Con Abo Ta Resolvé Desacuerdonan?

Un mal movecion​—⁠i e di tres piesa den un rij di cincu olefante di porcelana a cai for dje rèki. Lo mester drecha e piesa. Di otro manera, e armonia di henter e set lo bai perdí. Sin embargo, e proceso ta delicado, i bo no ta sintí bo cualificá. Lo bo tin cu busca conseho of asta pidi un specialista pa haci e trabou.

ARMONIA entre rumannan spiritual ta hopi mas precioso cu simpel adornonan. E salmista apropiadamente a canta: “Mira! Ki bon i ki agradabel ta pa rumannan biba huntu den unidad!” (Salmo 133:⁠1) Resolviendo un desacuerdo cu un compañé cristian tin biaha por ta un asuntu delicado. Ademas, algun no ta haci esaki den e manera corecto. Hopi biaha e “restoracion” ta innecesariamente doloroso of no ta masha sano, lagando marcanan mahos atras.

Algun cristian innecesariamente ta busca enbolbimentu di ancianonan nombrá den asuntunan cu nan lo por a atendé nan mes. Esaki kisas ta asina pasobra nan no ta sigur kico pa haci. “Hopi di nos rumannan no sa con pa aplicá conseho bíblico pa resolvé nan desacuerdonan,” un ruman cu experencia den duna conseho bíblico a comentá. El a sigui: “Hopi biaha, nan no ta sigui e manera di Jesus di haci cosnan.” Pues, kico realmente Jesus a bisa tocante con un cristian mester resolvé desacuerdonan cu su ruman? Pakico ta vital pa bira bon familiarisá cu e conseho aki i pa siña con pa aplik’é?

Desacuerdonan Menor

“Pues, si bo ta hibando bo ofrenda n’e altar i bo corda ei cu bo ruman tin algu contra bo, laga bo ofrenda ei dilanti e altar, i bai; promé haci pas cu bo ruman, anto, despues di a bolbe, ofrecé bo ofrenda.”​—⁠Mateo 5:​23, 24.

Ora Jesus a papia e palabranan ei, e hudiunan tabatin e custumber di ofrecé sacrificionan, of di presentá ofrendanan, n’e altar dje tempel den Jerusalem. Si un hudiu a peca contra un compañé israelita, e ofensor por a ofrecé un ofrenda kimá hinté of un ofrenda di picá. E ehempel cu Jesus a conta ta yega n’e punto di mas crucial. Ora e persona ta n’e altar i ta cla pa ofrecé su ofrenda na Dios, e ta corda cu su ruman tin algu contra dje. Sí, e israelita mester a comprendé cu reconciliacion cu su ruman mester tabatin preferencia riba efectuá un deber religioso asina.

Aunke tal ofrendanan tabata un rekisito dje Ley di Moises, nan riba nan mes no tabatin e balor di mas grandi den bista di Dios. Profeta Samuel a bisa Rey Saul infiel: “Jehova tin mes tantu deleite den ofrenda kimá i sacrificio cu den obedecé e bos di Jehova? Mira! Obedecé ta mihó cu un sacrificio, presta atencion [mihó] cu e sebu di chubat’i carné.”​—⁠1 Samuel 15:22.

Den su Sermon di Ceru, Jesus a ripití e órden di prioridad aki i a mustra su disipelnan cu nan mester resolvé nan desacuerdonan promé cu nan haci nan ofrendanan. Awe, e ofrendanan rekerí di hende cristian ta di un caracter spiritual​—⁠“un sacrificio di alabansa, esta, e fruta di lipnan cu ta haci declaracion público di su nomber.” (Hebreo 13:15) Sin embargo, e principio ta keda bálido. Apostel Juan di igual manera ta mustra cu lo ta en bano pa un hende pretendé di ta stima Dios si e ta odia su ruman.​—⁠1 Juan 4:​20, 21.

Interesantemente, e persona cu ta corda cu su ruman tin algu contra dje mester dal e promé paso. E humildad cu e ta manifestá asina probablemente lo producí bon resultado. Probablemente, un persona cu a ser ofendí lo no nenga di cooperá cu un persona cu ta yega cerca dje reconociendo su mes faltanan. E Ley di Moises a stipulá cu cualkier cos cu a ser cogé inhustamente mester a ser restorá completamente i un kinta parti adicional mester a ser agregá na dje. (Levítico 6:⁠5) Restorando relacionnan pacífico i armonioso di igual manera lo ta mas fácil si e ofensor mustra su deseo pa bai mas aleu cu loke ta ser rekerí, den e sentido mas estricto dje palabra, pa drecha cualkier daño cu e por a causa.

Sin embargo, intentonan pa restorá relacionnan pacífico no ta semper exitoso. E buki di Proverbio ta recordá nos cu ta difícil pa resolvé desacuerdonan cu un persona cu ta haña ta duru pa respondé faborabel. Proverbio 18:19 ta bisa: “Un ruman contra ken un eror a ser cometí ta mas cu un pueblo fuerte; i tin pleitunan cu ta manera e bara di un toren di habitacion.” Un otro traduccion ta bisa: “Un ruman ofendí ta mas duru pa gana cu un stad fuerte: I nan pleitunan ta manera e baranan di un kasteel.” (The Englishman’s Bible) Sin embargo, cu tempu esfuersonan sincero i humilde tin hopi chens di logra éxito den e caso di compañénan creyente cu ta deseá di agradá Dios. Pero ora tin afirmacion di picá grosero, e conseho di Jesus registrá na Mateo capítulo 18 mester ser aplicá.

Resolviendo Desacuerdonan Serio

“Ademas, si bo ruman cometé un picá, bai saca na cla su falta, abo cuné so. Si e scuchá bo, bo a gana bo ruman. Pero si e no scucha, hiba cu bo un of dos mas, pa dor di boca di dos of tres testigo tur asuntu por ser establecí. Si e no scucha nan, papia cu e congregacion. Si e ni sikiera ta scucha e congregacion, lagu’e ser pa bo mescos cu un hende dje nacionnan i mescos cu un cobrador di impuesto.”​—⁠Mateo 18:​15-17.

Kico si un hudiu (of despues, un cristian) a topa cu dificultad serio cu un co-adorador di Jehova? Esun cu a pensa cu un picá a ser cometí contra dje mester a dal e promé paso. E mester a considerá e asuntu cu e ofensor den privá. Dor di no purba busca sosten pa su banda dje situacion, siguramente lo e tin mas chens di gana su ruman, specialmente si tabatin solamente un malcomprendimentu cu lo por a ser solucioná rápidamente. Tur cos lo a ser resolvé mas fácilmente si esnan directamente enbolbí tabata e úniconan cu tabata sa dje asuntu.

Sin embargo, e promé paso kisas no ta suficiente. Pa trata cu e situacion ei, Jesus a bisa: “Hiba cu bo un of dos mas.” Esakinan por ta wel e testigonan ocular. Talbes nan a tende un dje individuonan calumniá e otro, of kisas esnan cu a ser hibá tabata testigo di un acuerdo skirbí por escrito riba cua e dos partidonan tin desacuerdo awor. N’e otro banda, esnan cu a ser hibá lo por bira testigo ora cualkier factor, manera testimonionan skirbí of oral, ta ser presentá pa establecé e motibu p’e problema. Aki atrobe, solamente e cantidad mas chikitu posibel​—⁠“un of dos mas”​—⁠mester sa tocante e asuntu. Esaki lo prevení cosnan di bira pió si e asuntu tabata solamente un malcomprendimentu.

Ki motibunan e persona ofendí mester tin? E mester purba humiyá su compañé cristian i deseá p’e rebahá su mes? Den bista dje conseho di Jesus, cristiannan no mester ta lihé pa condená nan rumannan. Si e ofensor ta reconocé su falta, ta pidi despensa i ta purba rectificá asuntunan, esun ofendí lo a ‘gana su ruman.’​—⁠Mateo 18:15.

Si e asuntu no por a ser resolvé, e mester a ser hibá n’e congregacion. Inicialmente, esaki a nificá e ancianonan dje hudiunan pero despues, e ancianonan dje congregacion cristian. E malechor no-repentí kisas mester a ser expulsá for dje congregacion. Esei ta loke ta nificá consider’é “mescos cu un hende dje nacionnan i mescos cu un cobrador di impuesto,” individuonan di kende e hudiunan a mantené nan distancia. E medida serio aki no por a ser tumá pa cualkier cristian individualmente. E ancianonan nombrá, kendenan ta representá e congregacion, ta e úniconan autorisá pa tuma un accion asina.​—⁠Compará cu 1 Corintio 5:13.

E posibilidad pa un malechor no-repentí ser expulsá ta mustra cu Mateo 18:​15-17 no ta aplicá na desacuerdonan menor. Jesus tabata refiriendo na ofensanan serio, pero dje clase cu por a ser resolvé entre e dos individuonan concerní so. Por ehempel, e ofensa por ta calumnia, afectando seriamente e víctima su reputacion. Of kisas e ta relacioná cu asuntunan financiero, pasobra e versículonan cu ta sigui despues ta contené Jesus su ilustracion dje esclabo sin misericordia cu a ser pordoná un debe grandi. (Mateo 18:​23-35) Un fiansa cu no a ser pagá bek den e tempu palabrá por ta djis un dificultad pasahero cu lo por ser resolvé fácilmente entre e dos individuonan. Pero lo e por bira un picá serio, esta ladronicia, si esun cu a fia ta nenga obstinadamente di paga bek loke e debe.

Otro picánan no por ser resolvé simplemente entre dos hende cristian. Bou dje Ley di Moises, picánan serio mester a ser raportá. (Levítico 5:1; Proverbio 29:24) Di igual manera, picá grave enbolbiendo e limpiesa dje congregacion mester ser informá n’e ancianonan di congregacion.

Sin embargo, mayoria caso di friccion entre cristiannan no ta cai bou dje procedura aki.

Bo Por Djis Pordoná?

Net despues cu Jesus a splica con pa resolvé desacuerdonan serio, el a siña un otro les importante. Nos ta lesa: “Anto Pedro a bini cerca i a bis’é: ‘Señor, cuantu bes mi ruman mester peca contra mi i ami mester pordon’é? Te na siete bes?’ Jesus dí cuné: ‘Mi ta bisá bo, no, Te na siete bes, sino, Te na setentisiete bes.’” (Mateo 18:​21, 22) Na un otro ocasion Jesus a bisa su disipelnan pa pordoná “siete bes pa dia.” (Lucas 17:​3, 4) Claramente, anto, ta di spera cu siguidornan di Cristo ta resolvé nan desacuerdonan dor di pordoná un e otro libremente.

Esaki ta un área cu tin mester di bastante esfuerso. “Algun ruman simplemente no sa con pa pordoná,” e individuo cu nos a cita den e introduccion a bisa. El a agregá: “Nan ta parce sorprendí ora un hende splica cu nan por scoge pa pordoná, na promé lugá i principalmente, pa preservá e pas den e congregacion cristian.”

Apostel Pablo a skirbi: “Sigui soportá un e otro i pordoná un e otro libremente si cualkier un tin un causa di keho contra e otro. Mescos cu Jehova a pordoná boso libremente, asina boso tambe haci mescos.” (Colosense 3:13) P’esei, promé cu nos bai cerca un ruman kende kisas a ofendé nos, lo ta bon pa meditá riba e siguiente preguntanan: E ofensa ta bal mi papia cuné tocante dje? Ta realmente imposibel pa mi lubidá desacuerdonan bieu conforme cu e berdadero spiritu di cristianismo? Si mi tabata den su lugá, lo mi no kier a ser pordoná? I si mi scoge pa no pordoná, mi por spera pa Dios contestá mi oracionnan i pordoná mi? (Mateo 6:​12, 14, 15) Preguntanan asina kisas por yuda nos bon pa ta pordonador.

Como cristiannan, un di nos responsabilidadnan importante ta pa preservá pas den e congregacion di Jehova su pueblo. P’esei, laga nos pone Jesus su conseho na práctica. Esaki lo yuda nos pordoná libremente. Un spiritu pordonador asina lo contribuí n’e amor fraternal cu ta e marca di identificacion dje disipelnan di Jesus.​—⁠Juan 13:​34, 35.

[Caption on page 23]

Cristiannan por resolvé nan desacuerdonan dor di sigui Jesus su conseho