Pregunta Di Lector

Den e tempu económico difícil aki, mas i mas individuo i compania ta recurí na bancarota. Ta bíblicamente apropiado pa un cristian pidi bancarota?

E contesta rib’e pregunta aki ta ilustrá aptamente con e Palabra di Dios ta ofrecé nos guia práctico riba asuntunan cu por ta claramente moderno. Hopi pais tin ley cu ta regulá bancarota. E leynan ta varia di pais pa pais i no ta na e congregacion cristian pa ofrecé conseho hurídico riba esaki. Pero laga nos haña un idea general dje provision hurídico di bancarota.

Un motibu pakico gobiernunan ta permití individuonan i negoshinan declará nan mes bancarota ta cu e ta ofrecé esnan cu ta fia placa of extendé crédito (creditornan) un midí di proteccion contra hende of negoshi cu ta fia placa of haci debe (debedornan) sin cu nan ta paga loke nan debe. Pa creditornan por parce cu e único recurso ta di apelá na corte pa declará e debedor bancarota p’e posesionnan dje debedor por ser distribuí e ora ei como pago parcial dje debe.

Un otro manera cu bancarota ta funcioná ta como un proteccion pa debedornan cu onestamente no por satisfacé nan creditornan. E debedor por ser permití pa haci peticion pa bancarota, riba cua su creditornan por tuma algun di su posesionnan. Tog, e ley por permiti’é retené su cas of cierto posesion mínimo i e ora ei sigui biba liber dje menasa continuo di pérdida of beslag riba su cosnan dor di su antiguo creditornan.

Ta bisto, anto, cu e leynan aki ta intencioná pa ofrecé un midí di proteccion na ámbos banda partido den transaccionnan financiero of comercial. Pero laga nos tuma nota di ki conseho probechoso Bijbel ta ofrecé.

Lo ta difícil pa un hende lesa Bijbel di kaft pa kaft sin sinti cu e no ta animá hacimentu di debe. Nos ta haña spiertamentunan manera Proverbio 22:7: “E ricu ta esun cu ta goberná riba esnan di poco recurso, i e fiador ta sirbidor dje homber cu ta duna e préstamo.”

Corda, tambe, Jesus su ilustracion na Mateo 18:​23-34 enbolbiendo un esclabo kende tabatin un debe masha grandi. “Su doño a ordená pa bende e mes i su esposa i su yunan i tur loke e tabatin,” pero despues e doño, un rey, a suavisá e asuntu i a mustra misericordia. Ora e esclabo ei mas despues a resultá inmisericordioso, e rey a ordená pa ‘entregu’é n’e carceleronan, te ora e paga tur loke e tabata debe.’ Claramente, e mihor curso, e curso recomendá, ta pa evitá fiamentu di placa.

Dios su sirbidornan den Israel di antigua tabatin tratonan comercial, i algun biaha dunamentu di préstamo i fiamentu di placa a tuma lugá. Kico Jehova a instruí nan pa haci? Si un persona kier a fia placa pa drenta den of expandé un negoshi, tabata legal i normal pa un hebreo cobra interes. Sin embargo, Dios a insta su pueblo pa ta inegoista ora di duna préstamo na un israelita den necesidad; nan no mester a saca ganashi for di un situacion adverso cobrando interes. (Éxodo 22:25) Deuteronomio 15:​7, 8 ta bisa: “Den caso cu algun di bo rumannan bira pober . . . , bo mester habri bo man generosamente p’e i sin falta fi’é a cambio di un borg cuantu cu e mester, di loke e ta den necesidad di dje.”

Bondad similar of consideracion a ser reflehá den e regulacionnan cu a stipulá cu creditornan no por a apoderá dje necesidadnan di bida di un debedor, manera e famia su piedra di mulina of un bistí necesario p’e persona mantené su mes cayente anochi.​—⁠Deuteronomio 24:​6, 10-13; Ezekiel 18:​5-9.

Naturalmente, no ta tur hudiu a aceptá i aplicá e spiritu dje leynan amoroso aki for di nan gran Hues i Dunador-di-statuto. (Isaías 33:22) Algun hudiu golos a trata nan rumannan masha severo. Awe, tambe, algun creditor por ta severo i irazonabel den nan exigencianan, asta pa cu un cristian sincero kende n’e momento ei no por a haci un pago debí cu el a experenciá algun sosodimentu imprevisto. (Eclesiastés 9:11) Dor di nan presion inflexibel i exigente, creditornan mundano por forsa un debedor asina den un situacion unda e ta sinti cu e mester protehá su mes. Con? Den algun caso e único cos cu creditornan lo reconocé ta e paso legal di bancarota. Pues un cristian, kende no tabata golos of negligente tocante su debenan, por recurí na pidimentu di bancarota.

Sin embargo, nos mester ta conciente dje otro banda dje asuntu. Un cristian por ta den debe debí cu e simplemente no a usa dominio propio den kico of cuantu el a gasta of pasobra e no a usa prevision razonabel den su decisionnan comercial. E mester ta simplemente indiferente tocante e debe i busca alivio lihé mediante bancarota, perhudicando asina otronan pa motibu di su poco dicernimentu? Bijbel no ta aprobá tal iresponsabilidad financiero. E ta insta e sirbidor di Dios pa laga su sí nificá sí. (Mateo 5:37) Corda, tambe, Jesus su comentario tocante calculacion dje gastunan promé cu cuminsá edificá un toren. (Lucas 14:​28-30) Na armonia cu esei, un cristian mester considerá cu cuidou e posibel resultadonan indeseabel promé cu e haci un debe financiero. Unabes cu e asumí e debe, e mester sinti su responsabilidad di paga bek individuonan of companianan cu e debe placa. Si hopi otro hende mira un cristian como un persona iresponsabel of inconfiabel, lo e por a mancha e bon reputacion cu el a lucha p’e i asina no tin mas un testimonio excelente for di esnan di pafó.​—⁠1 Timoteo 3:​2, 7.

Corda loke Salmo 15:4 ta bisa nos tocante e clase di persona cu Jehova ta yama bon biní. Nos ta lesa: “El [esun cu Dios ta aprobá] a hura pa loke ta malu pa su mes, i tog e no ta cambi’é.” Sí, Dios ta spera pa cristiannan trata nan creditornan manera nan lo kier ser tratá.​—⁠Mateo 7:⁠12.

En resúmen, anto, Bijbel no ta descartá e posibilidad cu den un situacion extremo, un cristian por haci uso dje proteccion cu César su leynan di bancarota ta ofrecé. Sin embargo, cristiannan mester ta excepcional pa loke ta onestidad i confiabilidad. Pues, nan mester ta ehemplar den nan deseo sincero pa cumpli cu nan obligacionnan financiero.