbio 23:15.

Disiplinando den Husticia

¹² Yunan tambe tin un necesidad fuerte pa disiplina. Como mayor, abo mester pone límite pa nan. Proverbio 13:24 ta bisa: “Esun cu ta retené su bara ta odia su yu, pero esun cu ta stim’é ta esun cu di berdad ta busk’é cu disiplina.” Sin embargo, Bijbel no kier men cu semper mester duna disiplina cu sota. Proverbio 8:33 ta declará: “Scucha na disiplina,” i ta bisa nos mas aleu cu “un reprendimentu ta obra mas profundo den un entendido cu golpia un estúpido cien bes.”​—⁠Proverbio 17:10.

¹³ Na cierto ocasion, algun disiplina físico kisas ta apropiado. Sin embargo, si dun’é cu rabia, probablemente lo e ta demasiado i ineficas. Bijbel ta spierta: “Boso tatanan, no iritá boso yunan pa nan no bira desanimá.” (Colosense 3:21) En berdad, “simpel opresion por haci un persona sabí actua como loco.” (Eclesiastés 7:⁠7) Un hóben amargá por asta rebelá contra normanan hustu. Mayornan pues mester usa e Scritura pa disipliná nan yunan den husticia den un manera firme pero balansá. (2 Timoteo 3:16) Disiplina piadoso ta ser duná cu amor i suavedad.​—⁠Compará cu 2 Timoteo 2:​24, 25.a

¹⁴ Naturalmente, “nos tur ta trompecá hopi bes.” (Santiago 3:⁠2) Asta un mayor normalmente amoroso por sucumbí n’e presion dje momento i bisa algu desagradabel of manifestá un furia. (Colosense 3:⁠8) Si esei mester sosodé, no laga solo baha cu bo yu den gran angustia of cu bo mes den un estado provocá. (Efesio 4:​26, 27) Resolvé e asuntu cu bo yu, ofreciendo un disculpa si esei ta parce apropiado. (Compará cu Mateo 5:​23, 24.) Manifestando tal humildad por hala atraé abo i bo yu mas cerca otro. Si bo ta sinti cu bo no por controlá bo spiritu i lo entregá na rabia, busca yudansa for dje ancianonan nombrá dje congregacion.

Famia di Un Mayor So i Famia cu Mayor of Yu di Criansa

¹⁵ Pero no ta tur mucha tin e sosten di dos mayor. Na Merca, 1 di cada 4 mucha ta ser criá dor di un mayor so. ‘Mucha hombernan sin tata’ tabata comun den tempu bíblico, i interes pa nan ta ser mencioná bes tras bes den e Scritura. (Éxodo 22:22) Awe, di igual manera, famianan cristian di un mayor so ta enfrentá presion i dificultad, pero nan ta saca consuelo sabiendo cu Jehova ta “un tata di mucha hombernan sin tata i un hues di biudanan.” (Salmo 68:⁠5) Hende cristian ta ser instá pa “cuida huérfanonan i biudanan den nan tribulacion.” (Santiago 1:27) Compañénan creyente por ta un gran yudansa pa famianan di un mayor so.b

¹⁶ Si bo ta un mayor soltero, kico abo mes por haci pa beneficiá bo famia? Bo mester ta diligente en cuanto studio di Bijbel di famia, asistencia na reunion i e ministerio di veld. Sin embargo, disiplina por ta un tarea particularmente difícil. Talbes ainda bo ta tristu debí n’e pérdida di un casá kerí den morto. Of bo por ta luchando cu sintimentu di culpa of rabia riba un kiebro matrimonial. Si tantu abo como bo ex-casá tin custodia riba yu, kisas bo ta asta teme cu bo yu por preferá di keda cu e casá cu a separá of divorciá. Situacionnan asina por haci’é emocionalmente difícil pa duna disiplina balansá. Sin embargo, Bijbel ta bisa nos cu “un mucha homber lagá pa su cuenta lo causa bergwensa na su mama.” (Proverbio 29:15) Pues, no entregá na culpa, remordimentu of presion emocional dor di un ex-casá. Fiha normanan razonabel i consistente. No haci compromiso cu principio bíblico.​—⁠Proverbio 13:24.

¹⁷ Sin embargo, dificultadnan por presentá ora un mama soltero ta trata su yu homber como un esposo substituto​—⁠e homber dje cas​—⁠of su yu muhé como su persona di confiansa, cargand’e cu problemanan íntimo. Hacimentu di esei ta inapropiado i ta confundí un yu. Ora e papelnan di mayor i yu ta bruha den otro, disiplina por caba na nada. Laga e yu sa cu abo ta e mayor. Si bo ta un mama den necesidad di conseho basá riba Bijbel, busk’é for dje ancianonan of talbes for di un ruman muhé maduro.​—⁠Compará cu Tito 2:​3-5.

¹⁸ Famianan cu mayor of yu di criansa tambe ta enfrentá desafionan. Frecuentemente, mayornan di criansa ta haña cu “cariño inmediato di nan yunan di criansa” ta raro. Por ehempel, yunan di criansa por ta masha sensitivo pa cualkier aparente faboritismo en cuanto yunan biológico. (Compará cu Génesis 37:​3, 4.) En realidad, yunan di criansa por ta luchando cu tristesa p’e mayor cu a bai i ta teme cu stimando un mama of tata di criansa di algun manera lo ta desleal na nan tata of mama biológico. Intentonan pa duna disiplina necesario por topa cu un recordatorio furioso, ‘Bo no ta mi berdadero mayor!’

¹⁹ Proverbio 24:3 ta bisa: “Cu sabiduria hende lo edificá un famia, i cu dicernimentu lo e resultá di ta firmemente establecí.” Sí, sabiduria i dicernimentu ta necesario di parti di tur miembro pa un famia di criansa tin éxito. Cu tempu, yunan mester aceptá e echo hopi biaha doloroso cu cosnan a cambia. Mayornan di criansa di igual manera mester siña tene pacenshi i compasion, no birando ofendí muchu purá ora nan ta enfrentá un aparente rechaso. (Proverbio 19:11; Eclesiastés 7:⁠9) Promé cu bo asumí e papel di dunadó di disiplina, traha pa establecé un amistad cu e yu di criansa. Miéntras un banchi asina no keda establecí, algun por considerá cu ta mihó pa laga e mayor biológico duna disiplina. Ora tension ta surgi, mester haci esfuerso pa comunicá. “Cerca esnan cu ta consultá cu otro tin sabiduria,” Proverbio 13:10 ta bisa.c

Sigui Traha p’e Salbacion di Bo Famia!

²⁰ Famianan cristian fuerte no ta pa casualidad asina. Boso, cabesnan di famia, mester sigui traha duru p’e salbacion di boso famia. Sea vigilante, notando característicanan insaludabel of tendencianan mundano. Pone un bon ehempel den papiamentu, conducta, amor, fe i decencia. (1 Timoteo 4:12) Manifestá e fruta di spiritu di Dios. (Galatio 5:​22, 23) Pacenshi, consideracion, misericordia i ternura lo reforsá bo esfuersonan pa siña bo yunan e camindanan di Dios.​—⁠Colosense 3:​12-14.

²¹ Cu yudansa di Dios, purba mantené un spiritu contentu i caluroso den bo cas. Dedicá tempu huntu como famia, haciendo esfuerso pa come por lo ménos un cuminda huntu cada dia. Reunionnan cristian, sirbishi di veld i studio di famia ta esencial. Sin embargo, tin tambe “un tempu pa hari . . . i un tempu pa bula salta rond.” (Eclesiastés 3:​1, 4) Sí, programá periodonan di recreo edificante. Bishita na museo, parke di bestia i lugánan similar ta agradabel pa henter e famia. Of kisas bo ta paga e television i dedicá tempu na canta, scucha música, hunga wega i combersá. Esaki por yuda e famia hala mas cerca di otro.

²² Cu boso tur como mayornan cristian sigui traha pa agradá Jehova plenamente “segun cu boso ta sigui producí fruta den tur bon obra i aumentá den e conocimentu exacto di Dios.” (Colosense 1:10) Edificá bo famia riba un fundeshi fuerte di obedencia n’e Palabra Dios. (Mateo 7:​24-27) I sea sigur cu boso esfuersonan pa cria boso yunan “den e disiplina i reglamentu mental di Jehova” lo tin su aprobacion.​—⁠Efesio 6:⁠4.

[Footnotes]

[Study Questions]

1, 2. Ki desafionan mayornan ta enfrentá awe?

3, 4. (a) Ki factornan a pone e papel di tatanan mengua? (b) Pakico tatanan cristian mester haci mas cu percurá materialmente p’e famia?

5. Con esposanan cristian por traha p’e salbacion di nan famia?

6. Ki papel mama i tata ta hunga den e desaroyo emocional di nan yunan?

7, 8. (a) Ki evidencia tin di un banchi fuerte entre Jehova Dios i su Yu? (b) Con tatanan por forma un banchi amoroso cu nan yunan?

9. (a) Con mayornan israelita temeroso di Dios a percurá p’e necesidadnan spiritual di nan famia? (b) Ki oportunidad cristiannan tin pa siña nan yunan informalmente?

10. Pakico studio di famia tin biaha ta un desafio, i ki determinacion mayornan mester tin?

11. Con studio di famia por ser hací agradabel?

12. Pakico disiplina no semper ta encerá castigu físico?

13. Con mester disipliná yunan?

14. Kico mayornan mester haci si nan sinti nan incliná pa entregá na rabia?

15. Con yunan den famianan di un mayor so por ser yudá?

16. (a) Kico mayornan soltero mester haci pa beneficio di nan mes famia? (b) Pakico disiplina por ta difícil, pero pakico e mester ser duná?

17. Con e papelnan di miembronan di famia por bruha den un famia di un mayor so, i kico por haci pa prevení esaki?

18, 19. (a) Cua ta algun desafio cu famianan cu mayor of yu di criansa ta enfrentá? (b) Con mayor i yunan den un famia di criansa por mustra sabiduria i dicernimentu?

20. Kico cabesnan di famia cristian mester sigui haci?

21. Con un ambiente contentu i caluroso por ser mantené den cas?

22. Pakico bo mester traha duru p’e salbacion di bo famia?

[Caption on page 16]

Amor i aprobacion di un tata ta importante p’e desaroyo emocional di un yu

[Caption on page 20]

Con Bo Ta Contestá?

◻ Con tantu esposo como esposa por cooperá den edificá nan famia?

◻ Cua ta algun necesidad emocional dje yunan, i con por satisfacé esakinan?

◻ Con cabesnan di famia ta siña nan yunan tantu formalmente como informalmente?

◻ Con mayornan por disipliná den husticia?

◻ Kico por ser hací p’e beneficio di famianan di un mayor so i famianan cu yu di criansa?