Ciencia, Religion, I E Buscamento Pe Berdad

“E echo cu hopi religion falso a aumenta . . . tabatin un efecto riba mi.”​—⁠Charles Darwin

DURANTE e principio di siglo 19, ciencia i religion a disfruta di un relacion armonioso. Segun e buki Darwin: Before and After, “Asta den publicacion científico, autor no a vacila ningun tiki den nan mencion di Dios na moda cu tabata claramente natural i sincero.”

E buki di Darwin Origen di raza a contribui na cambiamento di esei. Ciencia i evolucion a yega di forma un enlace cu a pasa por halto dje necesidad di religion​—⁠i di Dios. Segun Sir Julian Huxley, “Den e pensamento di evolucionista, un creador divino no ta necesario ni apropiado.”

Awe, e teoría di evolucion ta wordu declará di ser un fundeshi esencial di ciencia. Fred Hoyle a identifica un motibo clave pa tal relacion: “Hende científico ortodoxo ta mas interesá pa prevení un bolbimento ne punto di bista extremo di religion dje pasado en bez di ser interesá den un buscamento dje berdad den e futuro.” Cua sorto di punto di bista extremo a haci religion tanto repugnante pa hende científico?

Religion ta duna creacion un mal nomber

Den un supuesto esfuerzo pa apoya e Bijbel, “creacionista”​—⁠principalmente den alianza cu protestante fundamentalista​—⁠ta insisti cu e tera i e universo tin menos cu 10.000 aña di edad. Tal punto di bista extremo ta invita e mofa di geólogo, astrónomo, i físico, pasobra e ta contradici loke nan a descubri.

Pero, kico e Bijbel realmente ta bisa? “Na principio Dios a crea cielo i tera.” (Génesis 1:⁠1) Esei no ta indica cuanto tempo esei a encerra. E “promé dia” di creacion ni sikiera ta ser mencioná te cu Génesis 1:​3-5. “Cielo i tera” a existi caba ora e “promé dia” a cuminza. P’sei, cielo i tera por ta miles di miyones di aña di edad, manera hende científico ta bisa? Esei por wel tá. E Bijbel simplemente no ta indica e tempo cu esei a cubri.

Un otro extremo di religion ta e manera cu algun religion ta interpreta e seis ‘dia’ di creacion. Algun hende religioso fundamentalista ta insisti cu tal dia ta literal, limitando e creacion terrenal na un periodo di 144 ora. Esei ta provoca duda den hende científico, pasobra nan ta kere cu tal declaracion ta na conflicto cu descubrimento científico claro.

Sin embargo, interpretacion fundamentalista di e Bijbel i no e Bijbel mes ta loke no ta di acuerdo cu ciencia. E Bijbel no ta bisa cu cada “dia” di creacion tabatin 24 ora di duracion; realmente, e ta inclui tur ‘dia’ asina den un dia di hopi mas duracion, e “dia cu Jehova Dios a traha tera i cielo,” mustrando cu tur ‘dia’ bíblico no a dura 24 ora so. (Génesis 2:⁠4) Algun por a dura pa miles di aña.a

Asina, creacionista i fundamentalista a duna e idea di creacion un mal nomber. Nan siñanza tocante edad dje universo i e duracion di ‘dia’ di creacion no ta di acuerdo cu ni ciencia razonabel ni e Bijbel. Sin embargo, tin otro siñanza extremo també cu a haci religion repugnante pa hende científico.

Abuso di poder

Durante tur e pasado, religion a keda responsabel pa hopi inhusticia. Por ehempel, durante época mediano, e doctrina di creacion tabata trocí pa hustifica e apoyo dje iglesia duná na dictadura europeo. Nan a siña cu decreto divino a pone hende den nan puesto, ricu of pober. E buki Intelligent Universe ta splica: “Yiu mas hoven di hende ricu tabata bisá cu e ‘sistema di Dios’ tabata pa nan recibi mashá poco of nada dje propiedad dje famía, i peón tabata urgí constantemente pa keda contentu cu ‘e puesto cu Dios a gusta destiná pa nan.’ ”

No ta straño cu hopi hende tin miedu di bolbe na “extremo religioso di pasado”! En bez di satisface e necesidad spiritual di hende, hopi bez religion ta probecha di dje. (Ezekiel 34:⁠2) E revista India Today a comenta den un artículo dje redactor: “Cu e clase di fama cu el a establece durante e siglonan, ta straño cu religion ta retene algun credibilidad mes. . . . Den e nomber dje Creador Supremo, . . . ser humano a comete atrocidad di mas abominable contra nan próhimo.”

E historia spantoso di religion falso no tabatin un influencia di poco importancia riba e pensamento di Darwin. El a skirbi: “Gradualmente mi a yega di no kere den cristianismo como un revelacion divino. E echo cu hopi religion falso a plama riba sector grandi di mundo manera candela den mondi secu tabatin algun efecto riba mi.”

E triunfo di e religion berdadero

Hipocresía religioso no ta nobo den e mundo aki. Jesús a bisa lider religioso ambicioso pa poder di su tempo: “Boso ta parce bon hende pafó​—⁠pero padén boso ta yen di pretension i maldad.”​—⁠Mateo 23:​28, Phillips.

Sin embargo, berdadero cristianismo “no ta parti di mundo.” (Juan 17:16) Sigidor di dje no ta participa den religion i político corrupto; ni filosofía cu ta nenga existencia dje Creador no ta gáñanan. Apóstol Pablo a skirbi: “E sabiduría di mundo ta bobedad pa cu Dios.”​—⁠1 Corintio 3:⁠19.

Sin embargo, esei no kier men cu cristian berdadero ta bobo científicamente. Al contrario, sigidor di e religion berdadero ta hopi interesá den ciencia. Isaías, e profeta di antigua, tabata bisá: “Hiza bo wowo na halto i mira. Ken a crea e cosnan ei?” (Isaías 40:26) Di igual manera, pa Job comprende e Creador mihor, Dios a invité pa investiga e maraviya di naturaleza i dje universo.​—⁠Job, capítulo 38-41.

Sí, hende cu ta kere den un Creador ta mira e creacion cu asombro respetuoso. (Salmo 139:14) Además, nan ta confia loke e Creador, Jehova Dios, ta bisa tocante un speranza maraviyoso pe futuro. (Revelacion 21:​1-4) Pa medio di un estudio dje Bijbel, miyones di hende ta siña cu ni e origen di hende ni su futuro no ta depende di casualidad sin inteligencia. Jehova Dios tabatin un propósito den su creacion di hende, i tal propósito lo ser cumplí​—⁠pe bendicion di tur hende obediente. Nos ta invitábo pa investiga e asunto pa bo mes.

[Footnotes]

[Box on page 6]

IGNORANTE DJE EVIDENCIA?

“ASTA Testigo di Jehova a siña basta hopi tocante biología,” segun abogado Norman Macbeth den su buki na 1971 na inglés ­Darwin huzgá di nobo​—⁠un peticion na sano huicio. Despues di a leza un artículo den ­Awake! tocante e asunto di evolucion, Macbeth a bisa: “Mi a keda asombrá di descubri cu el a contene algun crítica perceptivo di darwinismo.” Riparando e investigacion extensivo i referencia huicioso di autoridadnan riba e asunto, e autor a concluí: “No ta ­correcto mas pa Simpson bisa: ‘Casi tur hende . . . cu no ta kere den [evolucion] ta claramente ­ignorante dje evidencia cien­tífico.’ ”

[Caption on page 7]

Dios no a laga e futuro di humanidad depende di casualidad sin inteligencia