Habriendo Wowo N’e Bon Nobo

“CIELU no ta ménos blou pasobra e homber ciegu no ta mir’é,” un proverbio danes ta bisa. Pero den nos bida ocupá di tur dia, nos ta mira cu cielu ta blou, na moda di papia? Nos ta mira e futuro cu confiansa? Nos realmente ta kere e bon nobo cu e Palabra di Dios, e Bijbel, ta presentá?

Den e artículo anterior, nos a considerá aspectonan di cieguedad literal. Laga nos examiná awor un clase di bista cu ta hopi mas importante. E ta enbolbé nos felicidad duradero i tambe e futuro pa nos sernan stimá.

Sin duda, nos ta enfrentá “tempu crítico, duru pa trata cuné.” (2 Timoteo 3:⁠1) Kico ta sosodé segun cu hende ta lucha pa gana nan pan di cada dia, ta soportá dificultadnan cu salú i problemanan di famia i ta enfrentá cu inhusticia social i falta di amor? Lamentablemente, hopi persona ta haña cu nan confiansa den nan próhimo, religion i gobiernu ta desvanecé. Mirando cu no tin ningun salida, algun ta concluí cu nan problemanan nunca lo ser solucioná den un manera normal. Den e corant brazileño Jornal da Tarde, Jacob Pinheiro Goldberg ta observá: “Hende, den bista di realidad brutal, ta sinti nan asina molestiá dor di erornan cu nan no ta razoná lógicamente, i nan ta confia riba religion místico frustrante.” Tog, asta ora cosnan ta bai malu, nos kier usa sano huicio, no ta berdad?

Imaginá pa un momento cu bo mester di un cas pa bo famia, i placa no ta problema. Talbes bo ta wak rond i ta bishitá varios cas den diferente becindario. Aunke algun ‘makelaar’ ta purba acomodá bo deseonan, bo no por haña e tipo di cas cu bo tin na mente. Sin embargo, ya cu e contentamentu i bienestar di bo famia ta enbolbí, bo no ta entregá, no ta berdad? Awor visualisá e felicidad ora cu finalmente bo haña e cas di bo soño.

Mescos cu lo bo dedicá tempu pa busca un cas nobo, pakico no examiná Bijbel pa haña un solucion pa bo problemanan? Mescos cu nos tin cu evaluá e echonan ora di tuma decision tocante un cas, asina nos tin cu razoná profundamente riba loke nos ta lesa den e Palabra di Dios. I asta mas beneficioso cu haña un cas ta nos miramentu i aceptacion dje berdad tocante Jehova Dios i Jesucristo. Jesus a bisa: “Esaki ta nificá bida eterno, nan ganando conocimentu di bo, e único Dios berdadero, i di esun kende bo a manda, Jesucristo.”​—⁠Juan 17:⁠3.

Pero si e mensahe di Bijbel ta asina balioso, pakico asina hopi hende ta keda ciegu na su bon nobo? Un motibu ta, i esaki por sorprendé hopi hende, cu “henter e mundu ta drumí den poder dje malbado.” (1 Juan 5:19) Como resultado, Satanas e Diabel “a ciega mente dje incrédulonan, pa e iluminacion dje glorioso bon nobo tocante Cristo, kende ta e imágen di Dios, no lusa nan.” (2 Corintio 4:⁠4) Aunke nos ta mira cu nos wowonan, ta e celebro ta interpretá e lus cu ta drenta e wowo. P’esei, ser ciegu ta ser definí tambe como ser “incapas of indispuesto pa dicerní of husga.” Esaki ta haci nos corda un dicho popular cu ta bisa: “No tin mas ciegu cu esun cu no kier mira.”

Un persona ciegu no por mira loke ta dilanti dje, pues e por ta den peliger di daño. E cieguedad físico di hopi hende awor aki no por ser cambiá, sin embargo ningun hende ta obligá pa permanecé spiritualmente ciegu.

Venciendo Cieguedad Spiritual

Mescos cu condicionnan sanitario inadecuá por debilitá e bista, un ambiente moralmente corumpí por contribuí na cieguedad moral. Ademas, Jesucristo a spierta hende contra doctrina i tradicion di hende. El a haci cla cu lidernan religioso dje tempu ei tabata engañando nan tou: “Guia ciegu ta loke nan ta. Pues, si un ciegu ta guia un ciegu, tur dos lo cai den un buracu.”​—⁠Mateo 15:⁠14.

En bes di ser engañá dor di lidernan ciegu, ki felis ta esnan cu ta habri nan wowo p’e bon nobo tocante e Reino di Dios! Jesus a declará: “P’e huicio aki mi a bini n’e mundu aki: pa esnan cu no ta mira por mira.” (Juan 9:39) Pero, con hende spiritualmente ciegu por yega di mira? Wel, laga nos sigui nos consideracion di cieguedad literal.

Varios provision ta disponibel awor pa esnan cu mal bista. Esaki no tabata semper e caso. Ningun intento serio realmente a ser hací pa yuda hende ciegu promé cu Valentin Haüy a establecé un scol special pa hende ciegu na 1784. Despues, Louis Braille a inventá e sistema cu ta carga su nomber; el a haci esei pa yuda hende cu mal bista lesa.

Kico di esnan spiritualmente ciegu? Den añanan reciente esfuersonan sincero a ser hací pa declará e bon nobo asta den e partinan mas remoto dje tera. (Mateo 24:14) Testigonan di Jehova ta contentu pa trece speransa na tantu esnan figurativamente como esnan físicamente ciegu.

Un muher brazileño a skirbi: “Mi kier a bisa cu apesar di mi deficiencia físico, mi por mira​—⁠spiritualmente. Ki un Dios maraviyoso! Nos ta contentu pa sa cu ‘Jehova lo habri su man i satisfacé e deseo di tur cos bibiente.’ ” (Salmo 145:16) I Jorge, kende ta físicamente ciegu, ta corda: “Mi bida por wel ser dividí den dos parti: promé i despues dje Testigonan. . . . Pa medio di nan, mi a cuminsá mira e mundu cu claridad i briyantes. Mi ta disfrutá di un relacion excelente cu tur persona den e congregacion.” Pa agradabel cu esei ta, Bijbel ta duna nos e siguransa cu pronto ningun hende riba tera lo ta ciegu​—⁠literalmente of spiritualmente. Con esei lo ta? Con lo e resultá cierto rond mundu cu “Jehova ta habriendo e wowonan di esnan ciegu”?​—⁠Salmo 146:⁠8.

E Unico Cura Permanente ​—⁠e Reino di Dios

Apesar di mas conocimentu médico, un cantidad di malesa ta sigui causa cieguedad, dolor i morto. Kico, anto, ta necesario pa eliminá malnutricion, condicion sanitario inadecuá i e miseria cu ta kita tantu vision como e goso di bida? Jesus su curacion dje ciegunan i otronan tabata un patronchi na escala chikitu pa futuro. Felismente, su siñansa i obra di curacion a prefigurá e bendicionnan pa ser dramá riba tera bou dje gobernacion dje Reino di Dios.

Curacion na un escala mundial ta cerca.a E programa di curacion divino aki ta ser ilustrá masha bunita dor di apostel Juan: “El a mustrá mi un riu di awa di bida, cla manera cristal, bashando for dje trono di Dios i dje Lamchi meimei di su caminda hanchu. I n’e banda aki dje riu i n’e otro banda dje riu tabatin palunan di bida produciendo diesdos cosecha di fruta, dunando nan fruta cada luna. I e blachinan dje palunan tabata p’e curacion dje nacionnan.”​—⁠Revelacion 22:​1, 2.

Expresionnan manera “awa di bida” i “palunan di bida” ta ilustrá cu despues cu e mal sistema di cosnan djawe a terminá, provisionnan curativo dje Reino di Dios lo lanta humanidad gradualmente na perfeccion. En realidad, e beneficionan dje sacrificio di rescate di Jesus (incluyendo pordon completo di picá), huntu cu conocimentu di Jesucristo i su Tata, lo efectuá un salú perfecto i bida eterno.​—⁠Juan 3:⁠16.

Felicidad den Dios su Mundu Nobo

Visualisá, anto, e tera sin crímen, polucion of pobresa. Visualisá bo famia bibando pacíficamente den e Paradijs restorá. (Isaías 32:​17, 18) Lo ta ki un deleite pa observá e variedad di color cu mente i sentidonan perfecto!

“E condicion natural p’e ser humano ta pa biba den un ambiente constantemente cambiando​—⁠di lus, color i forma. No tin un ambiente monótono den naturalesa,” Faber Birren ta bisa. “Color ta un dje deleitenan natural dje mundu aki. E ta e regla di naturalesa, no un excepcion, i hopi dje bida dushi ta dependé di dje.”

Ki precioso e don di bista ta! Lo ta ki un goso ora e wowonan di esnan cu un tempu tabata ciegu​—⁠literalmente of spiritualmente​—⁠por lo mira!

Sí, den e binidero Paradijs restorá, cieguedad i otro incapacidadnan lo no causa infelicidad mas! Ningun hende lo ser engañá mas. Siendo cu amor genuino lo prevalecé, tur hende lo ser iluminá spiritualmente. Esei, i hopi mas, lo tuma lugá den e futuro cercano, pero awor aki ta e tempu pa haña aprobacion di Jehova kende lo cumpli cu su promesa profético: “N’e tempu ei e wowonan dje ciegunan lo ser habrí”!​—⁠Isaías 35:⁠5.

[Footnotes]

[Caption on page 7]

N’e tempu ei e wowonan dje ciegunan lo ser habrí!