Informe Di Proclamador Di Reino

“Opone e Diabel, i lo e hui di boso”

DEN e promé siglo, un grupo di sigidor di “arte mágica” den Efeso a acepta e mensahe cristian, kimando públicamente nan buki di mágica. (Echo 19:19) E balor dje bukinan tabata 50.000 pida di plata. Si e relato bíblico kier men e denario, placa romano di plata, esei por a alcanza e balor di por lo menos $37.000!

Awe tin hopi hende cu na un tempo tabata doño di literatura tratando cu e oculto cu a manifesta un determinacion similar cu esei di Efeso di antigua. Considera e sigiente experencia di Canadá.

Rond di cinco aña pasá, un Testigo di Jehova tabata predica di cas pa cas ora na un cas un señora yamá Nora literalmente a halé den e cas. Durante hopi aña largu di su buscamento spiritual, Nora a coleccioná cientos di buki religioso i spiritista, pero e tabata kier sa loke e Bijbel ta bisa tocante e speranza pa hende morto. E Testigo a ofrecele e tratado Ki speranza tin pa stimánan morto? Pregunta di Nora tabata contestá, i el a acepta abonament pe dos revista Toren di Vigilancia i Despertad!

Despues el a cambia cas i a perde contacto cu Testigo di Jehova. Sin embargo, el a sigi recibi e dos revista pa post na su direccion nobo. També, el a encargá algun publicacion bíblico cu e revistanan a mencioná. Despues di poco tempo, un Testigo di Jehova a yega na su porta. Nora a recibié cu gusto i a keda impresioná di cu e Testigo a acudi directamente ne Bijbel pa contesta pregunta i Nora a invité pa bolbe pa mas consideracion.

Sin embargo, e Testigo a haya cu tabata difícil pa haci contacto cu Nora atrobé. El a haci bishita bez tras bez na diferente ora di dia i na diferente tempo durante e siman pero sin bon éxito. Pero, cu tempo su persistencia tabata recompensá i el a haya bon resultado. El a cuminza un estudio bíblico regular, locual bao di insistencia di Nora tabata celebrá tres bez pa siman. Loke el a siña a motivé pa papia cu amigo i miembro di famía, locual a resulta den tres di nan pidiendo estudio bíblico cu Testigo di Jehova.

Pa medio di su estudio Nora a yega di comprende cu tin hopi religion falso i profeta falso pero cu tin un solo camina cu ta hiba na bida. Pa hopi aña e tabata busca contesta pa su preguntanan den religion falso, pero despues di a siña loke e Bijbel ta bisa tocante demoño, el a reacciona mescos cu efesio di antigua mencioná den Echo 19:19. El a haci su biblioteca limpi i, durante e transcurso di varios dia, el a destrui mas cu mil buki tratando cu e oculto i siñanza di religion falso. Entre publicacion cu el a destrui, tabatin un huego di cuater buki di balor di mas cu $800!

Aparentemente desagradá cu e accion di Nora, demoño a molestié pa rond di dos siman. Pero, mal spiritu asina no por a kité di sigi su estudio bíblico i su asociacion cu e organizacion di Jehova Dios di dia djawe.

Experencia asina ta ilustra bon e berdad dje palabra bíblico: “Pues, somete boso na Dios; pero opone e Diabel, i lo e hui di boso.”​—⁠Santiago 4:⁠7.