Mustrando Amor Cristian pa Hende di Mayor Edad

SAMUEL JOHNSON, un autor di siglo 18, a conta e cuenta di un hoven cu, ora e tabata bishitá amigo, el a lubida unda el a pone su sombré. Ningun hende no a bisa nada tocante su negligencia. Segun e cuenta di Johnson, “Pero si un homber bieu ta lubida asina, hende lo hala scouder i bisa, ‘Su memoria ta bai.’”

E cuenta di Johnson ta demonstra cu hende di edad, kizás mescos cu otro grupo den menoría, ta obheto di calificacion inhusto. Aunque ta un desafío pa atende na necesidad di hende di edad, tur hende cu ta enbolbí ta saca beneficio. Cua desafío i recompensa tin, i pakico e asunto ta afecta mas i mas hende?

Segun datos, 6 porciento di poblacion di mundo tin 65 of mas aña di edad, i den país desaroyá e porcentahe ta dos bez esei. Den e Comunidad Europeo, cu a nombra 1993 como “E aña europeo di hende di mayor edad i di solidaridad entre e generacionan,” un persona di cada tres tin mas cu 50 aña di edad. Na Europa, mescos cu den casi tur país industrializá, menguamento di nacimento i e posibilidad di un bida mas largu ta haci hende di edad compone e mayoría dje poblacion. Cuido di hende di mayor edad den tal circunstancia ta claramente un trabao enorme. Ki diferente e situacion tabata den e Oriente di pasado!

“Depósito di conocimento”

E buki alemán “Manual di antigüedad bíblico pa lector di Bijbel cu tin educacion” ta bisa cu den antigüedad oriental “hende di mayor edad tabata considerá como conserbador di balornan tradicional di sabiduría i conocimento mas halto, pa cua motibo hovenan tabata consehá pa busca nan compañía i siña foi nan.” E diccionario Smith’s Bible Dictionary ta splica: “Den bida privá, hende di edad tabata respetá como depósito di conocimento . . . [Hovenan] a permitínan expresa nan opinion promé.”

Reverencia pa hende di edad tabata reflehá den e Ley di Moisés den Levítico 19:32: “Bo mester lanta dilanti cabei blancu, i bo mester mustra consideracion pe persona di un homber bieu.” Pues, hende di edad a ocupa un posicion di privilegio den e arreglo social i tabata respetá como un bentaha di balor. Ta keda bisto cu Rut e moabita a considera Noemí su suegra israelita asina.

Rut a decidi firmemente pa compañá Noemí for di Moab pa Israel, scuchando cuidadosamente e conseho di Noemí despues. Asina cu nan tabata den Betlehem, tabata Noemí cu a ripara cu e man di Jehova tabata dirigi asuntonan, anto a instruí Rut tocante kico pa haci. (Rut 2:20; 3:​3, 4, 18) E bida di Rut tabata formá na moda teocrático mientras cu el a siña for dje experencia di Noemí. Su suegra a resulta di ser un depósito di conocimento.

Di igual manera, hende muher cristian mas hoven djawe por beneficiá di asociacion cu hende muher di mayor edad den e congregacion. Tal bez un ruman muher ta considera casamento of ta lucha cu un problema personal persistente. Lo ta ki sabí pe busca conseho i apoyo di hermana maduro di mayor edad cu tin experencia den e asunto!

Además, un cuerpo di anciano por beneficiá usando experencia di rumanan di edad den e congregacion. Nos por siña for di Lot cu no a haci esei. Un pleitu entre wardador di carné di Abraham i di Lot a exigi un decision cu a afecta tur hende. Lot a tuma un decision imprudente. Lo tabata cuanto mas mihor si el a pidi e conseho di Abraham promé! Lot por a recibi guía maduro i por a salba su famía for dje miseria cu a resulta for di su decision rápido. (Génesis 13:​7-13; 14:12; 19:​4, 5, 9, 26, 29) Bo ta scucha atentamente na loke anciano maduro ta bisa promé cu bo ta tuma bo mes decision tocante un asunto?

Hende di edad sin número tin un celo duradero pe trabao di Jehova Dios, mescos cu Simeón i Ana dje promé siglo. (Lucas 2:​25, 36, 37) Un indicacion di respet i un refleccion di un actitud atento ta ser manifestá pa hende di mayor edad ora bo ta enbolbénan den actividad dje congregacion tanto como nan vigor ta permiti, asta ora nan edad ta bon avanzá. Kizás un hoven tin mester di yudanza pa prepara un asignacion den e Scol di Ministerio Teocrático. Un anciano astuto por conclui cu e instructor ideal ta un miembro di edad dje congregacion, cu sabiduría hecho, un manera bondadoso, i cu e tempo pa hacié.

Sin embargo, atencion na necesidad special di hende di edad ta encerra mas. Hopi di nan ta sufri di soledad, miedu di crimen, i dificultad financiero. Además, ora hende di edad ta bira malu, tal problema ta aumenta debí na fayo di salud i na desilusion en cuanto perdimento di nan mes vigor. Anto nan tin mester di hopi mas atencion. Con cada persona i e congregacion en conhunto mester reacciona?

“Practica debocion piadosa”

Durante e promé siglo, Pablo a skirbi bao di inspiracion na 1 Timoteo 5:​4, 16: “Si algun biuda tin yiu of nieto, laga nan siña promé pa practica debocion piadosa den nan mes cas i sigi paga e debida recompensa na nan mayornan i abuelonan, pasobra esei ta aceptabel den bista di Dios. Si algun hende muher creyente tin biuda, lagué aliviánan, i laga e congregacion no keda bao dje carga. Anto e por aliviá esnan cu realmente ta biuda.” E trabao di atende na hende di edad tabata un responsabilidad di famía. Si un miembro di edad dje congregacion tabata den necesidad despues cu e famía a haci su posibel pa yuda, e responsabilidad a baha riba e congregacion. Tal principio no a cambia.

Kico a yuda hende cristian mustra amor cristian pa hende di mayor edad mediante e práctica di debocion piadosa den nan mes famía? Leza e sigiente comentario di varios Testigo di Jehova cu tabatin algun experencia atendiendo na esnan di edad avanzá.

Atencion cu regularidad na necesidad spiritual

“Consideracion dje texto diario hunto tabata un yudanza di hopi balor,” segun Félix, cu a yuda su casá atende na su mayornan. “Experencia personal i aspiracion tabata incluí hunto cu principio di Jehova.” Realmente, den e aceptacion dje desafío di atende na miembro di famía di edad, un factor primordial ta e prestamento di atencion na nan edificacion spiritual. Esei ta e punto di bista lógico dje palabra di Jesús den Mateo 5:3: “Feliz ta esnan cu ta conciente di nan necesidad spiritual.” E texto diario por ta aumentá mediante un programa di lectura di Bijbel, mediante un consideracion di publicacion basá riba e Bijbel, i mediante oracion. Segun Pedro, “Ta parce cu hende di edad ta gusta un grado di regularidad.”

Sí, regularidad ta necesario den asunto spiritual. No solamente den cosnan spiritual sino també den bida diario hende di edad ta aprecia un rutina. Asta esnan cu ta un poco enfermo por ta animá calorosamente pa “baha for di cama i bístinan apropiadamente tur dia,” segun Ursula. Naturalmente, nos kier evita di duna impresion di dicta na hende di edad. Dóris ta admiti cu su esfuerzo cu bon intencion lastimosamente a malogra hopi bez. “Mi a haci tur sorto di equibocacion. Un dia mi a pidi mi tata cambia su camisa tur dia. Anto mi mama a hacími corda: ‘E ta mi casá ainda!’”

Hende di edad tabata hoven na antes, pero ta un tarea formidable pa esnan mas hoven pone nan mes den e sapato di esnan di edad. Pero, esei ta clave pa comprende nan necesidad special. Edad avanzá ta resulta den frustracion. Gerhard a splica: “Mi suegro a perde pacenshi cu su mes pasobra e no por haci mas tur loke el a haci na antes. Tabata mashá penoso pe acepta e situacion. Su personalidad a cambia.”

Den circunstancia cu ta cambia, no ta straño pa hende di edad expresa e sintimento di frustracion cu a aumenta den nan, criticando otro hende, specialmente hende cu ta atende na nan. E motibo ta senciyo. Atencion amoroso cu nan ta recibi ta hácinan corda e vigor cu nan a perde. Con bo mester reacciona na tal crítica of kehamento inhusto?

No lubida, tal sintimento negativo no ta refleha e punto di bista di Jehova di bo esfuerzo. Sigi haci loke ta bon, i mantene un concenshi limpi, aunque bo ta cosecha comentario inhusto de bez en cuando. (Compara cu 1 Pedro 2:19.) E congregacion local por ofrece hopi apoyo.

Loke e congregacion por haci

Hopi congregacion tin motibo pa keda profundamente agradicido pa esfuerzo di antes di nos estimada rumanan di edad, homber i muher. Kizás tabata nan cu a pone fundeshi dje congregacion, i a edifiqué for di solamente un poco publicador hopi aña pasá. Unda e congregacion lo tá sin nan actividad celoso di antes, i tal bez, nan apoyo financiero actual?

Ora mas atencion ta bira necesario den e caso di un publicador di edad, e famía so no tin cu wanta e responsabilidad. Otronan por yuda, haci diligencia, cushiná, tene cas limpi, hiba e ruman pa un paseo, ofrece transporte pa reunion cristian, of simplemente conbersa cuné den Salón di Reino. Tur por participa, aunque eficacia i rutina ta ser alcanzá mas mihor ora cu tin coordinacion di esfuerzo.

Coordinacion ta algo cu anciano por corda ora nan ta organiza pastoreamento. Algun congregacion ta ehemplar en cuanto esei, anciano sigurando cu pastoreamento regularmente ta ser hací cerca esnan di edad i swak, asta esnan cu ta bon cuidá pa nan famía. Sin embargo, ta parce cu otro congregacion por presta mas atencion na nan obligacion en cuanto esnan di edad.

Un fiel ruman cerca di 90 aña di edad, a recibi e cuido di su yiu muher i nuero, cu a sali for di Betel pa haci esei. Sin embargo, bishita di otro miembro dje congregacion tabata importante pe ainda. E ruman a lamenta, “Ora mi tabata bishita ruman enfermo, mi a haci oracion cu nan. Pero ningun hende nunca a haci oracion cu mi.” Atencion amoroso di famía no ta libra anciano dje obligacion di ‘pastorea e tao di Dios den nan cuido.’ (1 Pedro 5:⁠2) Además, esnan cu ta atende na ruman di edad mester ta edificá i animá pa sigi haci nan trabao excelente.

“Bieu i satisfecho”

Alexander von Humboldt, un científico alemán di siglo 19, tabatin 89 aña di edad ora un señora hoven a puntré si biramento bieu no tabata fastioso. E científico a contesta, “Bo tin pleno razón. Pero esei ta e único manera pa biba hopi aña.” Di igual manera, hopi ruman homber i muher djawe ta pone un bon ehempel, aceptando dificultad di behez pe onor di hiba un bida largu. Nan ta refleha e actitud cu Abraham, Isaac, David, i Job a manifesta, cu tabata “bieu i satisfecho.”​—⁠Génesis 25:8; 35:29; 1 Crónica 23:​1; Job 42:⁠17.

Edad avanzá ta resulta den e desafío di acepta yudanza di bon manera i expresa gratitud sinceramente. Sabiduría ta exigi pa cada un reconoce e límite di nan forza. Sin embargo, esei no ta condena hende di edad na inactividad. María tin hopi mas cu 90 aña di edad, pero e ta asisti na reunion di congregacion ainda i ta duna comentario ei. Con e ta hacié? “Mi no por leza mas, pero mi ta scucha E Toren di Vigilancia riba caset. Mi ta lubida basta hopi, pero generalmente mi ta logra duna comentario.” Mescos cu María, kedando ocupá cu asunto cu ta edificante ta yuda hende keda activo i retene nan personalidad cristian.

Bao di Reino di Dios, behez lo no existi mas. Ne tempo ei hende cu a bira bieu den e sistema actual i cu tal bez asta a muri lo tin memoria precioso dje cuido i atencion duná na nan. Mientras cu tal hende di edad avanzá ta recobra nan bida i vigor, nan siguramente lo sinti un amor intenso pa Jehova Dios i un gratitud profundo pa cu esnan cu a perseverá cu nan durante nan dificultad den e sistema bieu aki.​—⁠Compara cu Lucas 22:⁠28.

Kico di esnan cu ta atende na hende di edad awor? Mashá pronto, ora e Reino ta coge mando di tur e tera, nan lo corda cu gozo i alivio cu nan no a pasa por halto di nan obligacion sino a practica debocion piadosa, mustrando amor cristian pa esnan di edad.​—⁠1 Timoteo 5:⁠4.

[Box on page 30]

Esnan di edad lo aprecia bo bishita

Bo por haci hopi bon planeando un bishita di kizás 15 minut cerca un persona di edad despues dje actividad di predica. Pero, mihor no haci tal bishita pa casualidad, segun cu e sigiente experencia ta mustra.

Brigitte i Hannelore tabata predica hunto, conbersando cu un homber di edad ne porta di su cas. E rumanan a papia cuné pa cinco minut promé cu nan a descubrí cu e també tabata un Testigo di Jehova, un miembro dje mesun congregacion. Ki bergüenza! Pero, e experencia a termina riba un nota positivo. Hannelore a haci plan un bez pa bishita e ruman i yudé asisti na reunion dje congregacion.

Bo ta conoce e nomber i direccion di cada publicador di edad den e territorio unda bo ta predica? Bo por haci arreglo pa haci bishita breve? Probablemente e ruman lo apreciá esei mashá.