Bo Sa Pordoná?

BILL i su yu muhé Lisa, di 16 aña di edad, no tabata sali bon cu otro. Desacuerdonan menor entre nan frecuentemente a desaroyá den conflictonan di gritamentu. Finalmente, e tension a escalá te n’e punto unda Lisa a ser pidí p’e bandoná cas.a

Despues di tempu, Lisa a bin reconocé cu e tabatin falta i a busca e pordon di su tata. Pero en bes di pasa por haltu di Lisa su fayonan di pasado, su tata amargá a rechasá su esfuersonan pa haci pas. Imaginá bo! E no tabata dispuesto pa extendé misericordia na su mes yu muhé!

Siglonan pasá un homber sin culpa a ser condená na morto pa un crímen cu e no a cometé. Testigonan a lanta falsu testimonio i oficialnan político a nenga deliberadamente di administrá husticia. E homber inocente ei tabata Jesucristo. Djis promé cu el a muri, el a pidi Dios den oracion: “Tata, pordoná nan, pasobra nan no sa kico nan ta haciendo.”​—⁠Lucas 23:34.

Jesus a pordoná libremente, di curason, i su siguidornan a ser instá pa imit’é den esaki. (Efesio 4:32) Sin embargo, mescos cu Bill, hopi hende sin piedad no ta dispuesto pa pordoná. Con bon bo ta den esaki? Bo ta dispuesto pa pordoná otronan ora nan peca contra bo? I kico di picá serio? Mester pordoná esakinan tambe?

Pordoná Ta un Desafio

Pordoná hende no ta semper fácil. I den e tempu crítico aki, relacionnan humano ta birando cada bes mas problemático. Bida di famia en particular hopi biaha ta cargá cu tension i presion. Apostel cristian Pablo hopi tempu pasá a declará cu tal condicionnan lo prevalecé den “e último dianan.” El a bisa: “Hende lo ta stimador di nan mes, stimador di placa, presumido, arogante, . . . sin amor pa bondad, traicionero, cabesura, hinchá cu orguyo.”​—⁠2 Timoteo 3:​1-4.

P’esei, inevitablemente, nos tur ta enfrentá presionnan externo cu ta test nos abilidad di pordoná otronan. Huntu cu esei, nos ta lucha tambe contra forsanan interno. Pablo a lamentá: “E bon cu mi ta deseá mi no ta haci, pero e malu cu mi no ta deseá ta loke mi ta practicá. Awor, si loke mi no ta deseá ta loke mi ta haci, esun cu ta obra esei ya no ta ami mas, sino e picá cu ta biba den mi.” (Romano 7:​19, 20) Como resultado, hopi di nos no sa pordoná mes tantu cu nos lo a deseá. Bon mirá, imperfeccion i picá heredá ta ehercé un influencia poderoso riba nos tur, tin biaha hortando nos di compasion pa nos próhimo.

Ora un señora a ser animá pa pordoná un otro pa un ofensa chikitu, el a respondé: “Ningun hende ta bal e esfuerso cu ta exigí pa pordoná.” Na promé bista un comentario asina por parce friu, sin heful insensibel, asta sarcástico. Sin embargo, ora nos wak’e mas profundamente, nos ta mira cu e ta revelá e frustracion cu hopi hende ta sinti ora nan ta enfrentá un mundu cu nan ta considerá como egoista, desinteresá i hostil. Un homber a bisa: “Hende ta probechá di bo ora bo pordoná nan. Ta manera cu nan ta trapa riba bo.”

Nada straño, anto, cu ta difícil pa cultivá un actitud di pordoná den e último dianan aki. Tog, Bijbel ta animá nos pa pordoná bondadosamente. (Compará cu 2 Corintio 2:⁠7.) Pakico nos mester sa pordoná?

[Footnotes]