Feliz Den Un Berdadero Hermandad Mundial

SEGUN E RELATO DI WILLIE DAVIS

Na 1934 e mundo tabata den e gara di e gran depresion económico, i América tabata luchando penosamente den un confusion económico. Dilanti dje oficina di onderstand den Cleveland, Ohío, tabatin un lucha entre un poliz i un miembro dje partido comunista. E poliz a tira mata e comunista i un mirón, mi abuela, Vinnie Williams.

COMUNISTA a purba di haci e dos morto bira un incidente racial, siendo cu mi abuela tabata scur i e poliz tabata blancu. Nan a parti pamfleta cu título tal como “Poliz racista di Cleveland” i “Vinga e matamento.” Comunista a haci arreglo i paga pe entierro di mi abuela. Mi tin un portret di cargador dje caha​—⁠tur tabata blancu i miembro dje partido comunista. Cada cargador tabatin nan moquete cerá na halto na moda cu a bira símbolo cu e Poder Negro a adopta despues.

Ora mi abuela a muri, mi tabata den e matriz di su yiu, i cuater luna despues mi a nace. Mi a lanta gago. Mi no por a papia sin papia na moda gago, di manera cu mi educacion den scol na principio a inclui terapia pa papiamento.

Mi mayornan a separa ora mi tabatin cinco aña di edad, i nos mama a cria mi ruman muher i mi. Ora mi tabatin diez aña di edad, mi a cuminza entrega comestibles despues di scol pa yuda paga gasto di famía. Dos aña despues mi a cuminza traha tanto promé como despues di scol, i asina a bira ganador principal di pan dje famía. Ora Mama tabata hospitalizá i tabatin mester di un serie di operacion, mi a kita for di scol i a cuminza traha tempo completo.

Introduccion den un hermandad

Na 1944 un Testigo di Jehova a laga e buki na inglés “E berdad lo haci boso liber” cu esposa di mi primo, i mi a enbolbémi den un estudio bíblico cu nan a cuminza cuné. Ne mesun aña mi a cuminza asisti ne Scol di Ministerio Teocrático den e congregacion di Eastside. E instructor dje scol, Albert Cradock, tabata gago mescos cu mi, pero el a siña dominé. Cuanto animacion el a dunámi!

Nos barrio tabata principalmente italiano, polaco, húngaro, i hudío, i e congregacion a consisti di hende asina i di otro grupo racial. Esposa di mi primo i mi tabata dje promé afro-americano pa asociá cu e congregacion totalmente blancu, pero e Testigonan nunca a haci discriminacion racial pa cu nos. Realmente, nan a invitámi tur ora na nan cas pa come.

Na 1956, mi a bai biba den e parti di zuid di América pa sirbi unda tabatin mas necesidad pa evangelizador. Ora mi a bai nort atrobé durante e tempo di calor pa asisti na un asamblea di districto, hopi ruman di Cleveland a bishitámi i a expresa interés intenso den mi actividad. Nan interés a siñámi e les vital: Semper no sigi “vigilando cu interés personal boso mes asuntonan so, sino també cu interés personal asunto dje otronan.”​—⁠Filipense 2:⁠4.

Expansion dje ministerio di tempo completo

Despues di a sirbi pa tres aña den e trabao di predica di tempo completo como pionero, den November di 1959, mi tabata invitá pa traha den Betel di Brooklyn, e centro mundial di Testigo di Jehova na New York. Mi tabata asigná ne departamento di despachá literatura. E superintendente dje departamento tabata Klaus Jensen, i mi compañé di camber tabata William Hannan, dos homber blancu cu a bira tata spiritual pa mi. Cada un a sirbi casi 40 aña den Betel ne tempo cu mi a yega.

Rond di principio di 1960, tabatin rond di 600 miembro dje famía di Betel, i rond di 20 tabata afro-americano. Ne tempo ei, e lucha racial a cuminza herbe na América, i relacion racial tabata bao di presion. No obstante, e Bijbel ta siña cu “Dios no ta haci distincion,” ni nos tampoco. (Echo 10:​34, 35) Consideracion spiritual cu nos tabatin na desayuno den Betel tur maínta a sirbi pa fortalece nos determinacion di acepta e punto di bista di Dios tocante tal asunto.​—⁠Salmo 19:⁠7.

Ora mi tabata sirbi den Betel na Brooklyn, mi a conoce Lois Ruffin, un pionero di Richmond, Virginia, i nos a casa na 1964. Nos determinacion tabata pa permanece den e ministerio di tempo completo, di manera cu despues di nos casamento nos a bolbe ne parti di zuid di América. Na principio nos a sirbi como pionero special, anto na 1965, mi tabata invitá pa drenta den e trabao di superintendente di circuito. Pe sigiente diez aña, nos a bishita congregacion den estado di Kentucky, Texas, Louisiana, Alabama, Georgia, North Carolina, i Mississipi.

Un prueba di nos hermandad

Esei tabata un tempo di cambio grandi. Promé cu nos a bai biba den e Zuid, tabatin separacion di raza. Ley a prohibi hende pretu di asisti ne mesun scol, come den e mesun restaurant, drumi den e mesun hotel, cumpra den e mesun tienda, of sikiera bebe awa dje mesun fontein cu hende blancu. Pero na 1964 e congreso americano a decreta e Acto di Derecho Civil cu a prohibi discriminacion den lugar público, incluyendo transportacion. Pues, no tabatin base legal mas pa separacion racial.

P’sei, e cuestion tabata, Nos rumanan homber i muher den congregacion di hende pretu i hende blancu lo integrá i mustra amor i cariño un pa otro, of presion dje comunidad i sintimento profundo dje pasado lo hácinan resisti contra integracion? E mandamento bíblico tabata un desafío: “Den amor fraternal tene tierno cariño un pa otro. Hiba delantera mustrando onor un pa otro.”​—⁠Romano 12:⁠10.

Pa tanto tempo cu hende por corda, e punto di bista prevalente, specialmente den e parti di zuid di América, tabata cu hende pretu ta inferior. Casi tur aspecto dje arreglo social, incluyendo religion, a hinca profundamente tal punto di bista den mente di hende. Pues, no tabata fácil pa algun hende blancu considera hende pretu como igual cu nan. Realmente, esei tabata un tempo di prueba pa nos hermandad​—⁠tanto pa hende pretu como pa hende blancu.

Felizmente, en general, tabatin un reaccion maraviyoso ne integracion di tur congregacion. Siglonan di indoctrinacion di punto di bista di superioridad racial no tabata eliminá lihé. Sin embargo, ora integracion a cuminza, nos rumanan a acepté mashá bon, e mayoría di locual a alegra ora nan por a reuni hunto.

Interesantemente, hopi bez asta hende cu no ta Testigo di Jehova a coopera cu e integracion di nos congregacionan. Por ehempel, den Lanett, Alabama, beciña cerca e Salón di Reino tabata puntrá si nan tabata contra hende pretu cu a asisti na reunion. Un señora blancu di mayor edad a acepta e man dje ruman pretu i a bisa: “Bonbiní na nos becindario i adora bo Dios na bo gusto!”

Fiel rumanan den Etiopia

Na 1974 nos a keda encantá pa recibi cinco luna i mei di entrenamento como misionero den e Scol Bíblico di Galad di Watchtower den e stad di New York. Anto nos tabata asigná ne país africano di Etiopia. E emperador, Haile Selassie, a caba di ser kitá i poní bao di arresto di cas. Siendo cu nos trabao di predica tabata prohibí, nos a apreciá e relacion caloroso di nos hermandad cristian.

Nos a biba i a sirbi cu hopi ruman cu despues tabata encarcelá pa motibo di nan pegamento ne adoracion berdadero. Algun amigo stimá di nos tabata asta ehecutá. Adera Teshome tabata e otro anciano compañé di mi den un congregacion den Addis Ababa, e capital di Etiopia.* Despues di tres aña den prisón, e tabata ehecutá. Naturalmente, su esposa a keda profundamente tristu. Tabata ki un placer hopi aña despues pa miré manifestando gozo sirbiendo como pionero!

Worku Abebe, un otro ruman fiel, tabata sentenciá na morto ocho bez.* Pero e nunca a keda intimidá! E último bez cu mi a miré, el a mustrámi su orea cu wardador di prisón a machica cu cabo di rifle. Na chanza el a bisa cu el a haya cabo di rifle pa desayuno, almuerzo, i cena, por lo menos tres bez pa dia. Aunque el a muri despues, e rumanan ta cordé ainda cu amor.

Hailu Yemiru ta un otro ruman cu mi ta corda cu amor.a El a mustra amor ehemplar pa su esposa. Su esposa tabata arrestá, pero siendo cu e tabata na estado pa duna luz pronto, Hailu a pidi autoridad di prisón si e por tuma su lugar den prisón. Despues, ora el a nenga di compromete su fe, nan a maté.​—⁠Juan 15:​12, 13; Efesio 5:⁠28.

Pa motibo dje situacion político empeorando den Etiopia, nos a bai biba den Kenya na 1976. Nos a sirbi pa siete aña como superintendente biahero, bishitando e rumanan den hopi país di Oost Africa​—⁠incluyendo Kenya, Etiopia, Sudan, Isla Seychelles, Uganda, i Tanzanía. També mi a haci biahe te na Burundi i Ruanda na varios ocasion como parti di un delegacion pa papia cu funcionario tocante registracion legal di nos trabao den tal país.

Tabata un placer pa bolbe na Etiopia den Januari di 1992 pa asisti ne promé asamblea di districto cu nos a celebra ei despues dje kitamento dje prohibicion di nos trabao. Hopi dje mas cu 7.000 hende presente no a conoce otro, siendo cu na antes e rumanan a reuni solamente den grupo chikito. Cada dia dje asamblea, e mayoría tabata presente dos ora promé cu e programa a cuminza i a keda te laat anochi, gozando nos hermandad amoroso.

E derota di tribalismo

Pa siglonan tribalismo tabatin rienda liber den Africa. Por ehempel, den Burundi i Ruanda, grupo racial principal, tribu di hutu i tutsi, a odia otro pa mashá tempo. Desde cu e dos país a gana independencia for di Bélgica na 1962, miembro dje dos grupo racial a mata otro periódicamente na miles. P’sei, tabata ki un gozo pa mira miembro dje dos grupo racial cu a bira Testigo di Jehova traha hunto den paz! E berdadero amor cu nan ta manifesta un pa otro a anima hopi otro hende pa scucha e berdad bíblico.

Di igual manera, grupo racial den Kenya tabatin dificultad cu otro. Ki un contraste tin den e hermandad cristian dje pueblo di Jehova Dios den Kenya! Bo por mira hende di diferente grupo racial adorando unidamente den Salón di Reino. Tabata mi placer pa mira hopi hende asina kita odio di nan tribu i manifesta berdadero amor pa nan rumanan homber i muher di otro grupo racial.

Feliz en cuanto nos hermandad

Ora mi ta repasa den mi memoria e mas cu 50 aña di asociacion cu e organizacion di Dios, gratitud pa Jehova Dios i pa su Yiu, Jesucristo, ta yena mi curazón. Ta berdaderamente asombroso pa mira loke nan ta efectua riba tera! No, e situacion no tabata semper perfecto den e pueblo di Dios, ni nan no ta perfecto awe. Pero, nos no por spera pa cientos di aña di siñanza racista dje mundo di Satanás ser eliminá di un dia pa otro. En todo caso, nos ta imperfecto ainda.​—⁠Salmo 51:⁠5.

Ora mi ta compara e organizacion di Jehova Dios cu e mundo, mi curazón ta hincha cu aprecio pe berdadero hermandad mundial cu nos tin. Ainda mi ta corda cu amor e rumanan den Cleveland, tur blancu, cu a criámi den e berdad. I ora mi a mira nos rumanan den e zuid di América, tanto blancu como pretu, reemplaza nan sintimento di discriminacion cu amor fraternal, mi curazón ta alegra. Anto, despues di a bai Africa i mira personalmente con e Palabra di Jehova Dios por elimina odio entre tribu, esei a hacími aprecia asta mas nos hermandad mundial.

En berdad, rey David di antigua a expresa esei bon ora el a bisa: “Mira! Ta ki bon i agradabel pa rumanan biba hunto den unidad!”​—⁠Salmo 133:⁠1.

[Footnotes]

[Caption on page 23]

Entierro di mi abuela

[Caption on page 24]

Testigo di Jehova dje tribu tutsi i hutu ta traha hunto den paz

[Caption on page 25]

Ami cu mi esposa, Lois