E Bon Nobo Aki Mester Ser Predica Prome

“Den tur nacion e bon nobo tin cu ser predicá promé.”​—⁠MARCO 13:⁠10.

PAKICO Testigonan di Jehova ta predicá asina persistentemente? Siguramente nos ta conocí mundialmente pa nos ministerio público, sea ta di cas pa cas, riba caya of durante contactonan informal. Na tur ocasion apropiado, nos ta identificá nos mes como Testigo i ta purba cu tacto pa comunicá e bon nobo cu nos ta atesorá. Realmente, nos por bisa cu e ministerio aki ta nos marca registrá!​—⁠Colosense 4:⁠6.

² Djis pensa riba dje​—⁠ki ora hende mira den nan becindario un grupo di homber, muher i mucha bon-bistí cu tas, generalmente kico ta nan promé pensamentu? Ta ‘O, ata e católiconan (of ortodoxnan) atrobe!’ of, ‘Ata e pentecostalnan (of bautistanan) atrobe!’ No. Hende sa cu religionnan asina no tin famianan completo cu ta efectuá un ministerio di cas-pa-cas. Talbes algun grupo religioso ta manda algun asiná yamá “misionero” pa un asignacion di dos aña den cierto área, pero nan miembronan comun no ta participá den ningun ministerio asina. Solamente e Testigonan di Jehova ta ser reconocé mundialmente pa nan celo den comunicá nan mensahe na otronan na tur ocasion apropiado. I nan ta conocí pa nan revistanan, E Toren di Vigilancia i ¡Despertad!​—⁠Isaías 43:​10-12; Echo 1:⁠8.

Contraste Cu Cleronan di Cristiandad

³ Na contraste skerpi, informenan di noticia bes tras bes a revelá cu hopi dje cleronan den algun pais ta pedofil (perversonan sexual specialmente cu mucha), estafador inmoral i engañador. Nan obranan di carni i nan moda di biba extravagante ta bisto pa tur hende mira. Un compositor popular a expres’é masha bon den su cantica titulá “Jesus Lo A Bisti un Rolex [un oloshi di oro masha costoso] den Su Programa di Television?” E ta haci e pregunta: “Jesus lo tabata político si El a bin bek na Tera? Lo e tin su di dos cas na Palm Springs [un comunidad próspero na California] i ta purba sconde Su balor?” Ki apropiado ta e palabranan di Santiago: “Boso a biba den luho riba tera i a sigui tras di placer sensual. Boso a gorda boso curasonnan rib’e dia di matansa.”​—⁠Santiago 5:5; Galatio 5:​19-21.

⁴ Cleronan su asociacion cu políticonan i asta nan participacion den eleccion como candidatonan político ta desenmascará nan como escriba i fariseonan moderno. Na mésun tempu, den paisnan manera Merca i Cánada, e fondonan di religion ta secando dor dje costonan haltu di disputa penal i huicionan contra cleronan, resultando for di nan conducta desenfrená cu mucha i adulto.​—⁠Mateo 23:​1-3.

⁵ Jesus por a bisa corectamente n’e cleronan di su dia: “Ai di boso, escriba i fariseonan, hipócritanan! pasobra boso ta parce graf blanchá, cu pafó en berdad ta parce bunita ma paden ta yen di wesu di hende morto i di tur sorto di sushedad. Dje manera ei boso tambe, pafó en berdad, ta parce hustu pa hende, ma paden boso ta yen di hipocresia i maldad.” Pues, Dios no a duna e comision di predicá e bon nobo na cleronan di cristiandad, sea católico, protestant, ortodox, of esnan cu no ta pertenecé na ningun organisacion religioso formal. Nan no a resultá di ta e “esclabo fiel i discreto” profetisá di dje den Bijbel.​—⁠Mateo 23:​27, 28; 24:​45-47.

Pakico Predicá e Bon Nobo Promé?

⁶ Den Marco su version conciso dje mandamentu di Jesus pa predicá e bon nobo den tur nacion, e so ta usa e palabra “promé.” (Marco 13:10; compará cu Mateo 24:14.) E version di J. B. Phillips ta bisa: “Pasobra promé cu e fin yega e evangelio mester ser proclamá na tur nacion.” E uso dje adverbio “promé” ta implicá cu otro sucesonan lo sigui e trabou mundial di evangelisá. E sucesonan ei lo incluí e tribulacion grandi primintí i Cristo su gobernacion hustu riba e mundu nobo.​—⁠Mateo 24:​21-31; Revelacion 16:​14-16; 21:​1-4.

⁷ Pues pakico Dios kier p’e bon nobo ser predicá promé? Un motibu ta cu e ta un Dios di amor, husticia, sabiduria i poder. Den e cumplimentu di Jesus su declaracion registrá na Mateo 24:14 i Marco 13:​10, nos por haña un manifestacion impresionante dje atributonan aki di Jehova. Laga nos examiná nan brevemente un pa un i mira con nan ta relacioná cu e predicacion dje bon nobo.

E Bon Nobo i Jehova Su Amor

⁸ Con predicacion dje bon nobo ta reflehá Dios su amor? Na promé lugá, pasobra e no ta un mensahe intencioná exclusivamente pa un rasa of grupo. E ta e bon nobo pa “tur nacion.” Dios ta stima e famia humano asina tantu cu el a manda su Yu unigénito na tera pa ta un sacrificio di rescate p’e picánan di tur humanidad, no djis di un solo rasa. Apostel Juan a skirbi: “Dios a stima e mundu asina tantu cu el a duna su Yu unigénito, pa tur cu ta ehercé fe den dje no ser destruí sino haña bida eterno. Pasobra Dios a manda su Yu den e mundu, no p’e husga e mundu, sino p’e mundu ser salbá mediante dje.” (Juan 3:​16, 17) Siguramente e bon nobo, un mensahe cu ta primintí un mundu nobo di pas, armonia i husticia, ta un evidencia dje amor di Dios.​—⁠2 Pedro 3:⁠13.

E Bon Nobo i Jehova Su Poder

⁹ Con Jehova su poder ta ser manifestá dor dje predicacion dje bon nobo? Considerá lo siguiente. Ken el a usa pa cumpli cu e comision aki? Esei tabata cristiandad su organisacionnan religioso di mas poderoso, manera e Iglesia Católico Romano of denominacionnan protestant prominente? No, nan enbolbimentu den política ta descualificá nan p’e asignacion. (Juan 15:19; 17:14; Santiago 4:⁠4) Nan rikesa relativo i nan coneccionnan cu, i influencia riba gobernantenan elitario no a impresioná Jehova Dios, ni tampoco nan teologia mará na tradicion. Poder humano no tabata necesario pa Jehova su boluntad ser hací.​—⁠Zacarías 4:⁠6.

¹⁰ Ta manera apostel Pablo a bisa den su carta n’e congregacion corintio: “Boso ta mira su yamamentu di boso, rumannan, cu no hopi hende sabí na moda carnal a ser yamá, no hopi hende poderoso, no hopi hende di nacimentu noble; sino cu Dios a scoge e cosnan bobo di mundu, p’e brongosá e sabínan; i Dios a scoge e cosnan débil di mundu, p’e brongosá e cosnan fuerte; i Dios a scoge e cosnan inferior di mundu i e cosnan menospreciá, e cosnan cu no tá, p’e caba cu e cosnan cu tá, pa ningun carni por broma den bista di Dios.”​—⁠1 Corintio 1:​26-29.

¹¹ Testigonan di Jehova tin masha poco miembro ricu den nan filanan i siguramente ningun cu ta políticamente poderoso. Nan neutralidad estricto den asuntunan político ta nificá cu nan no por ehercé influencia político. Al contrario, hopi biaha nan tabata víctima di persecucion baho instigá pa lidernan religioso i político durante e siglo 20 aki. Sin embargo, apesar dje oposicion feros instigá contra nan p’e disipelnan di nazismo, facismo, comunismo, nacionalismo i religion falsu, e Testigonan no solamente ta predicando e bon nobo den tur e mundu sino tambe nan a crece asombrosamente na cantidad.​—⁠Isaías 60:⁠22.

¹² Na kico e Testigonan ta atribuí nan éxito? Jesus a primintí su disipelnan: “Boso lo ricibí poder ora e spiritu santu yega riba boso, i boso lo ta mi testigonan tantu den Jerusalem i den tur Hudea i Samaria i te n’e parti mas lehano dje tera.” Pues, kico exactamente lo ta e fuente di nan éxito? Jesus a bisa: “Boso lo ricibí poder ora e spiritu santu yega riba boso.” Awe, di igual manera, poder for di Dios, no abilidad humano, ta e clave p’e éxito dje Testigonan den nan ministerio mundial. Usando aparentemente e hendenan di mas débil, Dios ta logrando e trabou educacional di mas grandi den historia.​—⁠Echo 1:8; Isaías 54:⁠13.

E Bon Nobo i Jehova Su Sabiduria

¹³ E bon nobo ta ser predicá dor di boluntarionan. Jesus a bisa: “Boso a ricibí grátis, duna grátis.” (Mateo 10:⁠8) P’esei, ningun Testigo di Jehova ta ricibí un salario pa sirbi Dios, tampoco nan ta busca unu. Realmente, nan ni sikiera ta pasa colecta na nan reunionnan. Nan ta contentu, mediante nan sirbishi dedicá inegoistamente, pa duna Dios un contesta na su acusador, Satanas e Diabel. E persona spiritual aki opositor di Dios en efecto a bisa cu hende lo no sirbi Dios cu un motibu inegoista. Den su sabiduria Jehova a producí un contesta indiscutibel n’e mofa di Satanas​—⁠mediante miyones di Testigonan cristian leal predicando e bon nobo di cas pa cas, riba caya i informalmente.​—⁠Job 1:​8-11; 2:​3-5; Proverbio 27:⁠11.

¹⁴ Un otro evidencia dje sabiduria di Dios den laga e bon nobo ser predicá ta cu e promesa di Reino riba su mes ta un manifestacion di Dios su sabiduria. Apostel Pablo a skirbi: “Awor nos ta papia sabiduria entre esnan cu ta maduro, pero no e sabiduria dje sistema di cosnan aki ni esun dje gobernantenan dje sistema di cosnan aki, cu lo caba na nada. Ma nos ta papia Dios su sabiduria den un secreto sagrado, e sabiduria scondí, cu Dios a predeterminá promé cu e sistema di cosnan pa nos gloria.” E “sabiduria scondí” ei ta referí na Dios su medionan sabí pa caba cu e rebelion cu a cuminsá den Eden. E sabiduria dje secreto sagrado ei a ser revelá den Jesucristo, kende ta central den e bon nobo dje Reino di Dios.a​—⁠1 Corintio 2:​6, 7; Colosense 1:​26-28.

E Bon Nobo i Dios Su Husticia

¹⁵ Particularmente en coneccion cu husticia nos ta mira e importancia dje palabra “promé” na Marco 13:10. Jehova ta un Dios di husticia cu ta ser suavisá cu bondad amoroso. E ta bisa mediante su profeta Jeremías: “ ‘Laga esun cu ta broma tocante su mes, broma tocante su mes pa causa dje cos mes aki, di tene perspicacia i di tene conocimentu di mi, cu ami ta Jehova, Esun cu ta ehercé bondad amoroso, husticia i rectitud den e tera; pasobra den e cosnan aki di berdad mi tin deleite,’ ta e expresion di Jehova.”​—⁠Jeremías 9:⁠24.

¹⁶ Con Jehova su husticia ta ser mustrá relacioná cu e predicacion dje bon nobo? Laga nos ilustr’é cu un mama kende a traha un bolo di chuculati delicioso pa come ora bishitantenan yega mas despues durante e dia. Si e lagu’é riba e mesa di cushina sin bisa un palabra na su yunan ki ora pa com’é, kico lo ta e inclinacion natural dje yunan? Nos tur tabata mucha un tempu! Un dede chikitu asina lo kier purba e bolo ei! Awor si e mama a keda sin duna un debido spiertamentu, lo e no tin un base fuerte pa duna disiplina. Di otro banda, si e bisa claramente cu e bolo ta pa come mas despues ora e bishitantenan yega i p’esei no mester mishi cuné, e ora ei el a duna un spiertamentu claramente. Si e yunan desobedecé, e tin derecho pa tuma accion firme i hustu.​—⁠Proverbio 29:⁠15.

¹⁷ Jehova, den su husticia, lo no trece accion hudicial contra e mal sistema di cosnan aki sin duna promé debido spiertamentu. P’esei, specialmente desde 1919, despues cu e promé guera mundial a ocasioná “dolornan di afliccion,” Jehova a laga su Testigonan bai rond e tera proclamando celosamente e bon nobo. (Mateo 24:​7, 8, 14) E nacionnan no por pretendé hustamente cu nan ta ignorante dje spiertamentu único aki.

Con Extensamente e Mundu A Ser Cubrí?

¹⁸ Un indicacion dje eficacia dje trabou educacional mundial aki por ser mirá for dje buki Last Places​—⁠A Journey in the North. Su autor ta conta cu ora el a controlá e mapanan di laman p’e isla isolá di Foula, un dje Islanan di Shetland nort di Escocia, e mapanan a indicá “tur rond dje isla WKS (ruinanan di barcu cu a sink), RKS (barancanan), LDGS (rifnan), i OBS (obstruccionnan) den laman.” E indicacionnan aki “a spierta e nabegante prospectivo pa keda leu. E awanan rond di Foula tabata manera un campo di mina extremamente spantoso, cua a haci e isla inhospitalario pa nabegantenan di yate, bishitantenan di un dia i asta e brigada di obranan público di Su Mahestad [Reina di Inglatera], aunke nan no a impedí​—⁠mi a haña sa poco dia pasá​—⁠e Testigonan di Jehova.” El a continuá: “Mescos cu nan a scudriñá den barionan pober di stad grandi i e Tercer Mundu en busca di personanan combertí, asina tambe nan a busca hende pa combertí na nan fe riba e isla remoto di Foula.” El a tuma nota cu e Testigonan a laga un copia di E Toren di Vigilancia riba stupi di un habitante local, Andrew, algun luna promé. Anto el a agregá: “Un siman despues mi a mira un copia di [¡Despertad! na danes] na Faeroe [islanan di Noordzee] i dos luna despues un copia di [E Toren di Vigilancia na danes] na Nuuq, Groenlandia.” Ki un testimonio elocuente dje actividad celoso di Testigonan di Jehova den e regionnan norteño ei!

Kico Ta Impulsá e Testigonan pa Sigui Predicá?

¹⁹ Naturalmente, predicando di cas pa cas na hende straño no ta algu fácil, sin importá cuantu aña un persona por tin como Testigo. Pues anto, kico ta impulsá e cristiannan aki pa sigui predicá? Esei ta nan dedicacion cristian i un sentido di responsabilidad. Pablo a skirbi: “Awor, si mi ta declarando e bon nobo, esei no ta un motibu pa mi broma, pasobra necesidad ta poní riba mi. Realmente, ai di mi si mi no declará e bon nobo!” Cristiannan berdadero tin un mensahe cu ta nificá bida, pues, con nan posiblemente por ten’é pa nan so? E principio mes di culpabilidad di sanger dor di keda sin duna un spiertamentu den tempu di peliger ta un motibu urgente pa predicá e bon nobo.​—⁠1 Corintio 9:16; Ezekiel 3:​17-21.

²⁰ Con anto, e bon nobo ta ser predicá? Kico ta e clave p’e éxito dje Testigonan? Cua rasgonan di nan ministerio i organisacion ta yuda identificá nan como e religion berdadero? Nos siguiente artículo lo contestá e preguntanan ei.

[Footnotes]

[Study Questions]

1, 2. Kico ta un marca registrá dje Testigonan, i pakico?

3, 4. Con cleronan di cristiandad hopi biaha ta ser pintá den medionan di comunicacion?

5. Pakico cleronan di cristiandad no a resultá di ta “e esclabo fiel i discreto”?

6. Ki sucesonan mester tuma lugá pronto?

7. Pakico Dios kier p’e bon nobo ser predicá promé?

8. Con e predicacion dje bon nobo ta un manifestacion di Dios su amor? (1 Juan 4:​7-16)

9. Pakico Jehova no a usa cristiandad su religionnan poderoso pa predicá e bon nobo?

10. Ken Dios a scoge pa haci e predicacion?

11. Ki echonan tocante e Testigonan a haci nan único?

12. Pakico e Testigonan tabatin éxito?

13. (a) Pakico e Testigonan ta sirbi boluntariamente i sin pago? (b) Con Jehova a contestá e mofa di Satanas?

14. Kico ta “e sabiduria scondí” na cua Pablo ta referí?

15. Con nos sa cu Jehova ta un Dios di husticia? (Deuteronomio 32:4; Salmo 33:⁠5)

16. Con nos por ilustrá cu husticia ta rekerí pa duna un spiertamentu promé?

17. Con Jehova a manifestá husticia den un manera special desde 1919?

18. (a) Ki evidencia tin dje actividad di Testigonan den áreanan remoto? (b) Ki otro ehempelnan bo sa di dje?

19, 20. (a) Kico ta impulsá Testigonan di Jehova pa sigui predicá? (b) Cua preguntanan lo ser contestá siguientemente?

[Caption on page 14]

Bo Ta Corda?

◻ Kico ta distinguí Testigonan di Jehova for dje cleronan?

◻ Con predicacion ta reflehá Dios su amor, poder i husticia?

◻ Con e predicacion dje bon nobo ta reflehá Dios su husticia?

◻ Kico ta impulsá e Testigonan di Jehova pa sigui den nan ministerio?

[Caption on page 15]

Sin importá con isolá hende por ta, Testigonan di Jehova kier alcansá nan